الأم (نجوى و شهاب)

24

وعدني انو شروطي مش رح يتعدا عليها خرجت من عندو نرجف اكيد بعد الكلام لي معندو حتى معنى مفهمتش كيفاه خرج من فمي نضرب راسي في حيط من تفكير هذا منين جات فكرة متحبنيش هو اصلا مش شايفني افففف دخلت لغرفتو لقيت فاليز تاعي جابوهم هزيت بدلت ثيابي و مشيت لغرفة سلين قعدت على الكرسي حطيت مخدة ورايا و نقرا في كتاب حتى رقدت
______
شهاب بعد ما خرجت من عندو رجع كمل خدمتو و يخمم في لي قالتو ضحك عليها
-شهاب:(شرطي التاني متحبنيش يا طفلة عرفت الف غيرك ولا عمري حبيت فيهم وحدة يعني في صحة من عقلها تشرط عليا هاذ الشرط هههه)
حط الستيلو من يدو شعل ڨارو ومقدرش ما يخممش فيها
-شهاب:(واش فيها راح نحبو يعني راهي جلد على عضم شفايفها مشققين عينيها محوقين وشعرها اففف حتى تفكيرها بساطتها ثيابها حاجة ما تنفع فيها و بزايد عندها طفلة و معندهاش مستوى اه يا ربي بابا يهبل نهار يعرف بلي تزوجتها رغم انو لمصلحتو عملت هكذا خايف المقابلة غدوة تبهدل بيا).
كمل الڨارو لي في يدو و ناض خرج ماشي رايح لغرفتو شاف الضو في غرفة سلين دخل بشوية باش ما تنوضش لقا نجوى راقدة علا الكرسي و في يدها كتاب طلع حاجبو وهو يشوف معاها من بعد طبس عندها
-شهاب: منحبش وحدة كيفك انا مش انتي هي لي تقدر تكون مناسبة ليا.
نحالها الكتاب من يدها حطو بعيد و هز غطاها تلفت شاف مع سلين و تبسم من غير ما يحس مشا طفا الضو وخرج
________
حليت عينيا الصباح رقبتي توجع رقدت عند سلين ما بكاتش في الليل وقفت رحت لعندها طليت عليها راقدة كيف الملايكة خرجت من عندها لقيتو هو خارج من غرفتو لابس كوستيم كيف العادة شعرو مثالي ريحتو سبقتو شاف معايا بطرف عين ونزل في الدروج لحقتو نجري
-نجوى:استنا وين رايح ؟
تلفت ليا طلع حاجبو عينيه مظلمة خزرتو تخوف
-شهاب: معايا انا راكي تحكي؟
-نجوى:ايه وين رايح مش راح تشوفلي خدمة ؟
-شهاب: خدمة؟
-نجوى:ايه الاتفاقية تعنا نسيتها؟
-شهاب: منسيتهاش لكن مش وقتو ليوم تجي لعندك نادية باش تعاونك تحضري روحك
-نجوى:اوكي و غدوة نبدا الخدمة
-شهاب: انشاء الله.
كمل نزل وخرج وانا عاودت طلعت لعند سلين فاقت هزيتها رضعتها و بعدها دخلت لغرفتو خرجت ثيابها و ثياب ليا دخلت دوشت وهي معايا مممم الما سخون و جميع انواع الصابون و الشامبو الغالي متعت روحي و بنتي خرجنا بعدها ريحتنا تهبل لبستها ولبست نسمع في الباب يدقدق وتحل
-سعاد: صباح الخير بنتي.
-نجوى:صباح الخير.
دخلت و الضحكة مالية وجها جات لعند سلين تبوس فيها
-سعاد: ممم ريحتك تجنن يا عمري.
تلفتت ليا
-سعاد: راهي هنا نادية هيا انزلي نفطرو مع بعض بعدها تروحو.
-نجوى:حاضر.
نزلت فطرنا من بعد خرجت مع نادية و معايا سلين
نادية: اول شي نروحو نختارو ثياب ل بنتك بعدها ليك انتي و من بعد نروحو لصالون تجميل.
