العفه تقتل احيانا بقلم/ لولو_محمد (كامله)

الجزء الواحد و العشرون و الثاني و العشرون

#lolo #لولو_محمد
(((((((((((((((((العفه تقتل احيانا ))))))))))))))))
الحلقه الواحد و العشرون + الحلقه الثانيه والعشرون

الاتنين يقعدوا عالسرير
سيف / انا عارف انتى حاسه بايه لما عرفتى تخيلى احساسى انا لما عرفت
عفه / ايمن اللى كان بيحطهالك فى العصير صح
سيف / انتى عرفتى منين
عفه / انت قولتلى
سيف / انا ازاى و امتى
عفه / دخلت عليك فيوم الاوضه و كنت بتعيط جامد و قولتلى بس مقولتش مين
سيف / انا
....................
عفه / انت مش فاكر و لا ايه
سيف / خالص مش مهم اه هو كان بيجى يزاكر معايا هنا الكلام ده من خمس سنين كنت فى تانيه هندسه ساعتها اللى هى تالته فى اى كليه تانيه هو كان بياخد حبوب للصداع و عشان بيسهر طول الليل بيزاكر و مع الوقت ادمنها نصحته انى اقول لبابا و هنعمل اننا طالعين رحله اسبوعين و يروح المصحه منغير ماهله يعرفوا مرضاش و قالى انه مرتاح كدا هاله طلبت منى اقطع معاه بس انا كنت اهبل اوى و مسمعتلهاش قولت انه صاحبى من ابتدائى ازاى اتخلى عنه فى اول مطب فى حياته
عفه / لكن هو باعك
سيف / لما كان بيجى كان بيقولى متعملنا كوبايتين عصير و لا كوبايتين شاى و لا تجيب لقمه كنت بقوله و انت يعنى غريب متقوم تعمل لنفسك كان بيقوم و بيعمل اللى هو عاوزه انا وحيد امى و غالبا ماما و بابا مش موجودين و مكنش فى زينب ايامها فكان بياخد راحته مره فى مره لقيت الصداع مبيفارقنيش و الوجع لحد فيوم ملقيته بيدينى شريط و قالى حسيت باللى كنت بحس بيه بطل بقى تقولى اتعالج كلمه منى كلمه منه ضربنا بعض بس انا الوجع كان هيفرتكنى كنت بموت بجد
عفه / مروحتش لخالو ليه
سيف / روحتله و قولت انى هثبت للكلب ده انى هتعالج و مش هخليه يشمت فيا بس للاسف روحت البيت لقيته راح المستشفى روحتلهم قالولى ان بابا فى العمليات و انه بيعمل قلب مفتوح كنت هقوله ازاى
عفه / فى مليون مصحه و مركز علاج ادمان فى مصر مروحتش اى واحد ليه فى السر
سيف / انتى مجنونه كلهم عارفين بابا بمجرد مهدخل اى واحده فيهم بابا هيعرف و مش بعيد يتعمل دعايه للمصحه دى على قفايا ابن الدكتور عاصم عبد المعز اشهر دكتور لعلاج الادمان مقدرش يعالج ابنه و بيتعالج عندنا
عفه / كان المفروض
سيف / كان المفروض حاجات كتير اوى بس مقدرتش اعملها الشريط كان فى جيبى مش عارف ازى موقعش منى و ازاى خدته اصلا بس كان معايا و الوجع كان فظيع قولت هاخد حبايه عشان اعرف افكر
عفه / و حبايه تجر حبايه
سيف / روحت اشتريت مالصيدليه و لما الصيدلى خد باله انى باخد كميه كبيره قولتله ان والدى عامل عمليه لحسن الحظ كان عارف انا مين بقيت اجيب كل مره من صيدليه شكل و لما شح فى السوق اتعرفت على العيال الزباله فجاه و السنه اللى فاتت ايمن بقى ملك المزاج و منع كل العيال الصغيرين يبيعولى لو عاوز لازم اروح لعنده و اطلب منه
عفه / معقول
