الأم (نجوى و شهاب)

28

فات النهار و انا مع سلين تحاليل وفحوص و أشعة تعبت بزاف وانا تعبت معاها اخيرا قعدت في الغرفة معاها نزلت الستائر و طفيت الضو ورقدت حطيتها في حضني نرضعها بش ترقد ترتاح وغمضت عينيا معاها رقدت
_________
شهاب كمل خدمتو ورجع للدار لكن قلبو ما طاوعوش يخليها وحدها رغم انو قاسي وتصرفاتو باردة لكن قلبو حنين طلب من ريتا تحضر ثياب يديها للسبيطار لنجوى و سلين
-سعاد: ربي يشفيها يا بني وقتاه يديرو العملية.
-شهاب: غدوة الصباح.
-سعاد: وانت وين رايح.
-شهاب: نشوفهم و ندي ثياب بش يبدلو.
هز الفاليز وخرج وهي قعدت تتبسم وحدها
-سعاد:(هههه كون مشفتش بعيني يا شهاب نكذب والله خلاتك تهتم صح).
شهاب راح لعندها دقدق بشوية وحل الباب تاع الغرفة دخل كانت راقدة و سلين في حضنها مشا حط الفاليز جنبها على الطاولة وتلفت كانت سلين مكبشة في صدر امها بزوج يدين كانت مغطية لكن جزء يبان دور عينيه حس انو تصرف وقح يشوف بلا علمها من بعد حط يدو هز الغطا لي حاطتو بش يغطيها تحركت سلين فطنت ورجعت كبشت اكثر في امها و ترضع ضحك وهو يشوف معاها من بعد رجع على وراه وقعد على الكرسي مقابل يتفرج فيها ويخمم
-شهاب:(مش مذكر امي لكن كانت هكذا معايا؟ حنينة هكذا ؟ وقوية على خاطري ! يعني الراجل صح عندو القوة لكن الصبر لي عند المرا يغلب قوتو لانو القوة بلا صبر معندها حتى معنى و الضعف مع الصبر قوة في حد ذاتها)
بقا يتأمل فيهم ورجع راسو لورا غمض عينيه يرتحهم حتى رقد.
________
فطنت في آخر الليل حليت عينيا سلين راقدة هزيت عينيا لقيتو راقد على الكرسي حاط يدو علا وجهو يسند في راسو قفلت زرار الشوميز تاعي اه يا ربي تبهديلة محسيتش عليه كي دخل شافني في هاذ الحالة اووووف فجأة تحرك رجعت حطيت راسي على المخدة عملت روحي راقدة حليت طرف عين نشوف معاه مسح وجهو بيديه و تنهد من بعد كح و وقف مشا للشباك نظن هز الستائر و يشوف برا لانو ضو الشارع دخل للغرفة نسمع في صوت نفس تاعو واش قاعد يدير هنا مفروض راهو في الدار تبسمت لانو مخلانيش وحدي تحكت سلين و بدات تصدر في اصوات اكيد حلم مش مليح حطيت يدي عليها
-نجوى:اسسس ماما هنا اسس.
رجعت هدات و رقدت
-شهاب: راكي فاطنة
غمضت عينيا لزيت علا سنيا "اففف سلين يعني فضحتيني " رديت بصوت خافت بش ما نوضهاش
-نجوى:ايه.
-شهاب: جبتلك شوية ثياب ليك و لسلين لقيتك راقدة.
-نجوى:مرسي.
كنا نحكيو انا ما تلفت ليه وهو ما قرب جيهتي
-شهاب: كيفاه حالها ؟
-نجوى:تعبت اليوم صح
-شهاب: وانتي ؟
كي سأل عليا تلفت ليه نشوف معاه في ضو الشارع واقف قدام الشباك يديه في الجيب واقف بإستقامة طولو لي يعطيه هيبة جبدت شفتي بين سناني و جاوبتو
-نجوى:خايفة.
-شهاب: تعشيتي ؟
-نجوى:لا.
-شهاب: حتى انا ما كليت شي هيا ننزلو الكافيتيريا تاع السبيطار يمكن نلقاو حاجة.
