منقوله
حكاية ضيـــــاء
الحلقه25
معاذ: من ضياء؟
سميره: قداش عندنا ضياء..بنت عمك سعد من غيرها يعني.
معاذ: ههه تي ماشي.
وناض طلع لاقاه احمد
احمد: شن منو وين ياطير.
معاذ: حوول مش وقتك مانشوف في شي قدامي.
احمد: هذا خيره😕.
.
.
الجماعه كلهم نصدمو كيف انه خطوبه بسرعه هادي وقالو جنى اكتر وحده فرحانتلي😂 وسمعت أميمه لما جت التبارك قالتلهم قفه طايره ربي يتمملها.
في عز همي ضحكت علي المصطلح نتع قفه طايره مش غير طايره ياخدوجه راكبه فراري..شر الباليه مايضحك .
.
.
انا: رنا معاذ عرف😔💔.
رنا: من قالك😱
انا: بعتلي مسج " رسمي الدوه الي سمعتها"
رنا: حي معنها سمع...ردي عليه سيوره بيعرف.
انا: رديت "اي" بس😔.
رنا: اوس اوس امسحي دموعك الله غالب شن بديري.
انا: يح بيني يح بيني يتصل ياماما شن بندير.
رنا: باه باه قعمزي اهدي خودي شهيق زفير تلات مرات وردي.
انا: يااربي😭 هي...ألو.
معاذ: ضياء كان يطلع مقلب من الي اديري فيهم متلوميش الا نفسك بعدين.
انا: للأسف مش مقلب.
معاذ: يعني لما قلتيلي ولد عمي وانه زي خوك كنتي قاصدتها.
انا: اي.
معاذ: يعني انتي توا موافقه علي الي جايك ورسمي خطوبتك غدوا.
انا: اي.
معاذ: وتوا امتا تجاوبي بكامل قواك العقليه وله.
انا: ايي.
معاذ: تمام سؤال واحد بس وياريت تجاوبي بصراحه.
انا: تفضل.
معاذ: تحبيه وكنتي تعرفيه لما انا قتلك؟
انا: اي.
معاذ: تمام ربي يهنيك ويسعدك ومانتمنالك الا كل خير هي ماتبي شي.
انا: أسفه.
معاذ: عيب الكلام هذا احنا ولاد عم ف الاخير.
انا: تمام.
معاذ: سلام.
💔
سكر من هني وحذف تليفونه جابه علي اربعطاش طرف من هني.
ونا نهرررت نبكي بصووت...رنا حاضنتني وتبكي معااي.
انا: ااااااااااه ياااربي...حي ع الوجع الي انا حااسه بييه يارناا متتخايليشي.
رنا: بااه علاااش قلتيله هك.
انا: الانه هذااا الصح ضروري يكرهنيي بيش يقدر ينسااني ضروري😭😭.
رنا: ياروحيي عليكم😭💔.
انا: الله يسااامحك يابابااا الله يساامحك.
.
.
.
معاذ: الو عبدالرحمن انا طالع تونس اليوم نا ومحمد ولد عمتي ألحق انت.
عبدالرحمن: غير علاش شن صار.
معاذ: مافي شي يلا بيناتنا تليفون هي سلام.
خدي شنطته وقال لي بوه وامه وطلع حرق العجل خطم علي محمد وشد طريق لي تونس يتهرب مايبيش يشوف البنت الي يحبهاا غدوا خاطبها غيره.
.
.
.
فات اليوم كله ونا نبكي موقفتش نهائي ومطلعتش من داري ورنا مسكينه مخلياا سمير واهلهاا وقاعده معاي وتتحايل عليا بيش ناكل ونا ماعنديش نيه في شي.
ف الصبح.
جو عماتي ونساوين عمي يسألو بالك ماما تبي حاجه ولا يعونوها ف حاجه قتلهم انه كل شي واتي وشارينه وخدامات قايمات بي كل شي. وجي وقت انه نمشو للكوافير انا ورنا وكانت حسناء بتمشي معانا بعدين مصارلهاش.
