قدري المتعب

بارت 24

وهذا بارت هديه رغم الظروف بس متحملت الا اكتبلكم قبل لا انام
حتى لو قصير احسن متبقون حايرين😣
هالبارت كله اعترافااات ووجع وكت دموع😢
بارت ٢٤

وعلي يكول

عمرهم ينگضي بـ چذبه
عرفت الناس
ماريد الصدگ منهم ولا حبّه !

-فريت السياره واتجهت لبيتهم واني كلي وجع وذنب وندم ولو ترفضني هم حقها ،بس كون تسامحني حتى يرتاح كلبي وضميري ،لان يمكن اني بكل الاحوال جنت اظلمها
بس انك تظلم انسان مرخص روحه وراضيها على نفسه مو مثل من تظلم شخص هو بداخله مظلوم ومتاذي ومجبور يتحمل ظلمك وصرت انت والدنيا عليه .
وصلت يم بابهم ساعه ١٠بليل
دزيتلها رساله
-كاعده لو نايمه ؟

اسيل:بعد ما حجيت وياه ،الي عرفته هو مجان يعرف بوضع امي وشكله مخدوع اكثر مني بهالزواج
شفته عيونه تجدج نار من الاعصاب وطلع من البيت طاير
بقيت افكر والوب اريد اعرف وين راح وليش هيج طلع
لليل دزلي واني فتحت الرساله بسرعه ،شكد جنت مو فضوليه بس العيشه وياه وغموضه خلاني اصير اكبر فضوليه وردت اي شي حتى اعرف شصار ففتحت الرساله ورديتله
-اي كاعده
-اني جوه
-خليت ايدي على حلكي
عزززه وين جوه

-واكف بالباب ،اريد نحجي
تستقبليني لو اروح
-بلعت ريك ،رغم ماريد اشوفه بس بنفس الوقت اريد اعرف شنو الصار وشنو يريد يحجي كتله
راح اجي افتحلك
ونزلت للباب اهلي جانو كلمن بغرفته ينامون من وقت
فتحتله الباب جان واكف مرتجي عالسياره من شافني وكف واجاني
شفت ايده ملفلفه
عززه هذا شبي ،الفضول كتلني بس بنفس الوقت ما همني اسال عنه فسكتت

دخلته للبيت
-شو ماكو اهلج
-ينامون من وكت
-لعد خل نصعد لغرفتج نحجي حتى لحد يسمع
-باوعتله مستغربه ،وكتله اوك
صعدنا وكعدت عالجربايه وكعد هو عالطرف الثاني مال جربايه جانت ام النفرين
بقينا ساكتين شويه وحجى

علي:راح احجي وابد لا تقاطعيني افتهمي للاخير وبعدين احجي
-هزيت راسي بمعنى اي

-اسيل اسف على كلشي بدر مني واذيتج بي ،وعالايام الصعبه العيشتج بيهن ،وعلى ضني السوء بيج وعلى كلشي
يمكن انتي حقج ترفضين اسفي وتطرديني هم بس اني جاي اليوم احجيلج كلشي حتى اريح ضميري الي اشتعل اليوم من عرفت لاول مره بوضع امج ،وحاجتج الي بقتج على رحمتي ورحمه اهلي ،

-من حجى هيج اتذكرت الي صار بيه والمريت بي ودمعتي نرلت واني مبرطمه مثل الطفل
خليت ايدي على حلكي وهو يكمل كلامه

-اذيتج هواي بس مو من فراغ ،مالج ذنب والله اعرف
بس اني مو هيج ،علي من جواه مو هيج طاغيه شفت ضيم وعذاب يلا صرت هيج قاسي وما احس
انتي متعرفين كميه الخذلان العشتها
ومحد اتحملني ومحد صبر عليه
ولج قبلج متزوج بدل الوحده ٢ وما وفن وياي وما حسيت بسند
جنت ساند روحي بروحي وما احتاجيت احد ومن وكعت مالكيت الي يوكفني على حيلي .لا اهل ولا مره الي اتحملت
بس انتي اسيل بس انتي ،الشخص الوحيد الي اذيته بحياتي واتحملني هيج ،اتعلقت بيج وحبييييتج هم
اي والله حبيتج

-دموعي مستمره تنزل وهو يحجي ومكسور حيل ومن كال احبج
متحملت جاوبته بصوت ناصي
-الي يحب ما يسوي هيج

