حكايـة ضيـــــاء
الحلقه 11
سامي: لا هكا هو نفوت عليك بكرا العصر كل شي يكون واتي ومديريش حاجات واجد وانت وليد شد عندك المفاتيح من توا انا بنكلم حسن ياخدني عندنا كم مشوار
نورا ووليد: باه تمام حتي احنا ماشيين
سامي: اوك 👋.
نورا ووليد: سلام.
سامي كلم حسن وجي رفعه ونورا ووليد مشو طقو ف كم محل وخدو كم حاجه وروحت نورا ووليد مشي ع حاله.
.
.
.
اما عندنا نضت ع اذان المغرب راسي دبل فتحت فوني الانه كان مقفل القيت رنا متصله عاودتلها.
انا: الو.
رنا: اهلاا وينك مش مبينه.
انا: كنت راقده.
رنا: مصيبتك الحرفه نوضي صحصحي وتعالي عند اميمه مكسدين.
انا: معنديش نيه ومعنديش جهد.
رنا: غير تعالي بلله عليك قداش ليك ماجيتيش اهني حتي اميمه حرجت منك.
انا: الله الله ع الكذب بااه توا نجي.
رنا: هههه تمام نستنا.
انا: من في غاادي.
رنا: سعاد وبناتهاا والعيله.
انا: عندي نيه ف عركه اصلاا معاذ غادي.
رنا: ههههه لالا مش هني.
انا: باه تمام بنوض نا هي نتلاقو.
رنا: تمام.
سكرت من رنا نضت طلعت لبسه مليحه وجكترت عمري .
ليلى: صباح الخير يا أانسه.
انا: صباح الورد يامدام.
ليلى: ع وين ان شاءلله.
انا: ع حوش خدوجه هي تمشي معايا.
ليلى: اي اصبري كنت بنمشي اصلاا.
انا: بااه تمام.
بدلت ماما وطلعنا شور حوش جدي دخلنا سلمنا ع الحضور وقعمزت بجنب ام حسناء قعدت تسأل فيا ع القرايا وقاتلي احسن مادرتي تحجبتي كبرتي ف عيني ومنه ستره ومنه سكتي كل من كان بيتكلم نا فرحت بكلامها ونسمع في جني تلقح طيب فيك لبستي حاجه تستري بيها روحك وتاخد وتحط وكان عندي نيه ف عركه لكن مابيتش نعدل عليهاا ونا نصب ف مياا طاح مني الكاس ناضت اميمه تكشخ وجعتني اللقطه هوا كاس ازح مفروض تقول انكسر الشر مش تعيط علياا غمت عندي طلعت وين المسبح قعمزت قدامه وهماا ينادو فيا قاتلهم ماما خلوها ماحدش يمشيلهاا الانه تعرفني لما نتعصب نحب نقعد بروحي
قعمزت وحطيت سماعات جت ع اغنيه عراقيه ع جرح طول بديت نبكي وبعبرتي مش عارفه شن صارلي تكشيخه دارت فياا هكي بكيت بكيت وبكيت وقعدت نتحسر ع تركيا ونتكلم بصوت...نطلع امتاا مانبي وناخد مانبي ومره ف سنه نبكي 😂😭💔وتوا اهني حتي طلوع من سور ماخلوني نطلع وبديري اي شي بحسابه وكل شوي نبكي تي شنو هدا ياربي.
معاذ: عقل عقل ان شاءلله👏👏.
انا: شن جيبك انت هني😒.
معاذ: علاش تبكي.؟
انا: دخلكش اسع من تلاا وجهي كذا.
معاذ: جي وقف قدامي ويتبوسل...مش موسع وخيرهم عيونك سود وكبار هكي.
انا: زي قلبك ابعد من قدامي.
معاذ: قاعد نقلك ظالمتني😁.
