🔪شمكارة زووهرة 🔪 (مكتملة )

البارت 19

خليتو واقف بلاكة وشديت الطريق لفاس وأنا مجنة راسي سخون عليا غادي ينفاجر غير وصلت لكزا وأنا نوقف حيت صافي لفخد ورجل مبقيتش حسيت بيهم معا قوت توراك على لفران عطاوني الصداع بزاف مبقيتش قدا نورك على لفران ولا لامبرياج بقيت باركة واحد العداد وأنا نكرز في فمي ونتعصر بحالي بغا نولد وحلفت سيبطار لا مشيت ليه وفاش بغات تخرج تخرج لي ليها ليها

بقيت باركة باركة واحد شوية حليت لباطة ديال السيارة بان ليا فيها واحد لكتاب هزيتو وهزيت معاه واحد الستيلو كانو تماك يمكن ديال سليم بغيت غير باش نسي الهم ونتلاها بعدماا هدا عليا فخدي شوية .....وأول حاجة درت هيا بديت كنكنت گاع داك الشي لي جرا ليا مني كنت مزال صغيرة يعني من نهار تزاديت حتا لدبا بقيت كنكتب كنكتب نكتب حتا عمرت شي ربعة ديال لوراق مني رجعت نقرا داك الشي لكتب بان ليا حتا حاجة من داك الشي لي داز في حياتي مكان زوين يعني عمر شي حاجة دازت عندي وكانت زوينة كولشي داز غير المشاكيل في مشاكيل في مشاااكيل يمكن من نهار تزبقت من تر.... كريمة وأنا غارقة مشاكيل من راسي حتا رجليا

صراحة حسيت براسي مألمة بزاااااف واصلات ليا لعضم ودموع حبساهم غير في وسط شفار ديال عينيا مديرة راسي مرجلة ولاكن مرجلة غير من خارج أما لداخل تحطم نهااائيا بقيت نكرز في فمي في ديك السيارة وكنشوف في الناس ها لي غادين معا ولادهم وشارين ليهم الهرفة وهوما غادين ناشطين وها لي غادين بولادهم لمدرسة ها لبنات مجموعات ونشطات معا روسهم الضحكة خارجة ليهم غير من ودنيهم كلا وكيف دار ليه الله حتا أنا لي معندي زهر الزهر جا تا لعندي وكوز مبغا يتگعد صراحة غيروني حيت أنا معمرني جربت داك الأحساس أنك يكون عندك واليديك ويفرحو بيك ويفرحوك معاهم عشت بحال أيتيمة وليتبم كيحنوو فيه الناس أنا محنوو فياا لا نااس لا واليديااا لا دنيااا .
من نهار عقلت وأنا شي ينهزر فيا من هك وشي ينهزر فيا من هك .....عمر شي حد توصدت ركبتو وشكيت ليه همي وفشيت عليه قلبي بحالي بحال جميع لبنات لي في لعمر ديالي

بقيت بااركااا وكنشووف في الناس من ورى جاج ديال السيارة وعينياا مغرغرين .......بقيت نكرز في فمي نكرز في فمي حتا نفاجرت بالبكا معقلتش على راسي واحد العداد عاد سمعت شي حد كيذق عليا في الزاج ديال السيارة مني جيت نهز راسي بانو ليا الناس مجمعين وحاااديني من الزاج ديال السيارة وكيشوفو فيا النضرات ديال الشفقة واحد لمرة كبيرة هيا لي جات تشوف مالي وتسولني علاش كنبكي الصراحة مني شفتها دغيا شعلت السيارة ديالي وزدت من حداهم محملتش راسي فديك اللحضة حيت مكنحملش شي حد يشوفني كنبكي ولا يشفق عليا .....كولشي كولشي نقبلو حتا لشفقة ديال شي حد بقيت غادة موقت حتا وقفت لدرب لي كنا ساكنين فيه يعني ذربنا وقفت جنب باب ديال دارنا وبقيت حدياه من خارج وأناا كلي كنترعد ودمووعي شلاال فووق حنااكي .

بقااااا نفس الدار نفس الصباغة حتا حاجة متبدلت غير الناس لي تبدلو هزيت عيني في الشرجم ديال الصالون بان ليا محلول وناشرين فيه شي مانط بالين وشرجم ديال الكوزينة فية واحد الصوبيرة مرقض فيها لحمص وحداه ميكة فيها لخبز كارم يمكن...... بقيت واحد العداد وأنا كنشوف واحد الراس قال ليا طلعي يمكن يكونو داخلين يمكن يكون هاد الشي لي واقع ليك دبا غير حلم شوية كنقول أعودو بالله من الشيطان الرجيم يكما غادي نتسطا ونولي في خبار كان ونكمل القضية وماكين لي يذاويني وكولشي يبغيها فيا ممنهاش.