وفي الصباح الباكر كان في الشقة الاخرى (أحمد) يحاول إيقاظ (نجمة) التي كانت غارقة في أحلامها الوردية
(نجمة)بنعاس: شوية يا (مراد) سبني أنام
(أحمد): يوووه يا (نجمة) يبقي نامي في العربية يلا قومي بقى
نظرت له (نجمة) وجلست على الفراش ذهب (أحمد) باتجاه الباب واغلقه استغربت (نجمة) كثيرا عندما جلس بجانبها على الفراش
(أحمد): أصل (عيسى) نايم لسه هصحيه بس عايز اتكلم معاكي شوية
(نجمة): صباح الكلام قول
(أحمد): (عيسى) عملك حاجة يا (نجمة)؟
نظرت له بتوتر تتذكر موقف المكتب ومشاغباته
(نجمة): ليه بتقول كدا؟
(أحمد): عشان اللي شايفه مش طبيعي .. من ساعة ما اشتغلتوا مع بعض و(عيسى) متغير يعني مبقاش يسهر وبينسى مواعيده مع الستات دا عمره معملها
(نجمة): طب وأنا مالي يمكن أتغير بجد
(أحمد): أو يمكن بيعمل كدا عشان يرضيكي
(نجمة)بارتباك: لا طبعا يعني هو هيمشي على دماغي
(أحمد): (نجمة) في حاجة صح؟؟
أغمضت (نجمة) عينيها وتنفست ببطء تعلم أن ما ستقوله سيغضبه
(نجمة): ماشي يا (أحمد) هحكيلك بس ممكن بلاش عصبية
(أحمد): قولي
نظرت له بتوتر وقصت له ما حدث في مكتب (عيسى) وكيف دخلت دون استئذان ورأت الفتاة تحاول أثارته وكيف حدث مشادة كلامية بينهم أدت إلى سقوطها على الأرض ومساعدته لها وما حدث في الإجتماع من كلام على ورق واعطته الورقة ليقرأ وما حدث في ذلك الشهر من مشاكسات وأخيرا قصت له ما حدث أثناء محادثة والدها
(نجمة): أنا .. أنا ك.كنت هقولك بس مش دلوقتي عشان ميحصلش بينكوا مشاكل .. (أحمد) ورحمة مامتك وباباك ما تعمله حاجة
(أحمد): عايزني أسكت عشان يتمادى معاكي أكتر
(نجمة): أنا مش عارفة هو بيعمل كدا ليه بس أنا كويسة أهو وفي حمايتك (أحمد) عشان خاطري بلاش مشاكل
(أحمد): إزاي بتحبيه أوي كدا يا (نجمة)؟؟
نظرت إلى الأرض بخجل وارتباك
(نجمة): مش عارفة ليه هو بذات بس بذمتك مش جميل
أبتسم (أحمد) عندما رأى لمعان عينيها عندما تحدثت عنه وذلك الشغف
(أحمد): (عيسى) طيب جدا ويمكن زعله وحش بصراحة مجربتش .. بس صدقيني (عيسى) راجل بس شيطانه مسيطر عليه
(نجمة): يمكن ملقاش طريق تاني غير دا أو ملقاش إللي يدله على طريق تاني
(أحمد): (عيسى) كان بيحب و حبيبته خانته .. لا ومش أي خيانة .. راحت خانته مع أبوه
صدمت (نجمة) من حديث (أحمد) وبدأت تتنفس بسرعة
(أحمد)بحزن: ماكنتش عايز أقولك .. بس لازم تعرفي ليه وصل للحالة دي طالما بتحبيه ساعديه
(نجمة)بخوف: طب وباباه
(أحمد)بسخرية: قاله كلام كتير مش مفهوم .. قاله أنه مكانش يعرف أنها حبيبته وأنها واحدة رخيصة مش من مستوى علتنا ولما زعق (عيسى) وقاله عشان مش من مستوانا تنام معاها عمي ضربه ساعتها و(عيسى) ساب البيت فترة وبعد كدا عرفنا أن البنت دي اتجوزت وسافرت برة مصر وقرر (عيسى) يسافر ل(جان) فترة بعيد عن عمي ومرات عمي
