الأم (نجوى و شهاب)

21

رجع بعد 3 ساعات جاب معاه الدوا لي وصفو الطبيب لنجوى دخل يسمع في صوت سلين تبكي
-شهاب:الطفلة هذي لازم نغمة تاع صوتها يديروها في منبه هكذا اكيد يفيق الواحد.
مشا للصالة لقاها وحدها
-شهاب: هذي علاه هكذا تبكي؟
جات جداتو في يدها الحليب ومشات هزتها
-سعاد: اسسس نقص صوتك علاه تصيح وانا نقول مرتك علاه خلات الدار وراحت كلو منك.
-شهاب: ربي يسامحك يا ماني و يرجعلك عقلك قبل ما يروح عقلي.
-سعاد: واش راك تحكي؟
-شهاب: شي ...ويني؟؟
-سعاد: شكون؟؟
-شهاب: مدموزال نجوى.
-سعاد: مدموزال؟؟؟؟؛!!!
فاق مع روحو هو مش متعود يسميها باسمها فقط تبسم
-شهاب: نجوى وين هي؟
عوجت فمها
-سعاد: راقدة تريح في راسها من السبيطار.
-شهاب: اوكي.
مشا ومن بعد رجع
-شهاب: وين راقدة؟؟
-سعاد: وين رح ترقد يعني اكيد مش معايا ولا في غرفة المكتب راهي في غرفتها.
-شهاب: غرفتها؟
سكت شوية
-شهاب: غرفتي قصدك؟
-سعاد':غرفتكم ايه.
غمض عينيه لحظات تنهد و بعدها مشا طلع لغرفتو حل الباب بشوية ودخل يشوف فيها راقدة في بلاصتو قرب منها طبس لعندها راقدة حاطة يدها تحت خدها شعرها لافتو في منشفة لابسة ثيابو تبسم من غير ما يحس حط الدوا في الطاولة قدامها ومشا
____
حليت عينيا نضت شفت من و من من بعد انتبهت للدوا فوق الطاولة هزيت شفتو ااوه يعني جا لقاني هنا راقدة وش هاذا التبهديل خرجت من غرفتو نزلت للصالة نسمع في سلين تلعب مشيت قعدت قدامها و جات من ورايا جداتو
-سعاد: اسمعي وش ديري؟؟
تهزيت وتنفضت من الخوف فجعتني تلفت ليها
-نجوى:راني مع سلين.
-سعاد: والعشا شكون يوجدو لراجلك؟؟
ضيقت عينيا لي سمعتو ليوم كلمت راجلك و مرتك اكتر من لي سمعتو وقت كنت في بالي متزوجة ديجا وين راحت الخدامة
-نجوى:هه كنت نظن الخدامة توجدو.
-سعاد : امشي وجدي الطاولة وحطي العشا لراجلك اتلهاي بيه على هذي راح يطلقك.
اففف يا ربي مشيت وانا نحكي مع روحي المجنونة هذي رح نهبلو كلنا معاها مشيت للكوزينة نوجد الطاولة مانعرف حتى شي ما لقيتش المغارف الصحون معرفتش واش نحط تلفت لقيتو واقف قدام الباب يسند في ظهرو عليه مربع يديه بلعت ريقي وقلبي بدا يضرب توترت وهو تبسم مستحيل يعرف يتبسم مش مصدقة مي علاه راه يتبسم
-شهاب: لاقو عليك حوايجي.
نزلت عينيا ثيابو كبيرة نحس في خدودي رجعو طماطم وهو قرب مني بعدت بسرعة
-شهاب: رح نجبد المغارف.
حل الدرج جبد المغارف و جبد الصحون
-شهاب: اقعدي انا نوجد الطاولة.
قعدت وهو يوجد فيها لابس ثياب عادية تاع الدار اول مرة نشوفو هكذا طبيعي كيف الناس مش يتصرف كيف روبو شعرو ديما ممشوط بمثالية حط الصحن قدامي عروق يديه بارزة زادتو جاذبية
-سعاد: مليح الراجل يوجد و مرتو تتفرج.
تلفت ليها و سلين في يدها
-شهاب: راهي مريضة يا ماني قلت ندللها شوية.
-سعاد: نوضي نوضي بركاي بلا دلال حطي العشا لراجلك.
قعدت وهو يضحك عليها مشا قعد هو تاني وانا نضت نحط العشا ناضت حطتلو سلين في حضنو بقا باهت وانا اكتر
-سعاد: احكمو بنتكم عليا نتعشا في راحتي.
بقيت نشوف معاه حسيتو مش مرتاح هاز يد و حاكمها بيد وحدة
-نجوى:حط يدك ورا ظهرها.