انا: تي ابعد ودفيته طاح ف المسبح..نا حطيت ايدي ع فمي وقعد شوي ماباش يتحرك استغربت هدا خيره..معااذ معااذ بلاا براده هدا خير بلااه قاعد متحركش بديت نعيط تعالو تعاالو مابي يطلع حد او بي الاحرا ماسمعني حد قعدت نقوله هات ايدك وهوا لا حياة لمن تنادي مافش حل قدامي الي انه حتي ناا نقز بيش نطلعه هدا كان مامتش معااه داخل لوحت الفون ونزلت جبدته الا بعد الف واسطه لعند ظهري نكسر طلعته ع العشب وبديت نضرب فيه نبيه ينوض ندير ف ايدي ع صدره باش تطلع المياا مابيش يدير اي حركه ولا طلع المياا انا خفت صراحه وبديت نبكي ونعيط مافش حد سمعني تربح معااذ نوض ولله ماناقصه ناا راه.. ماجش ف راسي الا الافلام ومافش حل قدامي الا انه نحاول ونديرله تنفس اصطناعي كيف جيت بنطبس فتح عيونه وبدي يضحك ميت ضحك ناا قاعده مصدومه ونبكي وهوا ميت ضحك.
انا: ياحيواان ياحقيير خيرك معاياا ياانت😭💔.
معاذ: وووه هههههههههههه.
انا: وربي ماتستحي نسحابك متت ومنعلق ف ذمتي رقبه ننقض فيك ونفكر ف شهرين كيف بنصيمهم.
معاذ: ههههههههه يعطيك السلامه وخلاص نبي نفهم انتي من ابسط شي تبكي هكي.
انا: وانت كل حاجه عندك خلايع وتخويف هكي😭.
ع جية جنى ومعاذ قاعد متسطح ويضحك ونا مقعمزه ونحكي نفس التقعميزه قعده من الخلعه
جنى: 👏👏مشاءلله غرامياات وجوو مواعيد والمساكين الداخل يسحابوهاا متكنطياا وتبكي وامهاا تقول خلوهاا بروحهاا ينااري .
معاذ نااض قعمز .
انا: اويي هي انتي احترمي نفسسك وردي بالك ع روحك.
معاذ: شن تخرفي انتي ومن امتاا انتي اهني.
جنى: هه من التنفس الاصطناعي يافالح.
انا: خبطت ع راسي علييك حصله حصلتهاا توا هادي كيف بتفهم وراسها معشش فيه بنقلاديشي.
معاذ:😑 بااه ويعني كنت غارق طلعتني ونادت وعيطت لين شبعت مافيش حد سمعها .
انا: 😨😮🤦🏻♀.
جنى: ههه اكذب غيرهاا ياولد خالي وانتي هي ياساقطه ماشيه نقولهاا لي امك.
انا: بري قولهاا.
معاذ: تعصب ومشي شورهاا شدهاا من شعرهاا ويكلم فيها ويضغط ع سنونه...قسماا عظماا نسمعهاا الكلمه هاادي مره تانيه تشوفي حساابك وانتي مرااء بري قولها حتي بينك وبين نفسك مش حيحصل خير ابداا وقد اعذر من انذر وها قتلك ميبدااش اسمي معااذ كان منلعبش ف حيااتك عشره.
مسح ع قلبي وخدي بتأري وع شوية بنضحك كيف شادهاا معاذ وهيا تقوله باه اطلق بااه.
معاذ: تسمعي ف الي قلته ولا.
جنى: اي اطلق وووك .
معاذ: توكلي.
مشت وتمتم وتنتور وتبكي وحالتها حاله مسكينه الولد الي تحبه دار فيها هكي.
انا: خيرك عليهاا وكأنك زودتهاا حبتين.
معاذ: بيش تتربي تي كان مدرتش هكي صحيحة وجه عادي تمشي تقولهاا لي امك وتزيد عليها ابهارات ياخي.
انا: علييك عيله متوقعتش عندكم طروح الصغار تعاودو وجو القديم اهوا.
معاذ: هههه تي بنات سعاد هادم الجزيره والعربيه واختها تي باهي الي حصلناا ف جنى تمشي بتهديد لكن جنات مايمشي معهاا شي.
انا: وهدا شن يقولوله وربي الا مفرخ.
معاذ: حي حي ياضياء اجري اجري بسرعه.
ضربني ع ايدي وابدي يجري وحتي نا بديت نجري معااه زي الهبله وصلناا لي قدام حوش وقف وميت ضحك يضحك وداهش ليين معش قدر يتنفس ونا وقفت نشبحله وقايمه حاجبي.😒
انا: تراا قول والله من جدك انت والله مااك طبيعي رااه براا تعالج ف اقرب وقت ممكن.