-نجوى:علاه هذا كل ؟
نادية: كون ما نخرجكش لايقة بخويا يقتلني ههههه
سكت و نزلت راسي
نادية: لا مش كيما فهمتيها ههه انتي زينة لكن عادية يعني ثيابك و شعرك عاديين مش لايقين بأشهر رجل أعمال يعني من غير ما نحكيلك الصحف كل تنشر اخبارو وناس كل تبع واش يدير.
-نجوى:لا فاهمتك مش لازم تبرري.
تنهدت وحسيت بغصة مش عارفة علاه كي قالتلي مش لايقة عليه ضاقت نفسي يعني صح لانو كون مش هاذ الصدف عمري نحلم حتى يكلمني وصلنا لمحل كبير تاع الاولاد دخلنا وانا بقيت حالة فمي باهتة عمري شفت هاذ الشي كل في بلاصة وحدة راهي كل المستلزمات لي يحتاجها الواحد لاولادو موجودة
نادية: كرسي تاع طوموبيل ل سلين ما تنسايش مش مناسب تركب بلا حماية.
مشينا نشوفو الكراسي الخاصة بالطوموبيل
نادية: اوه شوفي هذا عجبني نشريوه ؟
هزيت بطاقة السعر حسيت بالدوخة
-نجوى:لا لا مش ضروري الكرسي مش راح تبقا رايحة جاية خلينا منو.
نادية: علاه مش ضروري سلامة بنتك مش ضرورية؟
-نجوى:لا مش هكذا قصدت يعني غالي ومش لازمني.
-نادية: لا لازمك و سلين موافقتني الراي شوفيها كيفاه تضحك.
هزتو و مدتو لواحد يتبع فينا من وقت دخلنا
-نادية: هيا قوليلي واش ناقصها ؟
-نجوى:لا ماناقص حتى شي جداتك شرات كل شئ.
-نادية: ايه نشوفو شوية تاع ثياب.
هي قالت شوية تاع ثياب لكن حسيتها قريب تشري المحل كل بعد ما كملنا مشات تدفع حقهم يا ربي لي صرفتو حق كرا تاع داري عام كل
-نجوى:مدموزال نجوى والله مكان لازم هاذ الشي كل.
-نادية: اووه واش مدموزال هذي قوليلي نادية ههههه مش مرت خويا ؟ حتى لو مش صح نحبك تقولي نادية و لازم هاذ الشي مش قال هو لازم يكونو لايقين عليا خليه يدفع الثمن ههههه.
ضحكت وخرجنا رحنا لمول تجاري كبير
-نادية: هذا المول تعنا عندك علم؟
-نجوى:والله معندي علم بحتى شي نعرف غير الاوتال لي نخدم فيه و الكافيتيريا لي شراها.
-نادية:: ايه عندنا بزاف غيرهم في كل مدينة و حتى في الخارج.
-نجوى:الله يرزقكم و يرزقنا.
قلقني حديثها وهي تتفاخر بلي عندهم اكره حديث عندي هذا هو
-نادية: نخليو سلين عند البايبي سيتر هيا.
-نجوى:كاين بايبي سيتر هنا ؟
-نادية: اكيد باش الامهات كل يتسوقو في راحتهم.
-نجوى:واو هايل.
دخلنا حطينا سلين عند البايبي سيتر و خرجنا لمحلات لي في المول وانا نقيس في الثياب و نعاود كلها غالية بعد ما شريت لي راح نلبسو في المقابلةرحنا الصالون دخلنا حكموني نتفوني هذا شعري وصبغة و تنظيف بشرة مانيكير مكياج صراحة بعد ما كملو معرفتش روحي منكذبش عمري درت هكذا اصلا في الميتم مكانش عندي بش نعمل هكذا و بعد ما خرجت كنت مع الحارس هذاك لي اصلا مكانش يخليني نخرج من الدار وبعدها سلين لي كل دراهمي راحو عليها يعني عمري ما كنت عايشة باختصار
-نادية: واااااو صراحة وين كان مخبي الزين هذا كل هههه خويا راح يتصدم كي يشوفك ههههه.
كانت تحكي و تضحك وانا غصة في قلبي كي قالت يتصدم علاه يتصدم اففف يمكن كنت مش حابة نصارح روحي اني صح نستنا في رد فعلو كي يشوفني و متشوقة انو يشوفني هكذا
-نادية: هيا نروحو للوتال درك تبدلي انتي و سلين لانو المقابلة بعد الغدا.
