🔪شمكارة زووهرة 🔪 (مكتملة )

البارت الرابع

ومعا ذالك طلعت بدلت بساعة خرة وهيا حلفت الى بغات تسكت ضرتني في راسي اللله يستر تغوت وتزدح بحال لحناش مني يجوك على غفلة وتكون معا شي حد براني ومتقدش تحكهم وراه بحال هكاك هيا دبا (لبنات راكم عارفيني علاش كتكلم 🤭) مهم نرجعو فين كنا لبست عليا حوايج ديال الدار عبارة عن قبية وسرواالهاا وااسعين وموريحين ..... ومشيت تمغطت جبدت گارو وبديت نكمي فيه وجدااتي مزال كنسمعها كتغوت لتحت

زووهرة : تفو على بشار شحال الحلق عندها صحيح گول كانت كتكول اللوز في يامتها , هادي مالها صارطة كسيطة حسن ليا نود نبدل بساعة خرة وقفت بغيت نلبس عليا شي حاجة ديال لخروج لقيت لحوايج لي في الماريو گاع مسخين وملمعين وتقول شي حاجة نقية باينة الخانزة سرم ديال خدوج مبقاتش بغا تصبن ليا حوايجي حتاا هومااا

مهم بقيت نقلب نقلب والو ملقيتش كولشي لحوواايج مسنين وفيهم ريحت لگااروو .... وأنا ياله دووشت...... وأنا نستسلم ولبست الحوايجي الجداد لي يالله شريتهم خصرت عليهم دم جوفي بغيت زعما نخليهم غير نهار لكبير هاد الساعة من خلاك ,وفيناهوا النهار لكبير بعدا وقيلة عمرو غادي يكوون ولا يطل عليا شي نهار

مهم الملابس لي لبست عبارة عن سروال دجين كحل واسع شي شوي وقبية مااروو وصباط بروتكان حتا هوا كحل ودرت كاسكية كحلة وخرجت من البيت يالله بديت غاديا خارجة بانت ليا ديك الجنية ولا نقولو دجاجة كروازية باركة قفازي حدا الباب وبقا تبلبل وخدوج هزا ليها كاس فيه الما وسكر باش تعطيه ليها وهيا تحير بحال المعزة غير شافتني وهيا تم جايا قزداني بغا تجبدها معايا

عايشه : شوفي ياه من ليوم منبغيش نشوف وجهك هنا ,خيالك مبقاش بغا نشوفو يضور قداامي في هاد الدار, واش سمعتيني ولا لا, صافي خرجي عليا من محالي ,خرجي عليا الالة من محالي دعيتك لربي دعيتك لربي هوا لي غادي ياخد فيك الحق ,سيري الالألة عند بوك .....ياك سيري يقلب عليك سيري عندو فرگعي ليه راسو شي شوية قبل ما يموت واش هوما يزهاو وينشطو معا روسهم مني وحلو لصقوك فيا ,.......سيري بحالياتك راك محنتيني وطيحتي ليا صحتي , ديما مشوهاني في الزناقي وديما معمرة ليا لحباسات, مخليتي ليا روكنة كي كيف لاليااتي طالعة ترذخي في بيبان هابطة ترذخي طيحتي ليا صحتي مالنا مكاين باس غادي تقتليني على ولااااااااادي ولادي ليا بقا تمحضرت لعراسهم ولوليداتهم

بقات تبلبل تبلبل بحال المعزة لي صارحة في الجبال وأنا غير كنشوف فيها وساكتة في الأخر شدت گلبها كدليل علا أنو ذرها قلبها كيف ديما

خدوج:(بالغواات وهياا شاادة مهاا لا طيح لارض ) مي مي مي وناري مي مالك مالك يكما زف عليك القلب التاني مي جوبيني أمي وهيا ناري أمي مالك قولي مالك راك خلعتيني عليك مي مي ....

خليتهم بزوجات يتبوحطو وهبطت خلفة معا الدروج الصراحة بقا فيا الحال مغديش نقول ليكم متسوقتش لكلامها ولاكن هيا لبدات , معمرها سمعاتني هاد الكلام لي قالت ليا ليوما دخل ليا بحال السم بين الجلد ولعضم معمرني توقعتها غادي دير ليا حالة على وض الباب لي هوا كان راشي أصلا وجاب سبتو عليا ,صراحة مزيان مني خرجات داك الشي لي في صدرها مزيان لواحد يوريك وجهو الحقيقي وتعرفو علاياش مطوي