عشگ-سمره
الجزء 7
بقلم ازهار ذابله.
مشاعر توقعك بالحب.
ومشاعر توقعك بالمشاكل "واخرى تجلب لك الالم ...
اسبوع الي باقي ع العطله وبعدها نمتحن.
خلص الاسبوع بسرعه عجيبه وصارت العطله الي انتظرها مااعرف هي صح كم يوم بس احس كل يوم حسوي بي انجاز.
بعدني ما سحبت نفس ولا شبعت نوم.
دزت عليه روى ع مود نقره سوه.
وماردت اروح بس ماما ظلت اتصيح وتغلط.
اوك ماما اروح بس بشرط اذا ضوجتني اتكون اخر مره مو تكولين بعدين.
ميخالف بس روحي لج عيب اني وعدت ام عصام كتله حتساعد روى.
اوك رايحه.
صعدت لبست جينز اسود وبدي وردي الردن مالته تور خفيف وحليت شعري ولميت الكتب والملازم.
واني اعبر النهر افكر اشلون استفز هاي الخبله واخليها تطردني.
اول مره ادخل البيوتهم قصدي اقصورهم
جانن عباره عن قصور قصر مقابل قصر وبدون سياج بس الحدايق تفصل بينهم.
وحدايقهم اتجنن كلها زرع ورد.
بيت ابو عصام اول ما دخلت حديقه بالباب وبالنص ممر وع الجوانب ورد.
وبعدين درج يوصل للباب الرئيسي.
فتت دكيت الباب فتحتلي الباب الخدامه مالتهم.
ودخلتني جانن منتظراتني .
الصاله اتجنن وكلش فخمه .
سلمت عل ام عصام وكعدتني يمها انتظر ست الحسن والجمال.
جانت الصاله فرشها كله باللون البنفسجي والبرادي كريمي وبيهم نقش بنفسجي وشاشه ضخمه وسط الصاله ومن عدها درج دائري وبعدين يتفرع الدرج ويكون باتجاهين.
ويوصل لصالتين منفصلات فوك.
كل صاله اثاثها ولونها شكل.
نزلت الاميره دينا.
هلووو حبي نور خوما اتأخرت عليج.
لا عادي بس وين نقره اكون مكان هادئه.
اي حبي بالحديقه الخلفيه محد يفوت اهناك.
اوك.
من سمعت بالحديقه ومحد يفوت بيها اطمنت ع الاقل اتحمل شكل هاي القرده
وحدها ما بيه حيل اشوف القرد ابن عمها.
طلعنه لحديقه.
جانت عباره عن بستان اصغير بيها كل انواع اشجار الفواكه.
والورد ومفروشه ثيل كلها.
والوسط مسطبه مسقوفه وع جهه مرجوحه.
كعدنه ع المسطبه جان شكلها دائري كلش منسق ومرتب.
اثار فضولي البيت والترتيب والديكورات الي تاخذ العقل.
اكلج روى هذا بيتكم منو المهندس الي رسم فكرته?
هههههههه عجبج البيت?
اي ماشاء الله جداا جميل.
لج هذا اخوي عصام هو الي صمم كل هذا التفاصيل الي جاي اتشوفينها.
امممممم يعني اخوج مهندس?
اي مهندس وهم يشتغل بالشركه ويه بابا.
يعني مو بس بالهندسه حتى بالتجاره.
حلووو.
منو الحلوو?
قصدي شغله حلوو الله يوفقه.
هاااا يسلمووو.
يله نور خلي نقره.
اوك .
بيمن نبدي?
روى : ابراحتج.
بدينه ندرس و روى مازعجتني عكس توقعاتي.
وام عصام كل فتره اتجيب النا شي ناكله او عصير يعني ماتخلينه نجوع.
شكرااا خاله تعبناج وبعدين اني حيزيد وزني اذا استمر الوضع هيج .
ام عصام : اوكلي حبي بالعافيه.
روى : شتقصدين احنه وزنه زايد?
نور : لا مااقصد شي بس اني قصيره اذا ابلع زيتونه انتفخ انتي ماشاء الله تاخذينه بطولج .
روى : هههههه صدك انتي قزووومه.
نور: نرجع لدرسنه ههههههه.
واحنه نضحك ونسولف دخلت سياره بالكراج الخلفي يعني يم الحديقه الي احنه كاعدين ندرس بيها.
ونزل شاب اول مره اشوفه.
طول وهيبه ولابس قاط وبأيده جنطه .
فات من يمنه وسلم.
اني نصيت صوتي وظميت وجهي بشعري.
وهاي الخبله ركضت ع الولد حظنته
واخذت منه الجنطه.
همه فاتو للبيت واني اباوع وراهم .
يتبع .....