معاذ: ووووه هههههههههه بطني معش نقدر وربي.
انا: لا واناا نجري معااك ونصدق فييك زي الهبله.
معاذ: ههههههههههه والله ماتوقعتك تجري امتاا القيتك تجري زدت تحمست.
انا: إيااه 😒.
معاذ: والله.. يلا يلااا سقدي ادخلي غيري لا تمرضي تواا .
انا: حي فوني قاعد غاادي.
معاذ: توا ناخده ف طريقي ندسهولك 😂.
انا: مانبيلك دساان خليه ف حاله خود فونك وخلي فوني ف مكانه.
معاذ: حط ايده ف جيبه وطلع هاتفه مبلول... اهواا هاتفي شفتيه شن صارله كله منك.
انا: هههههه تستاهل وهدا شويه فييك ياخي😛.
معاذ: هههه في غيره متخاافيش يلاا ادخلي صقعت نا بنمشي نبدل .
انا: تمام.
معاذ: حط ايده ف جيبه ويمشي مشى مسافه ونا كيف داخله صففر ويعيط من بعيد..ردي بالك ع روحك ياخوافه.
انا: ضحكت عليه واشرتله بي ايدي بمعني تمام👍👋.
ودخلت نرعش من الصقع بدلت وطلعت بناخد فوني القيتهم كلهم مقعمزين سلمت عليهم وقعمزت بجنب رنا
رنا: وينك انتي اختفيتي بكري حتي فونك القيته اهني فهميني وجنى دخلت تبكي شن درتيلها 😂.
انا: ههههه قصه توا نحكيلك بعدين اعطيني فوني وهيا وينها فرخه جنى توا.
رنا: قاعده الداخل تبكي تقولي ترا من ماتلهاا😂😂تليفونك عند حسناء.
انا: هههه مسكينه وجعتها اللقطه..سوناا اذا ممكن فوني يعني😁.
حسناء: هههه اهواا شدي.
جي معااذ لابس توته سبورت وينفض في شعره قااعد مبلول.
معاذ: سلام.
رتاج: وعليكم السلاام.
معاذ: حي بغبرتك انتي يابنت نوضي ديري قهوه😂.
رتاج: يخلي الواحد يندم يرد عليه السلام.
انا: رتوجه تراا تعالي شويه نبيك.
معاذ شافلي ويضحك ع صامت ع لقطات الي دارهم فياا وانا نصدق فيه زي الهدوقا 😂.
رتاج: هي جيتك جيتك.
معاذ: مفش مهرب راه بديرهاا القهوه.
انا: توا نديرهالك اناا شرايك😉😂.
معاذ: لالا توا نديرهاا بروحي كان هذا.
رنا: هههههه عارفها بتجيه متملحه.
حسناء: اسمعو بجو هكي نا جعانه.
وسام: حتي ناا .
معاذ: وحتي اني.
رنا: اند مي.
رتاج: ومي.
انا: ايااه حتي ناا.
احمد: هههههههه يلاا نوضو وديرو حاجه تكلاها.
حسناء: خاطرنا ف حاجه من مطعم .
معاذ: عليكم وعلي حمزه توا رفع حنين للمصحه ولا ياسر حتي هوا البراا.
ريهام: كلمو حمزه طيب وتوا يحن عليكم عيله مجاعه.
وسام: صدقتي فيهم متقوليش من شوي كانو يتعشو.
رنا: ياعيله متحسبوش ريهام ووسام شبعانين شكلهم.
وسام وريهام: لا كان بتجيبو ناكلو عادي 😂😂.
احمد: امالااا اسكتو ماديروش روحكم مفش منكم .
معاذ: حسن ترا هاتفك شويه بنبعت حاجه.
حسناء: حسن ف عينك قول سونا نعطيهولك .
معاذ: تحسابني احمد توا نعرف فيك كف يخليك تقولي حاظر بدون دوا زايده وتجيبي الهاتف.
حسناء: ههههه حاظر.
مديتله هاتفهاا وخايفه ترعش دخل ع جهات الاتصال رقم مسجل ضياء خدااه ورجعلها الهاتف لا بيبعت حاجه لا هم يحزنون.
