حكاية ضيــــاء
الحلقه28
معاذ: تضحك اضحك اضحك الانه حتبكي بعدين😒😉.
عماد: كيف😕؟
معاذ: غر علاش الاستعجال فصبرا جميل.
عماد: شن تقول.
معاذ: مريض نفسيا فوت.
عماد: اي واضح اصلاا مش صاحي ابدا.
معاذ: هههههههههههههه مقنينتك وانت لسانك طويل.
عماد: اسمع يا ولد قول شن عندك طول بلا لف ودوران.
معاذ: ههههه ولد تمام.
عماد: باه وين ماشي توا ممكن نفهم يعني.
معاذ: للكافي ياروحي😚.
عماد: متخلينيش نفقد اعصاابي واحكي بي احتراام ارجووك وادخل ف الموضوع طول انت منين تعرفني اصلااا.
معاذ: اوباا خلينا الاحترام ليك ياا المحترم ياعمري خيرك مضايق اهو ندهور بيك ف البلاد اكيد متعرفهااش.
عماد: بلاش معيله وارجع للمستشفى.
معاذ: توا انت شن تبي في المستشفى والهم اهو قاعد نسلي فييك مش خيرلك.
عماد: اسممع والله مافضيلك ومش فااهم ولا شي من الي قااعد ادير فيه توا.
معاذ: اهو وصلنا انزل يلاا.
عماد: شن جيبنا هني في خلا مخلي.
معاذ: "طلع المسدس وسحبه وقعد يمشي فيه ع لحيته"....توا نقتلك ولا شن ندير فيك بزبط.
عماد: لوح الواحد من ايدك وخلينا نتفاهمو بلعقل وخلي نفهم انا شن مدايرلك قبل وبعدين اقتلني كان بتقتل.
معاذ: علاااش ضياااااء مالقييتش الا ضيااء خلييت تركياا كلهاا وجيت لي ضيااء.؟
عماد: اها هوا هك الموضوع باه في نظرك علاش خليت تركيا كلهاا وجيت ع خاطرها لليبيا الانه نحبها ياراس.
معااذ فقد السيطره بدي يضرب ف رصاص تحت رجلين عماد وعماد قلبه قريب يوقف يستنى ف امتاا تجي رصاصه ف راسه.
معاذ: شكلك تبييييي تموووت انت اليوووم ونهاايتك حتكون علي ايدي.
عماد: ياراجل غير استهدى بلله علااش هذا كله قاعد نبي نعيش ومتتورطش فيا وتقعد حاصل بعدين .
معاذ: تبي تعيش وله عندك حل واحد توا ترووح طول لي عمي سعد وتقله بنتك خلاص مانبيهااش شن بتقله بنتك خلاااااص معش نبيهااا...وكان ماتبيش تقوول يبقى وددع حيااتك من توا واكتب وصيتك توا انا نوصلها لي امك بي ايدي.
عماد: نحي المسدس من ايدك خلي نعرف نتفاهم معااك عاارف انه ضيااء ماتبينيش وانا مكنتش حنجبرها علي شي لو ما عمي سعد حكالي قصه خلتني ناخدها غصبن عنهاا لي مصلحتهاا يعني.
معاذ: شن تفتفت قصة شنووووو😠😦.
عماد: غير قعمز واهدى باش نعرف نحكيلك مع انه عمي سعد حلفني مانحكي الحد لكن اشوي ورحت فيها فبنحكيلك ويارييت يقعد بيناا.
معاذ: زكري عااد تي احكي الزززفت.
عماد: ضياء مش بنت سعد وليلى يعني مش امها وبوها الحقيقين💔.
معاذ: كيييييييييييف شن تقوووول انت رااه الكلاام الي تحكي فييه كبييير وهلباا متأكد انت متأكد منننه😨.
عماد: تي عمي سعد هوا الي قالي .
معاذ: يااااااربي شن هذاا كيف صااار بااه بنت منوو ويين القوهاا تي كييف هك بااه ضياء تعرف تي استحااله تعرف كان هذا قتلي.
عماد: توا بنحكيلك القصه من طقطق لي سلام عليكم حت نا نصدمت زيك في الاول لكن مانبي ولا جنس مخلوق يعرف بيها حت ضيااء منبوهاش تسمع توا.
