الأم (نجوى و شهاب)

51

حليت عينيا كل بلاصة نحسها توجع سلين تفكرت سلين قمت من بلاصتي بسرعة نلقا في يدين زياد حكموني
-نجوى:زياد سيبني سلين محتاجتني سيبني.
-زياد: نجوى اهداي.
-نجوى:واش نهدى متقليش نهدى سلين هذي لي راك تحكي عليها تقلي نهدى.
كلشي كنت نخمم فيه كون كشما يصير عليها كون مانزيدش نشوفها كيفاه نعيش وهي بعيدة سمعت صوتها تبكي وساعو عينيا سكت نصنت لصوتها صح ولا نتخيل فيه
-نجوى:سلين سيبني
نحا يديه مني وانا خرجت نجري من الغرفة صوتها ايه هي نزلت نجري مش عارفة كيفاه ندعثر في هذوك الدرجات قريب نطيح شفت شهاب واقف هازها بين يديه وهي تبكي حطيت يديا على فمي دموعي نازلين قطعة مني هذي روحي هذي مش عارفة نعيش بلا بيها مشيت لعندو هزيتها حضنتها نبوس فيها ودموعي مش حابة توقف مش عارفة علاه نبكي لانو الف سبب قاعدة نبكي عليه في هاذ اللحضة نبكي لانها رجعت نبكي لاني تصورت منشوفهاش مرة أخرى نبكي لاني مزلت نقدر نحضنها و نشم ريحتها نبكي لانها قاعدة تبكي نزلت على ركايبي قعدت و ضامتها لصدري بكل قوتي
________
نزل زياد وراها و ريتا شافوها وهي في الارض تحضن في سلين و تبكي ريتا رجعت تبكي معاها زياد تبسم مع شهاب و عملو حركة بعينيه تعني صحيت شهاب قرب و طبس عليها يمسح على شعرها
-شهاب: نجوى سايي هاي رجعت سلين بخير
هزت راسها شافت معاه عينيها كلهم دموع خدودها حمر شفايفها حمر اكثر وقالتلو بصوت يرعش من البكا
-نجوى:عمري ننسا انك رجعتها ليا.
من غير ما يفيق لاحت يدها دورتها على رقبتو و جبدتو حضنتو ولانو كان مطبس مش قاعد الحركة هذي خلاتو يفقد توازنو يطيح عليها لكنو حكمها بيدو قبل ما طيح وحط ركبتو على الارض هي مكانتش اصلا حاسة انها رح طيح منعڨشة في رقبتو بيدها وهو حاط يدو ورا على وسطها يضم فيها بينهم سلين و حاط يدو الثانية علا الارض يحكم توازنو مش عارف واش صارلو في هذيك اللحظة هو سبقلو انو يحضنها لكن حضن بسيط تلف هي يدها علا وسطو لكن هذا اول حضن تلف يدها علا رقبتو و يحس نفس تعها على رقبتو و دموعها لي نزلو على كتافو ريتا كانت تتفرج فيهم حاطة يدها على خدودها و عينيها قلوب و زياد نزل عينيه و يشوف لجهة الثانية مع انو يعرف انو لي بيناتهم مجرد عقد لكن هي مزالت تعتبر مرت صاحبو ومش من حقو يحس باي شي اتجاها الا بعد ما يسأل شهاب
__________
كنت حاضنتو فجأة حسيت طمأنينة و ارتحت علخر سمع صوت نفسو قريب من رقبتي سلين حكمتني من خدي تقرص فيا فيقتني بعدت شوية عليه عينيا في عينيه نفس تعنا تخلص قلبي نحس فيه خرج حتى هو و معنقو في هاذ اللحظة انتبهت بيديه محوطيني يد حاضتني انا و سلين من وسطي و يد علا الارض نزلت يدي من ورا رقبتو حطيتها على الارض بش نحكم توازن تاعي وهو بعد
-نجوى:مرسي
-شهاب: بلا مزية
وقف و مدلي يدو بش نوقف حكمتها و قمت انا تاني هنا بش تفكرت بلي ريتا و زياد معانا تبسمت
-ريتا: الحمد لله على سلامتها كون صار عليها شي منسامحش روحي.
-نجوى:لا مش غلطتك
مشيت لعندها حضنتها و بعدت زياد جا مسح علا راس سلين و تبسم
-زياد: الحمد لله على سلامتها
-نجوى:مرسي زياد و سامحني اذا قلت حاجة وانا مش واعية على روحي.
-زياد: لا ما قلتي شي.
مشا لعند شهاب حط يدو علا كتافو
-زياد : انا نروح و نحكيو بعد ما ترتاحو
-شهاب: استنا حتى انا طالع
-نجوى:وين رايح؟
سألتو من غير منحس نزلت عينيا مش متعودة نسألو
-شهاب: مزال كاين حاجة نديرها و نرجع ما نطولش.
-نجوى:حاضر.
شهاب كان عارف انو جدو مش راح يخلي هاذ الامر يفوت وراح يبقا وراه رجع للدار كانت نجوى مع سلين منيمتها في حضنها وقف لحظات يشوف معاهم بعدها قفل الباب وراح لغرفتو رقد
حسام دار كيما طلب منو شهاب و الصباح راح رفع قضية نسب
الصباح
حليت عينيا سلين جنبي حضنتها و بستها تنهدت مش متصورة لي صار البارح اكيد لازم نحكي مع شهاب بش يتخذ اجراء يعني مش نورمال يدخل يهزها و يروح بلا ما يتحاسب لبست و خرجت دقدقت عليه في غرفتو
-شهاب: تفضلي.
حليت الباب لقيتو يلبس في الفاست تاعو
-شهاب: صباح الخير واش حاسة روحك اليوم؟
-نجوى:مليحة لكن جيت نحكي معاك بخصوص لي صار.
-شهاب: ايه حتى انا حبيت نحكي معاك البارح رجعت لقيتك رقدتي اقعدي.
قعد علا السرير يلبس في صباطو مشيت قعدت جنبو
-نجوى:شهاب نحبو يتحاسب على لي دارو راهو يتسمى اختطاف.
-شهاب: راح نحاسبو ما تخمميش فيها لكن الوقت مش مناسب كي يوصل الوقت راح نحاسبو.
-نجوى:يعني راح تخليه يسرح ويمرح رغم لي دارو لانو تخمم في انتخابات باباك و سمعتك يعني ميهمكش انو سلين تخطفت و كنت قادرة مانزيدش تشوفها كلش يهمك هي مصلحتك.
تغششت من ردو كنت نظن راح يعمل حاجة لكن هو قالي الوقت مش مناسب تنهد بعمق دليل على غشو و شاف لبعيد
-شهاب: نجوى نعرف لي فات عليك البارح مش قليل لكن خلي عندك ثقة فيا
زاد غشي منو كيفاه قادر يكون بهاذ البرود
-نجوى:ايه عندي ثقة فيك واش راح دير قلي.
-شهاب: درك ماراح ندير والو.
-نجوى:يعني هو مش راح يدفع الثمن.
-شهاب: مش من مصلحتك ولا من مصلحتي هاذ الشي درك وعموما واضح انو الهدرة معاك درك مش راح تنفع خليني نروح احسن وانتي ما تروحيش اليوم اذا حبيتي انا نكلم زياد.
خرج و خلاني بلا ما يعبرني لكن انا مش راح نسكت.