امواج القلوب❤

Untitled Part 24

موج:
الاشهر اللي رجع بيها للجيش بدت وياها المعارك اللي راح بيها نص الجيش كاتت عمليات ايقاف داعش عن التقدم للمناطق الجديدة واحتلالها وتحرير لبعض المناطق اللي احتلوها 

حسن مكانه بالجيش مكان حساس جدا بحيث يكونون من اول الصنوف بالجيش اللي يدزوها للحرب ما اسولف الكم كل التحاق اله شلون يكضي بحيث اجازته كانت اول يومين حب واشتياق ولهفة واتلكاه بحضني المشتاق اله واكتفي من ينام دموعي تجري واباوع عليه حاسه هاي اخر مره اشوفه وثالث يوم ابدي اتوسله يبطل وهو يعصب ويزعل صار حتى من كلمة عوف الجيش واخر ايام قبل التحاقه اكضيها بجي ومرات حتى لطم واوكع مريضه بالفراش لا اكل ولا اشرب اسوي اضراب اريده يبطل بس كل شي اله حدود وياه وحدودي توكف يم شغله يكول مو اني اللي كضيت عمري عسكري اجي على اخر وكت ابطل والله حرب وموت اني مو احسن من اللي يموتون يشعلني من هيج يكول ما يدري كلمة موت بالنسبه الي شنو يا ريت لو يسبق الموت الي وارتاح ولا اتلوع بعد بأحد من اللي احبهم

ما كنت احس بفرح ابد وياه لو شيسوي وشكد يداريني ويداري بجهالي وشكد صار يهتم الي وياما فاتت ايام ما افارق حضنه ابد بس ابقى بحسرة الفرح لان كل ما اتذكر اني منو وشنو شفت قبل وشكد بجيت اعزاز راحوا اشوف الفرح عمره قصير الي

شايفين اللي حتى براحته مشلوع كلب هاي اني بحضنه وما اريد اعوفه ومرات دموعي تتسابق وتنزل خوف عليه لو ادري هيج اتعلق بي واحبه ماكنت اتزوجه من الاول ولا اشوفه وجهي صار عندي هوس اسمه حسن سنه كامله بكل التحاق يروح ادري هو بالنار وادري شنو طبيعة شغله وعلى ساعة يتصلون يكولون راح هاي حياتي كضيتها برعب عليه اول معركة تحرير وثانية وثالثة ما اله مكان ثابت يكعد بي كان صنفهم بكل معركه لازم يشارك وطبعا بعد كل معركه يحصل ترفيعات وصعدت رتبته اكثر بس كل هاي واني اريد حسن وبس

اريد حبيبي اللي من يحطني بحضنه اشوف الدنيا احلى لا فلوس ولا ذهب ولا املاك ولا حتى رتبته ومركزه اريده بس هو ينطوه الي بطرك روحه كل شي ما رايده والله ادعي ربي واتفداه بروحي وبصحتي وعافيتي وبكل اللي نملكه بس كون سالم

الحرب مشت واني احسب ايام الناس تنتظر داعش تطلع من العراق حتى يفرحون يرجعون لبيوتها بس اني انتظر طلعتهم لان ما اريد ابجي بعد
فرحي يكون بدخلة حسن لبيته الحجية تعبانه اكثر مني وحيدها حسن تكضي نص نهارها تدعي ربنا لحفظه ورعايته عنيد كلش تعبنا اثنينا بعناده 

حب المرأة يختلف عن حب الرجل وخصوصا اللي مثل حسن اني كل اللي يريده انفذه بدون مقابل وما انتظر حتى شي منه بينما هو يوكف حبه يم اشياء بعد لا يعرف حب ولا يعرف حبيبه وياها اولها شغله عنده حدود وضحها الي مو بالكلام بافعال ومعاشرة وسنتين زواج

جهالي صاروا شويه كبروا واثنينهم ينادوه بابا لان اثنينهم وعوا بحضنه كنت اذا اريد افهمهم منو ابوهم الحقيقي هو ينجن ويكول يكبرون ويعرفون ليش ما ترضين
اتذكر اخر مره نهرته لكرار يكول اله بابا ولازم يصيحله عمو الا شويه بيتنا يصير فتافيت هوايه نكسر اثاث ومن اكثر المستهلكين لادوات المطبخ واغراضه ههههه اني وحسن