سيف / غصب عنى الوجع بيودينى بيبقى هاين عليا اموت بس غصب عنى انتى حاسه انا بقولك ايه
عفه تهز راسها اه
سيف / بقيت باخد كميه كبيره كل مره عشان مشوفوش و بقلل الجرعه على قد مقدر بس من يوم مجيتى زادت غصب عنى عشان مكنتش عاوزك تاخدى بالك من وجعى
عفه / و ازاى خالو مخدش باله منك خالص
سيف / انا كنت بزاكر بس لما دخلت الامتحان لقيتنى مش فاكر اى حاجه و فى ماده مالمواد نمت و مهما يعملوا مصحيتش انا حتى محستش بيهم بيشدوا الورقه منى سقطت الكل بدل ميعاقبنى اتعاطفوا معايا قالوا انى اتاثرت بعيا بابا و قالولى مش مهم هاله قالتلى يانا يالقرف ده و لحد متبطله متكلمنيش عملت البدع عشان ابطل لدرجه انى مره رميت الحبوب فى التويلت كلها بس تقولى ايه نزلت زى الكلب اشترى غيرها
عفه / و مرجعتلهاش
سيف / عرفتى مين الواطى بقى انا
عفه / بس خالو بقى كويس ليه مقولتلوش بعد كدا
سيف / كان فات الوقت خلاص معدش عندى اللى اعيش عشانه خلاص اتبخر السبب الوحيد اللى مخلانيش اندمج فى القرف انى مكنتش عاوز ايمن الكلب يشمت فيا
عفه / و هو كدا مش شمتان ضيع خمس سنين من عمرك يا سيف خمس سنين و انت فى العذاب ده
سيف / و انهى عذاب انا لما بشوف صورى القديمه او بقابل اى حد كان يعرفنى بروح اعيط لما كنت عندكوا و كل واحد يدعلى بكلمتين طلعت الاوضه و فضلت اعيط لحد النهار مطلع ركبت اول قطر و رجعت و حبست نفسى فى الاوضه عشان محدش يشوفنى و انا بعيط بكره ان حد يواسينى بكره لما بشوف نظره صعبانيه فى عنيهم
عفه / بايدك تغير كل ده انا هقف جنبك هساعدك عمرى مهسيبك يا سيف بس المهم تكون عاوز لان للاسف مش هقدر اتوجع مكانك
سيف / روحى يا عفه البلد و اتجوزى مصطفى مصطفى هيبعدك عن القرف ده
عفه / و اعيش باقى عمرى فى عذاب انا مبحبش مصطفى اه بحبه زى اخويا لكن مقدرش اعيش معاه مش قادره اتخيله مش بحبه يا ناس مش بحبه انت فاكر ان الكليه فارق معايا اعلام من غيرها انا بس بكسب وقت
سيف / و ليه مقولتيش
عفه / قولت و عيطت بس محدش سمعنى اهم حاجه الارض متروحش لحد غريب الارض اهم منى اهم من سعادتى
سيف / انتى اكيد غلطانه
عفه / حسن هيتجوز امينه و محمود هيتجوز سحر لنفس السبب بس انا مش هقدر
سيف / و لما تخلصى كليه هتعملى ايه
عفه / لسه قدامى سنتين و نص انت لو مكنتش روحت جبت مصطفى كنت كبرت المشكله و نهيت الموضوع
سيف / انا مروحتش غير عشان محمود قالى انك هتروحى تعتزرى لمصطفى قالى ان عموا سلامه هيجبرك تروحى مهنش عليا تروحى تصالحيه بعد اللى عمله كان المفروض هو اللى يجى و عارف قد ايه بتحبى ابوكى و مكنتيش هتقدرى ترفضيله طلب
عفه / انت روحت عشانى
سيف / امال عشان مين ميولع مصطفى و لا يهمنى بس انتى تهمينى و كرامتك عندى غاليه لو مكنش مصطفى احسن منى مكنتش عمرى سبته يخطبك اصلا
عفه / و مين قال انه احسن منك مين اللى اقنعك بكدا
سيف يطلع علبه الدوا من جيبه
عفه / بطل يا سيف بطل و ارجع احسن منه
سيف / انتى مجنونه مقولتلك مش هقدر
عفه / انا بالنسبالك ايه يا سيف
