الأم (نجوى و شهاب)

39

حليت عينيا الصباح حكمت كرشي كي تفكرت واش درت البارح قعدت نتمرغ فوق السرير آععع سلين فاقت على صوتي نصيح افففف منخرجش اليوم من غرفتي حتى نتأكد بلي خرج من الدار وقفت بدلت ثيابي سلين بدات تقلق ايه عندو اكبر غرفة و فيها توالات وصالدوبان وحنا هنا اففف سمعت الباب يدقدق قلبي طاح بين رجليا جاوبت بصوت مخنوق
-نجوى:نعم ؟
-ريتا: مدام نجوى مسيو شهاب قالك البسي و انزلي لعندي.
ااااااي واش يحتاج مني دخلت في حيط سايي افففف اففففف كيفاه نقابلو
-نجوى:قوليلو مكانش لقيتها ميتة قوليلو تبخرت ااااي قوليلو يستنا.
-ريتا: حاضر.
قعدت نطرطق في يديا تلفت ل سلين هزيتها نديها حماية ليا دعمني شوية اه منين نجيب وجه جديد نزلت لعندو كان في الصالة ضميت سلين ليا شفافي على راسها عينيا تحت وهي مقابلتو ظهرها ليا وقفت ضامة رجليا نرعش بكلي سخانة طالعة من وجهي هو قاعد مرافقو على ركايبو هاز تليفون بيد و يضرب في كف يدو التانية بيه بهدوء هز راسو شاف معايا من تحت لفوق
-شهاب: ملبستيش ؟
-نجوى:كيفاه ؟ وش نلبس؟
قلت بصوت قريب مش مسموع
-شهاب: تلبسي ثيابك لانو خارجين.
شفت معاه بدهشة مخرجني بعد لي درتو البارح
-نجوى:وين رايحين؟
-شهاب: بش تلغي العقد مع الشركة راني اتصلت بيهم و راهم يستناو فينا.
عقدت حواجبي ورديت بتحدي صوت ينهر فيه
-نجوى:مش راح تفهم بلي مش راح نتراجع بركا ما تأمر فيا وتقلي واش ندير واش ما نديرش انا حرة في افعالي.
وقف عينيه ظلمة خزرتو لي تخليني نبلع ريقي سيبها عليا
-شهاب: حرة في تصرفاتك ؟ علا هاذي سمحتي ل روحك تبوسيني البارح ؟ شكون عطاك هاذ الحق.
قلبي تقبض و الدم تجمع في خدودي رح يطرشقو قعدت نمهمه
-نجوى:مش ..م..مكانش ..قصدي.
-شهاب: اطلعي بدلي.
صاح عليا خفت لكن قاعدة نحاول ما نبينش دون جدوى قرب مني هز سلين من بين يديا حطها بعيد
-شهاب: عندك 5 دقايق نجوى***تطلعي تبدلي فيهم و ترجعي ولا يصرا لي مايعجبكش.
قال اسمي متبوع بلقب تاعو بصوت يخوف فيه تهديد اول مرة ينطق اسمي مع لقبو خفت مشيت لغرفتي بدلت و نزلت لعندو.__________
هز مفاتحو بغش و مشا قدامي حل الباب وانا بست سلين وصيت ريتا عليها و لحقتو لقيتو في الطوموبيل حليت الباب طلعت بلا ما يحكي جبد الحزام حطو عليه و مشينا توتر واضح في الجو بيناتنا وصلنا لمقر الشركة حل الباب ونزل وانا نزلت مشا قبلي وانا نحاول نزرب بش نلحق عليه خطواتو كبيرة دخلنا للشركة وقف عند الاستقبال يحكي بغش تقول راح يضربهم
-شهاب: وينو المسؤول عنكم هنا؟؟
-راهو في اجتماع شكون نقلو؟
ضرب يدو علا المكتب وصاح فيها
-شهاب: كلميه درك قوليلو شهاب***راهو هنا.
