الأم (نجوى و شهاب)

01

مشيت نمسح في الطاولات وأنا نغزل وننفخ😤 سي هارون مش عوايدو يطول عليا هكذا،شفت مع الساعة6:30 تاع العشية كان لازم يكون هنا من نص ساعة، مشيت نحيت مريول الخدمة هزيت ساكي نسمع في الباب رحت نجري نسمع في صوت رجليه الداخل
-سي هارون...ماردش وصلت نشوف فيه واحد دخل ومش اي واحد حضورو طغى وريحتو سبقتو دخلت مع نفس تاعي،شعر اكحل ولحية خفيفة،حواجب وعينين ضيقين كيف الصقر لابس كوستيم كحل واقف مع بدنو والطول اه يا ربي واش من طول راهو ضخم،تبا نحس في روحي قزمة قدامو،شكون هذا؟؟😕
مزلت واقفة نشوف معاه عينيه يخوفوا تحسهم باردين وفي نفس الوقت يختارقوك بشوفتهم دخل يديه في الجيب وشاف معايا قلبي يرعش توتر حكمني نزلت عينيا تحت نسمع فيه يقرب

-شهاب:سي هارون وين نلقاه؟

صوتو عميق والنبرة تاعو خشينة مع بحة هزيت عينيا بسرعة فيه جات عيني في عينو زاد توتر تاعي....عيناه مربكة حدَّ الهلاك.

-نجوى: مزال مارجعش.

في هذا الوقت دخل سي هارون كان يلهث😧

-هارون:مسيو شهاب سامحني طولت عليك يمكن؟

وقف يشوف مع الكافيتيريا وملامح وجه سي هارون ماتتفسرش كنت نقدر نحش بالتوتر تاعو مش غير هو لي توتر المكان كلو،قعدو يحكيو من ملامحهم فهمت بلي كلام كبير مكنتش نقدر نسمع واش راهم يقولوا بعدها وقف هو وملامح غضب في وجهو،تلفت ليا شاف معايا بعينين الصقر لي عندو، توترت نبلع في ريقي رجع يد في الجيب وخرج...كان قلبي مزال يرعش كي تكلم سي هارون

-هارون:نجوى بنتي لازم نحكيو.

صوتوفيه جديةكبيرةوقلبي ماكان قايلي خير

-نجوى:نعم سي هارون.

-هارون:اقعدي هنا.

مشيت بخطوات ثقيلة وقعدت مقابلاتو وهو كان يحوس على الكلمات منين يبدا

-هارون:بنتي كيما تعرفي الكافيتيريا تاعنا صغيرة ورجعت ستيل قديم والناس ماعادتش تجي ليها كيف بكري.

-نجوى:نعرف رانا في وقت الصيف والخدمة شوي عاطلة.

-هارون:يابنتي سامحيني على لي راح نقولو نعرف انتي معتمدة بزاف على هاذي الخدمة لكن مصروفها أكثر من الربح تعها ومعدتش نقدر نسدد الفواتير تعها راني قررت نبيعها.

نسمع فيه وغصة كبيرة في قلبي نحسو يتقطع💔💔 أول شيء جا في بالي وين بش نروح منين بش نعيش وين نلقا خدمة كيفها قريبة ليا

-نجوى:سي هارون تعرف وضعي كي تبيع انت الكافيتيريا أنا وين نروح.

-هارون:بنتي خممت في كلش لي شفتيه من قبل هذاك مسيو شهاب***عندو سلسلة فنادق ومطاعم كبرى في كل البلاد وحتى في الخارج وراه حاب يشري الكافيتيريا تاعي يحب يبني فيها مطعم كبير فيه طوابق بزاف ومعاه مول تجاري ووعدني يوفرلك خدمة فيه.