بس اريد اعرف شغلة شبيكم اصابعكم توجعكم النجمة تكهرب لو القصة مو حلوة كولوها مو حلوة والله ما ازعل بس مو هيج تسوون
تره ما يصير هيج اكتب واتعب ومشاهدات خير من الله وتصويت ماكو صح مرات ما اهتم بس هالشي دا يأثر على قصصي
-------------------
غيرت ملابسي بسرعة ونزلت اشوف بنيتي شبيها طبعا عيشتني هالطفلة معاناة وقهر ببداية ولادتها فضلينا نخاف عليها لان اول ما ولدتها طلعت قليلة وزن وضعيفه حيل ورغم ما الي خلك وما اكدر ارضعها جداتنا اصروا لازم انطيها صدري ويه الرضاعة الصناعية بصراحة اني عاندت ارضعها اصلا ما كنت بكامل وعيي ومرات حاولت انتحر وتلاحكوني باخر لحظه عقلي عبالك فاصل من العالم بمساعدة اهلي والمقربين كدروا يرجعوني للحياة شويه ويخففون من حالة الجزع اللي عندي بتذكيري باطفالي وحبي لابوهم صح ما احن عليها حتى بس عرفوا شلون يخلوني اتعلق بيها اقوى رابط بين الام وطفلها الرضاعة الطبيعية خلوني تلقائيا اجي وارضعها لان صدري يأذيني وهي شمرت نفسها عليه شهرين واني ما ودي اباوع بوجهها لحد اليوم اللي صخنت بي واني هاملتها وانشمرت بايدي بيومها يلا حسيت بفضاعة اللي دا اسوي من حسيت راح اموتها للطفلة بذاك اليوم كان ماكو احد بالبيت بس اني كلهم طالعين اللي بالشغل وعمه انعام يم امها هي وريهام وجدة بدريه وابويه يأدون واجب ومحمد بالعسكرية
اضطريت اركض لبيت خالو حسن اشوف عماد او ابوه يوصلوني للمستشفى وفعلا وصلت واخذني خالو حسن ويايه عمه انعام للمستشفى بيومها الخوف اللي اكلته كان كفيل يوعيني لدنيتي هذوله اطفال الغالي اذا احبه لازم احبهم ريحته ومكانه بالدنيا بيومها بتنا بالمستشفى وبقينا مكابليها للطفلة الاطباء ضلوا يحجون عليه لان ضعيفه كلش وعدها سوء تغذية وحتى يأست تطلع سلامات منها بس مثل كل مره هالطفلة سالمه وكأنه رب العالمين يشوفني بيها انه حتى لو ردتي تموتيها مو بكيفج كل صدمه اكلتها اقوى من الثانيه بس شنو بكل مره جزء من مشاعري يموت مرض بنتي وراه كرار توه يمشي وراح اكل سم فار وكوه تلاحكنا اله كل هالاحداث خلال خمس اشهر بعد وفاة ابوهم تعرفون منو اللي ابتلى بينا نفس الشخص اللي مرات من اصفن اكول يمكن الله جابني ابتلاء عليه كل هبطة اكلها يمكن ويه جهاله ما شايفها
لحد اخر صدمة تلقيتها خطبته الي من ابويه وابويه موافق واهلي كلهم موافقين وكلها تكول اي وشكو منها وانت ارملة وهو يداري جهالج وهو ما يريد يتزوج بس يريد وحدة تخدم امه وكلام طويل واني بقيت ارفض لحد ما اقتنعت ما الي غير حل اطفالي صغار محتاجين فلوس ومصاريف وهو عنده خير هوايه ما راح نأثر عليه يريد يجيب خادمه وامه ما تقبل وهي خطبتني اله بصراحه موافقتي عليه لاجل فلوسه وبس لا تتخيلون حبيته ولا فكرت بي اصلا الفرق بيني وبينه ٢١ سنه مو قليل يعني ولو رايده زواج اخر شخص افكر بي هو وادري هو هم ما مفكر ابد يتزوج بس ما ادري شنو تغير يمكن ضغط امه واخته
