امواج القلوب❤

قرارات

موج :
نزلت جوه وبديت احضر للعشا تبلت صدر دجاج للشاورما وحضرت عجينه اسويها فطاير ولحم للكباب وهوايه اطباق ثانويه كملت كل شي وحاولت الهي نفسي على كد ما اكدر حتى لا اشوفهم يلا همه شكم يوم اتحملهن بيها

العصر بدوا يفرفرون بالبيت وبالبستان وهاي مرام لزكت لابو عماد يتمشى وياها وهو يتعذرها بس فد لزكه ما شايفه مثلها كانوا كاعدين بالحديقه وبقوا للمغرب سوالف وضحك ابوهن واخوتهن هم بره بصراحه اني استحي اطلع يمهم من الولد مو هذيج المعرفه عندي بيهم بقيت بالبيت صار البيت اضلم والمولد ما اجا تأخر واني وحدي جوه احتريت وضجت يوميه مثل هالوقت اني بره ويه الحجية
مر وقت ودخل ابو عماد شايل سمسمه نايمه بحضنه لان جهالي بره وياهم

-ها هاي نامت
-اي عيني نامت تعالي اخذيها ....انت ليش ما طلعتي
-لا هنا ارتاح اكثر
-حطيها بغرفة امي لا تصعديها فوك وقت غروب واخاف تجفل وما تسمعيها
-اي
مشيت اخذذها لغرفة الحجية وهو اجا ورايه دخلت حطيتها بالفراش وهو كعد عالسرير اجيت اطلع جرني من ايدي وبهاليوم هاي ثاني مره يسويها بس اللي زاد لكيت نفسي كاعده بحضنه على رجليه كل ما اريد اكوم يرجعني
-عوووفني
-لا ابد بس شغله وحده اسويها وروحي
استسلمت بعد ما قاومته هوايه بقيت كاعده على رجليه جرني اكثر لحضنه حضني قوي وبعدين كمش وجهي واتقرب واني ابتعد غير اللي يريده وافتهمه كل الزلم يبوسون بهيج وضع هو فاجأني بعضة قويه لحنكي الا شويه اعيط من الالم دفعته قوي وهو مدري شعجب تركني واخيرا بحيث طلعت من الغرفة ركض اندعمت بمرام بالممر استغربت وجودها هنا وهي ارتبكت بس بصراحه ما كان عندي اي افكار براسي غير اللي سواه هالرجال

عبالكم حبيت هالشي بالعكس ضجت وانقهرت زين اذا بقى هيج شسويله ما راح اتحمل اكثر لحد الليل بعد ما شفته لان هم التهيت بخدمة هذوله اللي بدون احساس زين هسه اني اطلع خطار عالاقل اشيل ماعوني اتشكر من اللي تعبت بالاكل بس ابوهم زين الباقين كلش يغثون

صعدت لغرفتي وكنت عازمه اذا حاول يتقرب الي اصده وكالعادة نيمت الجهال وفرشت بالكاع انام دخل هو للغرفة غلست منه سويت نفسي نايمه بقى يطكطك يم راسي سويت نفسي جنازة ونايمه تالي راح جر مخدته وتمدد يمي بعد ما تحملت كعدت لحيلي باستنكار وهو ضل متمدد
-ها يعني ما نايمه
-عفيه هاي شنو ليش هيج تسوي
-زوجتي واريدج افهمي عاد بكل التلميحات والطرق كلتها
-وكلمتك
-راح تلزميها عليه بعد شوفي من الاخير نومتج بالكاع ما عاجبتني تنامين يمي
-ما ارتاح
-خلص نبيع السرير عليش جايبيه وننام اني وانت بالكاع احسن
ردت اضوجه واذكره بوضعنا واستخدمت كلمه كمت اشوفها تغثه هوايه
-عمو ابو عماد اني تزوجتك لان انت ردت وحدة تخدمك وهاي اني ليل ونهار اركض ممكن نومتي تخليها براحه
عصب وكعد لحيله وتقرب الي واني صرت بطرف الفراش بسرعة اريد انهزم بس لزمني رجعني هالنوب كف ايده بكد راسي يمكن يشيلني من ياختي ويعلكني بالمروحه يمكن اذا عاندته
-تعالي لج شنو شايفه نفسج انت وهيج تحجين وكاعده ترفعين صوتج لج لو اريد مره وفراش اشكال اكو ما باقي عليج تدرين بهالشي لو لا وبعدين تعالي هنا انت بيا حق تحرمين حلال ربج زاني بيج اني لج شويه اعقلي لخاطر ربج..... ويا موج تكولين عمو بعد الا اشمرج من شباك غرفتنا واخلص منج فاهمه لج ضحكتي الناس علينا كدام الاوادم عمو وعمو دخليني اسمعها منج مره ثانيه الا اخليج تعرفين منو عمج الصدك
سكتت ودنكت ضجت من كلامه وكمل هو
-زين انت دا تمنعيني منج وما تقبلين بعلاقة ولا نومه ولا حتى سوالف عاديه زين اني هذا حقي يمج لو لا احجي كولي ما الك حق بيه كولي لج ربج والله يحركج بنار جهنم عاللي تسويه والله ....اني زوجج لو لا جاوبي؟
هزيت راسي بتأكيد لكلامه
-خلص ما دام حقي وانت ما تنطيه ولي من وجهي اني هم ما رايده منج خلص ولي
سكت وكام دا يطلع واني هنا يلا نطقت ويا ريتني ما نطقت
- اني ما عليت صوتي واذا انت ما تتحملني ليش اخذتني اني كلت الك ما افيدك من البدايه وتدلل ما اكول بعد عمو راح اصيحلك حسوني حتى ترتاح وتبقى تضحك
بعدني اسولف صفك ايديه قوي جفلني
-لا حول ولا قوة الا بالله بابا انت تريدين تخبليني لو شنو هاي اسمها غيرة لو شنو اشو من باب ضايجه وتعاركين ذبان وجهج لان شويه اليوم فكت الخنكه اللي بالبيت وكاعدين نضحك حضرتج ضجتي وطنكرتي وفرحت كلت اي هاي تريد اهتمام وحب واجيتج وهم لكيت نفس اللطم والبجي شتريدين انت اريد افتهم لج راح تخبليني
-وانت شكو تضحك
-ليش الضحك بفلوس صار وما ادري والله عاد سنوني واني حر بيهن اريد اشوفهن شمس