خافت و ترعبت تي حتى انا قلبي طاح من هذيك الضربة بعد ما حكات في التيليفون
-راهو يستنا فيك امشي من هاذا الاتجاه في اخر الرواق تلقا مكتبو.
تلفت ليا حكمني من يدي صوابعو تغلغلو داخل صوابعي قشعريرة مشات مع يدي رمشت وانا نشوف معاه من بعد جبدني وراه مشينا للمكتب دخلنا وقف المسؤول
-اهلا اتفضلو كنت نستنا فيكم.
شهاب سيب يدي و مشا حكم الكرسي وشاف معايا تاع اقعدي بلعت ريقي ومشيت قعدت حركت راسي بشوية و تبسمت تاع شكرا وهو قعد خلا الراجل ماد يدو بلا ماسلم عليه حط رجل فوق رجل و شبك صوابع يديه الراجل تبهدل مسح بيدو علا الكرافات وعاود قعد
-وش نطلبلكم؟
شهاب: شكرا جينا نفريو المشكل و نروحو.
-مسيو شهاب لكن بعد التوقيع تعرف انو كي تفسخ العقد يترتب عليه تعويضات.
-شهاب: واش هي هاذ التعويضات؟
مد الاوراق لشهاب قراهم و كنت نشوف معاه ملامحو تبدلت جبهتو تجعدت حواجبو تعقدو ضم شفافو لاز على سنيه هز عينيه فيا بلعت ريقي وش كاين تاني من بعد حط الوراق
-شهاب: نقدرو نوصلو لاتفاق تمثل الطفلة بلا امها.
-صراحة شوية صعيب سياستنا تنص انهم يمثلو مع امهم بش يكون كلش طبيعي مش مصطنع.
دور وجهو شاف معايا عض شفتو بغش كبس يدو كنت نشوف في كل انش منو كيفاه قاعد يفور
-شهاب: وقتاه راح يمثلو؟
-نهاية هذا الاسبوع.
-شهاب: ايه شكرا على وقتك.
وقف وانا وقفت وراه خرجنا يديه في جيابو يغلي ياكل في روحو دخلاني خرجنا سمعتو جبد نفس طويل قتلني اكيد قتلني اكيد خربت الدنيا كي العادة عملي بيدو تفضلي اطلعي مشيت من غير كلمة طلعت وانا ساكتة نشوف معاه يفرك في المفتاح في يدو حل الباب وطلع و طربقو من بعد حطو شغل الطوموبيل و حط يديه علا الڨولو تنهد بقوة و ضرب بكل قوتو بيديه عليه ثلاث مرات من بعد حكمو يخض فيه انا مت من الرعبة بعدت لصقت الباب و نشوف معاه
-شهاب: كيفاه توقعي حاجة بلا ما تقرايها كيفاه خليتيني نرجع في قراري عمري وصلت لمكتب واحد وخرجت بيديا فارغين قوليلي باه تخمي انتي واش عندك في بلاصت مخك.
هبل رجع كيف المجنون تلفت ليا ويصيح
-شهاب: علابالك واش راني نخمم ندير فيك درك.
زدت لصقت في الباب ورايا بحلقت فيه خايفة صراحة منضنش انو من النوع لي يمد يدو علا مرا لكن في حالتو هاذي نتوقع كلشي قلبي بدا يضرب مقدرتش نبقا نشوف مع عينيه هبطتهم منو سمعت صوت ضحكة هزيت عينيا لقيتو ضحك مسح بيدو علا شعرو من بعد نزلها يحل في الشباك
-شهاب: حسابنا مزال ما كملش.
حط رجلو على دواسة البنزين ومشينا حاط يدو علا الشباك يعض على وسط صبعو من ورا ويسوق بيد نسمة داخلة من الشباك تلعب بشعرو حتى وهو مغشش زينون بلعت ريقي ودرت قدامي وصلنا للدار واحد فينا ما نطق كلمة
-شهاب: انزلي.
حليت الباب نزلت وهو راح.