قدري المتعب

بارت 5

الجزء الخامس

اسيل : صار ثاني يوم واجه ابو امجد وحده الصبح وحجه ويا بابا
اتفقو شوكت يجون علمود كعده الزلم وحتى يشوفني واشوفه
جان الموعد بعد يومين
ام اسيل : ماما لازم تحضرين نفسج خابري على عمتج تجي تاخذج حفي وجهج حواجبج
-ان شاء الله ماما بس انتي خابريها حتى تكوليلها عالخطبه وحتى تجي من باجر
ابو اسيل:واني راح اخابر على خوالها وولد عمي باعتبارهم عمامها حتى يكونون حاظرين بالكعده ،واخابر اثير وحامد ولد اختي هم

ام اسيل:اي عاشت ايدك عيني

-اجتي ثاني يوم عمتي جانت مقهوره شويه لان جانت تريدني ومتمنيتني لاثير ،ضحكت بيني وبين نفسي جنت اتكلب على اثير وهسه ماعرف شنو ومنو الراح اخذه
طلعنا العصر اني وعمتي رحنا للسوك اخذت بس شغلات بسيطه
ورحنا للصالون سويت حواجبي بس ترتيب ووجهي وهم تنظيف بشره وهالسوالف طبعا اني مو على بالي بس هاي سوالف عمتي وماكدر اكلها لا حتكلي شلون وانتي عروسه ومن هالحجي فختاريت اسكت احسن
كملنا ورجعنا عمتي بقت يمنه اثير ما اجه هالمره وياها مجرد وصلها من الباب وكال لابويه باجر اجيك العصر

طبعا الافكار ما راحت من بالي ابد خوف على توتر احاسيس مخربطه حتى لعبان نفس ،يربي شيجيب باجر واخلص والله حتى ماعرف اني شنو اريد
اريد يجي باجر لو ما اريده يجي هم دخت ويا روحي

واجه يوم الخطبه العصر جهزت نفسي مجرد فستان بسيط عالجسم وشعري مسرحته ورابطته ربطه خفيفه مكياج جدا بسيط
لان امه ومرت اخو واخته وخالته جاياات
سمعت صوت الزلم وصلو كلبي انخمط باوعت من شباك غرفتي جان اكو اكثر من شاب بس هم ممبين شكلهم
حجيت ويا نفسي ،الفاتو كلهم صاحيين يعني زين هسه هو مابي نقص

اووف شهالافكار هسه يجوز يطلع ناقص عقل او خلق هو كلشي بالشكل واني احاجي روحي جتي عمتي صاحتني كالت تعالي يم النسوان

نزلت وياها ودخلت لغرفه الضيوف الي بيها النسوان
جانن ٤ ٢ كبار و٢ شابات سلمت عليهن بوستهن اول وحده وكفتي كالت هلا بجنتي عرفتها هاي امه وبعدين عرفتني على اختها وبتها وجنتها
والله مبينين خوش ناس امه جانت سافره ولابسه كوستم تنوره جوه الركبه وستره ولبسها مرتب يعني ومرت اخو هم سافره بس اخته محجبه جانت وجها بشوش وبس مبتسمه بوجهي واني هم بقيت كاعده بس ساكته وابتسم ماعرف شسوي التوتر ذبحني

بقن النسوان يحجن ويا امي بهالسوالف مال زواج وعرفت بس هو كاعد ويا اهله اخو مسافر وهسه رجع علمود خطوبة اخو
واخته متزوجه هم ،
ورا نص ساعه او اكثر كالو طلعو ودزو عالنسوان امه كامت بسرعه طلعت للباب مال صاله صاحت رجلها سمعتها تتبشبش وياه

ام امجد:ابنك وين شو ما شاف البنيه لعد هالكعده المن خل يفوت يشوفها تشوفه
ابو امجد:يمعوده وين قبل هو من ورا خشمه جاي يكول عود باجر بالعقد اصلا عافنه وطلع اول واحد هو

-طلعو اهله واني مستغربه شعجب مراد يشوفني مصار عنده فضول
اوي يطبه مرض
راحت الهوسه من يمنا وعمتي هم راحت ويا ولدها ،واجه بابا يحجيلنه كال هلكد اتفقنه مقدم ومؤخر وباجر يجيبون السيد حتى يعقدلكم والولد عنده سفره شغل لدبي بعد فتره ويريد يسوي العرس هناك من يسافر شتكولين بنتي تقبلبن

-باوعت على امي تباوعلي باستغراب وهي حجت
شلون هناك العرس لعد بنتي متطلع بزفه منا ما اشوفها ببدله العرس؟

شفت بابا يباوعلي وغمزلي بمعناه انتي قنعيها
كتلها ماما اكيد تشوفيني اني عود ادزلج صوري بالبدله اكيد واحسن ما نسوي هوسه هنا اذا اني العروسه منو راح يشيل البيت ويحير بالخطار
بقت ساكته امي بعدين كالت براحتكم ..بس بقت ضايجة
هي خاصة بأخر فترة صارت مالها طاقة بكلشي ولا تحب تدخل نفسها بنقاشات كلشي جنا نكوله جانت تستسلم بسرعة وتكول براحتكم حتى لو ميعجبها

كمت من يمهم بدلت ملابسي وبلشت انظف البيت وراها سويت العشى وكملت الشغل وصعدت نمت
كعدت ثاني يوم نفس الروتين حجيت ويا ابويه
عرفت منه بعدين ان ماكو لاسالفه سفر ولا اي شي بس مجرد ابنه مايريد يسوي عرس ياخذج من البيت ونكول للكل سافرو هناك عرسهم

-بس بابا امي شنو اكوللها اذا سالت
-ميخالف عود طلعيلها اي حجه بوقتها

صعدت لغرفتي ،بس اتصفن كمت ما اهتم عادي شيصير خل يصير

بس مقهوره على تعبي الراح اكيد مراح اكدر اكمل دراستي واتذكرت حلمي وفستان عرسي الجنت اتمناه ...وارجع افكر ليش ميقبل يسوي عرس؟؟
وشي بداخلي يرجع يكول هو انتي ضحيتي ضحيتي بقت على هاي الحمد لله على كل حال

صار العصر وجهزت نفسي لبست بنطرون وستره جان البنطرون بيج وقميص ابيض والستره بيج وحزامها ذهبي والشال مشجر ماروني وحذاء كعب ماروني وخليت مكياج كلش بسيط مجرد كحل مسكاره وحمره فاتحه

ضليت كاعده بغرفتي منتضره لحظات دخولي لقفص حتى ماعرفه اذا جان ذهبي لو مجرد قفص انسجن بي
بعد دقايق اجاني حسين كال بابا يكول انزلي
اجه السيد وياهم

نزلت ويا حسين وشفت بابا باسني من راسي واخذني وياه دخلنه
للاستقبال سلمت بصوت ناصي وردو السلام بس مجان عندي قوه حتى ارفع راسي واشوف شنو كدامي ومنو اكو
شفت بس رجليهم جانو ٣هو وابو والسيد
ضليت مدنكه الى ان بدا السيد يسالني ولازم اردد اوراه وشافني مدنكه كال بنتي ارفعي راسج وباوعي وجاوبي اريد اتاكد انتي مو مجبوره
رفعت راسي والف فكره ببالي قليل رفعته وفتحت عيوني صار الولد كبالي وانصدمت من شفته

يتبع