سيف / ايه السؤال ده
عفه / بص يا سيف انا مبعرفش اللف و ادور مالاخر كدا بص فى عينى و قولى انى مجرد اخت بالنسبالك و انى عمرى مهكون غير كدا قولها و انا هرجع البلد بكره و اتجوز مصطفى بعده قولى انك مبتحبنيش و انك مش قادر تنسى هاله
سيف يبصلها و ساكت
عفه / قولها مره واحده يا سيف و انا هرجع كل حاجه زى مكانت
سيف يمسك ايدها اليمين و يلف الدبله فى صابعه عفه تقلعها
عفه / انا لبساها غصب لو قولت انك بتحبنى هقف قدام الدنيا كلها عشانك بس لو بتحبنى
سيف / هتقفى قدام الدنيا عشان ايه بطلى هبل بصى لنفسك الف من يتمناكى لكن انا فاشل و صايع باخد مصروفى من ابويا و بصرفه عالمخدرات ابويا بيجبلى كل سنه عربيه جديده و موبايل جديد عشان فاكر انى زعلان انى بسقط لكن ميعرفش ان ابنه فاشل و يعر
عفه / هتتغير هترجع زى مكنت حتى لو اضطريت اربطك فى السرير
سيف / هههههههه زوقك وحش اوى فى الرجاله يا عفه
عفه / لا مش وحش حلو انا عمرى مهقتنع انى عشت ستاشر سنه من عمرى بحلم بوهم بدعى ربنا يجمعنى بواحد وحش عمرى مهقتنع ابدا
عفه تتنهد
عفه / انا بحبك يا سيف ارتاحت بحبك من يوم موعيت عالدنيا بحبك انت و بس و مصطفى عارف و عشان كدا بيكرهك و بيغير منك لانه عارف و حاسس الكل عارف انا من صغرى و انا بقول انى مش هكون غير ليك سكت بس لما قالولى انك خطبت هاله احنا كان فى بينا اتفاق و وعد
سيف / انتى لسه فاكره
عفه / و عمرى منسيت انا وعدتك انى مش هكون لغيرك
سيف / و اخرته يا عفه هتعذبى نفسك عشان واحد ميستاهلش
عفه / قول انك مبتحبنيش
سيف / انا بكرهك يا عفه
عفه تبص فى الارض
سيف / و بكره جمالك
عفه تبصله باستغراب
سيف / جميله لدرجه الاستفزار بكره لمعه عينك لما ببصلك بكره برائتك و ذكائك بكره احساسى لما بتحسسينى ان ليا قيمه لما بتيجى تاخدى رايى و كان رايى مهم بكره اليوم اللى جيتى فيه و اديتينى سبب اعيش عشانه ايوه انا بكرهك
عفه تبتسم بخجل
سيف / و ده سبب كمان اكرهك عشانه
عفه / ايه
سيف / لما بتحاولى تدارى دحكتك و انتى مكسوفه ووشك لما بيحمر عشان كدا لازم تمشى لانى مش هقدر اقولك غير انى بكرهك
عفه / و انا بحبك يا سيف
سيف / انتى بتخونى مصطفى مش اكتر اى كان الكلام اللى دار بنا مش هيطلع بره الاوضه دى و هيتنسى هحطه فى ركن الزكريات الحلوه مع باقى حياتى و انساه
عفه / دا اخر كلام عندك
سيف / لو عاوزه تقولى لبابا قوليله انا مش هحملك اى مسؤليه ناحيتى و انا اسف على كل حاجه بس انا مش هقدر اقدملك اى وعود مش هعرف اوفيها
عفه / و انا اسفه يا سيف اسفه على كل لحظه اتمنيتك فيها و اسفه على كل مره نمت معيطه عشان انت نسيت العهد اللى بنا و خنتنى و اسفه انى ضحيت بكرامتى و قولتلك على مشاعرى و بعفيك من اى مسؤليه ناحيتى بس ياريت تستحملنى الفتره دى و انا اوعدك انى هكون اخف ضيفه مش هتحس بوجودى حتى دلوقت لو سمحت سبنى انام عندى كليه الصبح
سيف / انا اسف يا عفه
عفه / وفره اطلع بره
................