-الصحفي(ة):مسيو شهاب يقولو مكانش دخان بلا نار فجأة يخرج خبر انو عندك طفلة غير شرعية و بعدها انت متزوج تقدر توضحلنا؟
-شهاب: بالطبع انا متزوج و بنتي شرعية رح نوزع نسخ على تسجيلها عليكم بعد المقابلة وبالنسبة للزواج لي ظهر فجأة هو مكانش فجأة احنا متزوجين عندنا مدة لكن حبينا نبقاو بعيد على العينين و الصحافة تكون علاقتنا طبيعية
-الصحفي(ة):مسيو شهاب مذكور انو اسم بنتك سلين شكون سماها.
-شهاب: اكيد امها لي سماتها.
رجع هز يدي و باسها
-شهاب: لانو هي حملتها وتعبت اكيد هي الوحيدة لي عندها حق تسميها.
كان يحكي بكل ثقة يخليك تصدق كل كلمة
-الصحفي(ة):مدام نجوى واش تقولي في معاملة مسيو شهاب ليك هل هو صعيب في حياتو الشخصية كيف حياتو العملية.
تبسمت وفي مخي نحكي " مش غير صعيب راهو دراكولا "
-نجوى:لا هو حنين بزاف و متفهم و يقدر الظروف كلها و صراحة يعاملني كيف الاميرات انا و بنتو.
تبسم وهو يشوف معايا بطرف عين
-الصحفي(ة):مدام نجوى كيفاه تعرفتي على مسيو شهاب؟؟
-نجوى:تعرفنا خارج البلاد كنت في سياحة وهو كان عندو رحلت عمل ومن اللحظة الأولى كان اعجاب و تفاهم.
كنت نحكي و نتفكر كيفاه تعرفت عليه مررلي عيشتي اكثر من لي هي مرة
-الصحفي(ة):مسيو شهاب الكل يعرفو انك اغنى شاب في البلاد رغم صغر سنك رجل اعمال الكل يهابو منو وبلا ما ننساو انك أوسم رجل هنا والبنات كلهم حولك يحبو يخطفو ولو نظرة منك واش لي خلاك تعجب بزوجتك.
سؤالها باين من تغزال و غيرة علاه سألت هكذا و شوف كيفاه تتعوج كيف الحية
-شهاب: عندها لي مالقيتوش عند غيرها عندها شجاعة و صمود وكل ما طيح تعاود ترجع اقوى من قبل شي يخليك تخمم انك تحتاج مرا كيفها في حياتك مرا لي تكون متأكد انك اذا طحت رح تكون هي في كتافك تعاونك بش تنوض و تدفعك للأمام.
تلفت شاف معايا عينيا وساعو بهت وهو يشوف معايا ويحكي حسيت نفس تقطع فيا هو صح يكذب و يمثل بصح زاد فيها خلاني حتى انا نصدق واش راهو يحكي سكوت عم في البلاصة كل وانا وهو نشوفو مع بعض حتى قصت سلين السكوت هذاك كي جبدت الميكروفون و حطتو في فمها وضحكو كلهم تبسمت و نحيتهولها رجعتو
-شهاب: ههه حتى سلين حبت تقول كلمة في هاذ الموضوع.
ضحكو و بعدها سألتني وحدة
-الصحفي(ة):مدام نجوى سمعنا انك كنتي تخدمي هنا في الكوزينة تاع الاوتال كيفاه تخدمي حاجة بسيطة هكذا رغم انو زوجك هو لي يملكو.
تلخلخت وماعرفتش واش نجاوب مقاليش عليه هذا السؤال
-شهاب: حبت تجرب الخدمة عندنا مع اني رفضت انها تخدم لاني موفرلها كل شي تطلبو ومش مضطرة تخدم.
تبسمت و زربت قصيت عليه نعرف وين يحب يوصل بكلامو
-نجوى:حقيقة انا حبيت نخدم في الكوزينة شاف وهو رفض في بداية الأمر لكن بعد ما اقتنع بموهبتي في الطبخ وافق على شرط نبدا من الصفر من ابسط حاجة في الكوزينة.
تلفت نشوف معاه و نتبسم وهو يحاول يتبسم و يغص لاز على سنيه
-شهاب: ايه كيما قالت.
كملنا اللقاء مع الصحافة وخرجو.