#عشگ-سمره
الجزء 24
بقلم ازهار ذابله.
طعلوا اخوان ابو عصام زعلانين ..
وابو عصام هم ظل يصيح والبيت
صار هوسه ...
امي اجتني وهم اخذتلها ساعه
وتحجي وهي وعمتي واني ناسيني
بس يتعاركن ..
وام عصام صدك مستفزه تحجي عليه كدام امي ولا تستحي ..
وامي هم ماسكتت وظلن يتناكرن واني حايره بنصهن ..
واخيرا دخل عصام وكدر يحل النزاع.
امي راحت وصار العصر الجو كلش حلوو
بس الوضع متوتر ونسوا حته احنه بعدنا عرسان جدد ..
عصام شافني ضايجه وكال خلي نطلع
طلعنا العصر واتعشينا ...
واهنا راجعين بالطريق سياره سدت الطريق ..
شنو هاي السياره شكو...!
خلي اشوف شنو السالفه.
نزل عصام واني بقيت بالسياره.
نزل من السياره الثانيه اوس صح جانت ظلمه ومو واضح بس عرفته هو طوله و وكفته.
واشوف عصام يحجي وياه بعصبيه
وبعدين طلع افلوس وانطاه ..
رجع عصام صعد لسياره وشغل بسرعه
وبدون مينطق بحرف ...
جان واضح عليه هو متفق وياه يشوفه
بهذا المكان ..
ما جنت مهتمه بالموضوع ونسيت السالفه.
مر ع زواجنا فتره اسابيع ..
والحال كما هو بس عمتي اشويه خفت عليه و روى ابد ما اشوفها بس حابسه
نفسها بغرفتها" صراحه مرات اضوج عليها واريد احجي وياها بس اخاف من ردت فعلها واخاف تفهمني غلط.
طلبت من عصام اروح اشوف
اهلي وكتله اريد ابات يمهم
لان صار اهوايه مرايحتلهم
مقبل وكال لا ترجعين ماكو مبيت يم اهلج
همه بس نعبر النهر شكو اتباتين.
اريد ابقه يم ماما مشاتقتله وبابا ميجيني وحمودي صار شكد مشايفته يعني اروح ساعه وارجع مينفع " والدوام ع ابواب يعني بعد مااكدر اشوفهم والتهي بالمدرسه ...
يعني قافله اله اتباتين ...?
اي حباب ..
يله عمي بدلي خل اوصلج.
بدلت بسرعه واني ممصدكه عصام اقتنع
اريد ارجع لغرفتي اشتاقتيلها.
واشتاقيت لـ ماما وبابا.
امي من وره ام عصام متكدر تجي لان تتلكاها بالمشاكل.
وتعرف اني اضوج لذلك بعد متجيني
حته لا تسبب لي مشاكل.
وصلت لبيتنا وتلكتنا امي
وطلبت من عصام يدخل بس رفض كلها عندي شغل ..
واني بقيت يمها من الصبح
وساعدتها بالتنظيف وسوينا غده
ورجع بابا من الدوام فرح من شافني
وظل يسالني اذا مرتاحه
او واحد مزعلني ..
الصدك محد مضوجني وعصام مدللني
بس الغموض والاحداث الي اتصير
وياي هي الي متعبتني .
كل يوم يصير شي يزيد فضولي.
رجعت ايام العزوبيه وكعدنا اني وحمدي نتفرج فلم مثل قبل.
وصار الليل صعدت لغرفتي لكيتها
ع حطت ايدي .
كلشي مثل ماعفته
ماكو اي تغيير .
ماكدرت انام وعصام هم يحجي
وياي بالفون ويكلي مشتاقلج
وراد يجي ساعه بـ الوحده بالليل
بس اني مقبلت وظلينا
لحد الوحده ونص ونمت.
