الأم (نجوى و شهاب)

08

خرجت من عندو حطيت يدي على قلبي السكرتير قعد يشوف معايا مش فاهم
_____
نطرت يديها منو وخرجت تجري نزل يديه حطهم في الجيب رجعت الباب وراها طلع حاجبو وقف لحظات يخمم من بعد هز يدو مسح علا حاجبو و تبسم بلا ما يحس قعد على الكرسي تاعو حط مرفقو علا المكتب و صوابعو علا ذقنو يمسح على شفتو ويخمم فيها تفكر كي شافها الصباح و ضحك حرك راسو وراح حط يتفرج في الكاميرات يشوفها واش دير
___
دخلت للكوزينة نغزل من غشي حطيت نغسل في الماعون هذاك و نسب مش عارفة قداه وانا هكذاك يبسو صوابعي معدتش نحس بيهم معدتش نقدر نحكم صحن بين يديا نحس في وجيعة كبيرة طلع لون صوابعي احمر و يوجعو هزيت يديا نتفرج معاهم و نبكي من بعد قعدت على الارض ظهري على الحيط حطيت يديا تحت ذراعي يدفاو ونبكي بشهقة منقدرش نقعد بلا خدمة سلين تحتاجني معندها حتى حد من غيري منخذلهاش كيما خذلوني انا قبلها منخليهاش كيما تخلاو عليا قبلها الحياة لي عشتها في ميتم منسمحش تعيشها بنتي مسحت دموعي و رجعت نغسل
_________
كان يتفرج فيها عوج فمو
-شهاب:راسها يابس صح ..شافها تبكي و تتفرج مع يديها قلبو وجعو عليها ...يمكن زدت فيها شوية.
هز تليفون كلم شاف تاع الكوزينة طلب منو يرجع الما الدافي عادي
__________
كملت نهار تاعي بعد ما رجع الما عادي خرجت نحس بغصة و غش كبير رجعت للدار بعد ما جبت سلين من عند سلطانة قالتلي بلي راهي تكح فففف لازمني نديها للطبيب حطيت نتعشا وهي مسكتتش من البكا نعرفها كي تمرض ترجع هكذا حطيت يديا على راسي نحس فيه رح يطرشق من صوتها مرات نحس روحي تعبت منها صح نتمنا تكبر بسرعة نتمنا كون تفهم وتعرف الوقت لي لازم تبكي فيه ولي لازم تسكت نتمنى تعاوني كون تحكي وتقلي واش تحب مني بالضبط وقفت رحت لعندها تمديت قدامها حطيت يدي حكمتها نسكت فيها محبتش تسكت بدلتلها رضعتها عملت كلش علاه راهي تبكي غمضت عينيا تنهدت من بعد نضت هزيتها هزيت ساكي و مفاتحي وخرجت نديها للسبيطار
..وصلنا للسبيطار دخلتها لعند الطبيب شافها
-الطبيب:مدام بنتك عندها فتق.
حليت فمي كيفاه طفلة صغيرة عندها فتق
-نجوى:كيفاه فتق؟
-الطبيب:نسميوه عندنا فتق أربي يجي اسفل البطن يتولدو بيه الاولاد الصغار لي يسببو امو عضلات البطن متكتملش النمو تعها كي كانت جنين يعني.
بلعت ريقي وانا نسمع فيه
-نجوى:و كيفاه هذا شي خطير يعني؟
-الطبيب:هو مش خطير في وضعها درك لكن عندها كحة تتسبب في انتفاخ الفتق يوجعها ولازم نديرو عملية باه نقفلوه لانو مع الوقت يطور ويسببلها مضاعفات اكبر من هكذا.
-نجوى:والعملية صعيبة ؟ فيها خطر عليها ؟
-الطبيب:لا مش صعيبة نديرو شق صغير و نخرجو الكيس تاع الفتق و..
قعد يحكي و يشرحلي يفهم فيا سلين في حضني تلعب بيديها وانا تفكيري كلو كيفاه يحطوها على طاولة العمليات الباردة و يشقولها نحس بغصة كبيرة
-الطبيب:فهمتيني مدام.
-نجوى:ايه فهمتك وقتاه لازم العملية.
-الطبيب:هي ضروري باسرع وقت ممكن.
-نجوى: شحال تسوى هاذ العملية ؟
صدمني بالجواب تاعو نحس في رجليا تقصو فشلت بلعت ريقي منين بش نجيب هاذ المبلغ لي نديه يا دوب نسلك الكرا و الفواتير و مصروف سلين انا اصلا لروحي مش لاقية من يوم جات سلين منتفكرش شريت حاجة ليا تبسمت للطبيب شكرتو ونضت خرجت جهامة بلا روح قعدت على دروج تاع السبيطار نتفرج في الناس داخلة خارجة اصلا واحد ما جابو الخير هنا ناس كلها مهمومة حضنت سلين و وقفت
-نجوى:حبيبة ماماها متخافي من شي عندك ماما تحبك وتعمل كلشي على خاطرك.
رجعت للدار حطيتها راقدة بدلت و تمديت قدامها.