(نجمة)بذهول: مامته كانت تعرف؟؟
(أحمد): عرفت ولما عرفت قرارت تنسى وتعيش حياتها المستقرة .. ومش أول مرة
(نجمة): ومهمهاش كسرت أبنها
(أحمد): (نجمة) مش كل الناس باباكي ولا كل الناس زيك لسه قدامك مشوار طويل أوي .. أنا ماكنتش عايز ادخلك عيلة زي دي بس أنتِ حبيتي (عيسى) ولازم تعرفي كل حاجة
(نجمة): أنا مصدومة إزاي إنسان يتكسر من أقرب ناس لي ويفضل متماسك كدا .. طب .. طب هو ليه لما أنت و(جان) بتشتموا العيلة بيدافع عنهم كدا طالما عارف أنهم مش ناس كويسة
(أحمد): (عيسى) لما رجع مصر بقى واحد تاني خالص أنا نفسي اتفجأت ولما كلمت (جان) أقوله قالي أنه كان هناك كدا بردو سهر لوش الصبح بنات داخلة وخارجة عنده ..أنا مبقتش عارف بيتكلم جد أمتى وهزار أمتى
(نجمة): قرار يعيش في عالم هو إللي بنيه الصدمة جامدة يا (أحمد) أنا لو مكانه هيأس وادخل مستشفى اتعالج فيها
(أحمد): مش أي حد يحصله مشكلة يا (نجمة) يسيب الدنيا ويعيش في مكان لوحده
(نجمة): بس أكيد لازم تأثر عليه فترة
(أحمد): المهم يا ستي خالي بالك من نفسك وأنا معاكي في أي حاجة
وقف وقبل رأسها وكان سوف يذهب ولكن امسكته (نجمة)
(نجمة): أنت فيك حاجة صح؟؟
(أحمد): (نغم) مش راضية تسامح يا (نجمة) وأنا مبقاش فيه حيل اتأسف وأتكلم
(نجمة): (أحمد) إللي حصل مكانش سهل وسوري يعني أنت غلطان
(أحمد)بألم: والله العظيم كنت خايف عليها
(نجمة): ومتصرفتش ليه بطريقة تانية ليه تكسرها كدا
(أحمد): عشان مكانش قدامي غير كدا يا أما أبلغ البوليس ويحصل فضايح
(نجمة): (نغم) طيبة برغم إللي هي عملته بس أنت اكدلها أنك كنت خايف عليها
(أحمد): لما نرجع من السفر هتكلم معاها
اومأت له وذهب (أحمد) ليقظ (عيسى)، وبعد أن ارتدى الثلاثة اتجهوا إلى الطاولة ليتانولوا الطعام
(أحمد)بمرح: على فكرة يا (عيسى) هناك مفيش رياضة
نظر له (عيسى) ولم يفهم مقصده وبعد دقيقة نظر له
(عيسى): وبتقول عليه أنا زبالة دا أنت صفيحة
ضحك (أحمد) بشدة ولم تفهم (نجمة) ما يقولون ولم تهتم هي مشتاقة لوالدها
(نجمة): (أحمد) بقولك إيه ما نسافر بالقطر
(أحمد): مش هينفع العربية هتساعدنا هناك أكتر
(نجمة): أنا مش مصدقة أني راجعة أشوف الناس دي تاني
نظر (أحمد) بتوتر ل(عيسى) تدرك (عيسى) الموقف سريعا
(عيسى): أنا كمان من رأيي نسافر بالقطر
(أحمد): أنتِ راجعة معانا محدش يقدر يمسك
«نجمة»: أيوة صح عندك حق .. (سامح) دا كان سيء جدا
(عيسى): عاملك حاجة وإنتي صغيرة؟؟
نظر له (أحمد) يوبخه على قوله ف(نجمة) كانت صغيرة لا تدرك ما حدث في الماضي
(نجمة)بحيرة: حاجة إزاي يعني؟؟
(عيسى)بانفعال: يعني لمسك اااا...
