الأم (نجوى و شهاب)

19

بدل وخرج راح لوتال تفقد الخدمة و كي وصلت 10 تاع الصباح راح للسبيطار عند نجوى
_________
فطرت وبعدها جا لعندي الطبيب يشوفني بعد ماقاسلي الضغط و فحصني
-نجوى:دكتور راني نحس في روحي مليحة نقدر نخرج؟
-الطبيب:ايه تحسنتي الحمد لله تقدري تخرجي اليوم درك نسنييلك الإذن تاع الخروج و هذا الدوا لي تشربيه لانو صحتك مدهورة لازم تهتمي بماكلتك اكتر لانو الحليب تاعك يتأثر و تتأثر التغذية تاع بنتك.
-نجوى:حاضر.
كنت نسمع فيه ونخمم منين ليا بش نهتم بتغذية تاعي الدوا راني متحيرة كيفاه نشريه نشوف في الباب تحل و دراكولا دخل نص ونص ورا الباب حط يدو في الجيب
-شهاب: سلام عليكم.
-الطبيب:تفضل مسيو كنت نحكي مع المدام درك قلتلها على التغذية تعها.
مشا لعندو وبلا فهامة حطلو الوصفة في يدو
-نجوى:شكرا دكتور لكن الوصفة مدهالي ليا.
شاف معايا بنظرة من نظراتو الباردة الحقودة و حط يدو على كتاف الطبيب و شكروا
-شهاب: مرسي دكتور انا نهتم بيها.
خرج وهو جا قعد على الكرسي مقابلني يقرا في الوصفة
-نجوى:اعطيني الوصفة هنا.
هز عينيه فيا وجهو ما فيه حتى تعبير متقدرش تقرا واش يخمم ولا واش يحس شي مزعج تع صح تحس روحك تحكي مع دمية كان يطوي في الوصفة و عينيه في عينيا نكره يبقا يبحلق فيا هكذا نبلع في ريقي لكن مش رح نهرب بعينيا منو حط الوصفة في جيب الفاست تاعو و ضم كفوف يديه لبعضهم مرافقو على ركايبو رمش
-شهاب: واش حاسة روحك اليوم ؟
ماتوقعتش هاذ السؤال نظن تعودت علا حقدو
-نجوى:مليحة لكن من فضلك نحب الوصفة و ين هي سلين علاه ما جبتهاش معاك راني خارجة اليوم.
سكت وانا نستنا فيه يحكي مرر يدو علا شعرو وعدل القعدة تاعو
-شهاب: ايه بخصوص هاذ الموضوع كاين مشكل.
تنفضت من بلاصتي وقفت
-نجوى:ويني وشبيها سلين😨؟
وقف ليا حط يديه علا كتافي
-شهاب: راهي مليحة وشبيك اقعدي خليني نحكي.
-نجوى:وش تحكي واش هو المشكل؟؟
-شهاب: جداتي هي المشكل سلين راهي مليحة احسن مني و منك.
-نجوى:واش كاين ؟
-شهاب: كاين مشكل عند جداتي راكي حكيتي معاها البارح درك هي في بالها انو سلين بنتي.
وساعو عينيا وانا نسمع فيه واش يحكي
-نجوى:كيفاه؟
-شهاب: ظن بلي انتي وانا تزوجنا لانو كنتي حامل ب سلين و سلين بنتي وانتي مرتي.
-نجوى:ايه قلها بلي مكانش منها.
-شهاب: حاولت نفهمها.
-نجوى:ايه؟
-شهاب: راهي كبيرة و مخرفة و زيد عندها ضغط البارح جا الطبيب لعندنا في الليل لانو ضغطها طلع فقط كي قلتلها سلين مش بنتي وحتى راهي خبرت العايلة كلها.
بلعت ريقي ومش فاهمة شي وين حاب يوصل وش مشكلتي انا علاه يحكيلي
-نجوى:ايه يعني ؟
-شهاب: الطبيب قال بلي هي ما تتحملش صدمات في هاذا العمر وقال بلي هي وحدها يرجع عقلها وتعرف بلي انتي وسلين مش عايلتي.
-نجوى:ايه يعني كمل ؟
-شهاب: منقدروش نقولولها العكس يعني راح تضطري تكذبي معايا.
-نجوى:نقلها ايه انا مرتو ؟
-شهاب: ايه هكذاك فقط حتى ترجع لطبيعتها.
-نجوى:قلها رانا مطلقين.
-شهاب: ما نظنش ينفع..
صونا تليفونو و حنا نحكيو رد عليه
-شهاب: الو !
-سعاد:اسمع مشيت تخرج مرتك من السبيطار؟
-شهاب: ايه راني عندها وراح نخرجها.