رفعنا وسام حطنا في المزين وبما انه كان عندي قفطان حفله كبير ومش لابسته بكل فمحتجتش نشري بدت المزين فيا وعقلي ونا كلي ف عالم تاني رنا تحرك فياا تحريك من مكان لي مكان وتسأل فيا المزين تقلي ندريلك اللون هذا ولا هذا ونا نشوفلهاا وخلااص...زينتني وشفت المراياا.
المزين: تبارك الرحمن عليييك ربي يحفظك.
رنا: واااااااو ضيووو تهبلييي.
انا: شفت روحي ف المرايا طالعه تحفه لكن شن الفايده اذا كانت التحفه هادي في شي مكسوور داخلهاا ف حااجه توجع فيهاا وف غصه واقفه ف حلقهاا وخانقتهاا...طول الدمعه نزلت سخونه مجرد تفكيري في انه عماد مش معااذ وجعتني روحي انا زعما شن مدايره ف حياتي ياربي بيش يصير فياا هك الحمدلله الحمدلله ع كل حاال😭😭.
رنا: ضياااااء سااد بكى قاعدين ماتموش دموعك يابنتي بتفسدي الميكب.
انا: اااااه حيااتي كلهاا بتفسد جت ع شوية ميكب يعني😭.
رنا: الله غالب حبيبتي مرات راجل باهي شوفي جوه مراات رسمي يبيك الانه مش ساهله واحد يجي من تركيا لي ليبياا ع خاطرك اكييد يحبك.
انا: وناا نحبب معاااذ.
رنا: ضياء اسمعيني جاي معااذ انتي تحبيه وهوا يحبك ماقلنا فيهاا شي لكن ياضيو ياحبيبتي مش مكتوب للحب هذا يبدا اساسا احمدي ربك انكم قاعدين مدخلتوش في علاقه رسميه كان هذا شن بديري.
انا: رنااا ناا اول مره نحب اول مره نحس بييه الشعوور هذاا افهميني اول مره😭.
رنا: كان عماد راجل باهي راح يخليك تحبيه وتوا تشوفي.
انا: رنااااا مستحييل الكلاام سااهل عندك الحق💔.
رنا: اخخخ ياضياء بتعبيني انتي راه.
انا: ....
رنا: هيا ياقلبي احمد وحسناء البراا.
انا: مانبييش نمشي😭.
رنا: ضيااء يلاا حبيبتي تحمليهم هما ساعات ويفوتو.
انا: مش قاادره والله مااقادره.
رنا: هيا يابنتي هياا.
حسنااء: صلاااااتي ع النبي ضيووو طاالعه تهبلي.
انا: عليه الصلاة والسلام شكرا.
حسناء: هيا بالكم احمد يستنى البرا.
طلعناا ركبنا مع احمد.
احمد: مبروك.
انا: الله يبارك فيك😿
ف الطريق احمد وحسناء ورنا يهدرزو ..اتصل فون احمد قلبي دق بسرعه ترا من قلي انه معاذ المتصل.
احمد: الو.
معاذ: ايواا.
احمد: معاااذ يااتيس مش قتلك بنمشي معااك تونس.
معاذ: خلاص توا وصلت الحق انت كان تبي.
احمد: امتاا طلعت امس.
معاذ: راا منسمعش فييك شن تقووول انت ويين نبي نكلم امي.
احمد: نا كييف مروح بضياء والبنات من المزين نووصل توا نعطييك تكلمها.
معاذ: قلها مبروووك وسكر عليه الخط... محمد هي مشيناا الى ذاك المكان.
محمد: هياا امالا علاش جاي معاك😂.
معاذ: عاارفك واطي اصلا.
محمد: نفس الجو ماديرش روحك ملاك.
طلعو مشو لي البار طبعاا🍻
.
.
احمد: ضيااء قلك معااذ مبرووك😜.
نا ورنا شفناا لي بعض رنا شدت علي ايدي الانه عارفتني حنبكي.
وصلناا وزغاريط والدنيا مقيومه ورصاص نا قريب دخت من الرصاص الانه نخاف منه دخلت والدنياا زحمه مانسمع االا في تهبل ومشااءلله تباارك الرحمن...سلمت علي العيله اكل وكريمه ام عماد وخواته وقعمزت ونشووف ف مصير حياتي كلهاا قدام عيني.
