امواج القلوب❤

هروب

موج:
الفترة اللي بعدها كضيناها ركضه من حفله لحفله خطوبة ريهام لنمير واللي قضيتها احرك بدمي لان مرام بدعت بالركص والحفلة مختلطه وكانت تتعمد تشوف نفسها النا لو ادري ما حضرت ولا اجيت لحفلتهم طلعت عليه سم وهالنوب هم ورجعنا وتعاركنا وزعلنا اني وحسن بسببهن الله لا ينطيهن شوفني ايام سود بذيج الفترة حتى صرت اكره شوفتهم

اما الخطوبة الثانية كانت عماد لاسيل ام العسل تدرون عائلة اسيل عسل كلهم شنو من جمال واخلاق عرفتهم اكثر وتعرفت على امها من رحنا ثاني مره لبيتهم حتى نضبط الكلام وياهم ونتفق اكثر شكد فرق بين البشر والبقر هذوله بشر بس عيال ريهام ماخذين صفات من الحيوانات بتصرفاتهم شكد يبينون بالمظهر راقين بس تمسح الصبغ يطلع معدنهم الصدئ

بيومها طلعنا اني والحجية وصلنا عماد لبيتهم وهم يشوف البنيه دخلنا لبيتهم واستقبلتنا امها مره محترمه كلش وجدتها بعد احسن كلش فرحوا لما فتحنا موضوع الخطبة لان يحبون حسن على محبة المرحوم ابوها وحانت اللحظة الحاسمة اللي اني جنت انتظرها اكثر من عماد هههه شوفة العروس اريد اشوف ردة فعله من يشوف جمالها الاخاذ الحجيات اخذتهم السوالف واباوع عماد يلوب يريد الزبدة كلت ارحمه

موج:خاله ام كمال ...ام اسيل عيني ما دام اتفقنا من رخصتج ورخصة الحجية البنية لازم يشوفها ابنا وتعرفين النظرة الشرعية مهمه بكل زواج اذا متصير زحمه او نسبب احراج
ام كمال:لا يمه حقكم بهاي وهذا زواج وهو لازم يشوفها 

ابتسمت امها وراحت تصيحها بصراحة فضولي يقرا الف مو لان ما شايفتها لو اريد اشوفها ههههه اصلا اني فلستها قبل بعيوني بس اريد اشوف ردة فعل عماد من يشوفها اللي كان متوتر ووجهه صار لونه نيلي من الخجل مو احمر ههههه 

ودخلت عروستنا يا ما شاء الله هي مو محجبه وشعرها ضافرته ومخليته على كتفها واصل لبطنها ولابسه كلابيه لونها ليموني فاتح يبووو شطالعه منا هي بيها شقار وبيضا والعيون سبحانك ربي شلون طالعات 

عبالكم ملطخه مكياج ووجها صاير خريطة العالم ابد ولا ذرة مكياج بس اتصور مخليه حمره وردي فاتح واذا لون شفافها هذا فيا ربي صبره لابن حسوني هههه وجهها يشع براءة فوك الجمال
من كثر ما مركزين نسينا عماد وردة فعله هو احنا انثولنا عاد هو الله يعين

بعدنا ما كاعدين شويه واشو هذا كام يترخص وكال نكوم  ما يتحمل يشوف حلوات ابن حسون حتى بعدني ما شبعت منها صفنات ولا شبهتها اني ههههه بس تشبه العسل بالضبط كل شي بيها اشقر

اللي صدمني بذاك اليوم عماد طلع مخبل المسكين اول ما صعدنا هذا ركع الباب قوي وشخط السيارة بقينا اني والحجية ساكتين عاد جدته ما كدرت تسكت

ام حسن:ها يمه شرايك
عماد:جدة باجر تطلعون تاخذولها نيشان ومدري شنو وبنهاية الاسبوع نعقد وعلى نزلة ابويه الجايه العرس
موج:ههههه ها ابو العمد بيانك طحت
عماد:عفيه ام كرار تتصلين بيها وتكولين الها باجر انت رايحه الهم واني راح امرركم هسه للسوك تاخذيلها حجابات تلبسهم