وفاءاً لك

30

-مراد صدگ اذكرت انت البارحة گالت من آنتي مو يمي اني مخنوگ اوصل للموت من اشوفچ يلة ارتاح ليمتة جنت اشوفني ؟
- بين فترة وفترة اجي لبغداد واسوي روحي جاي للشركة مالتكم بدون محد يدري اجي اشوفچ من بعيد .
- ليش ما اجيتني ليتك جاي وحاجي وياي ما چان ضاع من عدنة كل هل العمر.
- خفت من صدچ خفت عليچ مني گالت نستني وعاشت حياتهة.
- لو ناسيتك چان ازوجت .
- مو شرط عدم زواجج چان يعني آنتي اتحبيني ايجوز خفتي لا ااذي اهلج فلهذا السبب قررتي ما ترتبطين ايجوز صارت عندچ عقدة من كل الرجال بعد الي صار وياج.
- اني ماكو يوم حاولت اشوفك حتى من بعيد الخوف الي بداخلي منك هو الحكمني گلت بالكي هوة يتغير ويرجع وجنت عايشة على هذا الامل .
- المهم رجعنة سوة .
- بس اني كبرت يا مراد مو قند نفسهة الحلوة والشيب تارس شعري وجهي ذبل .
- اني اشوفچ احلة مرة بالعام بالعكس صايرة احلة و بعدين اني هم كبرت وياج مو بس آنتي .
- مراد اذا ازوجنة وين نگعد ؟
- باربيل لان شغلي كله هناك .
- وامي وابوي وين ابقيهم احمد سافر ؟
- نبقى اهنا هل فترة وبعد ما يرجع احمد انروح صدگ راح تبطلين من الشغل؟
- اي بعد ما يحتاج اضمن مستقبلي واذا ارد اشتغل عود ادور بأربيل شغل خاف امل .
- على شنو ادورين تعالي وياي اشتغلي .
- اخاف اغار عليك .
- ليش ؟؟
- من اشوف النسوان الي دايرك يحجون وياك .
- هههههه لا يمعودة لا اتفضحينة والناس ماخذة فكرة اني شخصية اتخوف انوب ايشوفوني مثل الفار يمچ اتروح الهيبة ظلي بالبيت احسن .
- ههههه... مراد غنيلي صارلي هواي مسامعة صوتك .
- مو يددلل الحلو اححم
شكثر مشتاگ لو تدري شگثر مشتاگ ياعمري
ابوس عيونك الحلوة وضم صدرگ على صدري
انتضرت هواي اشوفك جاي ......

مراد صوتة حلوة وقند اتحب هاي الاغنية هواي ظل ايغني الى ان وصلو لبيت قند
- انزل وياي اشوي .
- لا عندي شغل وية سعيد وية المامل علمود المهر اروح استعجل على الموضوع لا اتغيرين رايچ .
- لا اتخاف ما اغير رأي مع السلامة .
- بـٌـٌٌـ👋ـٌٌـٌـُآٍيِ .

نزلت فتحت الباب ودخلت لگت امهة گاعدة بالصالة على القنفة باوعتلهة ورفعت حاجبهة قند صباح الخير مامة .
- بعد وگت .

نزعت حذائهة وحطت راسهة على رجلين امهة واتمددت امهة استغربت كلش يمكن اخر مرة قند نامت على رجلهة من ايام الاعدادية من جانت اتريد اتسولف وية امهة .
ظلت امهة تالعب بشعرهة وگالت الهة بصوت هادي .

- يمة ابوچ گالي مراد البارحة مريض شنو صار وياج سولفيلي.

قند وهية متمددة سولوفت لمهة على الي صار وياهة ..
- وهيج اضطريت ابقة يمة للصبح .
- يا بنيتي اذا ما تگدرين اسامحي لا اضلمين روحچ واتضلمين الرجال وياج .
- سامحتة خلص بعد نسيت كلشي يا مامة اني احبة لمراد وفراگة بعد صعب .
- الله يسعدكم يا بنيتي.
- مامة حگلج على اشياء بيناتنة گام وبتهة بس مو اتعصبين .
- گولي شنو صار.
- لا ما صار شي بس باجر اني و مراد راح نمهر بالمحكمة و ايصير الموضوع رسمي.
- ابركهة من ساعة .
- مراد گالي بمو انو مراح انسوي عرس ضخم خلي انسوي دخلتنة بنفس اليوم.