قدري المتعب

بارت 13

بارت ١٣

لكيته بوجهي
طفرت طفره احس كلبي وكع مني ،كمت ماعرف وين اضم روحي كعدت بسرعه يم الجربايه وجريت ملابسي حطيتهن على جسمي بسرعه اغطي شي يطلع شي ثاني

كمت احجي وارجف بداخلي ،هسسسه هذا شجاابه هم حظي حظي امدااني
هو فات ولا يمه الموضوع ماعرف شنو جاي ياخذ بس شفته اخذ شغله من المجر وطلع

اريد اكوم مابيه حيل شويه وكمت لبست ملابسي بسرعه ،حسيت بتعب فضيع بجسمي حتى ما مشطت ولا نشفت شعري بس مددت عالجربايه وتغطيت جسمي كام يرجف ولزمتني البارده
بالكوه نمت

حلمت هواي احلام وكوابيس حتى ما اتذكرهن جانت كلها شغلات مخربطه وهوسه
بس شفت امي يمي بغرفه ماعرف وين خلت ايدها على راسي ورجعت ورا شويه مثل الي تسويلي كمادات كالت ،ليش هيج حرارتج حبيبتي ،خلت الكماده وراحت
كمت اصيحها بس صوتي ميطلع بصعوبه اصيح
-مااا ما ،،ماما

فزيت من نومي شفت روحي عالجربايه يا الله شجابني هنا لا يروح يجي ويشوفني
لزمت راسي لكيت الكمادات على كصتي فزيت بسرعه كعدت لكيته كاعد ديشتغل

انصدمت من شفته بس محجيت شي كمت بسرعه من فراشه ورتبته بس الصداع موتني رتبت فراشه ولكيت المخده متبلله بشعري
ياربي شلون مصيبه بدلتها بغير وحده هو شافني بس كلشي ما حجى
رحت حطيت فراشي بالكوه اتحرك ونمت بمكاني ،بس افكر ليش هيج سوه وياي من شوكت هو يسوي شغله زينه ،!!بس جنت مريضه كلش وحتى عشى ما تعشيت كضيتها نوم بفراشي
نزل هو ورا شويه صعدت امنه جايبتلي حليب دافي وعلاج للصخونه
اخذتهن منها عرفت هو دازها

اخذت العلاج وراها نمت بسرعه لان العلاج بي منوم
وراها جريت يومين اني بالفراش فلاونزا قويه صارت بيه
وخشمي وعيوني محتقنات كلش ووجهي احمر كلما اشوف روحي بالمرايه عبالك صارلي سنه ابجي ،
وهو يدخل للغرفه ويطلع احسه يباوعلي من جوه لجوه حتى لا انتبه عليه ،

وراها طبت والحمد لله ورجعت لنفس روتيني بالبيت
بس الي اختلف هي نظراته ،احس وين ما امشي عيونه ورايه مثل الصگر بنفس الوقت يحاول ما يخليني اشوفه ،وترني كلش كمت ماحب حتى ادخل الغرفه

بليل جنت طالعه من الحمام واكفه يم المرايه اريد امشط شعري جان يرطن هو
-لا تمشطين هسه ولا تخلين عطر وروحي نامي يلا مو وكتج

-استغربت هذا شبي ياربي مو اكول بومه مادري شلون محسوب عالبشر انوب خله خشمه وياي حتى بهالسوالف
عفته ورحت كعدت عالكرويته العب بالموبايل واراسل ماما مثل كل يوم وطبعاً لحد الان عبالها عايشه بدبي

غفيت بمكاني ،رغم نومي ثكيل بس حسيت بحركه لما فتحت عيوني لكيته شايلني خلاني عالجربايه ،فزيت ودفعت ايده بسرعه كتله

-ليش جبتني هنا وليش تشيلني اصلا ،حاجيته واني مخنزره
هو بس يباوع عليه جاي انزل من الجربايه وجرني من زندي