بعد فتره فى البلد
سلامه / ايه رايك يا حسن الاسبوع الجاى هيبقى الفرح مدام كل حاجه جاهزه نستنى ليه
حسن / والله انا معنديش مانع
سلامه / على بركه الله انا هكلم عمك
حسن / خلاص تمام
مصطفى / مالك يا عفه مش بتاكلى ليه
عفه / باكل
مصطفى / عقبالنا
عفه / باذن الله
محمود / الا صحيح يا بابا هو انا هفضل مستنى كتير يعنى
سلامه / هههههههههههههههههه هانت كلها سنه و عروستك تكمل ستاشر و نجوزكوا علاطول
محمود / ايه ده يعنى حسن السنادى و انا السنه الجايه و مصطفى بعدينا بسنه نعمله بقى فنفس اليوم عشان نحتفل بيه سوا بعد كدا
حسن / افكارك يا شيخ لا ياعم كل واحد ينقى يوم لوحده انت عارف البنات بيبصوا لبعض
مصطفى / انا عن نفسى هعمله يوم عيد ميلاد عفه
حسن / دى ايه الدماغ دى اهو توفير برده بدل متجيب هديه عيد ميلاد و عيد جواز تجيب واحده
محمود / هدايا ايه يا عم احنا بتوع الكلام ده برده هو كفايه عليهم احنا احسن هديه
عفه / انا شبعت عن اذنكوا عاوزه انام
محمود / خلاص هنجيب هدايا متزعليش
عفه تطلع الجنينه و تقعد عالمرجيحه مصطفى يقعد جنبها
مصطفى / مالك
عفه / مفيش زهقانه شويه
مصطفى / تحبى اخدك بكره افسحك بعد الصلاه
عفه / انت بتحبنى بجد يا مصطفى
مصطفى / امال هستحمل جنانك ده يعنى ليه غاوى قرف مثلا
عفه تبصله
مصطفى / طبعا بحبك يا بنتى
عفه / ليه
مصطفى / هو ايه اللى ليه انتى بنت عمى
عفه / و انا اولى بيكى جمله مستفزه بجد عن اذنك
مصطفى / لا استنى
عفه / الموضوع موضوع ارض و بس عشان الارض متروحش للغرب مش كدا
مصطفى / على كدا بقى كان الاولى انى افكر فى اخواتى مش كدا لان لو كلامك صح احنا كدا المتضررين
عفه / انت بتقول ايه
مصطفى / بعد عمر طويل يعنى انتى هتورثى قد ايه اقل مالخمس ده اللى انا هاخده مع ان نصيب اخواتى البنات فى ارضنا النص يبقى احسبيها صح
عفه / مش قصدى
مصطفى / بصى بغض النظر عن الارض انتى لحد دلوقتى محلتكيش الا الهدمه اللى عليكى صح و لا انا غلطان و كام حته دهب بتوعك انا يا ستى عاوزك منغير الدهب و لا هدوم
عفه تبصله
مصطفى / انا اقصد يعنى بفستان الفرح و انا اللى هجيبهولك كمان و مش من فلوس ابويا من فلوسى و لعلمك شبكتك ابويا محطش فيها جنيه انا اللى بقالى زمن بحوشلها من و احنا عيال عندى صندوق خشب بحط فيه الفلوس و مكتوب عليه شبكه عفه من و انا فى اعدادى شوفى بقالى قد ايه
عفه / اعدادى ايه دانا كنت مدخلتش مدرسه باين و لا دخلت
مصطفى / انا بحبك من اول دحكه دحكتيها من يوم مقالوا عفه لمصطفى و انا عمرى مبصيت لغيرك