معاذ: احكي احكي بأذن الله تقعد بينا.
عماد: عمي سعد بعد اسبوعين ممكن ولا اسبوع من جيته لليبيا اتصل بياا قالي كانك قاعد عند ماطلبت فا أنا موافق عليك وكلمت ضياء وحت هيا موافقه ومش حنلقى خير منك لي بنتي وتعال لي ليبيا توا نتفاهمو...جيت لليبيا قالي عندي شروط خطبه وبعدها بي شهر العرس وتتزوج وطول تسافرو لي تركيا..قتله علاش الاستعجال هذا كله وكنت مفكر انه نسكنو هني ف ليبيا....مشى قلي بنحكيلك قصه وياريت تفهمني وتبعد ضياء ع ليبيا مشى حكالي انه ضياء مش بنتهم وانه بنت صحابهم الي دارو معاهم نفس الحادث ف تركيا وبما انه عمتي ليلى حامل والمرا ام ضياء حامل عمتي ليلي ولدها مات وام ضياء جابتهاا وتوفت وحت بوها توفى عمي سعد وليلى خدو ضياء يربوها ورضعتها ليلى ومابوش يعطوها لي خوالهاا الانهم مش كويسين ولما روحو لي ليبيا ع اساس البنت بنتهم ومافش حد يعرف لين طلع واحد من خوالهاا عنده علم بي الموضوع هذا وهدد عمي سعد كم من مره مشى عمي سعد سكته بشوية فلوس وطلب مني انه نسافرو ف اقرب وقت باش ميرجعش خالها تاني ويدير مشاكل...وهادي كل القصه وبااش ننكر انه مانبيش ضياء هادي لا اي صح هيا ماتبنيش ومش طايقتني اساسا بس توا تتعود بعد وقت.
معاذ مركزش ع الكلام الاخير الي قاله عماد كان هذا قتله وكل الي يدور ف رااسه اناا كان نضت وبعد وقت قالولي الحقيقه المره هاادي كيف بتكوون ردة فعلي انه امي وبوي متوفين والي كنت نقلهم امي وبوي مش هما نفسهم ودنيا داخله بعضهاا ولا عندي خوال ولا عمام وهذا كله الي عاايشه فيه وهم...هذا كله كان يدور ف راس معااذ كان يفكر ف الجرح الي انا بننجرحه والي واجعه انه هوا مش قادر ومش عاارف شن يدير.
معاذ: "مفنص ف عماد وعيونه معبيات دموع".
عماد: خيرك ياراجل انت كويس.
معاذ: انا راسي بيدخن ف الي كنت تحكي فيه توا تمام لكن بجديات توا بنحكي معاااك بلعقل وياتفهم ياتفهم الانه الموضوع في دماار حياة.
عماد: تمام شن في!
معاذ: ضياء تحبني وانا نعشقهاا تعرف شن معنى نعشقهاااااا يعني مش متخيل حيااتي من دونها. " ونزلت الدمعه".《جريئ》💔
عماد: "طبس راسه" باه.
معاذ: خبط مرش السياره بي ايده وقعد يحكي بالعياط وانت راح ادير الي بنقلك عليه وتبعددد احسلك.
عماد: اييدك مجرووحه دم يصب يااراجل اركب وهات نسوق .
معاذ: تي هيا قعدت ع الايد مجروحه 😏💔.
عماد: هياا ياراجل دم هلبا.
معاذ: تي عاادي يا... كله جرح وبنحكي الي عندي قبل...
.
.
.
ياسر: عنشكل اصل امه تي وينه الفرخ طول اززح ونقاله مقفل.
احمد: شكله قتله وقاعد يسلخ فيه توا😂.
ياسر: ها ها ها مبرد وجهك خوك ويديرها.
احمد: وكأنك عاطي الموضوع اكبر من حجمه ولا انا نتخايل.
ياسر: ماه انت ماتعرف شي.
احمد: اي والله شكلني مش عارف حاجه.
ياسر: وهوا هك خلي نمشي نروح بي فاطمه مشخير.
احمد: دير رايك.
.
.
.
