الأم (نجوى و شهاب)

13

رجعت للدار نحس في روحي واحدة مسخة كلامو مزال يتعاود في راسي عندو الحق في كل كلمة قالها مكانش غالط انا كنت رح نبيع بدني صح سلين صغيرة عمرها مرح تعرف واش درت لكن انا عمري مرح ننسا دراهم حرام لي كنت رح نديهم تمديت نبكي فرغت قلبي مجبتش سلين من عند سلطانة خليتها بعد ساعات من التخمام مش انا لي نستسلم مش مسؤولة علا حياتي وحدي مسؤولية سلين في رقبتي وقفت بديت نلم في الدار ونفرز في الشي لي كسروه السرارقة رجعت رقدت غصت في نوم عندي مدة طويلة مرقدتش هكذاك. حليت عينيا 10 تاع الصباح غسلت لبست وخرجت شريت حليب لسلين كملت اخر دراهم قعدو عندي ميهمش نرجع نخدم و شوفتي كل يوم راح تهدو لانو واحد صايع وميقدرش يهدني عالاقل حتى نلقا خدمة جديدة اصلا مبقاش و نكمل الشهر جبت حاجة ناكلها و مشيت جبت سلين من عند سلطانة .
غدوة الصباح رحت نخدم معنديش علاه منروحش اهانتو متعنيلي شي واذا مرجعتش رح يظن بلي هو ربح وصلت في الوقت كي العادة جا يشوف الامور مكنتش حاسة بشي مجرد كره حقد ليه صوتو رجع سم هو كلو رجع كيف الحية في عينيا
وصل قدامي وقف يديه في الجيب يشوف معايا
-شهاب: مدموزال نجوى عندك غيابين مش مبررين تعرفي بلي سياسة الفندق بعد 3 غيابات بلا تبرير رح نفصلوك.
هزيت عينيا في عينيه لي كنت منقدرش نشوف فيهم كنت نخزر فيه بكل تحدي في عينيه رموشو كحلة و كثيفة تحس انو حاط كحل معادش يخوفني
-نجوى:مش رح تتكر مسيو شهاب.
تبسم شبه تبسيمة يادوب فرق بين شفافو حك حاجبو ودور عينيه مني اول مرة هو لي يهرب بعينيه مني ومش انا لي نهرب
-شهاب: نتمنا ما تتكررش.
مشا وانا مشيت لخدمتي
_____
دخل للكوزينة كيف العادة شافها تصدم لانو مجاتش البارح ظن انها مش رح ترجع كي شافها لز على سنيه
-مليح كي رجعتي كنت نخمم كيفاه نخليك تركعي بعد الدرس لي قدمتيه ليا وانتي لي كنتي راح ترقدي معايا على شوية تاع دراهم
مشا يستفز فيها لكن لي مكانش يستنا فيه هو التغير لي فيها نظرتها ليه تبدلت حاس رجع فيه تحدي حيرتو كل ما حاول يكسرها ترجع اقوى من قبل وش عندها واش لي يمدلها في الدافع لي يخليها تجي كل يوم عينيها في عينيه بكل ثقة تخزر فيه خلاتو يبلع ريقو هو لي مكانش لي يقدر يوترو لا مرا لا راجل من طول عمرو مهيمن مسيطر خلاتو هي يهرب عينيه منها حك حاجبو كرد فعل لا ارادي تبسم بش يحاول يتمالك توتر الأسئلة لي في مخو منين ليها هاذ القوة كل ما تضربها تقوى مشا خرج عدا على السكرتير تاعو
-شهاب: نحب سجل كامل على الموضفة تاع الكوزينة نجوى***.
- حاضر
______
رجعت لعادتي نخبي الغدا تاعي الايام الجاية معنديش منين ناكل من غير هنا حتى الكلاب سرقو الثلاجة معنديش وين نخبي يعني كل يوم ندي حق العشا تاعي سلين ترضع مني و تشرب الحليب الخاص تعها مزال مبديتش نمدلها تاكل بسبب المرض تعها نحاول نخليها تشبع من الحليب بديت نخيط باش نعاون روحي.