واتصلو بي حمزه قالوله جيب معاك وجبات من كودو قالهم باه المسكين.
صارت لحظة صمت ع ارواح الشهداء😂 مافش حد تكلم.
معاذ: ف مرا جابت.
انا: كيف جايه بنقولهاا خطفتها من ع لساني .
معاذ: القلوب عند بعضها وغمزلي😉.
انا: تحشمت مش عارفه شن صارلي 😂 حطيت عيني ف الفون ودرت روحي مسمعتااش.
حسناء شافت حمزه من بعيد طارت تجري.
حسناء: لابااس ياختي لكن ولله جعانه مانشوف فيك بي الباهي توا.
حنين: ههههه انت مش انت وانت جعان عطيكم سمام تقهرو فيا نا منقدرش ناكل.
حسناء جبدت الاكياس من حمزه وقتلهاا معلش تكبري وتنسى.
حمزه: تي باه بشويه وانت تقولي لك سنه مكليتيش.
حنين: هههه خليها هي تعالا نمشولهم.
حمزه: لالا تعالي للحوش انتي مريضه ومش باهي ليك الدوشه والنسمه هادي.
حنين: ياحليلي منك ياحمزه بااه نسلمو عليهم ونرجعو .
حمزه: تسليم بس هاا قتلك.
حنين: اي تمام😘.
جت حنين سلمت علينا.
انا: ان شاءلله لاباس حنونه ماتشوفي شر 😜.
حنين: سلمك لايوريك باس😘.
معاذ: عليك حن تعيشي وتاكلي غيرهاا ياحنه.
حنين: حيوان😒.
حمزه: ان شاءلله فيك.
انا: وفيك😂.
معاذ:انت عااد راه حتي نا خوك..منورا ضيو😍 طقيهاا😉✋.
انا: استغربت من الاخ يدلع وجوه مولي ملييح ✋ربك يستر كماا يودع😱بعدين اتفكرت انه العافن ماايموتش😂.
حمزه: شكرا ياضياء يجي منك اكتر.
انا: هههههه والله نبصر رااه.
حمزه: اي اي 😂 يلاا حنين سلمتي وله.
حنين: هياا.
رنا: ضياء قدمي لازم نعزموك يعني😐.
انا: ماخاطريش 😷.
حسناء: ماخطركش عينك تعالي حتي العشاء ماتعشيتي.
انا: والله ماعندي نيه .
معاذ: خلوهاا شوري هادي.
جاب وجبه وجي قعمز بجنبي وكلهم مستغربين ف معاذ كيف يتصرف معاياا.
انا: مش واكله متعبش روحك.
معاذ: وعلاش.
انا: الانه منقدرش ناكل حاجه مش واكلتهاا قبل.
معاذ: ههههه انتي من شن مصنوعه بزبط.
انا: دخلكش😂😛.
معاذ: تواا بنمدك بي الي في ايدي كان مزال تقولهاا الكلمه هادي.
انا: دخلكش قلناا🙊.
معاذ: انتي عاد ع العنااد تموتي .
انا: حقاا نا نسيت حرجانه منك وجيت بنوض قعمزني.
معاذ: عارف..غير شوفيلي جاي.
قمت عيني جت في عينه طول حي ع ام العيوون الي عنده يهبلو توا كيف اكتشفت😂 لونهم عسليات وكبار .
انا: نعم😶.
معاذ مستوه فياا اناا نزلت عيني وحسيت رنا مركزه معاناا شفتلهاا غمزتلي.
معاذ: يعني انتي توا ماتبيش تاكلي حتي لو قتلك ع خاطري ذوقيه.
انا: شفتله🙄.
معاذ: ها شنو😟.
انا: بعدين لما بطني توجعني توا يفيدني خاطرك..كول انت ساد.
معاذ: باه كويس حتي نا معش خاطري ناض وسيب الباكو ومشي.
انا استغربت معقوله زعل من شي تافه زي هدا تي شن المخلوق اهوا ياهوا بيطلع عنده مرض نفسي ف نهاية الامر ياانا نقول ف كلام مش مفهوم ...غمتلي ونضت استأذنت ورنا كانت مركزه معايا لحقتني ومشيت للحوش قعدت نهدرز نا وياها شويا بعدين ناضت روحت ونا قفلت الفون ورقدت معش نندري ع شي .
