الأم (نجوى و شهاب)

12

غدوة الصباح سايي قررت معنديش وش نخسر سلين هي كلش عندي في هاذ الدنيا عايشة ليها انا مشيت وصيت جاري راجل كبير يجيب لي يصلح الباب تاعي و ديت سلين لعند سلطانة رحت نخدم تغديت مليح بعد ما كملت طلعت لعند دراكولا كرشي توجع فيا من التوتر تقول امعائي راهي في مصارعة العرق بارد صب عليا دقدقت الباب نسمع في صوتو البارد دارلي غصة في قلبي دخلت راسي في الارض
-شهاب: نعم واش تحتاجي ؟
وقفت معرفتش كيفاه ننطقها ولا كيفاه نخرجها من فمي لكن مكانش مفر من الامر
-شهاب: مدموزال نجوى علابالك بلي منقدرش نقرا الافكار يعني اذا راح تحكي ابداي تحكي.
بلعت ريقي و تكلمت بصوت مش مسموع يهمس
-نجوى:نحب نحكي في العرض لي قدمتو.
-شهاب: نعم مسمعتكش من فضلك علي صوتك.
نتنفس بصعوبة هو وقف وجا مقابلني قعد على المكتب ويستنا فيا نحكي قلبي خاني خدودي يفورو ودم في عروقي يغلي
-نجوى:نحب نحكي على العرض لي قدمتو.
-شهاب: عرض ؟ وينا عرض ؟
___
هو كان فاهم وش قصدها هو سمعها من اول مرة لكن كان حاب يذلها اصلا هو مزال غلو من الكف لي داها.
___
هو قالي وين عرض وانا ذبت في بلاصتي نحس العرق في جبيني
-نجوى:بخصوص المبلغ لي قلتلي تقدر تمدهولي.
-شهاب: مزلت مش فاهم.
-نجوى:قلتلي انو تمدلي المبلغ اذا انا وافقت.
-شهاب: توافقي على واش؟ مش فاهم ؟
-نجوى:نفوت ليلة معاك.
ضحك ضحكة وصلت لعينيه كأنو انتصر في اكبر معركة في الدنيا نظراتو مستفزة حادة كلها شر عينيه يخليوك تتعقد
قرب مني جلدي كلو يستنفر من قربو
-شهاب: ايه شكون قالك مزال قايم العرض تاعي.
سكتت معرفتش واش نرد هز صبعو حطو على خصلة من شعري يهبط فيه عليها و نزل على رقبتي و كتافي انا نبلع في ريقي قلبي رح يخرج من بين ضلوعي
-شهاب: اوكي
هنا انا استغليت الفرصة
-نجوى:نحب الفاتورة تاع الطوموبيل تخلصها انت.
ضحك علا جنب ومشا قعد
-شهاب: الليلة هذي تجي لعندي رح تدخلي من الباب الكبير تطلعي في المصعد منحبش يشوفوك غرفة 60 تلقايني نستنا فيك تقدري تمشي.
خرجت من عندو نحس في روحي حشرة نستجمع في روحي نفكر في روحي بسلين مشيت روحت كلمت سلطانة طلبت منها تخلي سلين تبات عندها دخلت دوشت مشطت شعري قعدت نشوف واش نلبس معندي حتى شي يتلبس معنديش حاجة جديدة منلحقش نشري شفت لي مش مقطع ولبستو بعدها لبست تريكو نوار و سروال جينز وقفت نشوف مع روحي شفايفي مشققين عينيا محوقين عضام خدودي بارزة من الضعف اسبوع فات عليا وانا كيف العبيد منرقدش يديا خشان من الما مشققين هزيت ساكي وخرجت تقول رايحة لجنازة دخلت للوتال طلعت للغرفة وقفت مدة مش عارفة قداه غمضت عينيا جبدت نفس طويل و دقدقت حل الباب
..كان لابس شوميز نوار حال القفال تعها كلهم بدنو مسكل في يدو كاس يشرب فيه شعرو مفرفش مشا وانا دخلت وقفلت الباب ورايا معرفتش نتحرك تقول عليا مخدرة طرافي كل يرعشو عضيت شفتي
-شهاب: ارواحي هنا علاه واقفة هكذاك.
شور بيدو على السرير بجنبو وانا الدموع بداو يتجمعو في عينيا مشيت حطيت الساك وقعدت على حافة السرير نشوف فيه كي ناض مشا هز الدراهم و راح هز ساك تاعي حطهم فيه
-شهاب: هذا حقك قبل ما نبداو.
وجعتني كلمتو هذي لكن هذا هو الصح واصلا مش جاية هنا باه نبكي و نحلل كل كلمة يقولها عندي مهمة نديرها
قرب مني طبس عليا بعدت نحس في السرير على ظهري قعد يشوف معايا وضحك ضحكة مفهمتهاش
-شهاب: يعني تتوقعي مني نقرب عليك ؟
وساعو عينيا مفهمتش واش يقصد
-شهاب: يعني في بالك انا شهاب*** نقرب على وحدة كيفك يخي ماشفتيش روحك كيفاه شوفي ثيابك شوفي يديك انا منقدرش نخلي روحي ننزل لمستوى كيف هكذا بنت الشارع نحسها احسن منك.
وقف مشا شوية ويحكي وانا دموعي نازلة مش مصدقة لي نسمع فيه قلبي تكسر نسمع حتى في صوتو وقفت
-نجوى:وعلاه طلبت مني نجي عندك.
-شهاب: حبيت نثبتلك الناس لي كيفك كيفاه رخاص كيفاه تبيعي روحك بطرف دراهم تخلي راجل غريب يحط يدو عليك يا خامجة.
مشا هز الساك رماه عليا
شهاب: اخرجي.
نحس في روحي مت وخلصت واحد صب عليا ما بارد تخدرو طرافي نرعش بكلي شفت معاه بنظرة كلها حقد طبست هزيت الساك خرجت منو الدراهم و مشيت لعندو
-نجوى:مش مضطرة نحكيلك ولا نفسرلك ونمد اعذار لكن تعرف الفرق بيني و بينك انت لابس ثياب غالية حاط برفانات غالية شعرك تمشطو و يديك ناعميين كلش فيك مليح لكن من الداخل انت رخيص انت ارخص حتى من ثيابي لي راني لابستها لكن انا هكذا من برا رخيصة لكن من داخل قلبي ذهب وروحي ديامو اغلى منك ومن ثيابك ومن كلشي تملكو.
ضربتو بدراهمو على وجهو وخرجت نجري ودموعي على خدي مشفتش ورايا .