(أحمد)بتحذير ل(عيسى): قصده كان بزعقلك بيضربك يعني؟؟
(نجمة): أيوة مرة ضربني عشان كنت عايزة أركب خيل وهو مرضاش روحت خليت السايس يركبني زعقلي وضربني وبعد كدا صلحني وركبني خيل بس وهو معايا
أغمض (عيسى) عينيه بغضب وتنفس (أحمد) بتوتر من عصبية (عيسى)، فهم (أحمد) أن (عيسى) وقع في حب (نجمة) ببراءتها و طفولتها ما يثير الضحك بالفعل أنه يغار عليها من أبن عمها عندما كانت صغيرة كان يريد الضحك كثيرا على مظهر (عيسى) ولكن إذا حدث سيبيت في المشفى
(أحمد): حبيبتي متزعلش هركبك خيل هناك براحتك و سيبك محدش يقدر يقول كلمة
ابتسمت (نجمة) بطفولة وكان (عيسى) في وادي آخر في الوضع الذي أمامه وكيف ستتقبل (نجمة) الخبر زفر بضيق ونظر ل(أحمد)
(عيسى): يلا ولا إيه؟؟
(أحمد): اه خلاص هنسافر بالقطر عشان كسلت سواقة
وقف (عيسى) دون كلمة واتجه إلى حقيبته وأخذ حقيبة (نجمة) و(أحمد) واتجه إلى الأسفل
(نجمة): هو ماله في إيه؟؟
(أحمد): أول حاجة لازم تعرفيها (عيسى) مزاجه متقلب بسرعة يعني اتعودي تشوفي كدا
اومأت برأسها وذهبت هي الأخرى إلى أسفل البنيان بعد أن قال لها (أحمد) أنه سوف يغلق الشقة جيدا رأت (عيسى) وهو يحاول إيقاف سيارة أجره ولكن يتلقى رفض اقتربت منه
(نجمة): طب إحنا ممكن نروح بالعربية للمحاطة ونسيبها هناك
نظر لها (عيسى) ثم اتجه إلى سيارته وبدأ في ترتيب الحقائب في حقيبة السيارة؛ استغربت (نجمة) أنه لا يتحدث معها، أتى (أحمد)
(أحمد): مالك واقفة ليه كدا؟؟
وقف أمامهم (عيسى) بالسيارة ونظر ل(أحمد)
(عيسى): يلا عشان منتأخرش
(أحمد): طب ليه عربية كنا ناخد تاكس
(عيسى): مكانش في حد راضي يقف يلا بقى
اومأ له ثم فتح الباب ل(نجمة) وجلست في الخلف وجلس هو مع (عيسى) في الأمام رن هاتف (عيسى) ورد عبر مكبر الصوت في السيارة وكان (جان)
(جان): صباح الخير
رد الجميع
(جان): عمي مضايق يا (عيسى) مش فاهم إيه السفرية المفاجأة دي
(عيسى): قوله (عيسى) هيبقى يكلمك المهم (داليا) عاملة إيه
(جان): كويسة بتسلم عليك .. عايزة تكلمك
(عيسى): هاتها
(داليا): مهو أنا لو كلمتك هتزعل مني
(عيسى): والله ملحقتش أقولك معلش
(داليا): (عيسى) أنت كنت موعدني هنخرج
(عيسى): طب هو أنا رايح أموت ما أنا جاي تاني
(داليا): بعد شر عليك يا حيوان .. قولي (أحمد) و(نجمة) عاملين إيه؟؟
نظر (عيسى) إلى (أحمد) ليتحدث تنهد (أحمد) بضيق
(أحمد): أنا كويس يا (داليا) و(نجمة) كمان كويسة
(داليا): طيب الحمد لله بقولك إيه يا (عيسى) في واحدة سألت عليك في البيت
(عيسى): مين؟؟
(داليا): على ما أعتقد إسمها (مايسة)
زفر (عيسى) وتذكرت (نجمة) موقف السينما
(عيسى): طيب ماشي
(داليا): أنا مش عارفة أنت بتجيب الأشكال دي منين أبوك كان هيكلها بعينه
(عيسى): لو جت تاني أديها نمرة تليفوني وأنا هتصرف .. هاتي (جان)
أعطته الهاتف
(جان): إيه يا قلبي؟