-تدرين جنت متزوج سجى بت خالتي ٣او ٤ سنوات احنا سوى ،من دمي ولحمي وعاشت حياتها وياي بكل طيب وسعاده ومن انكسرت شهر ما صبرت عليه تعرفين شنو شهر
بعد الحادث ب٣ ايام ضاجت ونفرت من مسؤوليتي ورجعت لدوامها لان متتحمل تكابلني
وبعد٣ اسابيع جزعت مني وطلبت تتطلك انتي تعرفين بهالشي ؟؟
والي بعدها ٣ ايام مصبرت تريد تصير مرتي واني اسمها بعدني محاطه ببالي ومركز بي
يمكن لو جانت صابره عليه بس شهر وشفتها انسانه تستاهل حب وتستاهل تكون مرتي جان هسه احنا مكملين حياتنا سوى
بس اني شترجى منها وهي بت خالتي عافتني ،وامي عافتني والتهت بحياتها وونساتها ما وكفت وياي باكثر وقت احتاجيتها بي
جاي تعرفين مرحله الجزع والتعب الي وصلتها من جنس النسوان
ردت اخلص منج شلون مجان وقبلت بيج حتى اخلص من اخر تدخل لابويه بحياتي ،واذيتي الج كلها حتى اخليج تجزعين وتعوفيني ومن شفتج متمسكه بيه بلش كلشي يتغير بعيوني ،
بسببج كمت اشوف اكو بعد بوب مفتوحه بوجهي ،بعد ما سدها الوكت
مجنت اعرف انتي هم مجبوره وصبرج عليه هن مجرد اجبار

-كميه الخيبه والانكسار الي هو بيها كسرت كلبي مجنت ادري بعد كل اذيته يجي يوم وتنزل دموعي عليه رديتله
حتى لو ما مجبوره عليك لو ادري بيك محتاجني ما اعوفك بنص الطريق مو اني الي اكسر احد محتاجني لان ماتربيت هيج اني

بس انت قسيت هواي بيه شوفتني نجوم الضهر حجيتها واني ابجي
باوع بعيني واحسه مهزوز حييل

-اسيل تعبان والله تعبان وهمج الي شلته اليوم هد حيلي واخذ من عمري دهر ،صارلي ٣ سنين ما شفت الراحه مصيبه بضهر مصيبه وخيبه امل من كل الي دايري
محتاجج والله ما ارتاحيت بس بحضنج وقربج اشر على حضني
واني كاعده اتمدد وخله راسه بحضني وهو يحجي
جمدت بمكاني بس ما سويت اي رده فعل
حسيته مثل الطفل بكل هيبته وقساوته هسه حاط راسه بحضني ويحجي بألم
محسيت بروحي شلون خليت ايدي على شعره
وكمت اتلمس بي
جر نفس قوي ،وكال
كدامي كتلووو

-انصدمت بالكلمه ،بس انتضرته يكمل منو كتلو يربييي

علي: واني حاط راسي بحظنها محسيت بس كل الي بكلبي جاي يطلع
كلام من سنيين مدفون وياكل بيه من الداخل ومحاجي لشخص ابد
كمت افرغ كلبي المحروك صار سنين ،وايدها الدافيه احسها تهون عليه وفاتحتلي الطريق وتكلي كمل

اسيل عيووونه عليه جانت احسه يكلي ماريد اموت
اخويه الماجابته امي ،صديق عمري ضهري الساند بي روحي ،العشت وياه احلى ايام حياتي عرفت العائله وياه و ويا اهله
ولج ذبحووو ذبحو كبالي بكل دم بارد محسيت بروحي بس دموعي كامت تنزل مثل النسوان واشهك بقوه بحضنها،
اتذكرت من اتمنيت هالامنيه بيوم دفنته،اتمنيت اوكع بالكاع وابجي مثل النسوان وبقى هالشي حصره بكلبي ٣سنين وهسه يلا بجيت

اسيل :هو يبجي واني حاطه ايدي على وجهي واشهك وياه ،احس بنار اشتعلت داخلي ،لا اعرفه ولا شايفته المات بس من حركه كلبه وهو يحجي عنه متحملت وجعني كلبي عالموقف
بقى على رجلي حاط راسه ،اباوعه هو وكل هيبته وصلابته صار مثل الطير المذبوح .
واني حاطه ايدي على شعره اتلمس بي وامسح على راسه
لحد ما حسيته غفى
......يتبع