الأم (نجوى و شهاب)

09

الصباح كنت مقررة نشوف اذا في الخدمة يمدولي سلفة و بعدها ينقصولي من الشهرية سقسيت وحدة من الكوزينة قالتلي ممكن لازم نحكي مع المسؤول تاع الخزنة في وقت الغدا لقيت وقت طلعت لعندو
-تفضلي باش نقدر نعاونك
-نجوى:كنت نحب نعرف اذا نقدر ندي سلفة
-ممم كيفاه اسمك ؟؟
-نجوى **
-مكش مسجلة هنا عندي ..تخدمي عندنا؟
-نجوى:ايه عندي اسبوع نخدم هنا اليوم مفروض منخدمش يمكن علا هاذي مش مسجلة عندك.
-لا المفروض تتسجلي من اول نهار على جال الشهرية تاعك.
سكتت مش فاهمة علاه منيش مسجلة
-نجوى:و يعني ؟
-لازم تشوفي المدير.
هو قال لازم تشوفيه وانا الغصة حكمتني نكره نشوفو اصلا شوفتو كل يوم على الصباح تكفيني و زيادة وقفت ورحت طالعة لعندو قلبي يضرب و يزيد كل ما نقرب من المكتب تاعو نحس في رجليا ثقال السكرتير مكانش يمكن يتغدا دقدقت نسمع في صوتو البارد لي بلا روح كي قالي تفضلي بلعت ريقي و دخلت لعندو طلع حاجبو رجع لوراه و تبسم تبسيمة صفرة
-شهاب: نعم واش تحتاجي قررتي تستقيلي ؟؟
-نجوى:لا مش رح نستقيل لكن كاين مشكل منيش مسجلة في مكتب المحاسبة.
وقف من بلاصتو ضحكة شريرة في وجهو عينيه قرب مني يديه في الجيب
-شهاب: وشكون قالك بلي مشكل هنا منسجلش واحد قبل ما يكمل الشهر هنا لكن قوليلي علاه سقسيتي لكان مسجلة ولا لا.
-نجوى:كنت نحتاج سلفة و قالولي ماتقدريش تدي لانو مش مسجلة.
-شهاب: صح ماتقدريش.
-نجوى:لكن نحتاجها
-شهاب: و كون تستقيلي قبل ما تسدديها ؟
-نجوى:مش راح نستقيل.
-شهاب: لا.
تلفت ومشا عوج فمو ميقدرش يسمحلها تدي سلفة هذا يعني بلي تزيد تقعد تخدم عندو هو يحبها تخرج مسح علا حاجبو
-شهاب: قداه تحتاجي
-نجوى:نحتاج ***
وساعو عينيه وضحك مفهمتش واش قصد بيها الضحكة هذي قعد على المكتب يديه في الجيب وشاف معايا بنظرة نحس قلبي رح يتجلط راني من يوم شفت عينيه داخلة في حيط
-شهاب: كاين طريقة كيفاه تجيبي هاذ الدراهم.
فرحت و بلا تخمام سقسيت كيفاه وقف ورجع لعندي قرب خلاص مني بيني و بينو شبر عينيا يتبعو في كل حركة يدير فيها رموش عينيه تلخلخت معرفت نبعد معرفت نوقف نظراتو تهدد فيا دم يغلي في عروقي
-شهاب: مستعد نمدلك انا هاذ المبلغ و مش سلفة.
شفت معاه نسقسي فيه بعينيا كيفاه وهو كمل حديثو
-شهاب: فوتي ليلة معايا.
صوت الكلمات هذو نزلو عليا كيف الصاعقة مش مصدقة لي نسمع فيه سخانة طلعتلي جلدي كل يفور نحسو تحرق ذاب يدي كرد فعل تلقائي هزيتها ضربتو كف وجهو دار كنت نلهث
-نجوى:واش الوقاحة هذي واش ..
الكلام هرب التعابير مكانش بش نوصفو ولا نوصف لي حاستو منيش رخيصة بعد زوج خطوات وراه حط يدو علا وجهو وضحك عض شفتو التحتانية وانا خرجت نجري من عندو نزلت للكوزينة هزيت حوايجي خرجت نجري بثياب الخدمة وقفت نرجع في النفس والدموع نازلة على خدودي كانو يصبغو في الرصيف تلفت شفت مع علبة الصبغة خليتو ما غفل عليها ومشيت هزيتها
- مدموزال واش ديري ؟
مشيت الطوموبيل تاع سي دراكولا مش هاممني لي يصيح عليا هزيت صبيتو كلو على الطوموبيل و رميتو على الزجاج و مشيت نعرف رح نندم لكن هذا انتقامي منو.