العفه تقتل احيانا بقلم/ لولو_محمد (كامله)

الجزء الاول

#lolo #لولو_محمد
(((((((((((((((((((((((((العفه تقتل احيانا ))))))))))))))))))
الحلقه الاولى

فى بيت فخم فى منطقه راقيه
فى اوضه اضاءه خافضه بنت جميله قاعده على السرير وواخده ركبها فى حضنها و منهاره مالعياط و بعدين تقوم تقف قدام المرايه و تمسح دموعها و تبص لنفسها كويس و تبص جنبها على يمين التسريحه تلاقى علبه فيها مبرد و مقص كبير و فرش تبص للمقص و بعدين تبص عالمكتب تلاقى ورق تروح تايد اباجوره المكتب و تقعد تكتب
ع/ امى الحبيبه انا اسفه اوى فى الوقت اللى بتقرى فيه الكلام ده هكون انا خلاص مت بس لازم تعرفى ان كل اللى هيقولوهولك عن بنتك كدب هيقولولك انك معرفتيش تربى بنتك هيقولولك انك بعتيها باديكى للموت لما وديتيها مصر هيلموكى انك مرضيتيش تجوزيها هيقولولك ان بنتك جابتلك العار بس قسما بالله يا امى مش حقيقى وغلاوتك عندى بيكدبوا دافعى عنى لانى مش هكون موجوده ادافع عن نفسى انتى الوحيده اللى لازم تعرفى الحقيقه عشان كدا هحكيهالك كلها من الاول 
///////////////////////////////////////////
فى بيت من دورين فى بلد ارياف
الباب يتفتح و ست بعبايه شيك تفتح الباب
الست / اهلا اهلا عاش من شافك يا هناء وحشتينى  ازيك يا دكتور عاصم
عاصم / ازيك يا ام حسن جوزك بيدايق لما بناديكى هدايه
هدايه / نورتوا والله اتفضلوا اتفضلوا
عاصم و هناء يقعدوا
هدايه / لما كلمتينى و قولتى انك جايه مصدقتش روحى من ساعتها و انا فى المطبخ مع البنات امال سيف فين واحشنى ابن الايه بقالى ياما مشوفتهوش
هناء / انا زعلانه منك اوى ياهدايه حد يعمل فى بنته كدا
هدايه / هى قالتلك
هناء / البت كلمتنى و هى منهاره مالعياط الغلبانه ملقتش حد يسمعها غيرى اعمل ايه يا هدايه جيت على ملا وشى
هدايه / فيكى الخير والله غلبت مع ابوها مصمم بيقول ان جواز البنت ستره
هناء / مقولناش حاجه بس على الاقل تكون موافقه
هدايه / و مين قالك انها مش موافقه مهى  موافقه
هناء / سالتيها و قالتلك موافقه امال بتعيط على اخرها و بتقولى اللحقينى يا خالتوا ليه مدام موافقه
راجل يدخل ووراه اتنين شباب عاصم يقوم يسلم عليهم
الراجل / اهلا بالدكتور اللى مشرفنا فى مصر و كل حته
عاصم / اهلا بابن البلد اللى ماكلنا
الراجل / فى ايه يام حسن فين الاكل
عاصم / ازيك يا حسن ازيك يا محمود وحشتونى يا عيال بقى مفيش مره تغلطوا و تيجوا تزورونى
حسن / والله يا عموا معاك حق انا فعلا مقصر معاك بس والله منزلت مصر خالص من اخر مره زورتكوا
عاصم / ملحوقه ياض ابقى تعال بص على اخوك
محمود / هو عامل ايه صحيح دلوقت يا عموا
عاصم بحزن / زى مهو الله يعينه
الراجل / طب متوديه مصحه و لا تشوفله حل
عاصم / مش هيعملوا معاه اكتر ماللى بعمله فى البيت
هناء / الله يعينه كل حاجه راحت منه الواد اكتئب و قافل على نفسه اوضته
