الأم (نجوى و شهاب)

15

كملت خدمتي و في الوقت لي كنت نخمم في ساكي لي خليتو مرمي في مكتب دراكولا جا لعندي السكرتير مدهولي كانو كلهم يتفرجو معايا يظنو انا لي سرقتو حتى نطق السكرتير
-مرسي كامل و سامحونا الخاتم لقيناه رماوه في الزبل و نتأسفو على اي ازعاج.
خرج وانا تنهدت كبشت في ساكي وخرجت روحت جبت سلين من عند سلطانة بعد ما رضعتها حطيتها وتمديت قدامها تلعب باللعبة الجديدة شراهالها ايمن ولد سلطانة ولا سرقها هههه نحس بالجوع نضت لقيت شوية من اكل البارح كليتو ومشيت نخيط حتى غلبني النعاس نحس في روحي مش مليحة مشيت رقدت قدام سلين لي بدات تبكي قربتها لحضني خليتها ترضع بعدها نحس في وجاع في كرشي تقلقت و قلقتني سلين اكثر بقيت نتقلب ونتوجع حتى رقدت الصباح كي فقت وجيعة متتحملش اكيد لي كليتو فاسد حتى كي نجبد نفس نحس امعائي تتقطع تقويت على روحي و مشيت نغسل اكيد كي نمشي رح يروح كلش بدلت لسلين و هزيتها الوجيعة غير تزيد نحس العرق هابط على جبهتي
-سلطانة: نجوى راكي مليحة ؟
-نجوى:عندي شوية وجيعة في كرشي مش حاجة كبيرة.
-سلطانة: كون متمشيش للخدمة يكون احسن.
-نجوى:اذا شفت روحي مش مليحة رح نرجع منقدرش نغيب بلا مبرر.
مشيت لكن مقدرتش نوقف على طولي كان لازم نركب قعدت على الكرسي كابسة على كرشي نحس فيها نقصت وصلت وين ننزل وقفت كأنو واحد رشق سكين فيا تقوصت وكبست على كرشي وقفت ونزلت العرق يصب عليا وقفت في وسط الطريق نشوف دمعة صغيرة نزلت على خدي نكمل ولا نرجع راح يحاوزني كون نغيب هاذ المرة حطيت رجلي نقص الطريق وبعدها محسيت على حتى شي
______
دخل للكوزينة ومن اول ماجات هي كل مرة يدخل لازم يحوس بعينيه عليها اول وحدة ملقاهاش كمل جولة المراقبة تاعو ورجع للمكتب
-شهاب: كلم مدموزال نجوى قلها ماتشقاش تجي غدوة عندها 3 غيابات بلا تبرير.
-حاضر مسيو شهاب و تفضل هاهو السجل لي قلتلي عليه فيه كلش.
عوج فمو من بعد هزو ودخل لداخل حطو قدامو شعل ڨارو حط رجليه فوق المكتب وهزو يقرا فيه يلعب بالڨارو بين شفافو
-شهاب:20 سنة صغيرة ممم واش لي يخليك تخدمي هنا بدل ما راكي تقراي عزباء ايه ويتيمة..
هز الڨارو من بين شفافو ونفخ الدخان تاعو بقوة وتنهد
-يعني كلش عليك بففف حاس روحي ظالم كبير لكن ميمنعش انك حبيتي تبيعي بدنك.
قلب الاوراق عض شفتو ورماهم
-ام عزباء ولاعبتهالي بنت الفاضل تعلم فيا الاخلاق هه.
دقدق الباب
-شهاب: ادخل.
دخل السكرتير
-شهاب: نعم؟
-مسيو شهاب كلمت مدموزال نجوى رد عليا واحد يقول راهي في السبيطار و لازم يجي واحد من معارفها شكون نبعت.
وساعو عينيه وبلا ميحس على روحو وقف
-شهاب: كيفاه وش دير في السبيطار.
-قال بلي لقاها في الطريق مرمية هزها للسبيطار.
هز الفاست تاعو وخرج
-شهاب: ابعتلي ميساج فيه نومروها درك.
ركب في الطوموبيل تاعو وراح وصلو نومروها كلمها رد عليه لي هزها للسبيطار قالو وين يلقاهم وصل للسبيطار دخل سقسا عليها وراح لعندها لقاه واقف مد يدو سلم عليه
-شهاب: شهاب***انت لي وصلتها هنا.
-فراس: فراس***ايه انا وصلتها لقيتها في الطريق.
-شهاب: واش قالو.
-فراس:قالو عندها تسمم تفضل تليفونها بما انو جيت انا نروح.
