حكايـة ضيــــاء
الحلقه15
الراجل: يخص حاجه لينا عندك
سعد: كيف مافهمتش تقدر توضح اكتر
الراجل: نبو بنتنا عندك.
سعد: بنت شنو شكلك غالط ف العنوان ياافندم.
الراجل: لا العنوان صح ميه ف الميه ياخي مفروض جيتك قبل 18 سنه مش توا لكن الله غالب الظروف تحكم.
سعد: ع شن تحكي انت بزبط راه صدقني غالط.
الراجل: بلا لف ودوران وراني عارف القصه من البدايه فلذلك متحاولش تنكر وقاعد نقلك كان مش الظروف راه مخليتهاش.
سعد: وانت من اصلا جاي تستجوب فياا وتقول ف كلام مش مفهوم.
الراجل: انا ربيع خو المرحومه زهره.
سعد:" صارله ستك قعد يشوف لي الراجل وساكت"
ربيع: وراجلها المرحوم عبدالله اذكرتهم ولا نزيد انذكرك بالك متعرفهمش.
سعد: الله يرحمهم ويحسن إليهم شن دخل البنت ف النص.
ربيع: برا رجع بيلف ويدور تاني قتلك نعرف القصه كلهاا فا متحاولش.
سعد: وشن تعرف ان شاءلله يلا عرفني معاك انا منعرفش.
ربيع: هه علي من تمشي فيهاا رااه مش علياا دور القطوس الي مايندري ع شي فوته.
سعد: تكلم بي ادب واسلوب باش نعرف نتفاهم معاك كان هدا الباب يفوت جمل.
ربيع: تمام مش تبي تعرف.
سعد: اي قول.
ربيع: خلي نذكرك انت ومرتك امتاا كذبتو وخديتو البنت مفكرتوش ف انه حد فينا راح يمشي للمستشفى ويستفسر كيف صار الحادت ولا بدير اجراءات ولا اي شي هادي النقطه اكيد فاتت عليكم.
سعد: باه كمل.
ربيع: مشيت وقالولي انه اختي جابت بنت وخديتوها انتم ع اساس عمامها.
سعد: باه علاش مجيتش ف هدكا الوقت واستفسرت وخديت البنت .
ربيع: ف هكا الوقت الظروف كانت متسمحش ونا خليت الموضوع بيني وبين نفسي وماقلت عليه لي حد وامتا عرفت انها عندك قلت الراجل مبحبح وتوا يعيشها احسن عيشه.
سعد: وشن الظروف الي تمنعك انك تاخد بنتكم ع قولتك.
ربيع: ف وقتها فكرت فيها من الي بيربيهاا محدش راح يقبل إلي هدا ياالله يربي صغاره وامي مرضت بعد ماتت بنتهاا متقدرش ادير بالها عليهاا وناا.
سعد: وانت خيرك.
ربيع: ونا منقدرش نحمل مسؤليتهاا .
سعد: الانك دابك وداب الخمر الي تشرب فيه اصلاا حتي لو جيت وطالبت بيهاا مستحيل راح نعطيهالك كان تربش قدامي.
ربيع: مافيش حد مايغلطش.
سعد: ف الي يصلح من غلطه.
ربيع: اهو جاي بنصلح.
سعد: جاي ومش صاحي وتبيني نعطيهالك تي ادير مادير ماك واخدهاا تعرف المرحوم شن قلي قبل مايموت قالي" البنت وامهاا امانه ف رقبتك رد بالك تردهاا لي اهلهاا مانبيش بنتي تربا عندهم" الانه عارف طينتكم شنو.
ربيع: هه كيف جاي برد عليه رن نقاله دقيقه بس...الو...شن في...باه تمام توا انجي...قتلك باهي ياا.....مترقيهمش.. سكر الخط.
سعد: تحشم راك ف مكتب محترم .
ربيع: انا توا بنمشي للمستشفى امي مريضه وتوا نفضالك تي لماا ناخدهاا منك غصبن عنك كان توصل للمحاكم البنت كبرت وانت مش محرم عليهااا.
سعد: اعلا ما ف خيلك اركبه وغير اعرف الحرام من حلال وتعال تكلم بعدين وريح راسك البنت محرم عليهاا
.
ربيع: ههه وكيف ان شاءلله كذبت الكذبه وصدقتها.
سعد: بنتي من الرضاعه يلاا توكل.