بالنسبة الي هوايه اشياء جبرتني اوافق عالزواج والدي صار ما يلحك على مصاريفنا محمد خاطب بنين من قبل وفاة سيف وهي معاندة تتزوج وتعوف ابوها وجدتها وفوك كل هالاشياء حالي حال كل الارامل بالعراق اشكال طلع عليه حجي يوم يكولون خانكه جهالها يوم يكولون مهزومه يوم يطلعون عليه تريد فلان ومتخبل على مرته وهي ناطيته مجال تعرفون موقفي لا محد مر باللي مريت بي اقرب الناس الي طلعوا كلام عني خواته لسيف شوفوني الويل يكولون اكلت حصتنا من بيت ابونا والله ما اخذت فلس من احد وهو الله يرحمه نطاهم بس البشر لما يعميه الجشع يصير بابشع صورة ما يدرون اني عايشة على راتب ابويه ومحمد يساعدني والله فلس ما كنت املك وره وفاته حتى ذهبي بعته
بكل مره احترك شويه لحد ما وصلت لحافة الانهيار وللمرة الثانيه انتحرت وهالمره بكامل عقلي اريد ارتاح واريح الناس وهم ما نجحت يكولون اللي يبلع ادوية يموت اشو اني ابلع ادوية يكولون تموت واصحى وره ايام بالمستشفى ربي شوفني الموت وما انطاه الي جدتي بدرية الوحيدة اللي فهمت شنو اللي دا اسوي وبقت تكول لو الموت هيج سهل كنت اتفداهم بروحي واموت بمكانهم سبحان الله على الايمان اللي شايلته
الفترة اللي بعدها اشتدت كل الاطراف عليه والدي كره ضعفي وكام يكوم ويكعد يكول ولي من وجهي حتى اولادي احسه ما يحن عليهم عبالكم كل الاباء يحنون ويحبون اني ابويه كان تبع زوجته وزوجته رادتني اروح لاخوها و هو بعمره ما كان قريب مني متعودة عليه هيج بس اللي موتني زعل جدة بدرية مني قاطعتني نهائي لحد ما نفذت اللي تريد تسويه بس طلعت سنوية سيف كعدوني كدام شخص اعتبره عم مو اكثر ولا يمكن يصير اكثر وهاي مرت ٥ اشهر على زواجي من عمو ابو عماد مدري خالو مدري شنو اسميه لان تاهت عليه
نزلت من الدرج للهول لكيت جدة ام حسن وعمه انعام كاعدات وجهالي يمهم طبعا ما خلت الجلسة من المنغصات حاير بجهالج وانت نايمه وسودة عليه على اخويه شمحصل وانت لساج لابسه الاسود تفاولين عليه بصراحه جلدي صار ثخين هالكلام صار ٥ اشهر اسمعه اروح لبيت اهلي جدة بدرية وبنين يحجوه اجي هنا اسمعه عادي صار كلش اصلا بيوم اللي ما اسمع منهم العتب والرزالة اتعجب لازم بيهم شي
حسن كل فترة بقائي وياه مرتين بس حاول ويايه وكل مره نبتعد اميال المره الاولى اول اسبوعين من زواجنا وقبل هاي اجازته وبالمرتين كانت كارثية وتنتهي بزعله والتحاقه للجيش ويبقى شهر يلا ينزل وحتى بعد نزوله شنو يشوف مريضه نفسيه حاطها بالبيت ومتأمل تكون زوجته بيوم
بنين تزوجت محمد وحاليا حامل بتوأم وهالشي الوحيد اللي مفرحني اخويه حبيبي فرحان هو الوحيد اللي ما قبل انغصب ووصل بي الامر يفسخ العقد ويه حبيبة طفولته يمكن الشغلة الوحيدة الزينه اللي سويتها اله زواجي من عمه هههه بس يبقى زواجي هذا وحياتي الجايه كلها مجهولة وصلت لهاي المرحلة وما ادري شنو وراها اي تزوجت وشفت كل خير بزواجي اطفالي وحياتهم وحياتي كل شي ترتب بس خربطت حياة شخص ثاني بدخولي الها واللي الظاهر حاله مو احسن مني 😔😔
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
