الحلقة 27
في الصباح الباكر .. فتحت جيهان الستائر المسدله .. أعطت آشعة الشمس الطريق لإضاءة حجرة
نومها .. حاول هاني فتح عينيه .. فتح عين واحده بصعوبه .. نظرت له جيهان وقالت بتوتر : قوم
ياهاني كفايه نوم
هاني بتكاسل : الساعه كام ؟
جيهان : سبعه
هاني : وايه اللي مصحيكي بدري كده؟
نظرت له جيهان بصمت .. فهم هو ما يوترها فقال : ماكنتي عملتيه بليل وريحتي نفسك ..
جيهان بعصبيه خفيفه : مانت عارف مكتوب عليه الاحسن الصبح عشان الهرمون بيكون مركز
الصبح اكتر
هاني : وعملتي ايه؟
جيهان : لسه خارجه من الحمام .. مابصتش على العلامه مكتوب بعد نص ساعه لو ظهرت
شرطتين يبقى ايجابي لو مظهرش غير واحده يبقى ..
بكت لحظتها وقالت : خايفه اوي ..
قام هاني من نومته .. اخذها في حضنه وقال بحنان : خايفه من ايه بس ياحبيبتي .. لو محصلش
حمل الشهر ده يبقى الشهر الجاي او اللي بعده .. لما ربنا يريد .. ماتخافيش ومتستعجليش انتي لسه
صغيره
جيهان : افهمني ياهاني انا مش مستعجله .. انا خايفه ليكون السقط اثر عليا ومش هعرف احمل تاني
هاني : مش الدكتور قالك ان اللي حصلك قبل كده مش هيأثر عليكي وباذن الله وحده هتقدري تحملي
تاني
جيهان : ايوه بس ..
هاني مقطاعا : شششش .. مش عايز بس ..
ثم ابعدها عن حضنه برفق ونظر لعينيها مباشرة وقال : جي جي حبيبتي لو ربنا قدر لنا وجبتي
اطفال هيبقوا غاليين عشان هما منك .. ولو ربنا قدر وماحصلش نصيب لاي سبب كان .. هتبقي
انتي مراتي وبنتي وحبيبتي وماليه عليا دنيتي ومش هحتاج حد غيرك ولا اطفال ولا غيره .. كفايه
عليا وجودك في حياتي .. الا اذا انا مش مكفيكي وعايزه اطفال عشان تملي الفراغ اللي في حياتك
وضعت يدها على فمه وقالت : اوعى تقول كده ياحبيبي .. انا بحبك فوق ماتتصور .. بس .. بس
لم تتمالك نفسها وبكت بمراره مره اخرى وقالت : بس انا نفسي ابقى أم
هاني وهو يربت على رأسها وقال : طيب كده عدى اكتر من نص ساعه يلا ادخلي بقلب جامد
وشوفي النتيجه
مشت جيهان خطوات بطيئه تجاه الحمام وشعرت ان الارض تتأرجح تحتها .. اسندت نفسها على
اقرب حائط .. وقالت : مش قادره ياهاني .. ادخل شوفه انت