نطقت لا اراديا هز عينيه خزر فيا بلعت ريقي حط يدو ورا ظهرها زربت حطيت العشا و هزيتها من عندو قعدت نتعشا معاهم مش متعودة على الناس حياتي بسيطة مع سلين فقط شعور غريب حاستو رغم جداتو المجنونة وهو لي كيف الروبو لكن رفقتهم مليحة محسيتش بالوحدة
-سعاد: صحة هيا اعطيني حبيبتي الصغيرة بنتي ترقد معايا اليوم.
-نجوى:لكن ...
-سعاد: اكيد معندكش مانع؟؟
سكتت معرفتش واش نقلها انا اصلا تعودت نرقد مع سلين قدامي محال
-شهاب: ايه خليها ترقد معاك.
تلفت ليه شفت معاه بعينيا نسقسي فيه غمزني وهي مشات من بعد وقف لعندي
-شهاب: درك ترقد نجيبها ما تقلقيش.
سكتت وحركت راسي ايه
لميت الطاولة نضفت الكوزينة و مشيت مش عارفة وين نروح طلعت لفوق نشوف في الضو جاي من غرفة مشيت بشوية دقدقت
-شهاب: نعم !
دخلت و مش عارفة علاه كل ما نشوفو نتوتر هكذا
-نجوى:كنت رح نسقسيك.
شهاب: تفضلي؟
-نجوى:وين نرقد؟؟
حك حاجبو و شاف معايا
-شهاب: ارقدي في غرفتي بما انو الغرفة التانية رجعتها ماني غرفة ل سلين.
بلعت ريقي ووساعو عينيا
-نجوى:نرقد معاك في غرفتك؟
-شهاب: ترقدي في غرفتي مش معايا.
سكتت ونشوف معاه يعني هو وين يرقد
-شهاب: انا مازال عندي خدمة هنا مطول ويمكن منرقدش.
-نجوى:و سلين؟
شهاب: ضرك نجيبها.
مشيت رحت لغرفتو قعدت على السرير نستنا فيه يجيب سلين بعد ربع ساعة نشوف في الباب تحل وهو دخل هاز سلين وقفت نجري لعندو حكمتها عليه
-شهاب: رقدت.
حضنتها و شميت ريحتها
-نجوى:ايه حبيبت ماماها تكون توحشت ترقد في حضني.
خليتو واقف ومشيت حطيتها على السرير وطبست بستها من راسها من بعد تلفت نقلو مرسي لقيتو خرج وقفل وراه الباب تمديت قدامها و حبيت نرقد لكن رقدت في العشية ما جانيش الرقاد
بعد ساعات نسمع في الباب تحل غمضت عينيا عملت روحي راقدة نشوف فيه جا هز مخدة و عاود خرجالصباح نضت سلين تبكي جبدتها لحضني تريكو هذا ضيق مقدرتش نرضعها نحيتو و جبدتها لعندي ورجعت غمضت عينيا
_____
ناض الصباح رقبتو توجع من الرقدة في الصالة هز مخدتو و طلع للغرفة حل الباب فجأة ودخل شافها سلين في حضنها مش لابسة تريكو عاود خرج حط يدو علا شعرو
-شهاب:بففف ...دقدق بقوة وتنهد
_____
نسمع في تدقديق حليت عينيا اووف كون دخل لقاني هكذا رجعت لبست وقلت تفصل دخل عينيه في الارض مشافش فيا حتى
-شهاب: ندي ثيابي و نخرج راني كتبتلك إجازة تاعك اسبوع كي نرجع نجيبها معايا و تليفون بيناتنا كلميني كي تحتاجي حاجة.
هز ثيابو وخرج وانا نضت من بلاصتي مشيت نغسل ونزلت لعندهم تحت لقيت ريتا وجدت الفطور
-سعاد: صباح الخير.
-نجوى:صباح النور.
قعدت نفطر معاهم جا شهاب
-شهاب: ماني راني رحت متحتاجي والو؟
-سعاد: لا منحتاج والو
مشا وانا نضت نجري وراه
-نجوى:شهاب.
تلفت ليا
-شهاب: نعم؟
-نجوى:وقتاه تحكي معاها و تفهمها ؟
-شهاب: اليوم نرجع بكري و نحكي معاها.
- ايه انا غدوة راني نروح بش يكون في علمك
-شهاب: ايه نعرف.
________
كانو يحكيو ومش حاسين على سعاد لي كانت تسمع فيهم
-سعاد:(مممم غدوة تروحي نشوفوها)
مشات هزت تليفونها
-سعاد: الو ..مجلة*** ايه عندي ليكم خبر يكسر الدنيا ...ايه ايه...اكتبي ..رجل الاعمال شهاب*** صاحب اكبر المطاعم و الفنادق عندو طفلة مش شرعية ...ايه اكتبي ..اوكي
كوبات وقعدت تتبسم - كي يشوف جدك هاذ الخبر نشوفو كيفاه يتصرف اففف سامحني حفيدي لكن لمصلحتك لانو عمري شفتك مهتم ولو شوية يمكن يتحرك احساسك هكذا.