هدايه / هى خلاص هاله دى فركشت معاه
هناء / من يوم مسقط يا قلبى كملت عليه انا روحتلها البيت والله و اتحايلت عليها و فهمتها ان دى ظروف عشان ابوه كان عامل عمليه قلب مفتوح فالواد مكنش بيزاكر
الراجل / الله يعينه دا كان مرتب عالدفعه
هناء /كلو اتبخر فى ثانيه الترتيب طار و التعيين و كمان خطيبته سابته معدش مركز فى اى حاجه و حتى اللقمه مبياكلهاش حالته تصعب عالكافر و اللى زود الطين بله انه عمال يسقط انا خلاص تعبت و مش عارفه اعمل معاه ايه
محمود / يا خالتوا نصيب هيعمل ايه يعنى و بعدين بلا مزاكره بلا قرف افتحوله مشروع احسن و لا خلوه يسافر بره يمكن لما يغير جو يتعدل
عاصم / غلبت معاه قولتله هعمله البدع و اشترتله عربيه جديده و كنت هسفره كام شهر فرنسا يغير جو مرضاش
هناء / خلاص بقى غيرو السيره انا قلبى واجعنى خلقه
هدايه / سلامه قلبك
هناء / بص يا حج سلامه انت عارف ان ربنا مكرمنيش غير بسيف و مجاش بالساهل و عشان كدا بعتبر عيالك هما عيالى
سلامه / طبعا يام سيف حد يقدر يقول غير كدا
هناء / انا مش موافقه على جوازه عفه دلوقت خالص البت لسه صغيره
سلامه / مانا متجوز اختك و هى قدها
هناء / و ماله يا حج انا مقولتش حاجه بس على اختى مكنش ليها فى العلام مكنتش عاوزه تكمل خدت الثانويه بالعافيه و اتجوزت هى حره بس عفه لا عفه عاوزه تكمل
سلامه / متكمل فى بيت جوزها
هناء / انت سالت مصطفى عن رايه فى الموضوع ده
سلامه / هى و جوزها يصطفوا
هناء / يعنى اجوزها لواحد دبلوم يقولها هتعملى بالشهاده ايه مانا اللى هاكلك و اشربك
سلامه يبص لمحمود و حسن
هناء / البت كلمتنى و هى مفلوقه مالعياط قالت انها استاذنت مصطفى و مرضاش و لما جت تتكلم معاه قلها احمدى ربنا انى جيت معاكى دوغرى كان ممكن اسكت لحد متجوزك و بعدين امنعك
سلامه / عداه العيب مصطفى طول عمره راجل و كلمته واحده و ملوش فى اللف و الدوران
هناء / و لا انت و لا اى حد فينا انا جايه هنا امنع الجوازه دى مصطفى ميتعيبش شايل ارض ابوه و اخواته البنات و ميه فل و اربعتاشر بيعرف ربنا و طيب و انا عرفاه من و هو صغير بس لو عاوز عفه يستنى اما تخلص كليه حتى لو هتاخد شهادتها بعد كدا تحطها عالحيط هما حرين بس تكمل تعليم
هدايه / اهدى بس يا هناء مهو برضه ممكن تكمل فى بيت جوزها احنا هنعد مع مصطفى و نتكلم معاه
هناء / يا حج البت صغيره هى فين صحيح
هدايه / زمانها جايه هى خرجت الصبح مع بنت عمها امينه كانوا بيشتروا حاجات
هناء / قولت ايه يا حج ريح قلبى اللهى يريح قلبك
سلامه / بس انا اديت اخويا كلمه
عاصم / و مش هترجع فى كلمتك عفه لمصطفى و مصطفى لعفه بس انت من حقك تحط شرط قبل كان بها مقبلش يبقى مفيش نصيب
سلامه / بس الشرط ده مكنش موجود لما قرينا الفاتحه
عاصم / مهو لما قريتوا الفاتحه مختوش راى البت برده و قريتها انت و اخوك و مصطفى لوحديكوا و بعدين جيت قولت لبنتك يا عفه انا قريت فتحتك النهرده على ابن عمك و البت معرفتش ترد عليك و لما قابلت مصطفى و اتكلمت معاه الواد قفلها