وقفت جبدت سلين لوسط السرير غطيتها لبست صباطي وخرجنا من الغرفة نزلنا للكافيتيريا قعدت وهو راح جاب 2 قهوة و ساندويتش ليه و ليا تبسمت.
-نجوى:راح ناكلو سندويتشات مع القهوة.
-شهاب: هذا لي لقيت يا للا
هزيت بديت ناكل في الساندويتش تاعي ونشوف فيه كي حل سندويتش تاعو نحا منو الخس و اللحم و خلا فيه غير الفرماج وطماطم ههههه
-نجوى:علاه ؟
-شهاب: منحبش ناكلهم منعرفش اذا غسلو الخس مليح والا اذا اللحم مش بايت.
طلعت حاجبي بففف هكذا يكونو لي زادو في فمهم مغرف من ذهب
-نجوى:ايه اذا كنت مش راح تاكلهم.
هزيت اللحم من قدامو و حطيتو في ساندويتش تاعي و رجعت ناكل ونتبسم نغيض فيه
-شهاب: انتي ما تخافيش على روحك تاكلي برك
-نجوى:اذا ما قتلش يسمن😊.
-شهاب: ايه علا هاذي قريب متي المرة لي فاتت.
-نجوى:غلطة برك هذيك بصح ما متش هههه
قعدت ناكل وهو باهت فيا بعدها تفكرت الصباح العملية حسيت بغصة
-شهاب: وش بيك؟
-نجوى:خايفة.
-شهاب: راح تكون مليحة متخافيش اكيد قوية كيف امها.
شفت معاه وبقيت هكذاك و نخمم مرات يقدر يكون انسان و تحس انو عندو مشاعر تبسمت ونزلت عينيا
-شهاب : هزي قهوتك نديك لبلاصة راح ترتاحي فيها.
هزيت قهوتي و خرجنا للجنينة تاع السبيطار قعدنا على الكرسي
-نجوى:هذي هي ؟
-شهاب: لا اصبري
قعدنا نشربو في القهوة ساكتين حسيت بنسمة باردة تاع افريل مع الصباح تلفت ليا هو
-شهاب: بردتي.
-نجوى:لا.
وقف نحا الفاست تاعو و حطها على كتافي كانت دافية من بدنو وريحتو فيها دخلت لجواجي قلبي قص عليا صوتو
-شهاب: شوفي.
هزيت عينيا وين كان يشور بيدو كان اول خيوط الفجر بدا يطلع ههه جابني نشوف الشروق وحنا في جنينة السبيطار ههههه رومنسية مكانش كيفها
-نجوى:منظر ياخد العقل.
-شهاب: ايه نحب نشوف الشمس وهي تشرق تحسيها كيف حياتنا تكون ظلام من بعد خيط صغير تاع ضو يقطع هذاك الضلام و ينتشر في كل بلاصة حتى تضوى الدنيا الخيط هذاك اسمو الامل .
كان يحكي و غارق في حديثو وانا نشوف معاه رموشو شفايفو يتحركو صوتو وخاصة كلامو سلب عقلي من بعد رجعت للوعي تاعي هبطت عينيا منو و ترشفت من قهوتي ووقفت
-نجوى:لازم نرجع لعند سلين نخاف تفيق وحدها.
-شهاب: ايه هيا.
وقف دخلنا لداخل نحيت الفاست تاعو مديتهالو هزها على يدو و طلعنا للغرفة عند سلين دخل هز تليفونو من على الكرسي وعاود خرج وانا تمديت قدام سلين.طلع النهار و دخلو سلين للعملية منذكرش خفت في يوم كيما راني خايفة درك قعدت رايحة جاية قدام غرفة العمليات ونشوف مع الساعة دقايق فاتو عوام اه يا ربي واش رآهم يديرو لداخل كل ما يمر الوقت وانا نخاف اكتر شهاب قاعد على الكرسي يتفرج فيا بكل هدوء كيفاه يقدر تكون اعصابو باردة لهاذ الدرجة نكرهو نكرهو و ما نطيقوش مشيت قعدت في الكرسي مقابلو رجليا يرعشو وبدا نفس تاعي يتسارع ودموع تجمعو في عيني حطيت يديا على وجهي و بديت نبكي حتى حسيت يدين باردين و كبار على يدي دخلو صوابعو حكمو يديا و نحاهم من وجهي و قبل ما نحكي ولا ندير رد فعل حط يدو ورا على رقبتي و جبدني بقوة لخضنو و لف يدو ورا ظهري و غرس وجهي في صدرو يمسح على شعري ويحكي
-شهاب: اسسس متخافيش راح تكون مليحة.