حنين: حمزززه حمزاوي مادمي مادمي مادمي ولك ياحمززه طرش ان شااءلله جعنك ماسمعت ولا صار منك.
وكان سامي ف المربوعه سمعها بعتلها مسج طول
سامي: لي محبه صنعك ياربي نقصي صوتك ياهمي 😂💔.
حنين: هييي خلعه تخلعك انت امتا جيت.
سامي: ههههه كيف روحت من المستشفى كنك شن تبي حمزه.
حنين: شنحالها ضياء توا.
سامي: قاعده ع نفس الحال.
حنين: ان شاءلله ربي يشفيها.
سامي: امين يارب وحقا تعالي جاي شن قلنا ع طلعه من باب الحوش من غير ايشارب.
حنين: شن قلنا😯وانت كيف شفتني.
سامي: ههههه منضرك فضيع وانتي تستعبطي.
شافت لي روشن المربوعه القاته واقف فيه ضحكتله ودخلت
حنين: حقاا سامي.
سامي: عيونهه😍.
حنين: تليفون ضياء قاعد عندي من هداك اليوم.
سامي: باه خليه عندك عادي وبعدين لما تطلع اعطيهولها.
حنين: واو فكره كنت ف غنى عنها الصراحه.
سامي: هههه ماه انتي جبتيها ليا هك طول تليفون ضياء عندي باه شنبدرلك انا متلاا.
حنين: ووواك خزي مش هك ياهم نبي نسألك نا مرات تعرف من هيا ف وحده تتصل قداش ليها.
سامي: توا مخلياا رنا وجايه تسألي فيا نا اما ابداع.
حنين: اي صح نسيت رنا عندك الحق يلا سلام.
سامي: وحقربي مااك مسكرتهاا وانتي زعلانه.
حنين: لا مش زعلانه عادي اصلا انا سؤالي غبي عندك الحق.
سامي: حنوونه حنو حنون والله ماقصدي.
حنين: لا عادي ولا يهمك ماتبي شي.
سامي: نبيك انتي😍.
حنين: 😳.
سامي: اويي وين رحتي.
حنين: معش تبصرهاا البصاره الباارده هاادي عارفني منحبهااش.
سامي: حاظر من عيوني وشن اخرى.
حنين: وبس.
سامي: نعليا منك.
حنين: ساامي شن قلناا.
سامي: تي عادي ياهمي كان قتلك نعليا منك ومن عيوني ونسمط عليك مش نحنا اصدقاء وصغار خاله يبقى خلاص.
حنين: بس مش ضروري منه الكلام هذا الانه احنا ولاد خاله ع قولتك فا احترم صلة القرابه الي بينا يلا سلاام.
سامي: شششت البنت كنها هاادي بتهبلني مش طبيعيه بكل لكن وربي عسل😍.
.
.
.
لبست حنين ومشت لي حوش عمها نجيب.
حنين: رنا وين شكلك طالعه.
رنا: اي بنمشي للمستشفى نشوف ضيو💔.
حنين: من بيرفعك.
رنا: بنمشي مع ياسر كلمته قالي بيحط فاطمه ف الحوش وطالع قتله يحطني ف طريقه.
حنين: وبااه...اس كنت بنقلك تليفون ضياء عندي وف وحده اسمها رفيقتي نونا ليهاا وقت تتصل.
رنا: اي نورا هادي هاتيه توا نكلمها ناا.
حنين: هاك بيش تخليه حت عندك.
رتاج: اما احلى هادي ولا هادي.
حنين: الفوشيا احلى.
رنا: رتاج راه ماشين مستشفى مش حفله.
رتاج: باه😐.
.
.
.
معاذ امتاا الدم بدي يصب هلباا اصر عليه عماد انه يمشو يخيطوها.
وصلو المستشفى وع الاسعاف خيطوله الجرح ولفوهاله.
عماد: حمدلله ع سلامتك.
معاذ: ناديلي احمد ف طريقك.
عماد: ان شاءلله.
ركب عماد.
سعد: شن وين كنت.
عماد: طقيت ف واحد صاحبي وجيت.
احمد:😕.
عماد: احمد معاذ يبيك لوطا.
