العفه تقتل احيانا بقلم/ لولو_محمد (كامله)

الجزء الخامس و العشرون

#lolo #لولو_محمد
(((((((((((((((((العفه تقتل احيانا ))))))))))))))))))))
الحلقه الخامسه و العشرون

هناء / و برده خطر انك تاخد اى دوا منغير اشراف طبى
عاصم / دى حقيقه دا غير تعارضات الادويه احيانا واحد ياخد دوا لمجرد علاج البرد ممكن يموت لان المواد اللى فى الدوا بتتعارض مع ادويه تانيه المريض بياخدها
هناء / صح عشان كدا لازم استشاره الدكتور قبل اخد اى دوا لان حتى الادويه لاى مرض حتى لو برد بيجى وقت و مفعولها بيروح بتبقى انت بتاخد الدوا لكن هو مش شغال فتزود الجرعه لنفسك و هكذا لحد متحصل كارثه
عاصم / فاكره الحامل اللى حكيتيلى عنها
هناء / دى كانت مصيبه كان عندهم تربيزه ازاز فى البيت اتكسرت و دخلت حته كبيره فى رجلها جوزها الاهبل بدل مياخدها للدكتور يطهر جرحها و يخيطه البيه اداها حبايه مسكن قويه هو نفسه كان بيتعاطاه و كتمولها الجرح ببن
..................
عفه / معقول
هناء / البيبى راح يا عينى دانا كنت هتجنن بقيت اللطش فيهم زى الهبله
عاصم / انا لحد –دلوقت مش فاهم انتى انفعلتى اوى على ايه
هناء / ازاى بس المتخلف قتل ابنه بايده لانه استصعب يودى مراته لدكتور يبص على رجلها رجاله متخلفه
عفه تبص لسيف و تكمل اكل
.......................
بعد فتره عفه بتلبس و نازله
سيف / انتى رايحه فين
عفه / خارجه مع انجى زهقانين و هنروح نتعشى و نرجع
سيف/ محدش قالى ليه
عفه / انا قولت لخالتوا ووافقت و عم جمال هيوصلنا و يروحنا
سيف / طب غيرى هدومك اللبسى حاجه من بتاعه الكليه
عفه / ليه يعنى ماله الطقم وحش
سيف / حلو بس غيريه برضه
عفه / لا مش هغيره و هنزل كدا انا مش لابسه حاجه مكشوفه و لا عريانه عشان اغيرها و لا هى تحكمات و خلاص
سيف يبصلها و يسكت
عفه / حتى لو تحكمات و خلاص ايه رايك بقى انى هنزل بيه انت اصلا بتتحكم بصفتك ايه انت حياله ابن خالتى و متنساش يا سيف انا يمكن زمان كان رايك يهمنى بس دلوقت لا خلاص انا مش هسمع غير لدماغى و بس
سيف / براحتك يا عفه حقك عليا اعملى اللى يريحك
سيف يدخل اوضته عفه تدخل وراه
عفه / ايه ده بالبساطه دى ايه مفيش شخصيه خالص
سيف / يعنى اقولك ايه انى غيران حد غيرى يشوفك بالجمال ده و انك فى اللون الابيض عامله زى الملايكه
عفه وشها يحمر
سيف / بصى يا عفه انا مبتحكمش فيكى انا بخاف عليكى اه معاكى حق انا مليش حق اتدخل نهائى بس غصب عنى مبقدرش اشوفك كدا و اسكت
عفه / ماشى هغيره
سيف / شكرا
........................
