امواج القلوب❤

واقع

موج :
ثاني يوم راح لدوامه وقبل لا يطلع ضل يوصيني على الشغلات اللي هو يسويهن بالبيت سقي حديقته اللي يحبها وطيور الحب اللي مربيهم ويحبهم اكثر من ولده يمكن

راح وضليت وحدي طبعا جهالي شويه صايرين يفتهمون اطلع الهم كارتون ويسكتون والحجيه تشوف الها شي تلتهي بي واني اضل افرفر بالبيت كل شي ما عندي هاي حياتي فراغ قاتل كنت اطلع وصفات من النت طبخ حلويات بس تره الواحد يمل بس الشي اللي صار بي تغيير حسن ثاني يوم بالليل كنت كاعدة ارضع بسمسمه دزلي رسالة ركضت اشوفها كانت هلو

رديت بسرعه بملصق تحية
💬زين لحكت قبل لا تنام الدجاجة
ابتسمت
💬الكتاكيت بعدهم كاعدين والدجاجة لخاطرهم بقت لهسه
💬الله يحفظ هالكتاكيت شكد يساعدوني
💬هههههه انت شعندك لهسه كاعد
💬ما سمعانه ديج الزعلانه يضل لنص الليل يعوعي
طكيت ضحك على سالفته تأخرت ما رديت
-ها نمتي
-لا بعدني
-نعسانه
-شويه
-يصير نسولف
-وهسه شكاعدين نسوي نكرز حب
-لج لا كل كلمه ترديني هيج يصير اتصل يعني
-هههه لا ما اقبل
-راح اتصل
دك الموبايل واني ارتبكت بس لازم ارد عليه
-هلو
-هلاوات شلونج
-الحمد لله
-زينه
-اي الحمد لله
-دوم ان شاء الله
-وانت شلونك
-مو زين
تغيرت ابتسامتي لضوجه
-ليش شبيك
-مريض
-لا احجي الصدك
-والله مريض شبيج صخنت وتمرضت مو كلت الج مو زين سبح الفجرية كله من وراج
-واني شعليه
-وحق ربج كله من وراج شايله خطيتي والله هسه جسمي متكسر من الصخونه توها يلا فكت شوي اخذت مسكنات وكمال ابو خشه يضحك عليه وجابلي شوربه
-دير بالك على روحك
-ليش بالله ليكون تحبيني وخايفه عليه
-لا بس ما بيه حيل تضل تكول من وراج
-اي مو اكول
-زين ما تكدر تاخذ اجازة وتنزل
-ليش
-غير مريض
-لا ما يحتاج بس اذا تريدين انزل انزل
-واني شعليه
-لج روحي رجعت صخنت راح اموت
-اسم الله عليك
-لا الله عليج هاي انت لو غيرج شو ما اعرفج
-يعني اسكت ما اجاوب
-لا بالعكس احجي اريد اسمعج بالبيت ما تعرفين تحجين
-ههههه ليش شبيه
-تخرسين مدري يجيج ثول مدري شبيج ليكون تتعاطين انت
ضحكت بصوت عالي
-لج اروح فدوة لهالصوت والضحكة يا ريتني يمج واشوفج هيج تضحكين
-ليش اني هم اضحك
-اي ويه الكل مو ويايه
-لا تصير هيج قابل متعمدة
-احبج موج
سكتت ما جاوبته
-ها ماكو رد
-تصبح على خير ابو عماد
-يلا تصبحين على خير وتغطي زين وما اوصيج راسج هم لفيه دولمه عدنا

ابتسمت وسديته وبقيت صافنه اني شنو اللي دا اسويه ليش انطيته امل واني ادري بنفسي مو فيدها ضليت اكل بنفسي الايام اللي بعدها انام من المغرب والصبح لما يتصل اكول اله جنت نايمه
لحد رابع يوم بعدني توني دا انام الساعة بالتسعة اتصل وما عندي حجة ولا اكدر اجذب واكول نايمه لان هو قبل شويه اتصل وسأل الحجيه وسألها وعرف ما نايمين بعدنا رديت عليه كلت ما احجي ويا هواي واكول اله تعبانه