قاالوا انه عماد بيدخل يلبس دبله هني انا وقفتلهم قتلهم لا تلبسني امه بحجة انه متحشمه وهما قعدو يضحكو ويتسهكو ومش عارفه شن يفترشو هذا بيولي راجلك تعودي من توا وهلباا كلاام مافش منه فايده ونا كل همي انه مايشوفش منظري هك مانبييش يشوفني ونا لابسه قفطان وعريان وبمكياج وتسريحه مانبي حد يلبسني الدبله مانبيي شي...المهم سمعو كلااامي لي اول مره ولبستني كريمه الدبله وزغرطو وكلهم فرحانين الا اناا ورناا مسكينه القيتهاا متنحه فياا وعيونهاا معبيه دمووع هزيتلهاا براسي بمعني تعالي جتني وحضنتهاا وقاعدتت تبكي وبكتني ونا ع سبله من غير شي.
طبعاا قعدو يقولو خيرهاا مشي ماما قتلهم زي الاخوات وديما مع بعض وياخدو ويحطو ومافش حد يعرف علاش نبكو غير نا ورناا💔.
خوله"اخت عماد": ضيو عادي ناخد رقمك.
انا: اي عادي.
عطيتهاا رقمي وطبعا اكيد مش واخداته ع سواد عيوني بيش تعطيه لي خوها💔.
كمل اليوم المشئوم واخيراا...نحيت القفطان والتسريحه بكل غل ولوحت الدبله ف الدرج وسكرت علياا الدار.
رنا: ياحيوانه افتحييي نا وين بنرقد.
انا: ف حوشكم.
رنا: ف عينك.
انا: اسمعي رنوش ساادك وقفتي معااي وتحملتيني مافيه الكفاايه وتعبتك معاي سامحيني😭.
رنا: شن تقولي يا مطرشقه افتحي.
انا: خليني اليوم بري لي حوشكم وراس رنا.
رنا: وشن ضمني تقعدي عاقله وماتخفونيش عليك.
انا: مش حندير شي وتوا نخلي فوني مفتوح.
رنا: باه تصبحي ع خير.
انا: هه منين بيجي الخير.
رنا: ضيوووو😡
انا: باه قدامك الخير.
.
سعد: شن جوهاا.
ليلى: ماوقفتش بكي.
سعد: توا تنسى وتتعايش مع الوضع.
ليلى: ان شااءلله نا خايفه دير ف روحهاا حاجه.
سعد: لالا مش لدرجه هادي.
ليلى: رنااااا شن ويين ماشيه؟؟
رنا: بنروح ياخالتي.
سعد: ماكش قاعده مع ضيااء.
رنا: كنت نبي نقعد لكن هيا صممت انه نروح.
ليلى: باه يابنتي بسلامتك وصحيتي علي كل شي درتيه مع ضياء.
رنا: سلمك هذا واجبي ضياء اختي❤.
.
.
.
محمد: هييي يامعاااذ يااغ... سادك ماشربت را
مش قادر نوقف ع حيلي باش بنقدر نرفعك.
معاذ: ههههه يا... خليني هني عاا عااجبني االلجو فضيييع.
محمد: ههههه فاطستها ع الاخر.
معاذ: عبيتهاا فلل بالك ننسى.
محمد: وااضح.
معاذ: خيره هذا يشبحلي.
محمد: مش عاارف.
معاذ: هي يا انت ههههههه ننقاني بديت نتكلم في كلااام حد وجعني.
محمد: من الي وجعك😕؟؟
معاذ: اشبح اشبح كيف يشوف يبي نطلعله عينه ولا كيف.
محمد: فوتك منه.
معاذ: لا نايضله.
ناض ورجع طاح.
معاذ: ههههه تقدر تساعدنا يابرنس.
محمد: توري ف فلاحتك ليش😂.
معاذ: طرزان وحركات وجو.
محمد: هوا انت واعي وتفترش مابلك زارطهاا...نوض نوض.
