امواج القلوب❤

غايات

حسن:
رجعت للجيش بعد اشهر كعدة بالبيت مقابيل موج وهي على حطتها تعبتني عنيدة وغيرتها ما مجرب مثلها حتى زوجتي الاولى الله يرحمها صح كانت تغار بس ارحم منها وتعرف تتحكم بكلامها هاي تشعلني شعل بكلمات قليله قاطعتها وقاطعت نفسي وياها احس روحي تعبت وتمرضت بسببها مو بسبب اصابتي اكذب لو كلت ما اريدها بس هي ما تنطي مجال ابد ولا تتراجع ولا تعترف هي غلطانة 

بنات عمي هاي تربيتهم واني ما يعجبوني وبالاول مرام كانت تحاول تقترب الي وابعدها ما اريدها ولا تناسبني بس موج ما تعرف هالشي غيرتها ما خلتها تشوف حقيقة انه مرام بزواجي الاول كانت مقابيلي وحبيت ام عماد واخذتها وتركت بنت عمي وبالمره الثانية هم هي موجودة وياما عرضت نفسها عليه ميصير اكولها هي بنت عمي بس حاولت تتقرب بشتى الدرق وكالتها الي بعد وفاة ام عماد بصريح العبارة هي تريدني اتزوجها بس لا هي من ثوبي ولا تناسبني وما تفيدني بس جيب عقل لام نص عقل اللي راح تخبلني بعنادها

مرات اكول اي صح حقها تغار ودليل حب بس كل شي اله حدود واني ما بيوم سويتها وشلت عيني لغير المره اللي تكون بعهدتي وتكون حلالي حتى موج ليوم ما فكرت اتزوجها اني قبلها ما شايفها ابد بعين محب لو راغب
التحقت للجيش وهي كل يوم تتصل ردتها بس شويه تلين هي كان كلامها كله رسمي وبوجود امي يمها تفتح كاميرا عود نسولف وافرح تطلع كاعدة وياهم كلهم وما اكدر حتى اطلب منها تبتعد لحد يوم طافت بيه اتصلت الصبح اعرفها هي وحدها بهالوقت بالمطبخ 

ردت بصوت متلهف زين هاي لهفة ليش احسها بردت تجاهي وحتى وصلت بيه تجي افكار براسي هي ما راغبة الحياة ويايه
-شلونج ام كرار
-هلو حسن شلونك اخبارك شوكت تنزل
-ليش تسألين
سكتت وحسيتها ارتبكت كملت وياها
-موج افتحي كاميرا
-ها ليش بالليل نفتح
-اي من تصيرين بنص الامة تفتحين مو شنو انت تتقصدين هيج تسوين
-لا والله بس هسه ثوبي موحلو وبالمطبخ
-اني راضي شلج دخل على اساس لو يمج هسه كنتي تلبسين بلا ردن
-هههه حسن هاي شبيك
فتحت هي كامره 

-واخيرا ارتاحيت هالنوب تكول بالمطبخ ومو حلوة على اساس  هو انت بالمطبخ وتخليني ادوخ شلون بغير مكان بعدين هو اني شبيه لو انت ما صدكتي نزعل شفتيها خوش فرصه تخلصين مني
-لا شنو اخلص منك والله مو هيج بس انت زعلان وخفت احجي وياك بهالامور لو افتحها وياك اخاف تفشلني
-اي مو على اساس يوميه انت تسويهن واني مفشلج لج هو من اول ما تزوجنا لحد هسه واني اركض وراج لا ضلت الي كرامه ولا وجه واطلب منج هيج شغلات

-اسفه
-لج لا تضلين تجفصين ببطني وتكولين اسفه وين اصرف اسفج
-شتريد يعني
ابتسمت بخجل واني احس قلبي طار من مكانه
-ما اريد بس اريد توعديني بالليل تتصلين وتتحضرين الي
-عزه حسن شنو هالسوالف عيب والله افشل اسويها وانت هم شلون تقبلها هيج