قدري المتعب

بارت 7

الجزء السابع

-وصلنه للبيت ودخل السيارة للكراج جان بيتهم كلش جبير مبين متمكنين يعني اكثر بعد من اهلي قبل
نزلنه من السياره
ابو امجد :تعالي عمو منا ندخل
-اخذني باتجاه المطبخ جان المطبخ جبير واثاثه فخم وكانا مجزء يعني مكان الطبخ بجهه من المطبخ ومعزول بعازل مثل المطابخ التركيه وباقي المطبخ عباره عن ميز طعام جبير زجاجي ولحد الان اتذكره شلون جان يلمع والثلاجه الجبيرة لونها فضي ام البابتين يعني كلشي جان اناقه بالترتيب والاثاث ضليت صافنه عليه

كعدت شوي وراح عمي يصيح مرته بعد دقايق اجتي
ام امجد :هلوو حبيبتي شلونج ،

اسيل :رحت ناحيتها بوستها وهي تباوع عليه من فوك ليجوة وتكول ما شاء الله ،ضليت اني صافنه عليها بكلبي كلت انتي الي ما شاء الله عليج .لبسها كانما وحده عمرها عشرينات
هي مو رشيقه وانما جسمها مرتب ومربربه ولابسه برمودا وتيشيرت ربع ردن والشعر اصفر كصة كاري وملامح وجها حلوه هي يعني شي سبورت مو مثل من اجتي لبيتنا

ضلت تسأل علىامي وصحتها وكعدت يمهم شويه جنت حيل قلقانه ومتوترة وبعد نص ساعة هي كالت

ام امجد :كومي حبيبي روحي لغرفتج ارتاحي ...تعالي امونه اخذيها لغرفتها
اسيل :ضليت ادور منو هاي امونه وطلعت الخدامه مالتهم جانت وحده عمرها بالثلاثين مو عراقيه ماعرفت شنو جنسيتها ،بس شنو حتى خدامتهم لبسها مرتب وجان اللبس الخاص بالخدم .
صعدتني امونه للطابق الثاني جان عباره عن سويت كامل اول ما اصعد تصير بوجهي صاله جبيره وديكورها كله اسود ورصاصي ومن الديكور الشبابي والحياطين احسهن نستله مو حايط

امونه :مدام هذا سويت خاص للاستاذ علي هذي الصاله
وهذا الحمام ومن هنا الغرفة وفتحتلي باب الغرفه
وميحتاج اوصفها جانت مكمله للصاله نفس الالوان اخشابها لون اسود والحايط ابيض ورصاصي ومرتبه والبروده البيها رغم الجو الحار اول مادخلتها جسمي اقشعر ،واتذكرت عيونه ماعرف ليش رجعلي الخوف منه ونسيت كلشي حلو جنت صافنه بي ،وضل عقلي يستذكر نظراته المخيفة ،استغفرك ربي انطيني القوة

لكيت غراضي الي جابوها الصبح موجوده بالغرفه ،نزعت شالي وبديت افتر بالغرفه اتفحصها وفتحت الكنتور لكيت نصه تقريبا فارغ والنص الثاني مرتبه بي ملابس علي.
عرفت مخصصيلي هالجزء الي ،بديت افتح الجنط واعلك ملابسي بعدني جاي اطلع بيهن سمعت صوت الباب

انفتحت الباب انداريت بسرعه وصار بوجهي
نفس عيونه الحاده والتعبانه بنفس الوقت ونفس تعابير وجهه ورفعه حاجبه ،بقى يباوع بوجهي واني هم بس لازكه بالكنتور
كلشي ما حجه حتى ما سلم ولا نطق اني انتضرته وخر من مكانه سويت نفسي مو مهتمه لوجوده ،
رجعت ارتب بملابسي وهو كعد عالجربايه ومدد بحذائه
اسيل :كمت احجي ويا روحي ،طاح حظك شكد قذر انت وحذائك عالفراش لعبت نفسي ،

طلع موبايله وضل يكلب بي واني اكمل بغراضي والهدوء والبروده تعم الغرفة كلها
وفجأة كسر هالهدوء من سمعت صوته
علي :هييييي انتي ..
اسيل :هذا على منو يكول هي !!!!لدرجة شكيت اكو احد يمنا بالغرفة
ما اهتميتله ضليت منطيته ظهري وكانما ما سمعته،
بس بداخلي افور انوب يحجي بببرووود كلش

علي :مو. كلت هييي ما تسمعين
اسيل :افتريت عليه بعصبيه ،على منو هي ،ترا ما اسمحلك الي تحاجيها عدها اسم شنو هييي ؟!!
شو هذا انتفض من مكانه واجاني بسرعه ماحسيت الا لزمني من ركبتي ودفعتي عالكنتور حيل
ويحاجيني ببرود يعني البرود الي بكلامه كلش مايشبه انفعاله وعصبيته ولزمته الي

علي: صوتج ما ترفعي كدامي وهذا ولسانج اكصه اذا تحاولين تجادليني ..هاي اول مره واخر مره اسمع صوتج بوجودي ،

_دفعني بقوه عالكاع وطلع من الغرفه
اسيل :وكعت عالكاع وانضرب راسي بحافه الميز احسه صار نصين دمعتي نزلت من الم الضربة مال راسي بس بدون صوت
بقيت بالكاع حد ما سكتت وكمت عدلت روحي ،باوعت روحي بالمرايه عيوني حمره
صرت احاجي روحي مثل الخبلة
خلص اسيل اششش بدون بجي ،اكيد هاي بس البدايه بعدني مشايفه شي لازم اتقوة حتى اكدر اقاوم..

يتبع