قامه وطلع للسياره بعد جهد جهيد وهما الاتنين يتخابطو ف بعض..ساق محمد بما انه معااذ منتهي ع الاخر.
وصلو للشقه معاذ ارقد طول...ومحمد خدي قهوى صحصح اشويه.
.
.
رنا: اناا محروقه واجعني معااذ نحس فيه نفس الجرح الي ذقته ياخي هوا اقوا حبتين الانه اعترفلها تعرف امتاا حكت معااه ضيااء كأنه الجرح نغرس فياا اناا توجعت نفس الوجع لما مشييت وخليتني نفسه بضبط وضيااء مسكينه كذبت عليه بيش ينساهاا وهيا لا تحب عماد ولا تعرفه اخخ بنهبل نا بنهبل.
سمير: لي هدرجة نا جرحتك😔.
رنا: اي يلاا فاتت.
سمير: اسف والله ماكان قصدي.
رنا: تي عاادي يامختش مشت بجوها واصلا وقتهاا نا مقتلكش اني نحبك الانك غبي ماتفهمش.
سمير: اي والله غبي ومانفهمش.
رنا: هههه صبحخير.
سمير: هههه باه اسمعي.
رنا: قول.
سمير: شن رايك نكلم معاذ ونقله الحق.
رنا: باه ها قتله مش حيصدق وبتزيد عليه بس لا اكتر تخايل يشوف الي يحبهاا تتزوج غيره.
سمير: قهرتك بالعكس يبدا عنده دافع انه يكلم خالي وخالي استحاله بيرفض ولد خوه.
رنا: هذا الكلام كان مزبوط قبل لا يجي عماد لكن بعد عمي سعد عطي كلمه خلاص وخطبهاا الولد معش يقدر حد يتكلم.
سمير: زمري يعني توا مافيش حل ابدا.
رنا: الله غالب مش مكتوبين لي بعض.
سمير: هوا معاذ مش هني ف تونس ومرات حت يستقر غادي.
رنا: اقسم من قلك.
سمير: ماه محمد خوي ماشي معااه.
رنا: نقصد من قلك بيستقر غادي.
سمير: لما جي بيرفع محمد قتله شنو منو قالي تونس وبلا عوده بأذن الله استقرار غادي.
رنا: ياحليلي علييه هذا هارب.
سمير: لالا قالها بجو تي نا نفكر في ياسر
رنا: خيييره حت هواا😦.
سمير: ههههه خيرك نخلعتي القصه هوا كان حاس قبل انه معاذ وضياء يبو بعض وتوا مسافر يعني بيرجع بيلقا الدنيا خاشه بعضهاا ضياء نخطبت ومعاذ هج.
رنا: جبتهاا تعرف كاان هنااك من بيقنع عمي فهوا ياسر.
سمير: الله الله ع الذكااء تي هوا خالي رجب مش حيقدر يقنعه ياسر بيقدر.
رنا: مرات يعني ماتندريش.
سمير: ياودي لا اظن مشكلتهم عويصه.
رنا: اي بكل.
سمير: وكأننا نحكو كيف الخوت من بكري.
رنا: هههه عنشكلك امشي درق وجك ارقد.
سمير: ههههه باه انتي حبيبت من.
رنا: بابا😂.
سمير: هههه خزي.
.
.
ناض معاذ الصبح راسه دبل دخل الحمام خدي دوش وبدل والقي محمد راقد خلاه ونزل خدي قهوى وفطر وقعد يمشي في الشوارع.
.
.
اما انا من التفكير دخت ورقدت ورحت ف سبات عميق وحسييت روحي بروحي مهنااش حد جنبي لا سامي الي من حد قتله بيخطبوني غصب بعتلي مسج بس انه سافر دبي ومعش اتصل ولا نورا صديقة عمري ع اساس ولا معاذ الي يناشب فيا ديماا ويخاف علياا ولا بابا الي متوقعتش في يوم انه يزعلني ويغصبني علي حاجه انا مانبيهاش ولا ماما الي موافقه ع المهزله الي تصير ومش مأتر فيهاا منضري هك ومحاولتش حت توقف بابا بي الكذب.
