امواج القلوب❤

حياة جديدة

موج:
كنت كاعدة بغرفتي وبنتي بحضني ووكرار يمشي حواليه وريهام تعزل باغراضي بجنطتي لان منتظريني بره الباقين حتى اروح ويه ما اعرف حتى اكولها للكلمه ""زوجي"" حاسه بذنب عبالك مسويه ذنب كبير او معصيه سبق هالساعه عقدنا كان سكتة بس الاهل حضروه وشهود اثنين

دموعي ما توكف ومحد يكدر يحجي وياي لان اكب بوجهم ساكتين
ريهام تبجي ويايه وكل شويه تجي تحضني
-كافي موجه الله يخليج ما يصير والله اللي تسوي
-ريهام اني خاينة اني مو وفية لج خنته لسيف ما حفظت غيبته بس سنه
-موجه حياتي والله انت دتموتين نفسج هوايه مثلج العراق متروس كلهن خاينات؟؟؟ انت عمرج لساه يلا ٢٠ شلون تكضي جهالج منو يربيهم محتاجين سند
-اي صح كوليها سمعيني يلا كولي انت ما تصلحين ام
-فدوة لعينج منو يكول هيج عنج جهالج هذوله وانت امهم بس كنتي تعبانه والحمد لله كلنا وياج محد عافج بس ابويه تعبان وانت دا تزيدين عليه القهر لج لعد هو صدك نساه لسيف ابن اخوه وانت تدرين شكد يحبهم لبست عمي بس هالشي بصالح الكل وبعدين والله خالو حسن احسن منه ماكو لا راح يضوجكم ولا راح يطالبج بشي وانت تعرفين شكد كان معاند عالزواج بس من شاف حالنا وكلام الناس اللي ما يرحم اجا خطبج حتى يسكتون العالم وتره جداتنا همه اللي رادوا هالشي يمعودة لا تضلين تبجين والله هو وين اكو احسن منه بعد
-ادري هو ما يريد مره ويريد اخدمهم بس اسمي تزوجت ريهام صرت باسم غير رجال
-يلا حبيبتي كافي كومي غسلي وجهج وروحي وياهم جدة كرجيه باقيه وحدها ببيتهم ويريدون يرجعون لهناك 

وكفت اخذت حجابي لبسته وطلعت للصالة وكعدت حتى بدون ما اسلم على احد اني وابويه صارلنا فترة ما نحجي وعمه انعام يرادلها الحجة حتى تزعل مني والباقين ما يهموني اصلا بنين تباوع الي من بعيد تزاعلنا اني وياها وتعاركنا
بهذا اليوم اني حتى ما باوعت للجهة اللي كاعد بيها خالو حسن ما اعرف الموضوع معقد ومشاعري اعقد بعد
سمعته ترخص من اهلي وكام طلع اني بقيت كاعدة ريهام وبنين طلعوا اغراضي بره ما اريد اروح واتمنى لو ابويه يتراجع اباوع عليه وكلي امل يكول ابقي بس اللي صار تركني وراح لغرفته بدون ما يباوع بوجهي زعلان مني

جدة بدريه كاعدة مقابيلي وساكتة تالي ما طول سكوتها
-يلا موجه كومي روحي لبيتج ويه زوجج
انداريت صفنت بعيونها شكد سهلة عليها كلمة بيتج لا بيتي ولا زوجي شنو من قساوة عدهم معقولة ما مقهورين بس اني هيج ميته 

وكفت اطلع منهم مو حبا بالمكان اللي رايحه اله بس انهزم من البيت لما يصحون اكيد بيهم شي نسوه لسيف نسينا ضحكته ووجهه الحلو خلص راح زين ليش هيج سهلة عدهم ينسون

طلعت بره بنين والجهال بالسيارة ومنتظريني صعدت بالمقاعد الخلفية رغم واضح المكان اللي يمه مخصص الي بقى فارغ

طريق خمس دقايق مشي المسافه بين البيتين بس اجوي بالسيارة حتى ناخذ غراضنا
وصلنا لبيتهم ونزلت بالباب شايله سمسمه وهمه نزلوا الاغراض كرار حبيبي كامش عباتي مستغرب من المكان اخر مره اجيت لهنا كان قبل وفاة سيف يعني ابني ما يتذكره
هو اني نفسي هالمره مستغربه مو عاد الجهال