امواج القلوب❤

اعتراف اول

موج:
مر هذاك اليوم واني بصراحه ضليت ضايجه منه ما من حقي ازعل ولا اعتب العتب ما يصلح بيناتنا لان هاي شغلات تصير بين الاصدقاء او الاحباب واحنا لا هاي ولا ذيج اصلا هو وين واني وين  لا عمرنا ولا افكارنا قريبه حتى هو من غير عصر عبالك 

سوينا عشاهم وما تعشيت وما شوفته وجهي بعد يريد يرتاح منا ومن مشاكلنا خليه ياخذ راحته جهالي يمي ما قبلت يروحون للهول كرار ضل يبجي ما يرضى يضل يمي تالي اجا عماد اخذه يمهم

كملت صعدت فوك للغرفه وما نزلت بعد وهو هم ما صعد بعد احسن وكرار صعدته بنين الي نيمتهم وغفيت للصبح وهو ماكو نام جوه مو حبا بي ولا اريده يصعد بس شراح يسكتها للحجيه بعد هي درت بالعركه من عياطنا وصياحنا طبكت وياه وهي هم اخذتني برزاله معدله
نزلت هي كاعده بس ما تحجي ويايه وحتى من صبحت عليها ردت عليه من وره خشمها اووي خلي تزعل كافي تعبت منهم 

هو طالع من البيت للعصر وما رجع والمغرب وهو ماكو وهي خطيه تلوب عليه وما يرد على موبايله
عزه بعيني عزه اذا صار بي شي وين اولي ضل عماد يدك واني حتى وجهي صار بدون لون والحمد لله الساعه تسعه بالليل رد عليه وكال طالع بره المحافظه وما يرجع اليوم يبات بره
هنا ارتاحينا صح بس الحجيه اندارت الي
-ها ارتاحيتي هج الرجال من المشاكل
-يمه والله ما سويت اله شي
-لا ما مسويه بس النهار كله مشاكل وكالبه الخلقه وبثوبج الاسود اللي عبالك خيمه وبس نحجي الدموع تهل وكل ما حجى وياج كلتي عمي عمه العماج وبين اللفاج خليني ساكته احسن...... هسه رجال راجع تعبان ما تعرفين هاليومين تكضيها بلا مشاكل كلت هسه شويه ابني راح يرتاح اخذناله وحده صغيرة وحلوة وكلها يومين ينسون اثنينهم بس احجي وانت الحجي ضايع وياج
-شسوي يعني
-لا تسوين ابقي هيج وهو الله اعلم وين راح بات هالليلة
سكتت ما جاوبتها يريد يروح بعد احسن اشو من بابه ما يريد زواج ومن باب يبات بره البيت وامه تكول مدري وين يروح عود اغار لا طبعا اصلا اني ما اريده يا ريت لو يعوفوني عاد 

بقى ثاني يوم لحد الليل ماكو ولما رجع متعشي صعد للغرفة واني بقيت جوه لحد ما ناموا جهالي اخذتهم وصعدت حطيتهم بمكانهم واني نمت بالكاع
وهاي صارت حياتنا بالايام اللي بعدها كلامنا قليل جدا بس ما قصر بشي ويانا ابد
اهلي يزوروني بس ابويه ما شفته غير مرتين من زواجي لهسه رحنا تعللنا يمهم وما سولفت وياه على كد السلام لان هو يحبه لابو عماد وينطلق وياه يبقون يسولفون واني ما اروح يمهم
جدة بدريه بقت تنصحني انسى واعيش وياه لخاطر جهالي بس مو بسهولة هالشي يصير اني ما اكدر انسى سيف يبقى شي ما يخليني اتقبل اي شخص بحياتي حبي اله مو يوم ويومين صح زواجنا قصير بس خطوبتنا طالت سنين وقبلها اصلا اني كنت احبه بس ما كدرت ابين اله ولا اكمل حبي وياه

بنين ومحمد تحدد عرسهم وره زواجنا بشهر واحد وبدينا التحضيرات اني التهيت ويه بنين كلش رادت كل الشغلات اللي تسويها العروس من توزيعات وترتيبات وكوشه وغيرها هاي كانت شغلي