رن فوني كم من مره لكن ماعنديش جهد نرد قعد يرن ويرن ويرن القيته رقم فته وعاود مره تانيه وتالته ورابعه رديت ومابيتش نتكلم.
هوا: الو السلام عليكم
انا: وعليكم السلام تفضل.
هوا: ديما تردي ع الارقام الغريبه ولا المره هادي كيف نايضه من النوم مركزتيش ع الرقم.
عرفته طول عمااد الدراه.
انا: اظن انه ميخصكش ومدخلكش.
عماد: تي كيف مايخصنيش مش خطيبتي😉.
انا: احلم وخلاص.
عماد: علاش نحلم زي مواليتي خطيبتي ف اسبوع تولي مرتي في شهر عادي يعني.
انا: "قهرني بطريقة اسلوبه هذا كنه يسحابني سلعه"...ها ها ها توا نشوفو.
عماد: المهم يا نكاديه صباح الخير.
انا: منين بيجي الخير والواحد متصبح ف وجك النحس الي بدون كرامه كيفه كيف الزينقو.
عماد: اسمعيني من توا يابنت الناس طولت اللسان هلباا ماتمشيش معااي ومره تانيه نتصل تردي وامتاا بنقول لي بوك ناديهاا تطلعي والجو الي درتيه ف البياان متع مانبيش نطلع مايمشيش معاي وهلباا حاجاات تانيه ماتمشيش معاي توا مع الوقت تعرفيها.
انا: سكرت ف وجهه الخط مصح وجهه وخلااص.
طول جتني رساله" وتصكيرة الهاتف هادي توا تشوفي عليها وتي روحك العصر جايك"
ف خاطري هذا خيره مايستحيش جاي بيش يتعاارك ولا كيييف لكن احسن خلي يجي دق الحديد وهوا حامي نفركشهاا يعني نفركشهاا.
نضت دخلت الحمام وصليت وقريت قرآن ومن امس مش واكله شي ماعنديش نيه.
نسمع ف صوت رنا البراا فتحتلهاا الباب.
انا: حمار تعالي تعالي جيتي ف وقتك.
رنا: بلا هزايب خيرلك.
انا: غير تعالي مصيبه توا بتصير.
رنا: قلت نا مفروض منخلكش بروحك الانه عارفتك متع مشاكل.
انا: غير استهدي بلله عماد كلمني الصبح وتكيتها معاه وجاي العصر ويهدد فقلت بنطلعله وبننهي المهزله هادي.
رنا: هذا بلا كرامه تي كان يبي ينهاها راه نهاها من الاول مش توا لما بدي الموضوع جديات.
انا: نا بنجرب وخلاص .
رنا: شن بتلبسي باه.
انا: ابيخ شي عندي ومش حاطه ميكب ولا شي.
رنا: تي وجك حاله اصفر بتخلعي الراجل.
انا: مش يبي يتجوز توا يشوف.
رنا: باه كليتي حاجه؟.
انا: مخاطريش.
رنا: نمشي نجيبلك حاجه تاكليها ونجي.
انا: تعالي تعالي مانبيش كليت بكري" نكذب طبعا بيش متزنش"
رنا: وكان تطلعي تكذبي.
انا: عينك تي ماكله وبنكذب.
رنا: سامي معش اتصل.
انا: اي💔.
رنا: نقص ايدي كان ماطلعش يحبك.
انا: قصي معنهاا نا مانقصني غير سامي يطلع يحبني تي لالا مستحيل سامي ونعرفه.
رنا: انت ياعريف نوض وتي روحك.
نضت نوتي ف روحي مصارش من كلام بكري انه بنلبس ابيخ حاجه فكرت فيها اشويه القيت اللبس مدخلاش بي الموضوع كان بنطفشه نطفشه بي اسلوبي وكلامي مش بلبسي.
لبست قونه عنابيه وبلوزه بيضاء ووشاح عنابي." لبسه سنبل وكيوت" درت شوية حاجات ع وجهي وطلعت للصاله انا ورنا.
