قدري المتعب

بارت 6

الجزء السادس

اسيل :طلب مني السيد ارفع راسي واشوف الولد ورفعته وجانت انصدمت من شفته
انسان يمكن اكدر اكول عنه كامل المواصفات كشكل ومبين ضخم ضخامته اذا اكون يمه اطلع نص منه بالحجم ،سماره الفاتح تسريحه شعره المنتظمة ومرتبة،اما ملامح وجهه فجان كلشي بيها حديه عيونه الحاده وحاجبه المرفوع يخوف مو بشر وجهه او فكه عريض مثل وجه المكسيكين ولحيه وشارب نفس المستوى
كل هذا كدرت اشخصه من نضره وحده اله ،ورجعت دنكت
وبقت نظره عيونه المخيفه والهالات السودا جوه عيونه كانما شخص مدمن او يمكن صارله سنين مريض .!

بدا السيد يحجي واردد وراه وهو هم نفس الشي ،ويردد من ورا خشمه كانما هو المجبور عالزواج مو اني
عقدنه وطلع السيد واستاذنت وطلعت رحت لماما

ام اسيل :الف مبروك يمه ان شاءالله زواجه الهنى والسعادة واشوفج اسعد وحده بهالدنيا يا عيون امج
اسيل :رحت لحضنها حضنتها قوي واشم بملابسها واحجي بداخلي ،الله يايمه هم راح الكي من هذا الحنان بعد اليوم ،من اتمرض لو اتاذه هم راح الكي من يخاف عليه ويضمني بحضنه ضليت فتره بحضنها الى ان حسيتها تعبت
كمت منها وصعدت لغرفتي غيرت ملابسي ونزلت مره ثاني شفت بابا يم الدرج جان يوم العقد يوم الثلاثاء

ابو اسيل :بابا ترا الخميس يجون ياخذوج
اسيل : بابا ليش هالسرعه قابل هو صدك عنده سفره
-والله بابا ماعرف هو الولد رايد هيج واني ماعترضت لان تدرين اوراق امج والجوازات خلصانه والسبت نسافر فكلت احسن شي تتزوجين قبل سفرتنا حتى حسين يروح بيت عمتج مينخاف عليه

-ماشي بابا مثل متكول
بقيت حايره ويا روحي زين شلون اني لا مجهزه روحي لا مشتريه شغلات للزواج خل اروح لماما تخابر عمتي صح خطيه تعبتها وياي هالاسبوع بس مالي غيرها امي وضعها ميسمح وخالاتي بعيدات

وصدك خابرتها وكالت باجر من الصبح يمج اني ،جانو منطين فلوس الذهب وهالسوالف لابويه وهو انطاهن الي حتى بالي مو يمه ولا سالته شكد بس جانن ورق ومبينات هواي
اخذتهن ورحت لغرفتي بلشت احضر شغلاتي وغراضي حطيتهن بجنط ،

كلما اصفن واتذكر شلون باوعلي بنضره مخيفه وافز من صفنتي
صارت الاربعاء وجتي عمتي
صعدت اني لبست وجهزت نفسي ورحت ويا عمتي للسوك طبعا عمتي لان عبالها زواجي مثل الكل فتريد تجهزني من كلشي
اخذتني لكي المحلات والمولات واشتريت كل احتياجاتي من عطور وملابس ومكياج وكلشي يخص العرايس حتى ملابس نوم كامت شتشوف تشمر عليه وما جنت اكدر ارفض حتى لا تشك وتكول ليش كالبه وجهج ،

واخر شي الفلوس البقت كالت عمتي اخذي بيهن كلهن ذهب كتلها عمه كيفج انتي المهم رحنا للصايغ وطلعلنا تخامه واختاريت منهن وحلقه هم عجبني حجل كلش نازك جان بي سيرين رفاع واحد منهن نازل منه خرز اسود حبيته واخذته ورجعنه للبيت تعبانين كلش جانت الدنيا مغرب حتى غدا تغدينه برا