(عيسى): اتعدل .. خالي بالك من (داليا) ومتخرجش مع صحابها اليومين دول أنت فاهمني
(جان): ماشي في أوامر تانية
(عيسى): (جان) أنا مبهزرش رجلك على رجلها ومعلش استحمل شوية
(جان): حاضر متقلقش
(عيسى): أمك وأبوك فين؟؟
(جان): ماما كالعادة في النادي مع مرات عمك وصحابها وبابا في الشركة عنده شغل وعمي في المجلة
(عيسى): أنت مروحتش أنت و(داليا) ليه
(جان): شوية و هنروح بس أصل في ناس هناك مش عايز اشوفهم
(عيسى): مين؟؟
(جان): عيلة (الصياد)
(عيسى)بفهم وسخرية: ما عشان كدا بقولك خلي بالك من (داليا) .. أبوك و عمك مصرين
(أحمد): عليه العوض
(جان): ربنا يعدي الأيام الجاية على خير .. هقفل بقى يلا سلام
أغلق (عيسى) الخط
(أحمد): تفتكر عمي هيرضى؟؟
(عيسى)بسخرية: مش بزنس هيرضى وإلي هتروح فيها (داليا)
توترت (نجمة) عندما تحدث عن (داليا)
«نجمة»: (داليا) مالها؟؟
نظر لها (أحمد) بحزن هو يعلم أن (نجمة) تحب (داليا) رغم كل ما حدث
(أحمد): متخفيش مفيش حاجة إحنا معاها أهو
(عيسى): (داليا) أختي محدش يقدر يأذيها
(أحمد): هي أختنا كلنا على فكرة
(عيسى): أنا مطمن عشان (جان) معاها غير كدا ماكنتش هسافر
(أحمد): هو أنتو الإتنين وراكوا سر أنا ماعرفهوش
(عيسى)ببرود: ومش لازم تعرفه
ضحك (أحمد) ونظر أمامه
(أحمد): ألا قولي مين (مايسة) دي؟؟
نظر (عيسى) إلى (نجمة) في المرآة التي كانت تتابع الحديث بصمت
(عيسى): واحدة طماعة عمك قايلها توقعني
نظر له (أحمد) بحزن
(أحمد): (عيسى) اااا..
(عيسى): بص يا (أحمد) أنا مش غبي بس للأسف عمك فاكرني كدا قال يعني مش عارف بيخطط لإيه
(أحمد): طب وناوي على إيه؟؟؟
(عيسى): المثل بيقولك رايح الزبون .. (مايسة) غبية أوي والمشكلة أن باين جدا عليها أنها متأجرة يوم ما روحنا السينما ورحت مع (نجمة) نشتري آيس كريم فجأة لقتها في حضني بذمتك في واحدة تسلم على حد كدا
نظر (أحمد) ل(نجمة) وأبتسم لها
(أحمد): خالي بالك من نفسك يا (عيسى) أبوك مش سهل
(عيسى): سيبك منه يلا وصلنا
ركن (عيسى) السيارة وترجل كل منهم وساعد (أحمد) (عيسى) في نزول الحقائب ودخلوا إلى محطة القطار
(عيسى): خليك أنت هروح أجيب التذاكر وجاي
(نجمة)باستغراب: هو أنت عارف منين أصلا؟!
نظر لها بضيق و ذهب دون أن يتحدث
(نجمة): هو أنا قولت حاجة غلط
(أحمد): أصلك فاكرة (عيسى) عيل صغير .. على فكرة سافر محافظات مصر كلها
صدمت (نجمة) من حديثه كثيرا إذا لماذا تلك الحياة المستهترة
(نجمة): أنت بتهزر
(أحمد): لا والله .. هو أنتِ ليه شايفة (عيسى) مستهتر هو اه ساعات بيعمل حاجات تبين كدا بس هو فعلا متحمل مسؤولية يا (نجمة)
(نجمة): مش عارفة أنا حبيته على استهتاره .. لما بشوف الجوانب التانية دي بفرح
(أحمد): ودي حاجة كويسة على فكرة
نظرت له بابتسامة ثم نظرت إلى (عيسى) القادم
(عيسى): فاضل نص ساعة و القطر يتحرك عايزين حاجة قبل ما نركب
(أحمد): لا يلا بينا