مادري شلون صحيت من النوم
بس فتحت عيوني مرعوبه وشخص
ملثم ماسك فمي"
ظليت اقاوم وادفع بكل قوتي
وممستوعه الي يصير
سحبني يريد يطلعني من الغرفه
بس اني مستمره بالحركه
بس مااكدر انطق خنكني
اخر شي من راد يطلعني من
الغرفه رخه ايده ع فمي وكدرت
اعض ايده بقوه ونبتت اسناني بيده
والكم بي بايدي واريد بس اوخر
اللثام عن وجها بس ما كدرت
من اتوجع تركني اشويه
صرخت صرخه قويه جدا
صحوا ماما وبابا وفتحو الاضائه
هو بسرعه اختفه مااعرف شلون شرد
صعدت ماما خايفه وحمودي كعد
وبابا هم وراهم "
شكو نور ماما شبيج .....!
ماما جان اكو حرامي ...
شنو حرامي ماما شلون فات للبيت ..!
مااعرف والله اني شفته وجان
يسحب بيه راد يطلعني
من البيت بس اني عضيته وصرخت
وهو اختفه مااعرف وين راح ...?
بابا تحلمين ماكو شي ...
لا مو حلم والله جان حقيقه
اني ضربته بيدي وعضيته
حته اسناني توجعني لحد الان
اهدي بابا ارتاحي.
نزلوني يمهم وحمودي طلع لسطح
يدور يشوف خاف اكو واحد
بس مالكه شي.
واني متأكده جان اكو شخص
راد يخطفني ...
صار الصبح واجه عصام بعد
ان كتله ع الي صار وهم عباله
اتخيل او احلم واني متأكده.
بس ماكو فايده الكل ممصدكني
رجعت ويه عصام لبيت وكلت بعد
مااعوف عصام ابد ..
حسيت الامان راح من عفت عصام
بعد ما اعيد هاي التجربه لان
من جان خانكني حسيت
نفسي حموت وبعد هاي
اخر لحظات بحياتي .....
بعد اصرار من عصام قبلت
اروح لدكتور نفسي واني اعرف
هذا مو حلم ..
وام عصام كالت لا هذا البيت
بي اشباح ...
يمكن بس جانت اتخوفني
وظلت تحجي قصص عن
الاشباح وشلون همه وبيت حماها
نزلوا بالبيت وهم شافوا هيج شي
وقرروا يغلقونه.
مااعرف اصدك القصه او لا
بس شي مو منطقي لان اني متأكده
مجان حلم ..
جنه اني وعصام كاعدين بصاله
ونتفرج فلم تقريبا الساعه بـ العشره
بالليل .
ورن فون عصام .....
المحقق بلغ عصام يجي لمركز الشرطه
لان لزموا اوس ..
ساله وين وشلون ..
كله رجع لمكانه واحنه مراقبين المكان ولزمنا .
يعني لزمتوا بالبستان...?
اي بالليل جنه مخلين واحد يراقب
وشافه طافر من البيت الي مقابل
البستان .
ومنتظره يدخل لبستان وبلغنا والقينا
القبض عليه ..
عصام يعني مجنتي تتحلمين
وهذا الحقير هو رايد يخطفج.
هسه صدكتوني مو اكلكم "اخ هذا شنو من بشر جان وكفت بعينه انت.
هسه انسجن والله لو اعرف
اعوفلهم القريه كلها ماادافعله ولا اخليله محامي .
يعني انت جنت مفكر اتساعده
هذا واحد مجرم وحقير ..
هو لو بيدي اتبره منه .
خلص لا تفكر الله خلصنا منه ومن شره.
لا بس اني خايف يطلع امسوي
بلاوي اكثر والله انفضحنا.
دخل عمي معصب ويصيح
ويسب و وكع من طوله كدامنا.
ركضنا اني وعصام وطلعت عمتي
و روى التمينا عليه انريد
نعرف شصار وياه.
ونقلنا لمستشفى بسرعه.
اني بقيت بالبيت وحدي
وكلهم راحوا وياه.
اتصلوا كالوا استقرت حالته
بس لازم يبقه تحت المراقبه.
اني مااخاف بس البيت جبير
وبس اني وروى وهاي المتعجرفه
متحجي وياي خلتني وحدي .
اسمع صوت بالصاله مقابل غرفتي
مااعرف شسوي ظليت افكر
رحت بسرعه وردت اقفل الباب
بس ماكدرت لان اكو شخص
وره الباب ويدفع بي مكدرت
اجمع افكاري صدك انصدمت وبقيت
ادفع بكل قوتي ..
يتبع ....