عفه / بس انا
مصطفى / انتى يا عفه ملكيش زيى بت عمى و مكنتش هقول انا اولى بيكى لا كنت هقول مربيكى على اديا و عارف اخلاقك ضامن انك هتصونينى هتسندينى يوم مقع و اتعب مانا مش هفضل واقف على رجلى طول العمر مسيرى هتعب و هقع
عفه / بعد الشر عنك يابن عمى
مصطفى / انا عارف انك مش مقتنعه بيا اوى خصوصا بعد مدخلتى الجامعه و كعبك على علينا
عفه تبصله
مصطفى / بس لعلمك اللقمه الحلال اللى بكسبها من عرق جبينى احسن من مليون شهاده انا مش جاهل انا بعرف اقرا و اكتب و قريت لناس كتير اوى مفتكرش انك انتى نفسك فكرتى تقريلهم بصى يا عفه انا بحبك مالاخر اه بحبك و مش هسالك بتحبينى و لا لا لان الاجابه واضحه فى عينك
...................
عفه / متزعلش منى يا مصطفى
مصطفى / خدى وقتك يا عفه حتى لو هستنى الاربع سنين انا راضى مش عاوزك تتجوزينى غير و انتى بتحبينى مش عاوزك فيوم تندمى او تحسى ان فى حد جبرك عليا صحيح انتى كدا كدا هتتجوزينى
عفه تدحك و مصطفى يبتسم
مصطفى / اصل صحيح يعنى هتلاقى احسن منى فين طب دانا لقطه و انا واثق انك ان شاء الله من نصيبى اصل الطيبون للطيبات و انا والله طيب ميغركيش شويه الجعجعه بتوعى انتى عرفانى
عفه / عرفاك
مصطفى / خلاص يا عفه عاهدينى تدينى فرصه
عفه / اسمع يا مصطفى انا عاوزه اقولك حاجه
مصطفى / قولى
عفه / انا محدش سالنى ان كنت موافقه عالجوازه دى و لا لا و محدش مهتم يعرف رايى و فكل مره بتكلم بيسكتونى مقدرش اكسر لابويا كلمه و لا مخلوق فبيتنا يقدر انت ابن عمى بس اللى بيحصل ده هيخلينى اخسرك لانك مش برضايا
مصطفى / و المطلوب يا عفه
عفه / انا مش هقدر اقولك افسخ الخطوبه و حاول تكسب قلبى بس هقولك انى هسيبلك الباب موارب و مش هقفله بس انت مش هتقدر تكسب قلبى يا مصطفى على الاقل محتاج معجزه
مصطفى / مفيش حاجه اسمها مستحيل ربنا بينبت الزهره فى قلب الحجر مش هيقدر ينبت حبى فى قلبك دا حتى يبقى كفر و اللعياذ بالله انا سعيد بالحوار ده و فرحان انك قولتى اللى فى قلبك و هحطه فى عينى و عقلى و قلبى بس مسيرك يا ملوخيه تيجى تحت المخرطه
عفه / هههههههههههههههههه
مصطفى / قومى يلا نقعد معاهم قومى كملى اكلك انتى مكلتيش النهرده تعالى يا شيخه لسه قدامى سنتين اربعه و عشرين شهر سبعميه و تلاتين و نص يوم تلاته و اربعين الف تمنميه و تلاتين دقيقه و احسبى انتى الثوانى انا على قدى فى الحساب
عفه / كدا و على قدك فى الحساب امال انا ابقى ايه يلا ندخل يا مصطفى يلا
..........................
