قدري المتعب

بارت 2

الجزء الثاني

طلعت من الحمام سمعت صوت الباب
اسيل :كوم حسون شوف الباب
حسين :معليه مدد اني من يمج افتحيها مراح ياكلوج
اسيل :امداك حبيبي
طلعت من باب المطبخ
عاليمنى الحديقه وكبالي الباب مو كلش عاليه وبيها زخرفه يعني اذا احد طويل يبين منها ،دا اتمشى وانتبهت هاي عمتي و هذا المصخم ،شافوني لا الحك بعد ارجع ولا بيه افتح الباب ومنا اني كفشتي طالعه من الحمام ووجهي احمر صارلي ساعه اجلف بي يلا بعد احسن خل يخترع مني
فتحت الباب
ام اثير :هلا يمه شلونج
اسيل :هلا عمة الحمد لله وبوستها واتلكيتها فوتي عمه فوتي جوه اهلي بالصاله
فاتت عمتي وضل وراها اثير يمشي بطيء
اسيل :هلاو اثير تفضل ،بداخلي ما بالعته ابد هذا شلون يباوع
اثير :هلا بيج
اسيل : دخل يتمشى بهدوء واني واكفه بمكاني سمعته يحجي بهمس
اثير :هو ياهو اليطلع من الحمام هيج ينكرط
اسيل :اني سمعته صرت ارجف من الاعصاب وصدك فار دمي لا اكدر ارزلة استحي من ابويه اذا سمع ولا اكدر الزم اعصابي انوب هو فات اني ركعت الباب حسيت جاي اخلي كل اعصابي بيها وطبيت للمطبخ اكمز

اجتي ماما للمطبخ
ام اسيل :اسوله جيبي شي لبيت عمتج كيك عصاير.انتبهت عليه هاي شبيج شو ضايجه
اسيل:اني كلشي احجي لماما فكتلها ضايجه من ورا اثير بس يذبلي حجي
ام اسيل :معليج بي ماما هسه اذا نحجي هم عيب من عمتج خوش مره متستاهل نقهرها من ورا ابنها ماعده اخلاق

اسيل :اي هاي هي روحي يمهم بس امشط واجيب العصير
رحت مشطت واني لبسي اصلا زين مالبس شغلات ضيقة بس لبست شي بعد اعرض ولفيت شعري كبايه
طبعاً مواصفاتي مثل اكثر البنات العراقيات
مابيه شي مميز جسمي وسط شعري طوله لنص ضهري واسود كللش ،بيضه عيوني شويه كبار وهن احلى شي بوجهي وعندي خدود بسيطه حواجبي ماحفهن هن مرتبات دايما يكولولي تشبهين امج

امشطت ورحت صبيت عصير وكيك ورحت قدمتلهم من وصلت يم اثير صدك لعبانه نفسي منه ولا باوعت عليه اني اصلا ماطيقه وخاصه بعد تصرفاته هاي انطيته العصير وطلعت ماضليت بالصالة

ابو اسيل :تعالي بابا وين رايحه كعدي يمنه قابل هم عندج دراسه
اسيل :هاا لا بابا بس اروح اشوف المطبخ عندي شغلات اسويهن

هو ماعرف ششوف بالمطبخ بس يلا حجة وخلص
ضليت خانسه بالمطبخ حد ما راحو يلا طلعت كضيتها اراسل صديقاتي واسال عالنتيجه
وخلص اليوم بشكل اعتيادي

بهالفترة بابا جان موصي على بضاعه من المانيا اثاث مناك ومخلي بيها ثلث ارباع فلوسه ودخل وياه شريك واحد من التجار جان هذاك كلش انسان متعجرف حسب كلام بابا عنه بس ابويه اضطر يوافق عالشراكه وياه لان جانت الشغله كلش زينه وهو الي طلب من بابا يدخله وياه شريك رغم جانت نسبه بابا اكبر تقريبا ٧٠٪؜ وال٣٠٪؜ للرجال
واتشاركو وجان الشخص المسؤل عن نقل البظاعه وتسليم الاموال هو واحد من طرف بابا يعني يثق بي كلش وهو الي ينفذله كل شغله الي بالخارج