احمد: تمام يلا ماتبي شي عمي.
سعد: تسلم يبارك فييك.
نزل احمد.
احمد: طييب فيك تي وينك لي توا مخلني متشحط ياا.... .
معاذ: مصارلك شي.
احمد: حييي خيرهااا ايدك والبلوزه كلها دم من ضاربك.
معاذ: جرح عاادي غير يتجكتر ويسحاب روحه حاجه مشى دار العار وصب دم هلباا.
احمد: تنكت😒.
معاذ: لا بطني تجري.
احمد: حييي علي امك تي رزيتني ف مرش السيااره شن درت فيه.
معاذ: "اشرله علي ايده "...كسرته👀.
احمد: ان شااءلله هذا كسرته بي ايدك تي هادي مش غير ادير العاار وتصب دم تي المسكينه باه الي منشلتش.
معاذ: هههه تي عادي جت ع هادي يعني.
احمد: نبي تعويض يابرنس.
معاذ: اوني قدامك fG حلال عليك.
احمد: قده كلامك.
معاذ: قد امك تقرب جيهتهاا نحشيلك رجلك.
احمد: خلاص معنها صلح المرش.
معاذ: تمام وانت بتبكي كله كله ع بعضه مرش بدل مايقول اهم شي سلامتك ياخوي.
احمد: ههههه زي الجن مافيك شي.
معاذ: مصار شي جديد ف الجماعه الي فوق؟
احمد: الي تسأله يقلك مدام مش عليها اجهزه معنها توا تنوض ف اقرب وقت.
معاذ: ان شااءلله خيير💔.
احمد: ان شاءلله...شن نحطك ف الحوش ونمشي ولا بترجع تاني.
معاذ: حطني بنغير دبشي وتوا بيجيني عبدو.
احمد: تمام امالا نظم امورك.
.
.
.
ليلى: سعد.
سعد: نعم.
ليلى: شوفت بنتي شن صار فيهاا😢.
سعد: الله غالب قضاء الله وقدره.
ليلى: ونعم بلله لكن حت احناا لينا ايد ف الموضوع غاصبينهاا ع حاجه هيا متبيهاش واحنا مش معودينها هك وفوقهاا لا انت ولا انا عبرناهاا وقسينا عليها ف الفتره الفاتت وقعدت بروحهااا ومتاكلش ومترقدش شفت حت احنا دافع ف الي فيه توا حراام بنتي متستاهلش قاعده صغيره وابصر امتاا تنوض منهاا الكومه هادي😭💔.
سعد: يامراء وحدي الله والله غالب الي صار صار وبتنوض منهاا ان شاءلله انتي ادعيلها بس.
ليلى: لا اله الا الله ها شوف ياسعد كان ضياء ناضت ان شاءلله رد باالك تجيب موضوع الزواج قدامهاا انا قااعده نبي بنتي ايواا.
سعد: بعدين ساهل هيا غر تنوض وبعدهاا ما يصير الا كل خير.
.
.
.
معاذ: بااه اني طالع مترقهمش.
عبدو: سقدنا ياراجل من بكري نستنا.
معاذ: عليك ذل ازح باه توا نجيك حسستني تستنى ف الشمس الحارقه ماك تحت مكيف يا... وكان مش ايدي لا نحتاجك انت ولا غيرك كمشه كلاب.
عبدو: ههههه بكل سقدد سقد روحك.
معاذ: فهمناا...وسكر عليه الخط.
وجي بيطلع بشويه بشويه باش امه متشوفاش واديرله محاظره مشت مشت وكبساته.
سميره: حييييي خيرهااااا يدك شن صااير وووك علياا نهار الاحرف من شنوو.
معاذ: متخافيش ياحنينه جرح عادي وتوا بنطلع مع عبدو مستعجل ويستنا فيا البرا.
سميره: عاادي ولافيلك اللفه هادي كلها باه من شنوو متعارك مع حد؟.
معاذ: لالا مرش السياره.
سميره: مش قادره نصدقك.
معاذ: تي وغلاتك الا مرش السياره.
سميره: واكيد مرش السياره هوا الي جرحك الجرح هذا كله بروحه انت مادرتله شي.