ربيع: راح ناخدهاا وتشوف .
سعد: تمام .
.
.
.
نضت من النوم مارقدتش هلباا ف الاساس مشيت لي ماما القيتها راقده بعدها مشيت للمطبخ جتني القطوسه عطيتها ماكلتها وطلعت لي المربوعه بنشوف سامي ناض ولالا .
دخلت بشويه بشويه القيته راقد جيت بنوضه بعدين سخفني خليته وطلعت قعمزت ع طاوله الي برا شفت ياسر اشرتله جاني الانه لابسه توته منقدرش نطلع من الحد المسموح بيه😐.
انا: ياااسر مبروووك ماسمعناا وربي فرحتلك من قلبي منو تعيسة الحظ الي داعيه عليهاا امها قصدي سعيدة الحظ الي داعيتلهاا امها 😅.
ياسر: ههههه الله يبارك فيك بشويه كيف حالك قبل وشن جو الشرق.
انا:😂 تمام الحمدلله عسسل معسليين الشراقه نعليااا من لهجتهم وناسهم وخلااص😍انت شن جوك وكيف صار هكي خت فت كل شي.
ياسر: هههه اي كل شي صار بسرعه.
انا: شن اسمها الكنه الجديده وان شاءلله غير حتي العرس بسرعه الانه خاطري ف عرس ونبي نشوف الاجواء واللبسات واتيات يستنو في عرس ونقيمو لك ولا يهمك.
ياسر: اسمها فاطمه😍والعرس ان شاءلله بعد شهر ع فكره اول وحده قلتلها الانه توا كيف قررت وبعدين توا بنقولها للجماعه ف تكسيده ف ليل كلها بتجي بيش تجي حتي انتي.
انا: بلله سلملي عليهاا فطومه ونوعدكش اني نجي بعدين 🙊.
ياسر: والسبب .
انا: ماعنديش نيه .
ياسر: مصح وجهك متجيش بنزعل.
انا: تمام توا نحاول.
ياسر: باه يلا اقلبي فسختك.
انا: فسختك😕.
ياسر: هههه اي معنهاا وجهك فيسك يعني.
انا: لا Yüz 😂.
ياسر: هههه باه عارفينك فالحه ف التركي يلا انا ماشي ماتبي شي.
انا: لالا صحيت بس نبي نسألك.
ياسر: شنو .
انا: معاذ هني😶.
ياسر: لالا علاش تسألي؟.
انا: لا شي غير قداش ليا مشفتاش😅.
ياسر: حتي نا ليا فتره معش شفته.
انا: اي .
ياسر: هههه شن اي هيا وجهك .
انا: سلاام😝.
فاات الوقت نضت نبي نمشي استحشتهم مع انه مليااش هلباا هني لكن تعودت عليهم وعلي جوهم وعلااش الكذب اكتر واحد معااذ استحشته مع انه اكتر واحد نتعارك نا ويااه واكتر واحد يهزب فيا ويجرح فياا لكن مش عارفه مكانته بروحه ممكن الانه اول مره
حد يهزبني بطريقه هادي ويبكيني فاكبدت عليه غريب امري الصراحه😂💔 مش قادره نوصف الشعور الي نحس بيه نا ف الوقت الحالي اتجاهه مخلطه مش عارفه اذا اناا نحبه الانه ماعمري جربت الحب ولا اناا متعلقه بيه وبس ولا اعجااب مافهمتش شنو بزبط لكن كل الي عارفته انه نبي نشوفه ونحكي معاه ونستاحش فيه هلباا ومايمشيش من تفكيري ابدااا خوصوصااا بعد مع حكيت ناا ورنا زادتت وضحتلي حاجات خلتني رسمي نصحاا ع الي يصير😍😂لقطاته وحركاته الي يدير فيهن لكن فجأ يجيني شعور انه عادي مرات يدير هكي بيش يحسن موقفه بس".
المهم😁 بدلت وبخيت عطر وكلمت ماما كان بتمشي قتلي باه طلعنا نا وياهاا سلمنا ع اميمه وجدي وعمامي ونساوينهم وطلعت جيهت المسبح وين يقعمزو اكلهم ونسمع ف دوشتهم شافني ياسر من بعيد بدي يصفر ويصفق من الحماس فرحان مسكين عرسه قريب 😂 وبدو يصفقو معااه نا وصلت نضحك
انا: شكراا شكراا😂👋.