-سعاد: ايه هيا راني نستنا فيكم على الغدا ما طولوش.
-شهاب: الغدا ؟؟ علاه ؟
-سعاد: كيفاه علاه وين رايح انت وهي يعني مش راجعين للدار؟؟
نشوف فيه ضايع يحك في حاجبو
-شهاب: حاضر حاضر جايين للدار.
نسمع فيه يقلها جايين للدار وش قصدو هذا يعني راح نكذب و نمثل على جداتو
-نجوى:وين رايحين منروح لحتى بلاصة معاك.
-شهاب: نجوى من فضلك اعتبريه طلب خدمة اي حاجة مرا كبيرة ما تكسريش بخاطرها غذا فقط وبعدها نوصلك لدارك.
سكت نخمم من بعد وافقت
-نجوى:اوكي.
-شهاب: اوكي بدلي وانا نخرج نجيب الإذن ونرجع.
خرج هو وانا بدلت ثيابي كي رجع خرجنا مع بعض مد يدو ليا يسندني بعدت عليه وشفت معاه باستغراب
-شهاب: راح نعاونك !!
-نجوى:نقدر نمشي وحدي.
دخل يديه في جيابو ومشا تنهد وانا مشيت وراه مش متعودة الناس يساعدوني خاصة هو لي كيفو اصلا كون مش جداتو منظنش كان يرجع اليوم وقف حلي الباب بش نطلع في الطوموبيل قفلو ورايا وراح طلع هو من جهتو ومشينا ساكتة طريق كامل اصلا مش طويلة وصلنا لدارو ايه مش دارو قصرو وقف ونزل حليت الباب ونزلت قبل ما يوصل يحلي الباب
-شهاب: راكي مليحة ؟
-نجوى:ايه.
-شهاب: هيا ندخلو تكون تستنا فينا ما تخافيش رح تحبيها.
دخلنا وانا قلبي يضرب تقول صح و هي مجرد كذبة كانت دارو واسعة و كبيرة لكن ما فيها حتى شي حيوط بيضا و الاثاث كلو اسود حيوط فارغة و مفيهاش الوان تماما كيفو وتعبر عليه كليا كيف وجهو لي مفيهش الوان و تعابير نشوف في طفلة مش كبيرة في العمر
-صباح الخير مسيو شهاب مدام نجوى تفضلو.
مشينا للصالة نسمع في صوت سلين تلعب تبسمت و سارعت في خطواتي نشوفها دخلت للصالة لقيتها قاعدة تلعب بألعاب و فرحانة مشيت نجري حضنتها وهزيتها نبوس فيها
-نجوى:يا روح ماما توحشتك توحشت ريحتك.. نبوس فيها و نعاود
-سعاد: شهاب جيتو؟
تلفت نشوف في جداتو واقفة تتبسم بلعت ريقي
-سعاد: اه يا بنتي خوفتينا عليك.
جات لعندي حضنتني و تسلم وانا مستغربة راهي صح مهبولة هههه
-سعاد: واش حاسة روحك درك ؟
-نجوى:مليحة الحمد لله.
-سعاد: الحمد لله رجعتيلنا بخير و رجعتي لبنتك.
-نجوى:انشاء الله متكونش تعبتك.
-سعاد: لا كيف الملاك و شهاب بات الليل كل معاها وهي تبكي اكيد استفقدت حضنك هي و راجلك.
بلعت ريقي و وساعو عينيا الدم طلع لخدودي السخانة خارجة منهم و شهاب يكح
-شهاب: احم احم ماني هيا نتغداو هيا.
حكمها و مشا وتلفت ليا قالي هيا
-نجوى:هذي صح مودرة عقلها كلو اه يا ربي مشيت قعدنا نتغداو
-سعاد: يا ولاد شفت بلي مكانش غرفة للطفلة اكيد جات علا غفلة ومكنتوش موجدين روحكم و علا هاذا عملتلكم مفاجأة وجدت غرفتها من كلش.
شرقتلي الماكلة في حلقي
-شهاب: كيفاه وجدتيها؟
-سعاد: شريت كلش باش ترقد بنت حفيدي مرتاحة.
-نجوى:يعني راح ترقد هنا ؟
شفت مع شهاب نستفسر نحب نفهم منو
-شهاب: لكن هي متعيشش هنا معايا يا ماني.
-سعاد: كيفاه هذا واش تقصد المرا معندهاش من غير دار راجلها نجوى انتي تقعدي هنا ومنحبش مناقشة في قراري.
وقفت و ضربت الطاولة و مشات لعند سلين هزتها
-سعاد: المشكل لي بيناتكم حلوه سلين تبقا هنا.
هزتها وراحت لغرفتها وانا بقيت نبحلق في شهاب ماش فاهمة لي صرا.