قدري المتعب

بارت21

مساء الخير عليكم متابعيني ،
التفاعل كلش ما يسوي واهس ليش هيج المشاهدات كومه والتصويت والتعليقات كلش قليله عالاقل راعو تعبي

بارت ٢١

اسيل :كعدت ساعه ٧ بدون ومنبه لكيته ماكو طالع ،استغربت مو عوايده يطلع من وكت

علي:رجعت للغرفه ونمت ومثل كل يوم نومتي وتعودت عليها لازم افز بليل ابقى كاعد فوك الساعه لحد ما اتعب وانام وكعدت من ال٦ سبحت وبدلت وطلعت قبل لا تكعد مابيه حيل اشوفها
للضهر وكت رجعتي عالغده هم ما رجعت ،كضيت كل وكتي بالمجمع تغديت برا وللمغرب تعبت بعد واني نوم ماشبعان متعود انام الضهر
واليوم مارجعت فمتت تعب المغرب رجعت للبيت
جانت ماكو جوا
صعدت على كيفي جانت الباب مفتوحه وسمعتها تحجي بالتلفون
والصوت مسموع اني واكف بالصاله وسمعتها تكول
-لا ماما شنسوي بالجاهل هسه ،بعدنا جدد وما نريد على شنو اراجع دكتوره ،وانتي تعرفين شغل علي وسفراته ماريد اتبهذل بالحمل وحدي من يستقر عود نسوي طفل .

واكف اسمع كلامها عبالك فتحت عيوني على شغله حنت ناسيها ،من داخلي اجاني شعور من صدك اتمنى يصيرلي طفل منها ومو طفل اطفال هم ،بس من ارجع واتذكر وضعي ،تشوغ روحي واعصابي تتعب
دخلت للغرفه بسرعه بعد ما قطعت افكاري وهي شافتني وفزت

اسيل:نهيت المكالمه ويا ماما الي جانت تلح عليه بسالفه الحمل عبالك صارلي سنين متزوجه وعلى ليش ماترحين تراجعين دكتوره وانتي رجلج مو صغير خطيه جيبيله جاهل يكبر وياه يلحك يفتهمه ،بصعوبه كدرت اقنعها احنا ما نريد هسه وخل تفوت سنه عود نراجع
واني احجي وياها دخل علي ،ارتبكت وودعت ماما
ارتباكي مو من المكالمه وبس ،،هو اليوم كله جان ماكو وهالشي ساعدني انسى الموقف الزفت الي سويته البارحه ومن شفته اتذكرت ،
بس اني ما اتوب الا انتقم منه واشوفه مذلول مثل الذل العيشني بي .
اتجرأت وكتله ،هلا بيك
حتى هو بقى صافن لان اول مره اسويها جاي ينصدم بافعالي

علي :رديتلها واني متعجب ،وبيج
ورحت اخذ المنشفه حتى اسبح واذب تعبي
وقاطعتني بصوتها

-خليتلك المنشفه بالحمام ،وراح انزل احضر العشى اكيد جوعان حجيتها واني ابتسم بوجهه

-كمت اضرب اخماس باسداس من الصفنات هاي شكو ،اسمعها واني متعجب شنو هالتغيير
كتلها اي جوعان والله هسه اكمل وانزل وراج

اسيل:عفته ونزلت واني مخنوكه من روحي بالكوه مسيطره واني جاي امثل عليه
نزل ورايه تعشى وصعد للغرفه واني افكر اليوم شنو اسوي
رحت وراه جان متمدد عالجربايه على بطنه مبين تعبان
اخذت ملابس ورحت بدلت بالحمام ،لبست بجامه تصير قماشها حرير خفيف الي يطبع عالجسم وبيها فتحات بالرجل توصل لحد الركبه ووياها ترابلس خفيف عالصدر مالته دانتيل وفوكاه القميص مالته عفته مفتوح
رغم بارده شهر الواحد جان نهايته ،بس الغرفه دافيه
طلعت من الغرفه هو ما يشوفني رحت فتحت شعري ورجعت رفعته بس بشكل مخربط ونازل على وجهي كم خصله
خليت بخات خفيفه من العطر بيدي ووزعتهن على ركبتي حتى لا يصير قوي العطر
بقيت صافنه شسوي ماعرف ،باوعت عليه شلون نايم اتذكرت من صاحني حتى افركله ضهره ،طخت بعقلي اتحارش بي بهالطريقه
ورحت يمه كعدت عالمكان القليل الباقي من الجربايه
وهو وجهه مو عليه
بس من كعدت حس بيه واندار ،باوعلي