بس هي هاي الحياة مو كلها حلوة وموج اكثر حياتها كانت كدر وحزن🙁
اوووف تذكرت هذاك اليوم الله يعينج حبيبتي عاللي شفتيه ويعوضج عن كل دمعه خير 😢
----------
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
شفت الحياة احلى والدنيا جنة بزواجي من سيف صح ما عنده شي ينطيه الي ولا وعدني بشي بعده طالب ويشتغل بس حتى يجيب اللي احبه كان نعم الزوج والشريك هادئ جدا ابد ما يعصب بعد زواجنا حبي اله زاد اضعاف مضاعفة
خصصت جزء كبير من يومي اله ولراحته حتى اهلنا والناس القريبين صاروا ينتقدون كثر اهتمامي بي وهو هم ما قصر ويايه بشي يكدر يوفره رغم صعوبة حياتنا
بعدها بفتره صار عندي حمل فرحنا هوايه بي وبدت اعراضه تبين عليه وخصوصا اللي مثلي ناعمه وجسمي ضعيف ما تحملت صرت اتخربط واوكع بالدوام واضطريت اترك دراستي رغم ما كنت رايده هالشي بس انجبرت اترك الدراسة الحالة المادية للعائلة ككل تدهورت والدي كان عنده تقاعد بس احنا هوايه صرنا وخاصة بعد ما رجعت وحده من اخوات سيف علينا ارمله ووياها اطفالها الاربعه بيت خالو حسن حالهم مو احسن منا بعد ما انقلبت حياتهم بوفاة امهم ببداية سنة ٢٠٠٩ بحادث سيارة هي وابنها الصغير على الطريق الرابط بين ديالى وصلاح الدين وهي رايحه لاهلها وبقوا بنين وعماد ويه ابوهم وجدة كرجيه هي المسؤولة عن بيتهم رغم تعبها وكبر عمرها وتساعدها بالبيت زوجة ابويه تروح كل يوم الهم شكد حاولوا يزوجون خالو حسن ما كان يقبل لان هو زواجه من عمه الله يرحمها كان عن حب ومن بداية شبابهم بس هي هاي الحياة ابد ما بيها انصاف لاحد لازم تلكي البشر عنده شي يبجي عليه
محمد وسيف طلاب ويدرسون ويشتغلون سويه خطيه بهذيج السنه وخاصة بداية سنة ٢٠١٠ تعبوا كلش محمد كان طالب سادس اعدادي بس هذا ما منعه يشتغل ويشيل مصرفه عن والدي وسيف يا دوب ملحك علينا بشهر السابع من هذيج السنه شويه زارنا الفرح لفتره قصيرة بتخرج ابونا من كلية العلوم وبولادة ابني كرار اللي البيت كله فرح بجيته طبعا هو كان اسمه بالبدايه علي وجدة بدرية ما قبلت عالاسم عدهم معتقد ما يسمون على اسم شخص مقتول او عمره قصير ما رضت غيرنا الاسم لكرار يوم ولادته شفت اجدادي بعيني لحد ما ولدته سبع ساعات اطلك وما يرضى ينولد اخر شي سووله سحب وبقى بالخدج اسبوعين واني كابلته وسكنت المستشفى