فى البيت فى مصر
هناء / الف مبروك و الفرح هيبقى فين
عفه / حجزوا قاعه كبيره جنب البلد
هناء / ربنا يتممله على خير عقبالك
عفه / يارب
سيف يعدى و يقعد وسطهم و فايده تفاحه بياكلها
هناء / هتلبسى ايه فى الفرح بقى انتى اخت العريس لازم تبقى قمر اربعتاشر
عفه / لسه والله مش عارفه
سيف / انا ممكن انزل معاكوا تشوفولكوا فساتين
عفه / لا شكرا ارتاح انت انا هبقى اكلم مصطفى يجى يلف معايا
سيف / كويس عشان يدفع هو
عفه / لا عشان ينقى الجرافته لون الفستان انا راجعه تعبانه و داخله انام تصبحى على خير يا خالتوا
عفه تدخل اوضتها
...............
فى الكليه
عفه / كلكوا معزومين يوم الخميس على فرح اخويا الكبير
انجى / انا هاجى وش بس انتوا هتعملوه فين
عفه / فى البلد بس لعلمك احنا البيت عندنا واسع يعنى اى حد ممكن يبات للصبح
انجى / مش عارفه ماما هتقول ايه
سما تدخل / انا جايه دا لو عفه يعنى عزمتنى
عفه / تنورى
انجى / بصى لو طارق جه ممكن احاول اقنع ماما
طه / و لو طارق جه انا جاى وش
طارق / انا جاى وش اصلا
سيرين / الله طب و انا هفضل هنا لوحدى لو مامه انجى وافقت هخلي ماما تكلمها و باذن الله هاجى
انجى / و هتلبسى ايه بقى
عفه / لسه مقررتش بس اليومين دول هكون مظبطه باذن الله
سيرين / و الكوافير هتبقى ايه بقى
عفه / هبقى مع العروسه عند واحده فى البلد بس كويسه اوى
سيرين / لا انسى انا هزوقك بنفسى هتطلعى موز موز يعنى
عفه / باذن الله ثوانى تليفون
عفه تقوم تتكلم فى التليفون
عفه / الو
مصطفى / انا قربت اوصل خلاص
عفه / ماشى انا فى الكليه تعال
مصطفى / نصايه بالكتير و ارنلك تطلعيلى
عفه / اوك ماشى سلام
عفه تقفل و تتصل برقم تانى
عفه / الو
سيف / الو
عفه / سيف معلش ممكن تيجى تاخدنى عم جمال غير متاح و انا مش عاوزه اركب تاكس لوحدى ممكن
سيف / حاضر
عفه / شكرا
عفه تقفل / مش فارقه معاك هنشوف
عفه ترجع تقعد مع صحباتها
انجى / مصطفى
عفه / اه هننزل نلف عالفستان والبدله بتاعته
انجى / اووووه هاو كيووت
عفه / بطلى افورتك دى بقى
انجى / خلاص خلاص
شويه و تليفون عفه يرن
عفه / الو ايوه انا طالعه اهو سلام
عفه تطلع تلاقى مصطفى واقف تركب معاه و تمشى
مصطفى / تحبى تتغدى الاول و لا نلف الاول
عفه / بقولك ايه نخلص الفستان الاول و بعدين يحلها حلال
مصطفى / ماشى كلامك
..................
سيف يوصل قدام الكليه يرن على عفه رنتين و الخط يتقطع يتصل تانى يلاقيها غير متاح
سيف / دا ايه ده
سيف يدخل الجامعه و يبدا يلف حوالين الكليه بالعربيه و يدور عليها ميلاقيهاش يتصل بالتليفون تانى يلاقيها غير متاح يتصل بحد تانى
سيف / ايوه يا ماما .... لا انا كويس هى عفه روحت ..... مش عارف قالتلى تعال خدنى و تليفونها غير متاح ..... معكيش رقم اى حد من صحابها ..... انا هخلينى واقف قدام الكليه شويه لو روحت كلمينى
...................