رنا: نورتيي حبنوو وجت حضنتني استحشتك ياشفشفه.
انا: هههه حتي نا وقمت راسي جت عيني ف عين معاذ كان يشبحلي ومش مفهومه نظرته متع واحد حاقد علياا مصدوم مفهمتهااش😣نا صارلي ستك قعدت نشوفله وساكته حتي الابتسامه اختفت مع انه مستحشاته لكن شفته اذكرت كيف استحقرني ووصل حتي ف سمعتي ونا حاضنه رناا وهيا تتكلم ومش معاهاا بكل حسيت بغصه...رنا بنروح تمشي معاي.
رنا: خييرك اللطف كيف جيتي قاعده حتي ماسلمتي عليهم.
انا: "قلتلها ف وذنها"ندخل للحمام ونرجعو قلهم ترا شن بتجيب وتجي بسرعه.
رنا: اعيله طاقين ف حوش عمي سعد وجايين دقيقه مش مطولين ترا شن بنجيبو.
ناضو اكلهم مع بعض خيرك قعمزي صارت دوشه ونا اكتفيت بي😊 مقدرتش نتكلم.
شويه هكي نااض معاذ عيط بيش يسكتوو.
معاذ: ضيااااااااااااااااء.
انا: نخلعت قبلت طول وكلهم سكتو 😳😯.
معاذ: "وبكل هدوء متقوليش الي كان يعيط".... تعالي اقعدي نا مااشي😑.
انا: مابتش نرد عليه كملت طريقي .
معاذ: تعصب الانه مايحبش لما يكلم حد يعطيه بظهره ويمشي وميردش كمل طريقه وف طريقه حذف الحوض متع الورد الي قدامه.
كلهم نخلعو وسكتو ويتوشوشو ومش فاهمين شن الي صااير وشن الي يصير والي هدا بدي يعطي ف تحليل وبرا عااد.
وصلت للحوش فصلت ومعاي رنا عارفتني متكنطيه متكلمتش بكل مسكينه.
انا: باااه نبي نفهم نااا علاااش يدير فيااا هكي نا شن درتله ياااربي مفرووض يصيير العكس هداااا شن يقولوله مرييض ومجقجق ومش صافي ابداا الانساان اهوا.
رنا: غير اهدي راه معاذ مدار شي باش تحكي عليه هكي ياخي هوا راعى مشاعرك وقال مرات تبيش تقعمز ف مكان نا فيه فا أنسحب يعني نا نحيه عليها اللقطه طلع يفهم .
انا: ماااه اناا منبيشي يمشي نبيه يقعد هوا يفهمش غبي شن ندرله ناا جيت ع خااطر بيش نشوفه ينوض هوا بيمشي مش حاجه تنرفز هادي.
رنا: لحظه لحظه فهميني ترا.
انا: فكيني منهم النظرات هادو مش ناقصه.
رنا: توا انتي حاطه الحق كله ع معاذ مع انك انتي الي بديتي وتبي تروحي.
انا: ماه كرامتي سمحتليش نقعمز 😢.
رنا: خلاص الحق ع كرامتك.
انا: هئه كرامتي معاها الحق ف كل شي اديره واصلا ناا علاش متكنطيه وهوا حتي مكلفش روحه واعتذر علي الي داره بلله ترا فوتيني.
رنا: ماهناك مجقجقه ومريضه ومش صافيه الا انتي هي باهي مش معاذ.
انا: باه عارفه روحي ريحي راسك.
رنا: تعرفي تتكلمي ليبي هلبا تقوليش عايشه البرا بكل ازح.
انا: البركه ف سامي..خبطت ع راسي حي ساامي قاعد ف المربوعه ونا واخده راحتي ونعيط تحت الروشن😱.
طقيت ودخلت القيته متكي وعين مفتوحه والتانيه مغمضه😴 .
انا: مصيبتك الحرفه شن قاعد لي توا راقد.
سامي: مشاءالله انتي كفيتي وفيتي ها فيقتيني بي عياطك .
انا: ان شاءلله سمعت الي قلته😯.
سامي: تحبيه؟.
انا: من هوا؟
سامي: معاذ.
انا: قتلك قاعد مصمم انه غدوا بترجع تركيا💔.
سامي: ضياء بحتي فياا.
انا: ها شن جاوبني.
سامي: ههههه عنبوفيتك من بجاوب التاني.