هناء / البت بتخاف تقولك لا البت استنجدت بيا عشان مش راضيه
هدايه / هى عارفه انك انتى و الدكتور ليكوا خاطر كبير عند الحج
بنت و شاب يدخلوا
هدايه / اهى جت
عفه تدخل تجرى تحضن خالتها
هناء / ازيك يا مصطفى
مصطفى / الحمد لله ازيك يا خالتوا
هناء / طالعه منك زى العسل مع انى زعلانه منك مووووت
مصطفى / و لا اقدر خير
هناء / عفه انتى عاوزه تكملى الجامعه صح
عفه تبص لابوها و تبص لمصطفى و اخواتها جنب بعض و تسكت
عاصم / متخافيش يا عفه اتكلمى قولى
عفه تبص لابوها تانى
سلامه / قولى يا عفه متخافيش
عفه / بصراحه اه انا لو كنتوا قولتولى انى هخلص ثانوى و اتجوز مكنتش تعبت نفسى فى المزاكره كنت هنكرت كدا و خلاص و اهو فى الاول و الاخر شهاده هتترمى فى الدرج و هتجوز لكن انا كان نفسى يبقى معايا شهاده
مصطفى / احنا اتكلمنا فى الموضوع ده و نهيناه
عقه / لا منهيناهوش ابويا قالى اتكلمى
مصطفى يبص لحسن و ينفخ
سلامه / اسمع بس يا مصطفى و نفهم هى عاوزه ايه
مصطفى / عاوزه ايه يا عمى دلوقت عاوزه شهاده بكره عاوزه تشتغل و بعدين جامعه ايه اللى هى عاوزه تخشها انت عارف الطريق من هنا لاقرب جامعه على يدك قد ايه دى سفر و شحطته و مواصلات على ايه كل ده يا عمى هو انا هخليها ناقصها حاجه
عفه / انا عاوزه شهادتى ان شالله بعد كدا ابلها و اشرب ميتها انا حره
مصطفى / شاهده يا طنط هناء بتكلم ازاى اصلا
هناء / مانت يادوب لسه قارى فاتحه و بتقولها لا على ابسط حقوقها المفروض تقف جنبها لحد متوصل للى هى عوزاه
مصطفى / دا لو كان اللى هى عوزاه ده فيه صالح لكن .... اقول ايه بس استغفر الله العظيم متقول حاجه يا حسن مانت دخلت جامعه و عارف بيحصل ايه
حسن / بيحصل ايه يا مصطفى عادى يعنى
مصطفى / متخلنيش افتح بقى يا حسن انا و انت عارفين و انت حاكيلى كل حاجه
محمود / كل مكان فيه الحلو و الوحش و عفه متربيه و انا عن نفسى بعد اذن بابا يعنى موافق انها تكمل جامعه الاول
مصطفى / كدا يا محمود
محمود / حقها مدام هى عاوزه كدا يبقى حقها و انا متكفل انى اوديها و اجيبها كل يوم
مصطفى / و انت ليه خلاص يا عفه ماشى مدام الكل موافق انا مش معترض هخليكى تكملى تعليمك بس تخليكى فاكره
عفه / متهددنيش انا مطلبتش غير حقى انا جيتلك الاول و انت رفضت كنت عاوزنى اعمل ايه يعنى
مصطفى / براحتك يا عفه اللى تشوفيه
حسن / طب هو السؤال بقى الفرح هيتاجل و لا هيتعمل فى معاده
مصطفى / و ايه علاقه الفرح بالجامعه
عاصم / ازاى يعنى يا مصطفى
مصطفى / هتكمل فى بيت جوزها
عفه / لا واول مدخل بيتك تقولى مفيش جامعه
مصطفى / انتى زودتيها اوى يا بت هو فى ايه
سلامه / مصطفى
عفه تعيط حسن يروح يقعد على ايد الكنبه جنبها و يطبطب عليها
عفه / انا اصلا موافقتش عالجوازه دى
.........................