ليلى: ان شاءلله خير علي وين ان شاءلله.
رنا: عماد بيجي.
ليلى: حااق بااه مرحبتيين بيه 😍" فرحت تسحابه انا مندياته"
المهم فات الوقت وبابا دخل علينا قبل بيقلي وتي روحك لقاني واتيه استغرب قالي ديري قهوه وتعالي للمربوعه..قلت يلاا ياضياء اكسري الشر وديري القهوه وطلعيها..درت القهوه وطلعتهاا طقيت ودخلت مديت لي بابا ولي عماد وقعمزت وبابا دار جو بنخليكم بروحكم وطلع.
عماد: مشاءلله عليك قدام بوك هاديه.
انا: شن تفضلت.
عماد: مليحه القهوه انتي مدايرتهاا.
انا: لا الشغاله.
عماد: توا نرفعاهاا معانا معنها.
انا: من هياا؟
عماد: الشغاله😂.
انا: ها ها اسمع هما كلمتين را انا مانبكش افهم.
عماد: فاهمها هادي اي حاجه اخرا.
انا: خلي عندك شوية كرامه وانسحب لو تكرمت يعني.
عماد: ضياء اسمعيني جاي انا ليا وقت نبيك قبل حت ماتجي لي ليبياا وبوك قالي انك موافقه وكلمت اهلي واتفقنا علي كل شي تمام لما جيت اهنى مش فاهم شن صار انتي وضحتيلي فكرة انك ماتبينيش فجأ استغربت.
انا: باه ويعني توا شن يصير.
عماد: مانقدرش نقلك حبيني بي الغصب.
انا فرحت نسحابه بينسحب.
عماد: لكن زواج راح نتزوجو وحت لو نعيشو مع بعض زي الخوت ولو ع الحب بعدين الزمان كفيل بي انه يقدر يغير القلوب او لا.
انا: انتم خيركم مستسهلين الموضوع لي ابعد الحدود وكأنه قطوسه الي ترسمولها ف حياتهاا مش بني ادمه وعندها الحق في انها تدخل ف قرارتها.
عماد: الله غالب هذا الي صار.
انا: قاعد مصار شي عندك وقت انه تنسحب.
عماد: مانيش منسحب والعرس بعد شهر هوا كم يوم نمشي لي تركياا نرتب كم حاجه وجاي علي العرس يعني كان بتوتي حاجتك من توا.
انا: ماشي معنهاا تبي تعيش حياة سوده انت.
عماد: اي معندكش مشكله بكل😜.
انا: باه بنطلب طلب.
عماد: قولي.
انا: حاول تفكر في انه هذا زواج مش لعب.
عماد: فكرت وياخي من جميع الجهات مفكر فيها.
انا: وياريت تزيد تفكر انه نا مانبكش وانت بي الي ادير فيه ومستقوي بي بابا ادمر في حيااتي وكانك زي ماتقول تحبني فالحب تضحيه وياريت تبعد وتخليني في حالي الانه نا منحببببكش.
عماد: ضروري ترضي بي الامر الواقع وزي ماقتلك كل شي خليه للوقت.
انا: سلام.
نضت وخليته ودخلت قربعت باب الدار.
رنا: شن صار.
انا: مسكر رااسه زي البلى شي تقوول نكلم ف حيط ولا شنو اخرا العرس بعد شهر نلعبوا احناا ماه نلعبوا.
رنا: حي مايبصرش هذا بكل.
انا: خلااص بنرضى بي الي يصير ماعندي حل غيره..بابا مستحيل يرجع ف قراره وعماد مسكر راسه وقالي حت كان انتي ماتبيش بنجوزك ومعاذ خلاص خدي علياا فكره انه نا وحده ملاعبيه وخاينه ولعبت عليه وحرقتله دمه وخلاص توا يكرهني وينساني ونا ربي يكون ف عوني بيش ننساه.
رنا: يعني خلاص الامل ضاع.
انا: وهوا هناك امل بيش يضيع.
رنا: لكن في صفه مشتركه بين معاذ وعماد.