انا: معنها غدوا راجع امتاا طيارتك .
سامي: ف ليل .
انا: مليح بكل يلا نوض منوض سادك نوم خلي نوتي سفره ع كيف كيفك ونا جعانه نتعشو.
سامي: سألتك؟.
انا: ونا منقدرش نجاوبك .
سامي: باه عدي لكن حطيها ف راسك .
انا: انبااه.
مشيت دخلت المطبخ ونفكر ف عشرين الف حاجه وتيت سفره مساويه وطلعت تعشينا نا وسامي ف الجنان لحق علينا بابا قعمز حتي هوا معانا ومعجبنيش مش ع بعضه سألته قال تعب وخلاص روحت ماما حتي هيا قعمزت معانا وقعدنا نهدرزو ونضحكو ونذكرو ف ايام تركيا وجوهاا وبعدين بابا دخل رقد.
.
.
.
.
عبدالرحمن: تي باه ياراجل تكلم قول اي حاجه.
معاذ: اي حاجه.
عبدالرحمن: مبرد دمك😒.
معاذ: باه وبعدين .
عبدالرحمن: وين الحيويه متع معاذ.
معاذ: مندريش عليها.
عبدالرحمن: باه احكي ليا قداش نتغوطلك ازح وانت شي توزع فيا وتتجاهل ف ام امي تقولش صاحبك راس .
معاذ: فوتني ف الوقت الحالي.
عبدالرحمن: لا فايتك فايتك براحتك .
فجأ عم سكوت لين معاذ حس انه عبدالرحمن تكنطا منه ضحك وقبله.
معاذ: طلع دخان وبدي يدخن..بس بس هي انت😉.
عبدالرحمن: تفضل😒.
معاذ: يزيد فضلك شنو الادب هدا.
عبدالرحمن: ما تبيش تحكي.
معاذ: يييي عليك تكبيش يا سي القصه ومافيهاا انه اناا حاير ومش عارف ناخد قرار وهل انا غالط او لا ومع انه متأكد انه نا الغالط.
عبدالرحمن: ف شنو هات مرات نقدر ندير حل.
معاذ: فوت متقدرش.
عبدالرحمن: وشن عرفك.
معاذ: وووك صدعتلي راسي ياراجل الموضوع يخص بنت اطلع منهاا.
عبدالرحمن: قلت نا مايقدرش يعيش من غير الجنس اللطيف.
معاذ: قهرتك هادي غير مش زيهم❤.
عبدالرحمن: اووو كلام كبير يارفيقي شكلك طحت طيحه كويسه.
معاذ: شكلني.
عبدالرحمن: واعتراف اخراا😮.
معاذ: ههههه نوض نوض.
عبدالرحمن: غير تعال وين ماشي.
معاذ: بنصلح حاجات غلط مدايرهم ف حقهاا.
عبدالرحمن: يالاهوي ياه ياهيا ياه 😯.
معاذ: يا ايه ياداه داه داه.
عبدالرحمن: ابويا عايز يقوزني.
معاذ: هههه من اين لك خفت الدم هده .
عبدالرحمن: من صاحبي والله 😌.
معاذ: انت ديما هكي ولا اليوم بس 😒.
عبدالرحمن: ههههه برا برا.
.
.
.
ياسر: رنا تعالي.
رنا: نعم.
ياسر: متعرفيش شن في مابين معاذ وضياء.
رنا: لا .
ياسر: قولي الحق .
رنا: الحق.
ياسر: 😂😂درقي وجهك درقي تعالي حسناااء.
رنا: ههههه بري سونا بيحقق معاك.
حسناء: ان شاءلله خير.
ياسر: شن في بين معاذ وضياء.
حسناء: مش عارفه لكن لا اظن في شي من الي ف راسك الانه مستحيل ديماا يتعاركو ومعاذ مش مخليها ف حاله زي الفار والقطوس.
ياسر: ماه يقلك المتل بعد العداوه محبه😂.
حسناء: ههههه لكن لا اظن.
ياسر: خليك مضنيش اقلبي يلاا.
دخل عليهم احمد يجري يدور ف مفاتيحه زي المهبول ووجه مايبشرش بي خير.
.
.
.
ليلى: خيرك شنو في متكلمتش بكل من حد لاجيت ووجهك اصفر وواضح مش ع بعضك.
سعد: اسكتي بلله مصيبه وطاحت ع راسناا.
ليلى: شن في خوفتني😦.
