الأم (نجوى و شهاب)

42

بعد الحلم الغريب العجيب قمت هزيت سلين و ثيابنا مشينا عملنا دوش لبست ثيابي لفيتها بمنشفة وخرجت من الصالدوبان نبوس فيها
-نجوى:ممم تجنن ريحة بنتي ...هزيت عينيا شفتو خارج من غرفتو بثياب الدار شعرو مفرفش في يدو كتاب يقرا فيه هز راسو معايا طلعو خدودي حمر مش فاهمة يعني رغم لي نعرف انو انا وحدي لي شفت هذاك الحلم لكن مبهدلة منو
-شهاب: صحا دوش.
-نجوى:يسلمك.
-شهاب: مش ليك ل سلين.
قرب باسها من خدها ويشم في ريحتها وانا تروهجت بريحتو هو
-شهاب: مممم واش بنينة.
كان قريب منها وانا مغمضة عينيا و مقربة منو نشم في ريحتو نستبن فيها هز راسو زربت بعدت
-شهاب: وشبيك ؟
-نجوى:شي..
قرب مني حسيت نفس تاعو في رقبتي هز شعري بيدو رجعو ورا كتافي بدني قشعر حركة خلاتني نذوب حسيت بخشمو كي لمس رقبتي حكمني وجاع في كرشي من التوتر همس قريب من وذني
-شهاب: حتى انتي ريحتك تشهي.
هو قال هكذا وانا غمضت عينيا تفكرت الاولاد لي يجريو و يصيحو عشر اولاد كاملين تخطفت في بلاصتي و بعدت نشوف معاه برعب
-نجوى:بعد عليا.
-شهاب: شبيك انتي اليوم ديجا امشي طيبي الفطور جعت.
وساعو عينيا مفهمتش واش قصدو
-نجوى:علاه وين راحت ريتا؟؟
-شهاب: معتادة كي ندي انا العطلة السنوية تاعي تدي هي تاني عطلة.
مشا نازل لتحت وانا مزلت نستوعب في هدرتو
-نجوى:كيفاه يعني ما تخدمش ؟ ريتا ما تجيش؟ انت تقعد هنا؟
مشا راح و ماردش على كلامي رجليا يرعشو راح يتحقق هاذ الكابوس لي شفتو مشيت نجري لغرفتي حطيت سلين على السرير رايحة جاية قدامها وهي تشوف معايا من بعد طبست عندها
-نجوى:سلين انا ماماك و ماعندنا غير بعض في هاذ الدنيا فهمتي يعني لازم تسانديني لانو واضح انا قدامو راني كيف الڨارو تاعو يلعب بيا كيما يحب لكن انتي اقوى مني نعرفك تقدري تقاومي جاذبيتو كي تشوفيه قريب مني صيحي ابكي كسري المهم اشغلي تفكيري فيك احسن من نندمج معاه خممي كون نجيب عشر اولاد آخرين من غيرك ننساك و مايعودش عندي وقت ليك.
كنت نحكي وهي تاكل في المنشفة واضح انها ما فاهمة والو نحيتلها المنشفة من فمها
-نجوى:سلين اعطيني جوابك درك راكي معايا ولا لالا.
لاحت يدها حكمتني من شعري شدتو
-نجوى:اي فهمت فهمت سايي ايه ما نشوفش معاه و مانسمحلوش يأثر عليا لا صوتو لا بدنو سيبي.
خرجت شعري من بين صوابعها وتنهدت ايه بصح راجلي وين المشكل يعني تبسمت وحطيت صوابعي على شفافي اففف حابة نبوسو بوسة حقيقية زادت حكمتني سلين من شعري
-نجوى:آي سلين اااع اوكي اوكي خلاص منفكرش خلاص في هذا الموضوع اوكي.
هزيتها لبستها و نزلت للكوزينة كان في الصالة يقرا في كتابو بديت نحضر في فطوري و قهوتو نسمع فيه يصيح عليا
-شهاب: ويني القهوة
-نجوى:جاية اففف.
كملت القهوة تلفت ل سلين
-نجوى:راني رايحة كون نغيب اكتر من دقيقتين ابكي اوكي.
خرجت القهوة ترعش بين يديا وصلت لعندو عدل قعدتو حط الكتاب فوق الطاولة قربت منو رايحة نمدلو فنجال القهوة مد يدو يحكمو عليا شردت ثانية يمكن اقل من ثانية في عروق يدو ضرب الفنجال عليها و ساح كلو عليه وقف بسرعة وانا من دهشتي وخوفي و ردت فعل لا إرادية تلحت حكمت تريكو تاعو بعدتو عليه بش ما يتحرقش
-نجوى:سامحني سامحني
بعدلي يديا و حكم نحا التريكو قدامي بعيدة عليه بإنشات حكمت نفس تاعي بدنو الضخم المسكل قدامي بلعت ريقي بقعة حمرا على جلدو تحرق مسكين ومن غير وعي حطيت يدي نمس فيها عوجت شفافي بحزن
-نجوى:تحرقت بسبتي.
نمرر في يدي على الحرق هزيت عينيا ليه كان يشوف معايا بغش عينيه ظلمة جبدت يدي بسرعة منو كبستها وخبيتها ورايا عضيت شفتي
-نجوى:نجيب نمسح القهوة.
هربت نجري من قدامو وقفت في الكوزينة نمروح على وجهي نبرد فيه نرجع في النفس هزيت بش نمسح شفتو خرج من الصالة طلع لغرفتو مشيت مسحت القهوة و قعدت نفطر رجع هو
-شهاب: اصلا كنت نحير فيك كون درتي حاجة قدقد لو مرة في حياتك.
-نجوى:درت بزاف حوايج قدقد المشكل كي نوصل ليك منعرف ندير والو.
مفقتش كيفاه هدرتها تبسمت ورجعت ناكل
-شهاب: حبيتي تقولي بلي نأثر عليك حبي؟
شرقتلي الماكلة في حلقي قعدت نكح و نضرب على صدري من كلمة حبي هذي هزيت نشرب في الما بلعتها وشفت معاه بدهشة
-نجوى:حبي؟ واش حبي هذي؟
-شهاب: انتي تتأثري بيا
كان يحكي و يقرب لعندي بعدت لصقت ظهر الكرسي و عينيا يبحلقو فيه
-شهاب: تتأثري لدرجة متعرفي ديري والو قدامي متعرفي تحكي متعرفي تخدمي متعرفي تتصرفي تي النفس تنساي كيفاه تتنفسي كيما درك.
انتبهت على روحي بلي قاطعة نفس يخي كلامو صح راهو قربو مني يدخلني في حيط قرب مني خالص رجعت نبلع في ريقي الف مرة في الدقيقة دورت عينيا لسلين لقيتها حاطة يدها على خدها تتفرج فيا ايي وانا لي قلتلها معندي غيرك عشر اولاد لا محال جبدت روحي بسرعة منو وقفت وصحت
-نجوى:ايييه وش هذي منعرف ندير والو
-شهاب: وشبيهم يديك يرعشو
-نجوى:نقص فيتامين اوه سلين وش درتي تحتك اييي هيا نبدلك.
درت سبة بسلين هزيتها و هربت من قدامو.