فى محل بدل
مصطفى / ايه رايك
عفه / حلوه
مصطفى / تمام هاخدها و كدا اخيرا نبقى خلصنا
عفه / بالسرعه دى معقول
مصطفى / هو انا زيك لازم اقيس عشر فساتين عشان انقى واحد
عفه / ماشى نروح بقى
مصطفى / ايه زهقتى منى بالسرعه دى
عفه / لا بس انا نسيت اقولهم انك جاى النهرده و زمان خالتوا قلقانه عليا
مصطفى / متتصلى بيها تطمنيها
عفه / تليفونى فصل
مصطفى / خدى موبايلى
عفه / مانا والله مش حافظه النمره اعمل ايه بس
مصطفى / اممم سهله انا هكلم عمتى تكلمها
عفه / اوك تمام
...................
سيف قدام الكليه
سيف / هو انا المفروض افضل واقف قدام الكليه قد ايه يعنى انا مروح تتصرف بقى
سيف يدور العربيه يشوف سما خارجه مالكليه بتدحك و تركب عربيه مع حد و تمشى يفتكر حوارهم عند ايمن
سما / ابقى سلملى على عفه
ايمن / كبرت بنت الايه و بقت عروسه و اتخطبت
سيف / لا مش ممكن
سيف يسوق عربيته و يطلع جرى على فيلا ايمن و اول ميركن العربيه و لسه هينزل يجيله تليفون
سيف / الو ايوه يا ماما ..... الحمد لله الحمد لله .... لا لا حصل خير تمام كويس انا مروح اهو تمام
سيف يتنهد و يركب العربيه تانى و يمشى
...................
قدام البيت
مصطفى / هتوحشينى
عفه / ماشى
مصطفى / بلى ريقى يا شيخه بكلمه
عفه تبتسم
مصطفى / ماشى هعديها اشوفك بقى الاربع
عفه / عندى كليه الخميس هخلص المحاضره و هاجى علاطول
مصطفى / كدا هتيجى عالفرح علاطول
عفه / اعمل ايه طويب سبها لله هبقى اشوف
مصطفى / ماشى انا همشى بقى هتعوزى حاجه
عفه / شكرا
مصطفى / سلام
...............
فى الشقه
هناء تفتح الباب لعفه
هناء / انتى يا لهوى عليكى
عفه / فى ايه يا خالتو
سيف يفتح باب اوضته و يقف
عفه / سورى يا سيف التليفون فصل
سيف يشاورلها
هناء / ايه ده جبتى الفستان خشى قيسى و فرجينى
عفه / حاضر ثوانى
عفه تدخل تقيس الفستان و تطلع بيه بعد شويه فستان فيروزى ستان بتطريز دهبى رقيق و نازل على واسع
هناء / ياخواتى عليكى عسل
سيف / و الجرافاته نفس اللون
عفه تهز راسها اه
سيف / كويس
هناء / يخواتى عليكى طالعه قمر فيه
عفه / هدخل اغير بقى
...................
سيف قاعد فى المكتب عالكنبه بيشتغل عاللاب عفه تدخل و مناخيرها لفوق و هو مش واخد باله
عفه / انت مخاصمنى بقى
سيف يرفع عينه
سيف / كنتى بتقولى حاجه معلش مخدتش بالى
عفه / دانت زعلان اوى بقى
سيف يشاورلها جنبه عالكنبه تروح تقعد
سيف / انتى عارفه انا كنت هعمل ايه النهرده بسببك
عفه / لا كنت هتعمل ايه
سيف / غالبا يا هموت حد يا هموت
عفه / يااااه ليه يعنى
سيف / اهو الشيطان لعب فى دماغى بقى افتكرت حد عمل فيكى حاجه
عفه / قال يعنى كنت هتزعل عليا
سيف / انتى عبيطه يا بت و لا ايه حكايتك انتى بجد متخلفه للدرجادى
عفه / متشتمش انت هتنسى نفسك و لا ايه مقولتليش ايه رايك فى الفستان
.....................