بعد فتره فى البيت
باب الشقه يخبط هناء تفتح تلاقى شابه بتعيط
البنت / سيف موجود
هناء / انتوا ليكوا عين تيجوا هنا بعد اللى حصل
البنت / ارجوكى يا طنط خلينى اقابله ثوانى بس
سيف يطلع من اوضته و يروح للباب
سيف / هند فى ايه ادخلى ادخلى مالك
هناء/ تدخل فين مكفايانا بقى
سيف / لو سمحتى يا ماما خير يا هند طنط جرالها حاجه هاله فيها حاجه فى ايه
عفه تطلع من اوضتها
هند / هاله مش لاقينها ماما هتتجنن عليها انا سبت جوزى و نزلت انت مشوفتهاش و لا تعرف عنها حاجه
هناء / و احنا مالنا و مالكوا
سيف/ لا مشوفتهاش انا زى موعدتها بعدت عنها خالص انا حتى مكنتش بروح الكليه غير عالامتحانات بلغتى البوليس
هند/ بلغنا مفيش حاجه تليفونها نسيته فى المكتب اللى كانت بتشتغل فيه سالنا فى المستشفيات كلها و الاقسام ملهاش اثر اخر مره اتشافت كانت فى الشركه و بعدين المدير زعقلها بيقولنا انها مكنتش كويسه بتيجى مبتشتغلش علاطول بتشرب قهوه و بس مبتشتغلش فزعقلها مشيت مرجعتشش
سيف / راحت فين طيب مكنش لها اصحاب اى حد
هند / المشكله ان حتى خطيبها اختفى تليفونه مقفول روحنا سالنا مكان مكان عايش البواب قال انه كان ماجر شقه شهر و مشى و فى الشغل نفس الكلام و فص ملح و داب
سيف / طب اديتوا اوصافه للبوليس
هند/ الظابط قال ان مفيش حد بالاسم ده و صاحب البيت اللى كان ماجر فيه طلع العقد اللى كان معاه و خدنا رقم البطاقه و كشفنا عليه و الشركه اللى كان بيتمرن فيها رقم البطاقه مضروب
سيف / انتى بتقولى ايه
هند / حتى الشبكه اللى كان جايبها طلعت فلصوا انا قولت يمكن تكون قابلتك احنا بس عاوزين نعرف هى عايشه و لا ميته
سيف / انا مش فاهم حاجه
هند / و لا احنا محدش فاهم حاجه ماما بتقول انها كانت تعبانه اوى الفتره الاخيره و ماجد وقتها كان اختفى
سيف / تعبانه ازاى يعنى
هند / اقولك ايه بس يا سيف معرفش مشوفتهاش ماما بتقول كان داخل عليها دور برد جامد و قالتلها تروح تكشف انا عارفه انك مش هتقدر تساعدنى بس انت كنت اخر امل عندنا انا وريت صورتها للبواب قال مش فاكر دى بقالها كتير اوى مختفيه
هند تعيط و عفه تاخدها فى حضنها و تبص لسيف اللى بيبص و ساكت
عفه / باذن الله هتبقى بخير
هند / انا بس عاوزه اطمن عليها انا حاسه انها اتخطفت الناس بيخوفونا بيقولوا انهم ممكن يكونوا تجار اعضاء لان ازاى خطيبها كمان يختفى و كل تفاصيله تطلع كدب
هناء / و هو انتوا مسالتوش عن خطيبها ده قبل الخطوبه و لا مصدقتوا
هند / ماما بتقول انها سالت بس يعنى هتسال مين سالت البواب والشركه هى يعنى كانت هتعمله فيش و تشبيه و بعدين هى و هاله كانوا لوحديهم منغير راجل و لا ضهر الله يعينها امى
عفه / هترجع باذن الله انا متاكده انها كويسه
هند / يارب انا خايفه عليها اوى
سيف / انا هسال صحابنا القدام كلهم لو عرفت اى حاجه هقولك
هند / سالتهم كلهم و انت اخر واحد محدش شافها من زمان اوى و لا يعرفوا عنها اى حاجه
سيف / سالتى مين
هند / سالت وفاء و مريم و حسناء حتى مصطفى و ممدوح سالتهم محدش شافها بس ايمن ملقيتوش و معرفلوش عنوان
سيف /ايمن؟؟؟
هند / هو اللى باقى يا سيف معدش فاضل غيره بس هى مستحيل تروحله دى كرشاه من بيتنا لما جه اتقدملها
سيف / هو اتقدملها
هند / انت متعرفش بعد مسبتوا بعض علاطول و علاقتهم المفروض اتقطعت من يوميها
سيف يرفع راسه عينه تيجى فى عين عفه تهز راسها لا
هند / انا اسفه انى ازعجتكوا و شكرا على كل حال
عفه / لو عرفتى حاجه طمنينا
هند / ادعيلها ارجوكى
عفه/ حاضر
هند تمشى
هناء / انا مفهمتش اى حاجه
سيف ساكت و يدخل اوضته و عفه بتبص عليه
هناء / احنا ناقصين مكفايه اللى هو فيه بقولك ايه يا عفه خدى بالك من سيف اى حاجه تحصل كلمينى
عفه تهز راسها و هناء تنزل عفه تدخل الاوضه تلاقى سيف بيدور فى كل حته و فاتح الادراج كلها
عفه / بتدور على ايه
سيف / علبه الدوا بتاعتى فين
عفه / معرفش