قويت انا في البكا وكبشت بيديا في الفاست تاعو
-نجوى:راهي هي كلش عندي في الدنيا هي عايلتي الوحيدة معنديش من غيرها كون تروح نرجع وحدي كيف ما كنت قبل.
-شهاب: معندها وين تروح راهي هنا و مكش وحدك.
حسيت براحة كبيرة وانا حاطة راسي في صدرو صوتو نحسو طالع من صدرو والبحة لي فيه خلاتني نحس بأمان كبير ونصدق كل كلمة قالها.
________
قعدت رايحة جاية قدام غرفة العمليات وهو توتر محبش يبين بش ما تخافش وفجأة قعدت مقابلتو وبدات تبكي متحملش يشوفها هكذاك وقف لعندها و فكر انو يحكي معاها يطمنها لكن عرف انو لي هي محتاجتو في هاذا الوقت هو حضن وكتاف تبكي عليه بلا تفكير جبدها لحضنو في هاذا الوقت جات سعاد ونادية من بعيد شافوهم هكذاك سعاد ضحكت و نادية طلعت حواجبها بتعجب مش متعودة تشوف خوها حنين هكذا تبسمت على جنب وراحو لعندهم.
-سعاد: يا ولاد واش احوالها؟
تلفت شهاب ليهم ووقف بسرعة بعد من نجوى عدل الفاست تاعو وجبد منديل مسح دموعها لي على صدرو وهي مسحت عينيها
-سعاد: يا بنتي زينة ما تبكيش.
حضنتها جداتو و نادية قعدت تشوف مع شهاب و تتبسم وهو طلع حواجبو يسأل واش كاين تبسمت و مشات لعند نجوى
-نادية : قداه عندهم من لي دخلوها للعملية
-نجوى:قريب ساعة.
في هذيك الأثناء خرج الدكتور وقفت تجري لعندو
-نجوى:دكتور !!! كيفاه كانت العملية
تبسم الطبيب
-الطبيب:كانت ناجحة و ساهلة و بنتك بخير درك نطلعوها للغرفة وتقدرو تشوفوها.
تبسم شهاب و هو يشوف فيها كيفاه فرحانة و تبكي
-شهاب:(هههه خايفة تبكي فرحانة تبكي مش طبيعية )
حط يديه في الجيب
-شهاب: بما انو خلصت العملية و ماني و نادية هنا معاك انا نروح لخدمتي.
-نجوى:شكرا.
تبسمت و من عينيها كانت ألف كلمة شكر خارجة
-شهاب: ما درت والو على سلامتها العشية انشاء الله.
مشا وهي و سعاد و نادية قعدو يستناو تخرج
___________
من جهة ثانية بعيد عليهم في 2 حسام الحارس لي لعب عليها كان في القهوة مع اصحابو
-حسام شوف شوف تصاور هذو مش هذي الطفلة لي كنت في علاقة معاها
هز الجورنال يشوف مع التصاور هي و سلين و جنبها شهاب حاط يدو علا كتافها
-حسام: ايه والله هي سبحان الله كبرت من نهار خليتها وتبدلت و زيانت و لا عندها طفلة و متزوجة برجل أعمال كبير هههههه مليح.
-سبحان الله خليتها من هنا تزوجت و جابت طفلة من هنا تقول كانت موجدة كلش.
-حسام: ايه عندي مدة انا من لي خليتها اكثر من عام.
-ايه وقداه تتصور الطفلة في عمرها؟؟
عوج فمو و رما الجورنال بعيد
-حسام: ايه خلينا من هذا الحديث.