---
بعد فتره ..
#وعد
كانت متمدده على السرير تتأمل السقف بعد ما شربت حبت المسكن .. من ألم يدها و من التعب الي صار لها طول اليوم ..
سمعت صوت رساله من جوالها ،، ففزّت وعد من سريرها و اخذت الجوال وهي تتمنى يكون هالمسج منه لانها كانت تفكر فيه طول الوقت .. و كانت أمنيتها متحققه على المرسل و رفعت الجوال و كان فعلا راشد مرسل لها رسالة !!
(مرحبا وعد .. اخبارك ؟؟ طمنيني عنك أول اذا انتي صاحيه)
ارتسمت ابتسامة فرح على وجهها .. أخيرا ارسل لها و يتطمن عليها ! وعلى بالك أنا نايمة يا راشد ؟! لا حبيبي انا صاحية ولان مو قادره أنام لا من ألم يدي ولا من تعب قلبي
فتحت الرساله و كانت محتاره شنو تكتب ... و بعد تفكير سريع كتبت
(أهلين راشد أنا صاحية مانمت والحمدلله أنا أحسن شوي)
كانت متعمده انها تكتب "شوي" على شان تحسسه انها لازالت تعبانه و ياعسى يفهم و يهتم فيها و يتطمن عليها و يتصل .. و أرسلت الرسالة اليه
بس كلها ثواني و جاها الرد من راشد ...
(لاتتعبين نفسك ونامي لا تخوفينا عليك .. و ما تشوفي شر )
قرأت الرساله مرات كثيره ..... آه يا راشد بس ابي اهتمامك وحنانك .المهم تحن وتلين معاي ... لكن زي ماهو يثقل عليها هي بعد ماتحب تبين انها مهوسة عليه وكتبت ( الشر ما يجيك... لا تشيل همي يا راشد .. انت الي نام بكرا وراك دوام اما أنا لا تحاتيني ما راح اداوم طول هذا الاسبوع )
وأرسلت الرسالة وظلت ماسكة الجوال تنتظر الرد .. مرت دقيقة ماجا الرد وبدت تتوتر !!
وعد توترت و قالت بحلطمه - شفيه مارد ؟؟
وشوي الا رن الجوال بايدها واخترعت يوم لقت الرنين مو رسالة !! كان الرنين اتصال من راشد !!
وبأصابع مرتجفة ردت - ..... اهلين
راشد وهو يوقف السيارة داخل البيت في الحوش..- هلا وعد
وعد بهمس - هلابك
نزل راشد من السيارة و قفل الباب وهو يقول - ... كيفك ؟
وعد- تمام الحمدلله
راشد - ليه مو مداومه طول هذا الاسبوع ؟؟