انا: شن هيا؟
رنا: نفس حروف الاسم الفرق ترتيب😂.
انا: مفضاك عليك تركيز عندك ازح.
رنا: باه اضحكي قداش ليا شفتش ضحكه السمحه.
انا: 😊
رنا: اوسع.
انا: خطيني😣
.
.
.
عند معاذ ومحمد الجو طبيعي وعادي محمد حلف علي معااذ معش فيه شرب نهائي الانه دارله العار ومعاذ قله باه الانه القي روحه ماشي في طريق غلط ومش حيجيب فايده...يفوتو في وقتهم من قهوه لي قهوه وع البحر واتصل عبدالرحمن بيهم قالهم جاي ومعاذ قله يمر علي احمد ياخد منه الفلوس ودبش موصيه عليهم قله باهي وماشي الجو.
.
.
.
فاتو تلاته ايام طوال عرااض بابا مسئلش علياا وماما تجي مره مره ع اساس تنصح فياا وتبيني ناكل وهك ونا تلاته ايام لا ماكله لا شي مره مره نشرب في ريحة ميا بس ورناا مره مره اطق فياا قلتلهاا اطلعي انتي بلله عليك خودي حاجات العرس الانه والله ماعندي حيل قتلي باه مسكينه وبدت تجيبلي بشويه بشويه وع اساس انا بننسى وكل يوم يفوت نزيد نكبد اكتر...عماد سافر تركيا ومتصلش فكه فكه وسامي مره مره نحكو ع الواتس كانت ردت فعله عاديه علي الخطوبه قالي مبروك بس استغربت ونورا فرحتلي تسحابني نحبه الانها متعرفش بي موضوع معاذ... واليوم ضروري نمشي عند جدي الانه ياسر روح ودايرين عشاء وكان مامشيتش بيديرو قصه لبست وماعنديش حيل حت نوقف نبي نرقد وبس قعدت ندور ع دبله ضروري نلبسها كان هذا شن يفكني من اسئلتهم وصلناا غادي سلمت ونجامل فيهم وخلااص قلت لي رنا نطلعو طلعت معاي مسكينه جيهة وين نقعمزو القيناا احمد وحمزه ووسام مقعمزين قعمزنا معاهم وطلعت حسناء وحنين وجنى وجنان وجنات وجي سمير...طبعا جنى بدت تعامل فيا كويس عاد نخطبت وتفكت مني واطمنت علي معاذ.
حمزه: وكأن الحياة بدت ترجع لي طبيعتهاا.
احمد: اي ياسر وين.
سمير: قال خلي نقعمز نهدرز شويا وتوا نلحق.
احمد: ههههه بيدرلنا جو المتزوجين حت هوا.
سمير: هههه شكله.
احمد: تي كنكم تقوول ف عزا اززح اشي اشي كل وحده احررف من التانيه.
حسناء: خيرناا قاعدين عادي يعني.
احمد: تي حت ضياء الي قبل متسكتش توا انخطبت بدت تتجكتر من بكري ساكته.
رنا: يا ابني مالك ومالنا.
احمد: واجعني حالكم الصراحه.
حنين: ويااسر جيي ووووه ويااسو جيي.
ياسر: شايفك ياماما شايفك🙌.
نضنا سلمناا عليه وقالي صار سافرت مشيتي درتيها ونخطبتي😉..وبدي يهدرز عليناا.
ياسر: اي شن جوكم وشندايرين شن صار شن مصارش كيف الدنياا...ووين الي بلا عقل معاذ مشفتاش وحت التاني محمد.
احمد: توكلو لي تونس.
ياسر: اضرب هادو الاتنين بذات مفروض ماخليتهمش يمشو مع بعض الانهم حيخربو الدنياا تونس سلامتهاا معنهاا.
قعدو يهدرزو ونا ف عالم تاني كل مايقولو معاذ قلبي ينتفظ نفض جيت بنوض حسيت بدوخه قعمزت وقلت توا تمشي حسيتها مشت نضت بنشرب ميا ونا في طريق الدنيا بدت ادور بيااا واغمى عليا معش نندري علي شي.
.
.
.
.
يتبع