نضت اذان الظهر خشيت الحمام نظمت اموري وطلعت صليت وشديت الفون فتحت نت هدرزت ع نورا شويه وسامي مسكر نت وقعدت نتصفح ونمشي ف الوقت
.
.
.
ف تركيا
سامي: ها نورا كل شي واتي نفوت عليك.
نورا: اي عادي.
سامي: تم نا جاي ف طريق .
نورا: مرات تلقاني ناا ف الشنطه بدل الحاجات الي بترفعهم 😢💔.
سامي: ههههه ديري رايك يلاا حتي انتي تفرح بيك ضياء فرح.
نورا: تي مش غير تفرح😂.
سامي: عبدالواتق .
نورا: حقا قولتلهاا ضياء انك تكون ف ليبيا غدوا فرحت قريب طارت.
سامي: بعقللك انتي كنك نورااا فييش تحسي خربتيي كل شي كنت مختطله ازززح مااه سألتيني قبل منورا بكل يانوراا 😡" تعصب وتنرفز وبدي يعلي ف صوته"
نورا: غير هدي من روعك.
سامي: تي اما روع وانتي خليتي فيهاا روع الي نقوله تمشي تعاوديه مكانش العشم والله.
نورا: غير بشويه عليك لا ينتلصلك عرق وانت شطحت فيا شطحه صح نبصرر علييك ماقلت شي كنت بنشوفك شن بدير بس 😂😂.
سامي: ترا قولي ولله ماقلتلها.
نورا: خيرك انت ولله مقلتلها يعني بعقلك توا بنمشي نقولها لي ضيو واضحه مفاجئه ولو انهاا فاجعه ولكن 😂.
سامي: خزييي فجعتيني وربي .
نورا: تعيش وتاكل غيرهاا وان شاءلله تمشي وترد بسلامه.
سامي: الله يسلمك يلاا خمسه واطلعي.
نورا: تمام.
شويه هكي ورن عليها سامي طلعتله الحاجات وسلمت عليه ودخلت.
سامي تلاقه مع حسن وقعدو يهدرزو
حسن: باه انت قلت لي خوك انك مسافر لي ليبيا .
سامي: هوا ومرته توا ف لندن ويبو شهر غادي يعني نمشي ونجي وهوا قاعد مروحش وكان صار مصار توا نقله لما نروح.
حسن: عند من بتقعد غادي .
سامي: عند خالتي هيا الوحيده اصلاا ف ليبيا من الاهل الباقي كلهن البراا.
حسن: كان عندها بنات ارفعني معاك معنها جوك فايح😜😍.
سامي: ههههه اشببح الفاسد اها عندها بنتين وتلاته ولاد .
حسن: كوييس بكل مدام عندها ولاد نا مش ماشي. سامي: غير تربح.
حسن: خزي حتي بي الكذب ميعزمش.
سامي: هههه ماه عارفك بارد توافق طول ونقعد حاصل فيك بعدين.
حسن: تافه 😂😂.
سامي: والله هيا شرايك تمشي معايا ع اقل نأجرو شقه ونتسبل بيك بيش منقعدش عند خالتي .
حسن: ف الحالتين مش رافعني ع سواد عيوني .
سامي: ههههههههه لا مش هكي ياتيس.
حسن: ملاا كيف فهمني ترا بالك نا فاهمك غلط يانصي😉😒.
سامي: هههههه عنبوفيتك مش محتاج عزيمه بتمشي هياا مرحبتين بيك بدون مانقلك.
حسن: توا خلااص معش نبيهاا احتفظ بيها لي عمرك 😂.
سامي: ههههه طز فيك...حقا مقتلكش سيارتي عند وليد خليتهاا.
حسن: كملت كني نا مش ع اساس خوك 😂.
سامي: ههههه ماه ياواطي هوا سيارته باعهاا وتوا ماعنداش سياره عطيتهله يمشي بيهاا .
حسن: ان شاءلله الرانج بعهاا😮.
سامي: اي حتي نا ختشت لما قالها لياا .
حسن: غبي مش حيحصل كيفهاا.
سامي: ينخافش عليه تو يحصل احسن منهاا عقله نظيف ويعرف يلعبهاا.