معاذ: مادرتله شي انتي تعرفيني من قبل انه نا مش متع مشاكل.!
سميره: لا انت حشااك ملااك نازل من السما.
معاذ: كيف عاد شهادتك مجروحه فياا.
سميره: اي زي ايدك.
معاذ: اهو يتصل فرخ النم يلا سلام ماتبي شي.
سميره: سلامتك ورد بالك ع رووحك.
معاذ: ان شاءلله.
طلع معاذ من حوشهم وطلعت رنا ورتاج من حوشهم وطلع ياسر من حوشه ف نفس الوقت.
رنا: حي معااذ خيرها ايدك.
رتاج: حمدلله ع سلامه.
معاذ: شكلني بنكتب ع جبهتي ايدي مجروحه من مرش السياره تي سااد ازح واضح انها مجروحه وانتم من بكري تسألو اهو شوفو الناس الي تفهم ف الذوق طول قالت حمدلله ع سلامه.
رنا: ياتافه نا توا كيف سألتك.
معاذ: اي حق انتي مسألتيش خنجاوبك يارنا ايدي مجروحه من مرش السياره وتوا حت ياسر جاي وبيسأل نفس السؤل وبرا عاد خودلك محاضره والولد متشحط البرا.
ياسر: سمعت اسمي.. حي خيرها ايدك.
معاذ: لا حول ولا قوة الا بلله😩.
رنا: ههه ايده مجروحه من مرش السياره.
معاذ: الله يفتحها عليك...يلا انستو بعض.
ياسر: تعال تعال تعال متأكد مرش السياره😒.
معاذ: تي زي مانشوفلك توا.
ياسر: رنا ورتاج توكلو للسياره اونهي البرا وتوا نجي.
رنا: انها توزيعه.
معاذ: اصبرو ارفعوني معاكم.
ياسر: برو برو...اسمع جاي شن درت لي عماد لما رفعته وشن قصة الجرح هذا.
.
.
.
رنا: زعما علاش ياسر وزعناا نحسله في قصه من ورا معااذ.
رتاج: انا حسيته عادي.
رنا: عادي عينك مايطلع من وراه الا مصيبه.
رتاج: حييييي😱.
رنا: خييييرك.
رتاج: نفسه وربي الا نفسه.
رنا: تي من هواا.
رتاج: طلع صاحب معاذ مش حمزه معنها.
رنا: تي ويين تعرفيه ياهم شن مغبره قولي.
عبدو: "مش هادي نفسها متع طاسة الشاهي اي وربي الا هيا حي علي امهاا خيرهاا طرف هك شن نسل العيله هادي كلهم حلوين ولا كيف".
رنا: احكي.
رتاج: هذا يوم الي داخت ضياء نسحبوها دوخه عاديه وبتمشي وبترجع عمي رجب قال ديرو طاسة شاهي بلوز مشى درناها وجيت نا بنرفعهاا والدنيا ضلام نسحابه وسام الي واقف قعدت نكلم فيه وهوا مسكين الولد متكلمش بكل لين امتا قربت تكلم عرفته مش وسام ولما حمزه فتح الضي شفته وحصلت تكشيخه من حمزه ووليت وتوا لما شفته اذكرته عليك حشمه درتها هذاك اليوم.
رنا: نزلو دموعها.
رتاج: هيي رنا خيرك علي ما اعتقد موقف محرج ويضحك مش يبكي.
رنا: حت نا كنت نسحابها دوخه عاديه وبترجع لكنن لي توا قاعده مارجعتش طوولت هلبا يارتااج طولت هلبا.
رتاج: رنا امسحي دموعك بترجع بترجع انتي بس قولي ان شاءلله.
رنا: ان شاءلله.
رتاج: غريبه معلقتيش علي الي قلته.
رنا: نقول مبروك يعني ايوا ايواا عبدالرحمن وجو.
رتاج: هههه قهرتك قصدك مش معتز هذا.
رنا: لالا معتز هذاك مجنتل طرف اغبر.
رتاج: حت هذاا حليوه🙊.
رنا: بدينا نكبدو.
رتاج: قهرتك اس اس ياسر جي.
.
.
معاذ: سلام
عبدو: زدت اشويه تانيه.