لليل عمتي راحت وكملت اني لم غراضي بعد ما شوفتهن كلهن لماما وجهزت نفسي مثل اي عروس ومددت على فراشي واني بقلق
جنت كلش تعبانه وافكر شلون راح يكون هالشخص الي راح اعيش وياه ،عبالي راح ارتاح من اشوفه بس اتذكرت انو الشكل مو كلشي ولا الاعاقه الجسديه ممكن تكون مشكله ،لان اني هسه خايفه من داخله الي ماعرفه شنو

كعدت الصبح نزلت بسرعه يم اهلي احس اريد اشبع منهم قبل لا اروح شفت حسوني عالدرج ديصعدلي
حسين :اسوله ماما وبابا يردوج تعالي نتريك سوى اليوم اخريوم

اسيل :ها ولك صرت اسوله لان راح تخلص مني بعد ويامن تتناگر
حسين:لا والله اصلاً راح اشتاقلج كلش انتي اختي الوحيده وحتى من اتعارك وياج ترى احبج كلش
اسيل : واني احبك فدوه لگلبك بسته من خده ،دير بالك على ماما وبابا انت صرت رجال بعد ولا تخلي بابا يتعب ودايما روح لماما اسالها اذا محتاجه شي
حسين :اي اكيد لا تخافين ،يلا تعالي ننزل
اسيل :نزلت وحضرنه الريوك بالمطبخ وماما جبناها يمنه عالكرسي فدوه لگلبها ضحكتها تنطيني قوه وطاقه ايجابيه
اتريكنا والوكت يمشي بينا وصار ب١٠خابرو بابا حتى يجون ياخذوني
طلع بابا من المطبخ وراح يحجي وياه
وبعدين اجه وكال اتاجلت الطياره للعصر
اني عرفت بابا قنعهم حتى اضل للعصر لان اصلا ماكو موضوع طياره .

فرحت كلش وبديت اجهز الغده الهم وحضرتلهم اكثر من اكله وخليت بالبراد وبالفريز حتى يضل عدهم جاهز منا للسبت لان السبت يسافرون ،بعد الغدة صعدت سبحت وحضرت ملابسي ولبست وجهزت روحي

لبسي جان جداً عادي بنطرون جينز وفوكاه شي طويل بس مو كلش ولفيت شالي ومكياجي الخفيف .ونزلت يم ماما اريد اشبع منها
ضليت يمها نسولف وهي تنصحني شغلات عن الحياة الزوجيه وشلون اتعامل وياة واهم شي كالتلي الرجال من يكون عصبي لا تجادلي بشي حتى لو كان هو غلط ،انتظري الى ان يهدى وراح يتغير المجرى من صالحج وبعد هواي نصائح ،واني بس كاعده يمها واهز براسي .

انتهت النصايح وانتهت الافكار وكلشي جان يسود الموقف انتهى بمجرد سماع صوت السيارة .
عرفت اجه احد ياخذني ماعرف اذا هو اوابو امجد .
ودعت اهلي وطلعت ويا بابا للسياره وغراضي جانو موديها من الصبح كلها ،صعدت بالسياره وسلمت على ابو امجد

الطريق كله ما حجه اي شي وياي بس عرفني على عدد عائلته ،
ابو امجد :شوفي بابا اني عندي امجد الجبير متزوج ومسافر شفتي مرته اجت ويا عمتج هم رجعو سافرو البارحه لان عدهم التزامات هناك

وعندي هدى هم متزوجه وعلي هو اصغر واحد ابني الوحيد الي مافاركني يوم ،،هو مدللي ومابيوم احد رفضله طلب ،وانتي لازم تكونين مطيعه اله وماتزعلي ابد مهما شفتي منه اتحملي .

اسيل :من كلامه حسيت اكو شي خلاه يكول عن ابنه هيج ليش كال (مهما شفتي منه)،يلا يا اسيل عيشي وشوفي شنو جاي...

يتبع