حسن: راد الله عليناا وخلاص .
سامي: ههههه كنك انت من شن تشكي
.حسن: هيي بلله خليها ف القلب تجرح لا تطلع البرا وتفضح😂💔.
سامي: له له له حسك وجعتني.
حسن: هياا هياا ساد دوه وانت من بكري تتكلم مدهشتش ازفت تقول بالع راديو.
سامي: الله واكبر .
حسن: لي امتاا بنقعد نعاني فيك مش عارف ياهم مزالك ساعتين بي الكتير وتكون ف المطار.
سامي: باه ويعني.
حسن: نوض وتي العلاقه الي بترفعها🎒.
سامي: شن هياا العلاقه😂.
حسن: الي يديرو فيها ف الاعراس يوم الثلاث ولا الاربعاء ولله معارف بزبط باش يندولها ديما ف الي اسمه محمد ولا احمد يفتحها مش عارفه عليش مينادوش ف حسن قاعد ف خاطري نفتحهاا ازح😐.
سامي: ههههههه عنجد تفكيرك اول مره نسمع بيها.
حسن: هوا انت عمرك حضرت عراس بيش بتسمع بيها بلله اسألني نا ديما نجي قدامهم ع امل يقولولي تعال افتحها وشي يقعدو يدورو ف محمد واحمد لين يلقوهم 😢😂.
سامي: مفضااك 😂😂.
حسن: عااد كنت عيل نسحابها حاجه كبيره.
سامي: ههههه .
حسن: ييي عليك وجع راس قداش ماتدوي يارفيقي.
سامي: اسأل الله العظيم رب العرش العظيم ان يشفيك.
حسن: اجمعين ياشيخ 😉👋.
طلعو سامي وحسن لي حوش سامي جهزو الشنطه وكل شي ونظمو جو الحوش وطلعو
شور المطار
حسن: باه قلي من بيجي ياخدك من المطار غادي.
سامي: توا نوصل نتصل بي واحد من عيال خالتي يرفعوني ع حد علمي يسكنو قريب من المطار.
حسن: باه تمام.
سامي: كنك .
حسن: لا مكانيش غير بنرايفلك بس😅.
سامي: فكناا من الجو معنديش نيه نبكي 😂.
حسن: ههههه اخر الدنياا انت تبكي.
سامي: حتي نا بنرايفلك ياقرعتي .
.
.
.
ف ليبيا
وسام: اطلعي من راسي مش رافعكم.
رنا: ييي عليناا باه توا من بيرفعنا.
حسناء: مااه كان انسوقو راه مش هدا حالنا من بكري نجدو فيهم.
وسام: بنرقد هدرزو البرا لو سمحتوا.
حسناء: مرقد جدي الي رقد معااد ناض .
وسام: باه شكراا اطلعي هي
.رنا: تعالي نشوفو احمد .
مشو لي احمد ف المربوعه:
حسناء: اسلام عليكم🙊.
احمد: وعليكم السلام ورحمة الله وبركاته نفهم فيهاا النبره والنظره هياا لخصو شن تبو.
رنا: ع طاير .
حسناء: سلمه الي يفهم طول.. الحق نبوك اطلعناا ناخدو كم حاجه لي ضياء🙈.
احمد: خلوها غدوا اليوم مش فاضي بكل .
رنا: مفش وقت 😪.
احمد: باه كلمو معااذ.
حسناء: اي حق مش قلناا هوا توا نرفعكم .
احمد: هاا نتصلكم بيه...الو وين انت..مش وقت برادتك باه ميه ميه هي سلام ...اوني كيف داخل من البوابه لحقو عليه .
طلعو يتجارو لي معاذ قلهم باهي طول ركبو ورفعهم لي محل كبير ف كل شي يبوه ونزل معاهم .
معاذ: انتشرو ف الارضي فسادا .
شدو سله سله وطارو بدو يعبو ومعاذ عجبوه باكوات لونهم بنفسجي خدي واحد كبير واحد صغير قال لي صاحب المحل يتكمه ع كيفه ويعبيه شكولا والكبير خليه فاضي وقاله نمر عليك بعدين ناخدهم...طبعا البنات خدو شن يبو وروح بيهم.
.
.