سعد: خال ضياء جاني ف المكتب ويبي بنتهم ويتحلف انه راح ياخدهاا.
ليلى: اما وااحد فيهم وشن عرفه وشن جاابه توا.
سعد: حكالها القصه.
ليلى: بااه شن بدير تواا😢ارجوك تخليهمش ياخدو بنتي مني.
سعد: ان شاءلله توا نحلها متخافيش.
ليلى: كيف بتحلهاا.
سعد: نتفاهم نا وياه ب فلوس مرضاش بعدين نعرف كيف نصرف.
ليلى: غير رد بالك وارتاح توا مرقدتش بكل ومبكري انت تسوق.
سعد: ان شاءلله.
.
.
.
سامي: يسلمو ايديك .
انا: سلمك .
سامي: كلماتك نورا .
انا: هه من نورا.
سامي: قصدك من هدكا اليوم معش اتصلت.
انا: اي بلله خليها ف سرك قدااش تغيرت الي قاعد مصبرني انك انت موجود كان هذا مش عارفه شن ندير.
سامي: وانا بكرا مروح شن بديري.
انا: باه عش اذكرني.
سامي: هههه حتي نا بنستاحشك.
انا: اوباا تحبش تقولها قبل بي الغرباوي.
سامي: قلتهاا وتم.
انا: تعرف خاطري نمشي للكافي الي ديماا نقعمزو فيه وخاطري ف هلبا حاجات وكان خاطري نقرا الكليه غاادي.
سامي: الله غالب ونا كان خاطري تقعدي ونشوفك ديما ونطلعو مع بعض ونعلمك سواقه لين تهبليني ونورا تخاف تركب معاك وواااجد حاجات كنا نديرو فيهن توا متتخايليش قداش تركيا مكسده بلاك .
انا: بنبكي😢.
سامي: لا ياخمجه ما اتفقناش ع هكي.
انا: مش عارفه كيف بنقرا كليه من غيركم.
سامي: شن بتتخصصي قاعده طب ولا غيرتي .
انا: نبي طب لكن بابا يبيني نقرا ادارة اعمال بيش ندير الشركات الي برا.
سامي: عررض جميل ادخلي ادارة اعمال معنها احسلك بي هلباا.
انا: وهدا الي بيصير.
.
.
.
ف تركيا
وليد: تعرفي انه نا جعان قريب نموت.
نورا: ندير ف بيتزا نحسبك معاي.
وليد: ياريت والله .
نورا: نتكلم جد تجي تاخدهاا.
وليد: لالا صحيتي زايده معاك.
نورا: خلاص بعد ساعه مر علياا تلقيها واتيه حسبتك وتم.
وليد: هههه مش حنقول لا ياقلبي.
نورا: امباه تمام😘 شن بدير انت توا.
وليد: بنكلم حسن بيش بنقله بنجيب نا سامي غدوا من المطار.
نورا: ايييي سيمو بيروح غدوا قصدك.
وليد: اي واسمه سامي.
نورا: هههه نجيلي الغيور نا.
وليد: هههه فكينا من التلسين وقوليلي شن جو ضياء صابحيتكم.
نورا: تعرف حتي نا منعرفش شن جوها.
وليد: علاش.
نورا: كل ما بنجي نكلمها تصير حاجه وانت تعرف ماما مرضت ف الفتره الاخيره وهكي معش فضيت ومطمنه سامي معاها غادي.
وليد: اي كيف حالها امك توا.
نورا: تمام الحمدلله احسن.
وليد: سلمي عليهاا.
نورا: يوصل من عيوني.
وليد: الله ع كذب وع عيونك.
نورا: ههههه ماه رديت عليك بي عبط احرف من عبطك.
وليد: اي موارقلك 😂.
نورا: كوييس😅.
وليد: هي شويه كذا ونجي نطمن ع عمتي.
نورا: هههه تمام ودرس السياره ف اخر الشارع ها مش ناقصين فضايح .
وليد: باهي ماتبي شي.
نورا: انلالا.
وليد: حليلي ناا نحببك.
نورا: هههه حتي ناا.
وليد: حت انتي شنو .
نورا: نحبك ♥️.
وليد: ههههه ماه من الاول علاش دهشي فيا.
نورا: هههه ماه ضروري .
وليد: تي ماشي ماشي.
نورا: رد بالك ع روحك 😍.