حكم تليفونها و دخل لداخل عندها كانت راقدة قعد على الكرسي يتفرج فيها ضعيفة تاعبة مهزومة يخمم كيفاه كلش ضدها وهو كان عندو يد في هاذا الشي هو مش طبيعتو يكون ظالم هو فقط عندو مبادئ في الخدمة ميحبش يفسدها هو هكذا صارم في كلش حتى في حياتو الشخصية كلش علا قوانينو يمشي لكن ميحبش الظلم تنهد حك راسو وخرج
-شهاب: دكتور كيفاه حالتها
-الطبيب:عندها تسمم خطير ولازم تبقا عندنا هنا حتى نتأكدو بلي هي بخير.
-شهاب: اوكي تصرفو.
قعد في الكرسي برا يحس في يديه مربطين هو سبب في لي فيه هي درك صونا تليفونها رد
-شهاب: الو.
-سلطانة : الو نجوى وين راكي سلين هنا نهار كل وهي تبكي نظن لازم تجي تشوفيها.
-شهاب: الو
-سلطانة: وانت شكون وين هي نجوى.
-شهاب: راهي متقدرش ترد عليك درك شكون انتي.
-سلطانة: قلها بنتها راهي تبكي لازم تجي تديها للطبيب.
سكت يخمم تنهد
-شهاب: وين تسكني راني جاي.
مدتلو العنوان تعها خرج كلم السكرتير تاعو جا لعندو
-شهاب: امشي معايا اديني للحومة هذي منعرفهاش.
-مسيو شهاب وانت واش يديك لبلاصة كيف هذي.
-شهاب: اطلع ما تناقشنيش.
مشاو راحو لعندها حبسو شوية بعيد ميقدروش يكملو للداخل لانو مكانش طريق نزل يشوف من ومن حومة شعبية بأتم معنى الكلمة عمرو جا لبلاصة كيف هذي
-شهاب: وين نلقاو دارها سلطانة هذي.
-نسقسيو الناس مسيو شهاب.
سقساو على دار سلطانة دخلو عرضهم ايمن بسكين
-ايمن: اعطيني 5 دينار.
شهاب وساعو عينيه باهت فيه طفل صغير بسكين رح يسرقهم
-شهاب: قداه عمرك انت؟
-ايمن: متحكيش قلتلك اعطيني 5 دينار.
-مش سكين لي في يدو تع لعب
-شهاب: قلي وين هي دار سلطانة نعطيك 5 دينار.
هجم عليه ايمن يضرب فيه و سكرتير حاكمو
-ايمن: علاه تجيب في اسم امي على لسانك نقصهولك.
-شهاب: امك ؟ وين تسكن امك قلي.
-ايمن: منقلكش شكون انتم ؟
دخل يدو للجيب جبد 20 دينار
-شهاب: قلي وين تسكن تديهاحكمها عليه.
وقالو تبعوني ....طلعو لعند سلطانة دقدقو خرجت
-سلطانة : نعم؟؟
-شهاب: انا لي حكيتي معاه قلتلك راني جاي ندي الطفلة للطبيب.
-سلطانة: وانت شكون وين هي نجوى
-شهاب: مريضة متقدرش تجي.
-سلطانة: اه يا ناري عليها مسكينة قلتلها الصباح راكي مش مليحة اه يا غبني عليها استنا نجيب سلين.
دخلت جابت سلين لي كانت تبكي
-سلطانة: من الصباح على هاذ الحالة.
شاف معاها وهي بين يديها تبكي بشهقة تتحرك ويديها صغار كلش صغير صوتها عالي حاد يوجع عقد حواجبو وخزر في السكرتير تاعو
-نعم ؟
-شهاب: هزها.
-منعرفش هزها انت.
-شهاب: من وقتاه تناقشني قلتلك هزها.
مشا هزها وهو خايف مش معتاد يهز الاولاد الصغار
-سلطانة: هاذو حوايجها 
طلع حاجبو وتلفت للسكرتير
-في يدي الطفلة علاه تشوف معايا.
نفخ و حكمهم عليها و نزلو رجعو الطوموبيل ركب من ورا و السكرتير جا حط سلين من ورا معاه
-شهاب: علاه تحط فيها هنا.
-كيفاه نحطها معايا تحب الشرطة يوقفونا.
مشا ركب وراحو للسبيطار وهي تبكي و تتحرك قعد ينفخ ويشوف معاها تحركت رايحة طيح من الكرسي لاح يدو حطها على كرشها ثبتها فوق الكرسي حكمتو بزوز يدين وتبكي يديها صغار خلاص بالنسبة ليديه حس احساس غريب من بعد قعد يمسح على كرشها بش تهدى بدات تسكت السكرتير تاعو كان يتفرج فيه في المرايا ويتبسم وصلو للسبيطار و نزل هزها وهو خرج عدل الفاست تاعو وتنهد
-شهاب: بفف الاولاد الصغار مزعجين تع صح.
تبسم السكرتير تاعو ودخلو شافها الطبيب وحكالو على الحالة تعها هو هنا فهم علاه نجوى كانت تحتاج دراهم زاد حس بذنب اكبر.