#عشگ-سمره
الجزء4
بقلم ازهار ذابله.
عرفت هذا الصوت الي اكرهه
صوت مزعج خشن وعالي
من اسمع صوته احسد الاطرش
احسد كل شخص فقد حاسة السمع
من اشوف وجهه احسد الاعمى
احسد المسجون لان محبوس ومحد يكدر
يزعجه.
صحت بشجاعه وخوف انمزجت
مشاعري بين الخوف وبين شعوري
بالضعف واريد انتقم من الي وصلني
لهاي الحاله.
شتريد مايكفيك الي اتسوي
انت حيوان انت غبي.
بس بعصبيه وصريخ واغلط عليه.
والي قهرني يباوعلي ويضحك
مرتجي عل الجامه مال السياره
ويباوعلي بنص عين ويضحك
اتمنيت اقتله احركه مااعرف شعور
غريب عذرت القاتل عذرت المجرمين
يمكن اكو عدهم دوافع حتـ يقتلون.
استفزني بحركته وبكلام الي يكوله
مااعرف احسه امرخصني يستخف
ببنيه يحسها ضعيفه ومتكدر اتسوي
شي.
لزمت احجاره يمي لان جنت كاعده اباب المدرسه واكو حصو اهوايه ع حافة الرصيف.
بدون تفكير شمرتها عليه بكل قوه.
اول احجاره بكصته ماسمعت بس اخ.
وضم وجهه بكفوفه.
مابطلت استمريت بثوره القذف
ماخليت حصوه ولا احجاره فلشت سيارته
و الجامه انصدعت.
من شافني هيج دار بسرعه وطلع.
واخيراا خلصت.
بس ماادري احس هاي الحادثه
زيدت الحساب عليه بعد ماكو مجال
اكيد حتعاقب.
بس مليت من السكته شخص مستفز
يستاهل كل الي سويته.
واصلا والله احس قليل بحقه هذا الحيوان
مو زين مني وسكتت.
وصل بابا بعد ربع ساعه.
سلام.
وعليكم السلام باباتي اسف اتاخرت عليج.
عادي بابا ولا يهمك.
اشبيج نونو حبي احسج زعلانه.
مااعرف بدون اي تفكير ولا حسبت احساب اي شي
ارتجيت ع ايد بابا وهو يسوق وابجي.
من سالني هيج كل المعانات الي احس بيها.
بابا ..ااااه والله اريد اموت واخلص. !
بنتي شنو هذا الحجي ليش شصار?
بابا كل يوم مشكله والبنات بالمدرسه
اتعاركن وياي وضربني.
وبعدين المديره فصلتني! !
لان كلهم يصيرون ضدي لان اني جايتهم نقل وهاي روى بنت ابو عصام عدها عصابه.
شنو هذا الحجي بنتي اني اروح لـ ابو عصام واحجي وياهم بعد متتعرضلج.
بابا ...
هااا عيون البابا.
اممم لا تكول لـ الماما فدووه.
هههههه اي واني قبلج ردت اوصيج
لان اتسوينه مشكله.
وصلنه البيت ونزلني بابا من وره البيت لان ماكو شارع اكبال بيتنه.
لازم انلوف وره البيت يله نطلع لشارع
جان الشارع ترابي ضيق.
يعني مثل لوفه نصف دائره يله نوصل.
دخلت البيت والخوف يرافقني.
اخاف من امي.خاف سمعت خاف اجو اشتكو من عندي
خاف اوس رجع يشتكي ويذب مصايب براسي.
بس بالرغم من الخوف والقلق دخلت.
حمودي جان كاعد يلعب بلي.
وماما بالمطبخ.
اني مثل الحرامي بدون صوت دخلت.
بابا دخل وراي جايب مسواك واغراض للبيت .
اني ما نزلت بعد.
اخاف والتفكير بكل هاي المصايب يخليني اضعف وابتعد عن هدفي
الحقيقي.
هو الهدف الي مخليته ومكوفه كل حياتي يمه .