وليد: حت انتي سلاام😘.
نورا: سلام .
ناضت توتي ف البيتزا.
نورا: خسااره ياريت ضياء اهني تحبهاا البيتزا الحيوانه خلي نكلمهاا نشوف شن جوهاا.
.
.
.
انا: الله وااكببر.
سامي: كنك.
انا: شوف من يتصل😕.
سامي: نورا.
انا: اي.
سامي: باه ردي.
انا: هاك رد عليها انت قبل الان كان رديت نا بنفصل.
سامي: هاتفك ولا هاتفي.
انا: رد رد قبل لا تفصل معنديش خلق نعاودلها...فتحت الخط والمايك وعطيتهوله وهوا يتحلف فياا بي حواجبه ويضرب فيا 😂💔.
نورا: الو الو ضياء تسمعي فيا.
سامي: ايوا نورا شن جو.
نورا: اهلين سامي شخبارك لييك وحشه املاا وين ضياء صاير حاجه خيرها مش هيا الي ردت ع هاتف..
نا بديت ندير ف حركات لي سامي انه يقوللها ع اساس نا مريضه وهكي.
نورا: الو سامي وين رحت.
سامي: معاك .
نورا: ضياء وين عطيهالي.
سامي: نوراا راه ضياء.
نورا: خيرهاا شنو في متخوفنيش.
سامي: ضياء مرضت واجد الفتره هادي وانتي مشاءلله مقصرتيش تسألي عليناا يوميا بارك الله فيك الصراحه .
نورا: حي كيف مرضت قلهاا سلاامتك حبيبتي ماتشوفي شر والله ياسامي حتي نا مايعلم بيا غير ربي ماما مرضت الفتره الاخيره ومعش فضيت الحق.
سامي: باه ان شاءلله لاباس عليهاا.
نورا: لا يوريك بااس كان ضياء بجنبك عطيني نكلمها.
نا قعدت نأشرله بي معني لا مع انه كنت نبي نكلمها رايفت ع صوتها وهدرزتها.
سامي: دقيقه بس اهي معاك " وحده بي وحده😜"
انا: باه ياسامي لماا نوريك توا يبانلك...طبعا كحيت وغيرت نبرت الصوت...الو 😩.
نورا: ضيوو حبيبتي خيرك شنو فيك ياقلبي ان شاءلله ف القطوسه ولا فييك.
انا: ان شاءلله ف قهرتك شن دخلها القطوسه.
سامي ميت ضحك 😂.
نورا: باه اسفه المهم امورك تمام مش ناقصك شي عاد سيمو معااك نسيتينا.
انا: لا تمام التمام انتي الي وليد معااك نسيتينا بعدك تعرفينا نا ورفيقي طبعنا مش نسااي .
نورا: ههههه عندك الحق سامحيني والله مقصدي لكن الظروف تحكم .
انا: اي اي تحفظي قاعدتنا ولا نسمعهالك.
نورا: مافيش شي مستحيل الي يبي يوصل لي شي راح يوصله حتي كان وين.
انا: ايواا بزبط .
نورا: نوعدك معش تصير تاني .
انا: ان شاءلله .
نورا: رد بالك ع روحك .
انا: سلاام ..
سامي: اس توا ناا نعدي عند ولاد الخاله نبات عندهم بما انه اخر يوم.
انا: لالا خليك.
سامي: لالا عيب بعدين خالتي تحرج .
انا: انباه تمام براحتك.
سامي: تشااو ياشفشفه.
انا: الله قداش ليا عش سمعتها.
سامي: يااشفشفه يااشفشفه يااااشفشفه نزيد ولا نوقف متع اسبوعين فاتو😂.
انا: ههههه لالا ساد يابارد.
طلعت معاه ع اساس نفوت فيه وقعدنا نهدرزو
.
.
.
دخل عليهم احمد يجري يدور ف مفاتيحه زي المهبول ووجه مايبشرش بي خير
احمد: تي وين ام ام المفاتيح اززح حسناااااء وين المفااتيح.
حسناء: مش عارفه😯.
ياسر: خيرك شن في بي شويه.
احمد: عطيني مفاتيحك وامشي معاي بسرعه.
ياسر: خيرك شن في شغلتني.
احمد: غير هيا ضروري.
حمزه: خيرك يا راجل.
احمد: ياودي بسرعه معاااذ مدااير حاادث وف المستشفى..
.
.
.
يتبع
