الأم (نجوى و شهاب)

65

مشينا للسبيطار سألنا على رحيل*** وش من غرفة و طلعنا لعندهم وصلنا كان قاعد واحد على الكرسي قدام غرفتها صغير باين هذا هو راجلها تلفت ليا شهاب
-شهاب: انتي ارجعي الطوموبيل خلي الشوفور يوصلك مش لازم عليك تكوني هنا.
-نجوى:لا قلتلك نجي معاك اصلا قلبي ميتهناش اذا رحت.
تبسم وحكم يدي صوابعو بين صوابعي و مشينا لعندو
-شهاب: سلام عليكم.
هز عينيه فينا و ضحك
-فراس: ههه وعليكم السلام.
وقف مد يدو سلم على شهاب وتلفت ليا
-فراس: واش احوالك مدام راكي مليحة؟
وساعو عينيا يحكي معايا كأنو يعرفني شفت مع شهاب خفت نرد عليه شهاب كان يشوف معاه مستغرب
-فارس: معرفتينيش انا لي جبتك للسبيطار المرة لي فاتت.
-شهاب: آه مسيو فراس والله صح وانا نقول وين شايفو.
-فراس: علاه ومالا واش جيتو ديرو ؟
كح شهاب الراجل مسكين كان يضن بلي عرفناه جينا نطمنو عليه
-شهاب: نجوى هذا لي جابك هنا و رجعو هو ومرتو شافوك كنتي راقدة.
تبسمت و شكرتو وقالي بلا مزيتو
-شهاب: تعرف الدنيا صغيرة صح انا خوها تاع نادية.
تبدل وجه فراس كان باين فيه قلق ويحاول يكون مليح معانا
-شهاب: نعرف اختي متعملش حاجة كيف هكذا لكن لي عملتو انت تاني ميعملوهش رجال.
-فراس: شوف خويا مش بلاصة لي نقدرو نحكيو فيها نعرف لي درتو مش حاجة نفتخر بيها بصح كنت واضح مع اختك من الاول و انت متعرفش واش دارت هاذي راهي الخاتمة تاع لي دارتو كل هنا تمادات بزاف وصلت تحب تقتل مرتي وابني.
-شهاب: كيفاه كنت واضح معاها من الاول؟!!!
بداو يقلقو و صوتهم يعلا اكثر اضطريت اني ندخل و نجبد شهاب نسكتو بسيف هدى وقعد مشينا قعدنا بعيد شوية حاسة يديا مربطين نحب نعاونو مش عارفة كيفاه نخفف عليه هو كل مرة كان يلقا كيفاه يخليني نريح حطيت راسي على كتفو حكمت يدو بين يديا
-نجوى:كلش راح يكون مليح متخافش.
-شهاب: كان لازم نعرفها اكتر كنت مشغول بزاف بش نشوف واش راهي دير.
-نجوى:مش غلطتك نادية كبيرة وتعرف صلاحها و زيد غلطت حتى هي ومكانش لي مايغلطش.
-شهاب: ايه بصح انا خوها الكبير انا لي كان لازم عليا نحميها.
-نجوى:متقلقش درك يهدا الراجل و نحكيو معاه واذا لازم نحكي مع مرتو.
-شهاب: لا انتي ما تدخليش.
-نجوى:علاه ما ندخلش ؟ تعتبرني مش من العايلة؟ وانو مشاكلك مش مشاكلي ؟
جبدت روحي منو و هو وقف
-شهاب: خارج نشم شوية هوا.
مشا وخلاني قعدت نغزل تلفت كان فراس مزال قاعد مشيت حكيت معاه فهمت منو و حكالي وحتى انا حكيتلو انو نادية قلبها ابيض ويمكن لي عملتو لانها تحبو و المرا كي تحب واحد متعودش تشوف قدامها طمني بلي مرتو اصلا ما قدمتش شكوى وانو هو قدمها لكن ناوي يسحبها عمل هكذا بش تخاف و تبعد واصلا هو عرف عايلتها درك واي حاجة تعملها رح يخبرهم دورت لقيت شهاب واقف يخزر فينا وقفت
-نجوى:شهاب ؟
حط يديه في الجيب ومشا خرج لحقتو نجري
-نجوى:سامحني مسيو فراس.
-فراس: سماح معليش.
خرجت لقيتو واقف
-نجوى:شهاب
-شهاب: هيا رانا مروحين البارح ما رقدتيش و الليل درك هيا.
مشا حلي الباب طلعت وهو طلع قدامي دانا الشوفور روحناروحنا للدار كانو يستناو فينا يعرفو واش درنا فيها قلتلهم لي هوما رح يسحبو الشكوى لي ضد نادية شهاب ساكت طلع لغرفتو بعدها لحقتو انا كان ديجا دوش و بدل قاعد على السرير و سلين مكانش
-نجوى:ويني سلين ؟
-شهاب: داتها ماني ترقد عندها.
ردلي بلا حتى ما يشوف معايا كان قاعد يشوف في البوم تصاور مشيت قعدت جنبو
-نجوى:هذو تصاور تعكم ؟
قفل الالبوم وحطو علا الطاولة جنب السرير وقدم لفوق هز الغطا دخل تحتو
-شهاب: كي تكملي طفي الضو غلبان.
مش عارفة شبيه يعامل فيا هكذا لكن خلا قلبي يحرق فيا محبيتش نلومو قلت متقلق مشيت هزيت ثيابي دخلت درت دوش خفيف لبست و خرجت طفيت الضو و رقدت بعيد عليه فوق الغطا حضنت المخدة من يوم عرفتو محسيتش روحي نكرة كيما درك بدات عيني تغمض كي حسيت بيه ناض تلفت شفتو قاعد على حافة السرير حاط راسو بين يديه قعدت و قربت منو حطيت يدي على ظهرو نمسح عليه
-نجوى:شهاب غدوة تخرج هدي روحك.
بعد عليا و دور وجهو لا هكذا بزاف واش يعني كي عاد مقلق يرجع فيا انا مفقتش مع روحي دزيتو بيديا لزوج من ورا وانا نصيح
-نجوى:شبيك انت درك وش هي مشكلتك معايا علاه تعامل فيا هكذا فاه غلطت معاك؟
تلفت ليا باهت تلحت عليه نضرب فيه و نحكي
-نجوى:فهمنا قلقان و ندمان ومش طايق روحك وانا من لي جينا نحاول نوصل ليك حابة نخفف عليك شوفتك هكذا قهرتني وانت تعامل فيا تقول عليا حشرة.
كنت نضرب فيه ونفارع فيه وهو يحكملي في يديا بعدها حكم يديا بين يديه و جبدني لعندو بقوتو وانا ندز فيه نحب نفلت يديا منو
-شهاب: سامحيني.
-نجوى:منسامحش بعد نحي يديك مني.
-شهاب: سامحيني مش قصدي انا هكذا تعلمت كي نحزن نحزن وحدي حد ما يشاركني حاجة مش بيدي من صغري وانا وحدي.