امواج القلوب❤

مشاعر

هذا بارت اضافي حبايب لا احد يكول مقصره وياكم تره ارفعه فلقه😂😂 منا موج معصبتني ومنا انتو لا تخلوني اروح ابتلي بفد وحده😁😁تره اني ابد ما احجي عليج😚😚

موج:

بعد ما طلعت من غرفتنا نزلت اركض جوه هذا شبي هاي كلها لان كلت اله وديني لاهلي سجن خو ما سجن هو اني من تزوجت لحد هاليوم ما باقيه عدهم وهذا عرس اخويه ضلت السالفه تاكل بيه رغم هو وداني العصر بس ما يحجي ويايه ولا يباوع بوجهي بعد احسن

وفعلا اهلي كالوا ما نحتاج شي والاكل كله راح يسووه جاهز والعرس بالحديقه ومرتبيها ومكان كعدة الناس وعمه انعام فرحانه وطايرة من الفرح بزواج ابنها الوحيد ودا تاخذ بنت اخوها فرحتها كانت ما الها مثيل اما محمد مو بس فرحان حبيبي طاير من فرحته ووالدي هم شفته فرحان باخويه بصراحه اول مره اشوف اهلي بهالفرح دومنا مكدرين حتى بعرسنا اني وسيف صح هم فرحنا بس كانت الامور كلش متدهورة وضعنا المادي والاجتماعي وكل شي منهار

بس صار المغرب وكف هو وشال كرار وطلع بره ينتظرني البس عباتي وحجابي واطلع وراه ضجت وانقبضت روحي شنو يعني ما يقبل ابات عدهم جده بدريه انتبهت الي وكامت تحولت يمي وتسولف بصوت ناصي
-كومي يمه كومي رجلج لا تخلي ينتظر
-اي جدة كايمه ادري طارت الدنيا لو راح يصير شي اذا بقيت هنا
-لج كومي كافي لسان لو سيف الله يساعده عليج لا تتحاجين ولا احد يكول الج كلمه
-هاي اني جدة
-اي انت ويلا لبيتج ما عدنا نسوان تبات بره هههه لج لو ما يريدج جان عافج وراح وما سأل عنج كومي يمه الله يهديج ويهديه عليج
-اي مو مخبله والله يهديني
-دكومي العفو احنا المخابيل موجه يمه تدرين انت شكبرها معزة سيف عدنا بس هالرجال سند الج لا اب ولا اخ دايم روحي وياه وكملي وياه يمه وهذا نصيبج لا تعترضين
-جدة ما اكدر وما احبه ولا نفسي تريد هالشي واذا صار مغصوبه عليه واني تعرفيني ما انغصبت على شي بيوم
-اي جنتي مدللة وهسه صرتي ام وكبرتي انسي هذيج الايام وهاي جدامج الناس كل النسوان حبت ازواجها كلهن اختارن ويه منو تكضي حياتهن كومي يمه بعدج جاهل ما فهمتي شي انت شنو شفتي من دنياج الحكي تره ما بيها بس هم وقهر وابو عماد تره ما راح يكول الج تعاي ينتظرج انت تروحين خلي هالكلمتين ببالج وفكري زين قبل لا تخسرين مره ثانيه

طلعت من اهلي وما حجيت كلمه صعدت بسيارته وهو يأفأف وضايج لان انتظرني شويه والله هسه اني كامشه ايدك واتوسل دعوفني

وصلنا بيتنا ونزلنا واني صعدت لغرفتي ابدل ملابسي وجهالي بقوا يمهم كملت وردت انزل اسوي عشا بس اللي جفلني دخلة ابو عماد للغرفة وسدته للباب بقوة وعصبيه
-لج انت شنو كدامج زعطوط هيج تسوين وياي
-شسويت اني
-اكول الج تطلعين ورايه معناها ركض تجيبين غراضج وتجين
-جده بدرية رادت تحجي وياي وتأخرت
-والعصر ها شلون تسدين الباب وتطلعين واني احجي هااا احجي اهلج ما ربوج ما كالوا الج من احد يسولف وياج ما تروحين الا يكمل كلامه شوفي لج سويتيها هالمره وركعتي الباب هيج وطلعتي مره الجايه الحكج لو تطيرين بسما رب العالمين وارجعج كفخات فاهمه