معاذ نزل.
عبدو: تي وين.
معاذ: بنزيد اشويه تانيه.
عبدو: هههههههه مبردك.
معاذ: الله عليك راحه اول واحد متسألنيش خيرها ايدك.
عبدو: لي انك مقايلي ع التليفون يااحول.
معاذ: اي صح نسيت انه مانقدر ندس عليك شي.
عبدو: هههههههه سألتك بلله الاسلوب هذا معش تحكي بيه بجو هك معااذ ثقيل مولي راه تبي الحقيقه وانت معلن الحداد مش عاجبني بكل تي قدااش ليا شفتش ضحكتك.
معاذ: ماه هذا حنا الي ديما نبصرو ونخلقو ف جوو ونضحكو ونضحكو فيكم لما تجي الفتره الي بنعلنو فيها الحداد نبدو ثقلين ومفيناش جو بكل وووه قداش مملين..لكن الشئ هذا مش ف ايدينا للأسف وزي مانقولو ديما فتره وتعدي كله راح يمشي اذا كان احنا بكبرنا ماشين قعدت ع شوية الوجع هذا الله غالب تحملوناا.
عبدو: ياحمار مش هك كانك عليا نا صاحبك وغصبن ع ملت ابوي نتحملك سوا برضاك ولا غصبن عنك لكن الي نحكي فييه والاني صاحبك واجب علياا انه نقلك رااك يامعاااذ كترت وطولت فيهاا الفتره هادي لا بت تعدي ولا شي وف ايدك انت كان بتخليهاا تعدي ولالا فلذلك افردهاا خلااص وخليهاا تعدي ننقاني استاحشت معاذ القديم.
معاذ: مايحس بي الوجع الا صاحبه سوق واسكت ماعنديش جو للنقاش ولا عندي جو انه ناخد نصائح من حد الانه ف الاخير الي ف راسي بنديره.
عبدو: اي عارفه راس السطل هذا" ضربه ع راسه".
معاذ: هباطه ياناس هباطه.
عبدو: ههههه وين تبي تمشي.
معاذ: نقلك حاجه برا ناخدو قهوه نكيف بيهاا وبعدها حطني ف المستشفى.
عبدو: علااش المستشفى.؟
معاذ: بنلعب فيهاا علاش يعني بلاا غبااء زاايد.
عبدو: باه معااذ فهمناا انك تحبهاا وتحبك وفاهم الي حاس بيه لكن الجماعه مايعرفوش بي الشي هذا والبنت مخطوبه وقاعده مناضتش من الغيبوبه يعني ماشي غاادي علاش باش تقعمز لوطا وتشوف الماشي والجاي ولا باش يحسو العيله وادرلها مشكله.
معاذ: زكري عاارف كلامك صح لكن تعال فهمه للقلب .
عبدو: مستشفى مافيش مشي من هني وجاي نا بنوقفلك لي انك قاعد تفسد ف حياتك وحياتهاا.
معاذ: ياريتني مشيت مع ياسر ولا وجع الراس الي نا فيه توا.
عبدو: وجع راس عينك هذا الصح وانت ماتبيشي.
معاذ: خلاص انا مانبيشي ياسيدي اخطاني.
عبدو: توا نخطااك توا نخطاااااك "وولع المسجل وزاد ف الصوت والسرعه "
الله الله ايامي مشن.
الله الله ايامي مشن الله الله ايامي مشن.
احتار الفكر وعيوني بكن.
الله الله يابختي العطيب في ها الجيل ماعندي نصيب.
حت الراس صفا راح شيب والمشيات في الخطوه بطن.
وهيييييي نبكي بلا راده يابدموع بداده علي طير غاليته قولو صادوه صياده.
معاذ: علي طييير ربيته ياصدووه صيااده💔👏.
عبدو: 👀💔.
ف نص الانسجام والاغنيه رن تليفون معاذ وكان سامي المتصل.
معاذ: نقص خلي نشوف سامي خيره.
سامي: تييي ويينك ياارا حط كل شي ف ايييدك وتعاال للمستشفى بسرعه.
معاذ: خييييرك شن فييي ان شاءلله خير.
سامي:...
.
.
.
.
يتبع