بدلت وحظرت الجدول.
واسمع امي اتصيح ...
نزلت ركض من اول نور مابيه حيل افتح ع نفسي جبهه.
لكيت امي امحظره الغده.
ومنتظريني.
اتغدينه والجو صافي امي لحد الان محد موصللها اي شي.
بس مااتصور حطول اكيد العصر تبدي
الشكاوي.
كملنه غده لمليت المواعين من الميز
ودخلت المطبخ اغسلهم
واسمع تلفون ماما يدك جانت ناسيته بالمطبخ.
شفت الاسم ام عصام ..
اخ يا حظي المصخم .
بدون تفكير لغيت الصوت وضميت التلفون.
اكيد اتريد تشتكي.
بس الشي الي امخبلني هذوله غير ناس
عاشين بقريه اصغيره
بس شكد مطورين يروحن ارقى مراكز تجميل.
وسيارتهم فخمه وبيوتهم اقصور.
كل هذا وهمه املاكهم كلها بساتين
حتى ميبيعون منها مخلينها هيج
مااعرف مصدر ثروتهم الحقيقي
ناس غامضين.
صح ابو عصام جانت عنده شركه .
ومن عدها اتعرف ع بابا وهو جابنه
يمهم وقنع اخوه ابو اوس يخلينه ننزل يمهم.
مااحب هذا المكان خسرت بي اختي وصديقتي .
خسرت بي حريتي وشخصيتي.
ماما اتغيرت من بابا خسر شركته
وباع بيتنا بس حتى يسدد الديون.
ومكدر يوفي كل اديونه.
شاف انسب حل هو يعيش بعيد عن منطقتنا.
امي جانت تلبس وتصرف وتطلع ماعجبها الوضع الجديد بس ماكو حل عدها غير تقبل اتعيش بقريه وتغير نمط حياتها اشويه.
اختي اساور جانت ممرتاحه اول ما نزلنا
خافت من المكان.
عكس شعوري اني حبيت الطبيعه.
بس هي جانت اتشوف شي اني ما شفته.
اول ايام النا جانت اتظل حابسه نفسها بالغرفه .
ممتأقلمه ع الريف اني جنت صف سادس ابتدائي.
واخوي احمد جان ثاني متوسط واساور جانت رابع ادبي .
من اول يوم دوام الها بالمدرسه ضاجت واني حسيت بيها واحجي وياها مااعرف شنو الي مزعلها .
خلصت سادس ورحت الاول متوسط ونجحت لثاني بهاي الفتره اساور بعد بس تمتحن سادس واتروح لـ جامعه.
بس بالعطله صار الي محد متوقعه !
جنه كلنا طالعين وتركنه اساور تقره
لان وزاري وصعب .
واتاخرنه بالرجعه.
رجعنه البيت اظلم كان وقت بعد الغروب
محد مشغل الاضويه .
وماكو حس يعني اساور مختفيه.
صعدت اركض لغرفتنا .
شفت منظر مستحيل انساه بحياتي.
جانت اساور كاعده ع الكرسي والحبل
مربوط ع عنقها واكو حبل ثاني مربوط بالمروحه .
جان لون بشرتها غريب وشاحبه
هزيتها وكعت.
صرخت صعدوا اهلي ولكيت نفسي
وسط الصريخ والنحيب.
وكل وحده تحجي شكل هاي اتكول خافت
من الامتحان.
وهاي اتكول الله يستر ع بناتنه اتورطت بشي ويه ابن حرام وعافهه.
ما جنت مستوعبه كل الكلام كان ينحجي عن اختي.
بعدني ممصدكه اني خسرتها .
صار تحقيق وفتحوا ملف بس بسرعه عجيبه انسدت القضيه .
وبابا جان بوضع مايسمحلها يقابل المحقق فتكفل ابو عصام بكل اجرأت التحقيق.
انغلقت القضيه بغموض مثل الخموض الي جانت اتعيشه اساور .
يتبع........
