امواج القلوب❤

الموجه الاولى

حبايب هوايه اجتي اسأله عالقصة اصبروا بعدنا بثاني جزء تره😁😁

كل شي راح تعرفوه وبهذا الجزء اتصور صار واضح منو عمي ابو عماد اللي بالبداية ههههه😁

...............

بعد ما كبرت شويه انمنعت ابقى هواي يم بيت عمي علي لان سيف جبير وميصير ابقى هناك واذا اروح لازم اخذ ريهام اختي وياي ونروح شويه ونرجع للبيت هنا صارت صداقتي بهيام ومحمد شويه اقوى لان بعمري وتقريبا امهم ما الها شغل بيه لان اني بكد اطفالها ومو بس هذا السبب لان امها لزوجة ابويه اللي هي اقارب جدتي بدرية من بعيد اسمها جدة كرجيه كانت كلش خوش انسانه وتخاف ربها وكل ما تجي تبقى يمنا فترة هي وحفيدتها بنت ابنها وتبقى تحجي على بنتها وتخليها تتعدل بتعاملها ويه اهلنا اكثر وبيبي بدرية ما تقصر تبقى تزن يمها على جنتها هههه وهذيج تطبك ويه جدتي على بنتها والمستفيد الوحيد بالموضوع ابويه لان اول ما تزوجها هوايه تعذب لان صغيرة بالعمر وما تعرف تتصرف بس الله ينطيهم العافيه الحجيات دخلوها دورات تدريب وتاهيل من جديد هههههه ارتاحيت اكثر من سمارة وياهم

اني كنت مو شاطرة بالدراسة بس ذكية كلش ونبيهة بس لحد هاليوم اطلع طلعات قوية ولحد اليوم يتذكرون سوالفي بطفولتي ويضحكون
وراها صرت شويه اكبر واني طولت من وكت وجسمي كامل بس بعقل طفلة وصرت كلش حلوة وبهاي الفترة صرت احس بسيف عنده مشاعر الي وبصراحه اني هم مثله وخصوصا عمي علي حجزني اله اول ما بلغت وصرت مسمايه باسمه بعمر ١٣ سنه بدت مشاعرنا تكبر
سيف اول حب بحياتي واول مشاعر تجاه رجل كانت اله صرت اروح لبيت عمي ملهوفة اشوفه واسولف وياه
اول وحدة انفضحت كدامها ريهام صح زعاطيط بس عرفت اكو شي مو خالي يمكن ذنب اهلنا خلوا براسنا هالسوالف وادري بنفسي محجوزة اله وماكو داعي اضم بمشاعري بعد
هو بس خلص سادس اعدادي انخطبنا رسمي كنت زعطوطه بمعنى الكلمة وهو عقله هم مو كلش ههههه بس حبنا نقشناه نقش من صغرنا
ادمنت العشق وياه وصاروا اهلنا يخافون منا لان اني مراهقه وهو عمره يلا ١٨ سنه وقرروا يستعجلون بزواجنا وعمي علي عنده موضوع الزواج كلش سهل لان حالته المادية زينه وهو اصلا مقرر ياخذنا اني وسمارة لاولاده الاثنين قرر بسنة ٢٠٠٦ نعقد محكمه بيومها كنت حتى بعدني ما مخلصه اسناني اللبنيات ههههه وبحضور ابويه وعمي عقدنا محكمه ما كنت افهم شي بس لبسوني بدله وجكليت وكيفت وصديقاتي من المدرسة وياي وطبعا ما انسى اهلي فرحتهم بهذاك اليوم شلونها
كعدت اني وبدلتي الوردية اللي اخذوا منها شبر حتى تصير عليه ومكياجي الهادئ اللي سوته الي سمارة لان ما احتاج مكياج حلوة وصغيرة واصلا ماكو صالونات لان الوضع الامني بهذيج الايام والدنيا محتركه ما خلتنا نسوي حتى حفلة كبيرة بس شي بسيط للاهل واجا حبيبي وحب طفولتي سيف كعد يمي لزم ايدي اول مره وكنت خجلانه واتذكر عرس سمورة ههههه واخجل اكثر واتخيله شلون راح يبوسني ويبووو يا فشلتي ودي اختفي بهذيج الساعة