امواج القلوب❤

مرسى (الجزء الاخير)

موج:
بعد ما رجعت لحسن شفته هوايه تغير ويداريني مو بس لان حامل هو تغير طبعه كليا وحاول يصلح موقفه وياي وخاصة وهو يدري زين ما الي ذنب باللي صار واني هم حاولت انسى كل شي واركز بس بحياتي وياه وويه اطفالي وابني اللي ننتظره حسن كان كل اسبوعين ياخذني لطبيبتي مراجعه حتى لو اعاند وما عندي شي غصب ياخذني ويحاول يبين هو حاب هالطفل

بحملي بكرار وسمسمه ما كدرت اشتريلهم مثل هالمره حسن كل ما ياخذني للسوك يضل يكول اشتري واشتري هالشي كنت احبه منه حسسني فعلا هو حريص عليه ويريده مثل ما اني راغبته وراد يوصل ندمه على معارضته ببداية زواجنا للانجاب وشلون جبرني على شي ما احبه وبصراحة كل فترة اذكره شلون ما كان يريده ههههه ويكعد يتعذر بعمره حبيبي كان فشلان من الموضوع ومستحي لان هو جد لجهال بنين وخالهم راح يصير اصغر منهم هههه

خلال هالفترة كلها زوجة ابوية ما وصلت لبيتنا رغم الكل اجوي وشافوني حتى ابويه وجدة بدرية هي ما اجتي كنت اظن لان ما مهتمة وما تريد تشوفني لحد ما يوم كان حملي بنهايته تقريبا سمعتها تعيط بالبيت طلعت ولكيت حسن كامشها وموتها كتل ردت اخلصها تهجمت عليه وضربتني بس ما تأذيت بس خفت منها وابتعدت بحركة سريعة
حسن هالنوب تخبل موتها الا شويه نريد نفتهم شكو ما قبل يحجي تالي هي اللي نطقت 

-اي كله لخاطر كح..... بايع الاول والتالي نسيت اني اختك الجبيرة والله شنو صورتها وهي مصلخه ما كانت تستر روحها بالاول حتى الناس لا تشوفها لو هي تتعمد مطلعه جسمها وتستعرض ومن نصورها تستشرفون براسنا اني ما سويت شي صورت ومرام طلبت موبايلي شمدريني شراح يصير 

حسن:لج جلبة اني ادري انت شنو وادري ليش صورتيها وهذيج النذله الثانيه والله اذا وكعت بايدي الا اشرب من دمها كح..... وحدة تصور وهذيج تهدد لج ويا منو لعبتوا انتو والله لا اكسر روسجن يا سا.....غبيات عبالجن تفوت بجلودكم والله لا اصلخ جلدج اليوم بس ردت اتأكد 

رجع عليها واستلمها ضرب وكفخ ياهو اللي يوكف بوجهه ينكتل وياها عماد اجا ويحاول يفكها ماكو فقد عليها تالي انهزمت من جوه ايده كوه والحجية تحجي عليها طلعت لبيتهم ركض وهو كعد تعبان يلهث عاط جيبي ماي
ركضت جبت اله وشرب بس اني شنو يمكن دمي نشف شكد صاير عصبي ما واصل لهيج مرحلة ابد وما شايفته بهالشكل خفت منه من كل عقلي واني اتذكر ضربه الي بيوم الحفلة

وبقيت ساكته بس شنو بطني كامت توجعني مدري الم ولادة مدري مغص من الخوف فاتت ساعه بديت اتكلب من الالم واخاف اروح يمه لو احجي والحجية بقت يمه لما يعصب تبقى مكابلته ما تكوم واني اخاف احجي وياه واكول بطني توجعني 

خاصة هو بقى يتصل بعمه ومره يعيط مره يتعارك وهذيج تنكر ما ترك كلمه ما حجاها عليهم وهي شبعها شتم ومسبة
رحت لغرفتي تالي ما تحملت طلعت الهم للهول عيوني تصب دمع هو شافني وكام يركض عليه وانخبص وخبص الحجية ويتوعد لانعام اذا صار بيه لو بابنه شي لان ضربتني طلعنا للمستشفى وولادتي هم صعبة كانت مثل ولادة كرار ما شفته لحسن من هذا اليوم لثاني يوم لان كضيتها بصالة الولادة بس موبايلي ما يسكت كل شويه يتصل عليه كان عندي الم ولادة وكل اعراضها بس ما ينزل الطفل وبالموت للفجر ثاني يوم يلا ولدت وطلعت بس طلعت اشبه الجنازة من التعب لسه اتذكر من طلعوني وشكل حسن مره يضحك مره ينقهر وتولاني بوس والعالم عبالهم ابويه هههه بعدها التهيت بابني وحياتي الجديدة اللي انفتحت الي وكل شي ممكن يعكرها نسيته