سيف يمسكها من ايدها جامد
سيف / انتى هتستهبلى
عفه / ايدى يا سيف بتوجعنى
سيف / كان فى علبتين فى الدرج ده مفيش مخلوق يقدر يمد ايده عليهم
عفه / يمكن زينب دخلت نضفت الاوضه و لا حاجه و رومتهم
سيف / و حياه امك و هى هتسيب الاوضه كلها و تنضف الدرج بس و بعدين هترميهم مليانين فين الحبوب يا عفه
عفه / معرفش
عفه تطلع مالاوضه و سيف يجرى وراها
سيف / عفه عفه ارجوكى اسمعينى بس بصى انا لازم انزل ادور على هاله هروح لايمن اساله ارجوكى هاتى الحبوب انا عارف ان انتى اللى عيناها
عفه / لا مش انا و بعدين هعينها ليه
سيف / عفه بابا اللى بيشتريهالى و ماما كانت بتدخل كل يوم تفكرنى اخد دوايا و زينب متجرؤش اصلا تدخل اوضتى و انتى الوحيده اللى عارفه انها مخدرات يبقى مفيش غيرك
عفه / و مدام انت ذكى اوى كدا بتتعاطى ليه متبطل و تقف على رجلك بقى على الاقل لو كنت قدرت تبطل زمان مكنش زمانهم بيعيطوا على هاله دلوقت
سيف يضرب عفه بالقلم يوقعها فى الارض
عفه / لا راجل يا سيف اضرب كمان اضرب
سيف يشدها من هدومها و يبص فى عنيها مفيهاش خوف و مليانه تحدى
سيف / انا مش عاوز اذيكى يا عفه هاتى الحبوب هاتى حبايه واحده و انا كدا كدا رايح لايمن هبقى اجيب تانى
عفه / رميتهم كلهم روح دور عليهم فى المجارى بقى
سيف و هو ماسك هدومها يرجها جامد و هى بتصرخ فى ايده
سيف / انطقى خبتيها فين انطقى بدل مموتك
عفه بتعيط مالوجع / حرام عليك يا سيف دانا بحبك
سيف / انتى فاكره نفسك واصيه عليا فاكره انى ممكن فيوم مالايام ابصلك انتى مجرد واحده زباله رميه و خاينه
عفه / ربنا يسامحك ادخل اوضتك يا سيف ادخل ربنا يهديك
سيف يزقها بعيد
سيف / انا مش عاوز ايمن يشوفنى تعبان مش عاوزه يحس بضعفى
عفه / يبقى متروحش خف الاول و بعدين روح خليه يشوفك سليم خليه يحس انك هزمته
سيف / و انتى مال امك انتى بيا
عفه تحط ايدها على ضهره يضير و يزقها على اخر دراعه تخبط فى ترابيزه السفره و تقع فى الارض و هى ماسكه بطنها
سيف / انا عارف انك مرميتيهاش
عفه / اقلب الشقه حته حته مش هتلاقيها
سيف / هاذيكى يا عفه هاذيكى جامد
عفه / اكبر اذى انى اشوفك بالمنظر ده و اقف اتفرج
سيف/ و هيفيدك بايه هروح و اجيب غيرهم
عفه / هرميهم برده و كل مهتجيب هرميهم
سيف / هقتلك يا عفه هقتلك
عفه / انا راضيه بس مش هسمحلك تكمل فى القرف ده مش هشوفك بتموت قدامى و افضل ساكته
سيف يشدها من شعرها و هى بتصرخ و يجرها عالارض لحد المطبخ و يجيب سكينه كبيره
سيف / لاخر مره هاتى الحبوب و الا هقتلك
عفه / اقتل يا سيف فى السجن هيعالجوك
سيف / انتى مجنونه
سيف يحط السكينه عالرخامه و الوجع باين اوى عليه عفه تروح تحط ايدها على ضهره و هى بتعيط
عفه / انا هكلم عموا هخليه يبعت عربيه تاخدك هقوله انك مدمن
سيف يضير و يديها قلم تقع فى الارض مغمى عليها يقف يبصلها و هو مذهول و هى مبتتحركش يقرب منها و يهزها ايدها تتحرك يسيبها و يجرى ينزل
....................
فى فيلا ايمن
تاكس يقف و سيف ينزل منه يجى يدخل الامن يوقفه
سيف / لسه محفظتنيش يا حمار
الامن يدخله سيف يدخل يلاقى جعفر فوشه
جعفر / منور يا سيف باشا اتفضل جاى بدرى اوى المرادى
سيف / ملكش فيه فين ايمن
جعفر / عنده ضيوف ثوانى ابلغه بوصولك
سيف يدخل المكتب و هو واقف بالعافيه و مش قادر و باين عليه الالم اوى ايمن يدخل
ايمن / مصدقتش نفسى ايه يا سيف انت افورت كدا يا حبيبى لسه بدرى على معادك
سيف / الفلوس اهى خلصنى
ايمن / شكلك تعبان اوى مفتكرش ان ده وقت مناسب نتكلم فيه عن السعر الجديد
سيف / سعر ايه خلصنى عاوز زياده ماشى هات بدول و المره الجايه
ايمن / مفيش دلوقت و مفيش مره جايه
سيف / قصدك ايه
ايمن / بص انت حبيبى و مش هخبى عليك انا فى مشكله كبيره اوى و انت بس اللى تقدر تحلهالى
سيف / طب هات الحبوب الاول و بعدين نتكلم
ايمن / مقولتلك فى مشكله فى السعر
سيف / اللى عاوزه هتاخده انجز