امواج القلوب❤

بين الماضي والحاضر

فات عام كامل رجعنا للدراسه بعد ما انتقلنا للمكان الجديد اني خسرت سنه وداومت رابع اعدادي ويه بنين وريهام
بنين ويايه نفس الصف وريهام كانت ثالث متوسط نروح ونرجع سويه للمدرسة وصرنا صديقات كلش لان ماكو غيرهن المكان اللي سكنا بي قليل الناس لان بساتين وبنصها بيوت فالمسافات بعيده عن الجيران اقرب شي همه بيت خالوا حسن ونطلع ونرجع سويه بسيارات يوميه احد يوصلنا نجحنا الرابع وفاتت فترة على وفاة بيت عمي سيف رجع قدم للكلية ونجح مرحله اولى

بيوتنا بقت ما كدرنا لا نبيعها ولا نأجرها وسيف خطيه ما عنده هذيج الامكانية حتى نتزوج صار يدرس الصبح بالكلية والعصر يطلع يشتغل عامل حتى يجمع فلوس زواجنا
الحلو بعلاقتنا انه سيف صار يجمع فلوسه عندي ملابسه اكله كل شي اني مسؤوله عنه صار مسؤوليتي بالكامل
حبي اله تعدى كل الحدود كنت لما اغسل قميصه اكون مشتمته الف مره يمكن لما يوصل للغسالة صح عمري صغير بس فتحت عيوني على تعلقي بي والشخص اللي يشجعني لخدمته وحبه جدتي كانت تستعطف قلبي عليه وخطيه وابن عمج وبقى وحيد واني اتخبل بالزايد عليه 

اني وسيف سويه بنفس البيت وبنفس المكان بس بعيدين مثل البعد بين النجوم صح نكعد ونسولف بس اي مشاعر او صفات حب ما عدنا حتى نسيت احنا عاقدين تقريبا مجرد اصدقاء وهو بقى حزنه وتعبه على اهله مأثر عليه واني استحي ابادر لو اتقرب اله ومرات اكول اخاف بطل ما يريدني لحد يوم طلعنا اني وهو مو البيت للبستان اللي بينا وبين بيت خالوا حسن 

تمشينا وضحكنا وسولفنا اني وهو كنت ماخذه كتابي ويايه عود دا اراجع وهو اصلا حجة حتى نطلع لان جدة بدرية ما تقبل نطلع سويه
وصلنا لمكان تقريبا منعزل تفاجأت بي تقرب الي بيومها خجلت كلش لان صارلنا فترة مبتعدين لزم ايديه وتقرب الي عيونه ما انساها بيها شوق وحب يفوق الوصف 

-موج مشتاقلج هوايه
-سيف لا احد يشوفنا عيب
-انت ما مشتاقه
دنكت راسي شلون سؤال هو اني ميته مو بس مشتاقه بس ما اكدر اكولها ضليت ساكته باسني بخدي هوايه بوسات متفرقه واخذ ايديه لفهم على رقبته واني مثل الما شايفه كيفت حضنته وشمرت كتابي وهو يشم برقبتي ويبوسها وكلمات حلوة باذني توصفني
-موج احبج هوايه لو ما انت والله الدنيا ما بيها طعم
-اني هم احبك سيف اموت عليك
-موج بس اكمل فلوس الغرفة والعرس نتزوج ما اتحمل لما اتخرج بعد انت شتكولين عمي يكول الا تكمل لج شيصبرني وانت مقابيلي
-اي حبيبي
دنكت خجلانه منه رفع راسي وتقرب يكمل على اخر قطرة حياء بيه
غمضت عيوني اريد كل حواسي وياه واله وصل لشفافي بعدنا هسه بدينا بعدني عنه بدفعة
فتحت عيوني مستنكرة اباوع عليه ليش هيج يسوي ويبوو يالفشلة اللي صارت
خالوا حسن شافنا عزه يبووو
سيف عدل نفسه ولا عبالك صاير شي وتقدم اله وسلم عليه ومشوا واني من فشلتي لو ميته احسن الي شكد عيب شافنا